Okuhungira ouatjiri, kape nomundu ngu ma yenene okuhungira oukahu kutja Paulus wa sanene pi. Oviperendero mbi tu muna momambo wetu ohunga na Paulus, oviperendero uriri, kavi ya zikamena koviraisiro mbi nouatjiri.

Posi yokutja, pe noviraisiro tjiva ohunga nokutja Paulus wa sanene pi. Okutara kotjihorera, okambo nga o-Zion’s Watch Tower ketenga ra Marta 1902, ka tamuna otjiraisiro tjimwe indu tji ka tja: “Ohunga nombuniko ya Paulus: . . . Membo ndi ‘Acts of Paul and Thecla,’ . . . nda tjangwa mombura ape 150 O.Z., mu nomakahururiro ngahino omasembasemba ohunga na Paulus. Mu ro eye wa kahururwa otja omundu ‘omusupi, ngu nongwara, nomakotorama, ngwa tungwa nawa nu wozombumbu nḓe ṱunasana; nu wa ri neuru ere.’”

Embo ndi The Oxford Dictionary of the Christian Church (rombura ndji 1997) ra tja nai ohunga nomatjangwa omakuru: “Embo ndi ‘Acts of Paul and Thecla’ ri yenena okukara nouatjiri moviṋa tjiva mbya tjitwa momakuruhungi.” Embo ndi The Acts of Paul and Thecla, aari varwa otjembo enanḓengu tjinene mozombura ozonguru, otja tji pa raisiwa momambo 80 wOtjigrike nge ri ko, na warwe omengi momaraka warwe. Kunao, oviperendero momambo wetu, vi hitasana nomakahururiro ohunga nokutja omuapostele Paulus wa sanene pi.

Nungwari tjiwa kutja pe noviṋa vyarwe ovinanḓengu tjinene ohunga na Paulus, pombuniko ye. Nandarire ngunda Paulus e ri motjiungura tje tjokuzuvarisa, ovandu tjiva mbe ha ri noumune wa Mukuru, va tja “eye omuini tje ri puna eṱe, ongozu, nomambo we opouriri.” (2 Kor. 10:10) Posi yokutja matu sokuzemburuka kutja, eye wa rira omuapostele okupitira motjihimise Jesus tja tjita. Eṱe wina matu yenene okuripura ohunga na imbi Paulus mbya yenenisa, Kristus tjinga e mu ‘toorora okumukarera nokutjivisa ena re kovanavisenginina.’ (Oviung. 9:3-5, 15; 22:6-8) Nu wina ripurira kombatero ndji tu muna momambo wOmbeibela Jehova nga hinga Paulus okutjanga.

Paulus kena pe ritongamisa mena roviṋa mbya yenenisa ngunda e hiya rira Omukriste, nu wina kena pa kahurura kutja eye omundu wombuniko ndja sana pi. (Oviung. 26:4, 5; Fil. 3:4-6) Nungwari eye wa tja: “Owami omuhinanḓengu tjinene povaapostele avehe, nu hi yenene okuisanewa omuapostele.” (1 Kor. 15:9) Eye kombunda wa tja: “Nangarire kutja owami omuhinanḓengu tjinene povakambure avehe, Ndjambi we ndji pa ousemba wokuzuvarisira oviwaṋa ovinavisenginina Ombuze Ombwa yovihuze vya Kristus mbi ha vazewa.” (Ef. 3:8) Ombuze ndjo tjiri onanḓengu tjinene kombanda yombuniko ya Paulus.