1. Omauzeu waye Ovakriste veserewondo etenga ngu va muna?

MOKATI kozombura nḓa 62 no 64 O.Z., omuapostele Petrus wa tjanga orutuu ‘kovandu vozonganda mba rimbara mehi ra Pontus nora Galatie nora Kapadosie nora Asie nora Bitinie.’ (1 Petr. 1:1) Ozombongo moAsie zovandu mba za kovirongo ovingi pekepeke nḓa, tjiri aaze hepa omuhunga nomayanḓiparisiro. Owo va munine omapirukiro nu va yambururwa. Va muna “omarorero omazeu.” Owo wina aave hupu motuveze otuzeu tjinene. Petrus wa tja: “Ondjandero yoviṋa avihe ya tumbuka.” Mozombura zokehi 10, Jerusalem matji nyonwa. Nu hapo Ovakriste koṋa akuhe, mave sokutjita vi kutja ve tuurunge oruveze oruzeu ndwo?​—1 Petr. 4:4, 7, 12.

2, 3. Ongwaye Petrus tja tunduuza ovakambure ovakwao okusekirisasana? (Tara kotjiperendero pomautiro worupa ndwi.)

² Otjiṋa tjarwe Petrus tja tunduuza ovakambure ovakwao okutjita, ya ri ‘okusekirisasana.’ (1 Petr. 4:9) Embo ndi ‘okusekirisasana’ meraka rOtjigrike, ri heya ‘okuraisa ouwa poo otjari kovandu vozonganda.’ Posi yokutja, Petrus wa tunduuza ovakambure ovakwao ‘okusekirisasana,’ nandarire kutja aave tjiwasana poo aave ungura oviṋa pamwe rukuru. Nu hapo okusekirisasana maku ve vatere vi?

 ³ Okutjita nao maku ve eta pamwe. Tara kotjihorera tjoye omuini. Ove wa rora okuṋangwa i varwe? Omaṋangero ngo ye ku ṱuna vi? Indu ove tji wa ṋanga ovandu tjiva koyoye, kwa ṱuna vi koupanga woye kuna wo? Indu tji matu sekirisa ovakambure ovakwetu, tu uta okuvetjiwa nawa. Ovakriste moruveze rwa Petrus, aave hepa okukara noupanga oupame kuna ovakambure ovakwao, otja omauzeu tjaaye ririre ko omengi. Eṱe wina matu hepa okutjita nao, “momayuva omasenina” nga.​—2 Tim. 3:1.

4. Morupa ndwi matu katara komapuriro yeṋe?

⁴ Omomiano viṋe mu matu yenene ‘okusekirisasana’? Matu yenene vi okuisapo oviṋa mbi mape ya avi tu tjaere okusekirisa varwe? Otjikwaye tji matji tu vatere kutja tu rire ovayenda ovawa?

5. Matu yenene vi okusekirisa varwe pozombongarero zombongo?

⁵ Pozombongarero zombongo: Eṱe tu yakura ovandu avehe mbe ya ku zo, otjovaṋangwa periro eyapuke. Jehova notjira tje ombe ri ovetuṋange. (Rom. 15:7) Indu ovandu ovape tji ve ya, eṱe tu rira ovevesekirise. Ongwaye tji u hina okutjita ozongondjero zokuveyakura, kaina tja kutja mave munika vi, poo va zara ozombanda nḓa sana pi? (Jak. 2:1-4) Indu tji wa munu kutja omuyenda wa haama erike, mo yenene okumuningira okuhaama puna ove? Eye tjiri ma kara nonyuṋe okumuna ombatero yokukongorera nawa oprograma, poo okupaha omatjangwa ngu maye lesewa. Imbwi tjiri ma rire omuano omuwa ‘wokusekirisa ovozonganda.’​—Rom. 12:13.

6. Oouṋe mbu matu sokuṋanga tjinene pozoyetu?

⁶ Koukurya ouṱiṱi wopokati koruveze, poo keriro: Ovandu moruveze rOmbeibela aave sekirisa ovakwao mokuveṋanga keriro poyawo. (Gen. 18:1-8; Ovapang. 13:15; Luk. 24:28-30) Omaṋangasaneno wokurya pamwe nga, aaye raisa oupanga nohange. Nu hapo ovandu veṋe mbu matu sokuṋanga tjinene? Matu sokuṋanga imba mbu tu hakaena aruhe, tjimuna ovakambure ovakwetu mombongo. Otja ouye mbwi tji mau ririre ko ouvi, eṱe matu hepa ombatero yovakambure ovakwetu, nu matu sokurira omapanga omaṱakame ku wo. Mombura ndji 2011, Orutu Orunane rwa rundurura oiri yomakonḓononeno wokambo kOruhungu poBetel ya Amerika. Omakonḓononeno aaye utu 6:45 yomapeta, posi yokutja nai ye uta 6:15 yomapeta. Omena ratjike tji va tjita nao? Omatjivisiro ohunga nomarundurukiro nga ya raisa kutja, mape ya aku vatere ovakambure poBetel okukara noruveze ndwa yenene kombunda yombongarero, okusekirisa varwe poo okusekirisiwa. Ozomberoo zarwe wina za tjita nao. Ondyero ndji ya tjita kutja, eṱunḓu roBetel ri kare noupanga wopopezu.

7, 8. Matu yenene vi okusekirisa ovayandje womahungi mbe ryangera ombongo yetu?

⁷ Atuhe tu kara nondjoroka indu tji matu ryangerwa i yovandu okuza kozombongo zarwe. Mape ya ave rire ovatarere vorukondwa, poo povikando tjiva a rire ovakuramene po okuza koBetel. Ovitjitwa otja imbyo vi yandja oruveze rwokusekirisa ovakambure ovakwetu mba. (Lesa 3 Johanes 5-8.) Omuano umwe mu matu yenene okutjita nao omokuveṋanga koyetu, kutja tu yekurya pamwe oukurya ouṱiṱi uriri wopokati koruveze poo keriro. Ove mo yenene okuvatera?

⁸ Omukazendu omukambure moAmerika wa tja: “Oure wozombura ozengi ami nomurumendu wandje aatu ṋanga ovayandje vomahungi novakazendu vawo aruhe koyetu. Otjikando atjihe, tji twe ve sekirisa, twa ri nondjoroka onene, aatu tjaterwa okukara puna wo, nu kwa yanḓiparisa ongamburiro yetu tjinene. Kape notjikando tji twa rora okukara nomuhihamwatima.”

9, 10. (a) Oouṋe mbe hepa okusekirisiwa oruveze orure? (b) Hapo imba mbe nozondjuwo ozonḓiṱi mave yenene okuvatera? Sasaneka.

⁹ Ovayenda mbe yekukara oruveze orure: Moruveze rOmbeibela, ovandu aruhe aave yandja oruveze kovayenda vawo okukara po. (Job 31:32; Filem. 22) Ndino wina tu hepa okutjita nao. Ovatarere vorukondwa potuingi ve hepa  oruveze okukara po, indu tji ve yekuryangera ombongo. Ovahongwa vozoskole zOuhona, novengi mbe ya komatungiro wotuveze twOuhona, wina ve hepa oruveze okukara po. Tji kwa tjitwa oumba, mape ya ape kara omaṱunḓu tjiva ngu maye hepa oruveze okukara po, nga ozondjuwo zawo tji za manuka okuṱunwa. Eṱe katu sokumuna kutja owomba uriri mbe nozondjuwo ozonene ombu mave sokuvatera. Owo mape ya va tjita nao povikando ovingi rukuru. Hapo ove ko nokuyenena okuvatera, nandarire kutja ondjuwo yoye onḓiṱi?

¹⁰ Omurumendu omukambure moSouth Korea, u zemburuka oruveze indu tja sekirisa ovahongwa mbe ya kozoskole zOuhona. Eye wa tja: “Rutenga ee keyakeya mena rokutja ami nomukazendu wandje oruveze ndo twa ri a twa kupasana oupe, nu aatu kara mondjuwo onḓiṱi. Posi yokutja okuyandjera ovahongwa mbo okukara puna eṱe, ya ri ondjoroka onene. Otjovakupasane ovape, eṱe twa yenena okumuna kutja matu yenene okukara nondjoroka, indu tji matu karere Jehova natu kara nozondando motjira tje pamwe.”

11. Ongwaye imba mba tjindira oupe kombongo yeṋu tji ve hepa okusekirisiwa?

¹¹ Ovakambure ovape mombongo: Ovakambure ovakwetu poo omaṱunḓu, mape ya ave tjindire momaturiro weṋu. Tjiva mape ya va tjindira kombongo yeṋu mena rokutja mu hepa ombatero. Poo mape ya arire ovakandjira mba hindwa kombongo yeṋu okuyekuvatera. Tjiri inga omarundurukiro omanene ku wo. Owo mave hepa okuiririra omaturiro omape nga, nombongo ombe, poo nandarire eraka epe, nombazu yehi ndo. Okuveṋanga okukarya eriro eṱiṱi uriri pamwe, poo okuyenda pamwe koṋa korive, maku ve vatere okukara nomapanga omape, nokuiririra ongaro ombe mu ve ri.

12. Otjitjitwa tjiṋe tji matji raisa kutja ko hepa oviṋa ovingi okusekirisa varwe?

¹² Ove ko hepa oviṋa ovingi okusekirisa varwe. (Lesa Lukas 10:41, 42.) Omurumendu omukambure u zemburuka oviṋa mbya tjitwa ku ye nomukazendu we, indu tji va rira ovahindwa. Eye wa tja: “Twa ri omitanda, katwa ri nondjiviro onyingi, nu aatu hihamenwa konganda. Ongurova imwe omukazendu wandje aa hihamenwa konganda tjinene, nu omiano vyandje vyokumuvatera kaavi ungura. Nu ape 7:30 yongurova, pa kongora omundu pomuvero. Tji twa paturura omuvero, pa kuramene omuhongwa wOmbeibela ngwe tu etera oviyaporosine 3. Eye we yekuyakura ovahindwa ovape mba. Eṱe twe mu ningira kutja ma hite mondjuwo, natu mu pe omeva. Kombunda atu mu hangere otee no-hot chocolate. Eṱe kaatu tjiwa okuhungira Otjiswahili, nu eye kaa tjiwa okuhungira Otjiingirisa. Nungwari otjitjitwa hi, tje tu vatera okuuta okutjita oupanga kuna ovakambure ovakwetu mombongo yetu ombe.”

13. Ouwa waye mbu za mokusekirisa varwe?

¹³ Hapo ove wa rora okutira okusekirisa varwe? Tjinangara peri nao, ove mape ya wa pandjara oruveze oruwa rondjoroka, noruveze rokuhara omapanga omakarerere. Okusekirisa varwe otjiṋa otjiwa tji tji tu vatera kutja atu he rimunu ourike. Posi yokutja mape ya oripura kutja, ‘Hapo ongwaye ovandu tjiva tji ve tira?’ Pe nomapu omengi pekepeke.

14. Matu sokutjita vi indu tji tu hina oruveze poo omasa okusekirisa varwe poo okusekirisiwa?

¹⁴ Oruveze nomasa woye: Ovakarere va Jehova ovandu mbe kara noviungura ovingi, nomerizirira omengi wina. Tjiva mape ya ave munu kutja kave noruveze poo omasa wokusekirisa varwe. Tji u ri mongaro otja indjo, mape ya mo hepa okurundurura omuano mbu u twapo oviṋa mbi mo sokutjita. Hapo mo yenene okutjita omarundurukiro kutja u kare noruveze nomasa wokusekirisa varwe poo okusekirisiwa? Omatjangwa ye tunduuza Ovakriste okusekirisa varwe. (Hebr. 13:2) Kanavi okutwapo oruveze koviṋa  mbi, nu otjiṋa otjisemba okutjita. Nungwari kutja u tjite nao, ove mape ya mo hepa okunakaura oviṋa tjiva mbi heri ovinahepero tjinene.

15. Ongwaye tjiva tji ve muna kutja kamaave sekirisa varwe?

¹⁵ Omuano mbu u rimuna omuini: Ove wa rora okuvanga okusekirisa varwe, posi yokutja u muna kutja ko nokuyenena? Ovandu tjiva ve nohoṋi, nu ve tira kutja ovandu mbu va ṋanga kave nokuyekutjaterwa. Varwe ve muna kutja kave novimariva ovingi, okuyandja kovayenda vawo oviṋa ovakambure varwe mbi ve yandja. Posi yokutja zemburuka kutja, otjiṋa otjinanḓengu tjinene, kaviṋa oviwa mbi u na vyo mondjuwo. Nungwari ovandu mbu wa ṋanga mave yoroka indu ondjuwo yoye tji i ri ongohoke nohirona, na indu tji mo ve yakura nawa.

16, 17. Otjikwaye tji mo yenene okutjita indu tji u nozongendo zokusekirisa varwe?

¹⁶ Tji u tira okusekirisa varwe, tjiwa kutja ka ove erike. Omunene wombongo moBritanje wa tja: “U yenena okukara nemuma indu tji mo rirongerisa okuyakura ovayenda. Posi yokutja, otja tji pe kara notjiṋa atjihe tji matji tjama nokukarera Jehova, ozondaya nḓu tu muna za kapita ozongendo ngamwa azehe nḓu mape ya atu kara na zo. Ami ee tjaterwa okuhaama puna ovayenda vandje, okupwena okosiva nokuserekarera.” Tjiwa kutja, okuraisa onḓero aruhe kovayenda voye otjiṋa otjiwa. (Fil. 2:4) Ovandu ovengi ve kara nondjoroka okuserekarera ohunga noviṋa mbya tjitwa mehupo rawo. Nu omuano umwe omuwa wokutjiwa ohunga noviṋa mbi, eendu tji mwe ya pamwe. Omunene wombongo warwe wa tja: “Okuṋanga ovakambure ovakwetu koyandje, kwe ndji pa oruveze rwokuvetjiwa nawa, nu tjinene ohunga nomuano mu ve ya mouatjiri.” Indu tji wa raisa onḓero movayenda voye, ku tjita kutja ovandu avehe ve yorokere otjitjitwa ho.

¹⁷ Omukazendu omukandjira ngwa yakura ovahongwa vozoskole zOuhona poye, wa tja: “Ami tjiri pomautiro ee rikende, mena rokutja ondjuwo yandje ya ri onḓiṱi, nu yari noviṋa ovikuru. Omukazendu womurumendu umwe ngwaa hongo poskole ndji, wa wisa omutima wandje pehi. Eye wa tja, owo tji ve ri motjiungura tjokuvarura ozombongo, ve tjaterwa tjinene okukara poyomundu ngu noupanga ouwa kuna Jehova, nu ngu hi noviṋa ovingi mondjuwo ye, ngu noumune tjimuna owawo, wokukarera Jehova nokuhina oviṋa ovingi. Ihi tje ndji zemburukisa ohunga nomambo mama nge tu raera indu tji twa ri ovanatje: ‘Okokuwa okurya ombowa puna omundu ngu wa suvera.’” (Omiano 15:17) Okutja ko nokuhepa okurikenda, otjiṋa otjinanḓengu tjinene, okuraisa orusuvero kovayenda voye.

18, 19. Okusekirisa varwe maku tu vatere vi okurundurura omeripura omavi ngu tu na wo ohunga na wo?

¹⁸ Oumune woye ohunga na varwe: Pe nomundu mombongo ngu nongaro ndji ha tjata kove? Indu tji u hina okutjita otjiṋa okurundurura oumune woye, okutja oumune woye ohunga naye kamaau runduruka. Mape ya o ha vanga okuṋanga omundu koyoye wongaro ndji i ha tjata kove. Poo mape ya pe nomundu ngwe ku hihamisa, nu ngamba ouzeu kove okuzemba otjiṋa ho.

¹⁹ Ombeibela i tja ove mo yenene okurundurura ongaro yoye kuna varwe nandarire omunavita na ove, indu tji mo ve sekirisa. (Lesa Omiano 25:21, 22.) Indu tji wa ṋanga omundu koyoye ku vatera kutja oha kara nomeripura omavi ohunga nomundu ngo, nu ku tjita kutja pe kare ohange pokati keṋu. Ove mape ya outu okumuna ovikaṋena oviwa mu ye, imbi Jehova mbya muna indu tje mu nanena kouatjiri. (Joh. 6:44) Indu orusuvero tji rwe ku hingi okuṋanga omundu ngu ha undjire ko okuṋangwa i ove, ku yenena okurira ombutiro youpanga ouwa kuna ye. Mo yenene vi okutjita kutja orusuvero arire ndwe ku hingi? Omuano umwe, omokutjita oviṋa mbya tamunwa mOvafilipi 2:3, ndi mari tja: “Zarasaneye nomerisusuparisiro, aruhe ovakweṋu amamu ve  vara otja ovanene pu eṋe.” Eṱe matu sokuripura nomiano ovakambure ovakwetu mu ve ri ovanene pu eṱe. Mape ya atu rihongere kongamburiro yawo, onḓaro orure, ouvanḓe poo ovikaṋena vyawo vyarwe oviwa. Okuripurira kovikaṋena vyawo oviwa mbi, maku tjiti kutja orusuvero rwetu ku wo ru kure, nu maku tjiti kutja ku rire oupupu ku eṱe okuveṋanga.

20. Ongwaye nu omomuano uṋe mu matu yenene okuraisa ondengero komaṋangero ngu twa yakura rukuru?

²⁰ Omutjange wepsalme David wa pura kutja: “Muhona, owaṋi ngu ma yenene okuvarura Ondjuwo yoye ondjapuke?” (Eps. 15:1) Okuzambo, David wa hungirira kovikaṋena Jehova mbye vanga kutja ovayenda ve ve kare na vyo. Tjimwe tjovikaṋena mbi, okuyenenisa omakwizikiro wetu. Eye wa tja: “Eye aruhe u yenenisa omakwizikiro we, nandarire kutja owo omazeu.” (Eps. 15:4) Indu tji twa yakura omaṋangero, eṱe katu sokukarunduruka kombunda, indu tji pe hi nepu esemba. Omutuṋange mape ya wa tjiti ozongondjero okurongerisa oviṋa avihe, nu indu tji twa teya omakwizikiro wetu, okutja ozongondjero ze azehe za moroka. (Mat. 5:37) Tjiva ve teya omakwizikiro womaṋangero ngu va yakura rukuru, kutja ve yende ku yarwe ngu maye munika ouwa. Hapo okutjita nao maku raisa orusuvero nondengero? Kunao, matu sokuyakura omaṋangero, natu raisa ondangi ku ingwi ngwe tu ṋanga, na ku avihe mbi me tu pe. (Luk. 10:7) Nu indu tji pe ya ozongaro nḓe hina okutuyandjera okuyenenisa omakwizikiro wetu tjiri, matu raisa orusuvero indu tji twe ve raere tjimanga.

21. Okuraisa ondengero kombazu ya varwe, maku tu vatere vi okurira ovayenda ovawa?

²¹ Otjiṋa otjinanḓengu wina, okuraisa ondengero kombazu ya varwe. Mozombazu tjiva, omundu u yenena okuya uriri ngunda e hiya ṋangwa, nu mozombazu zarwe katjiṋa otjiyakurwa okuya uriri, au hiya ṋangwa. Momahi tjiva, ovasekirise ve yandja ovikurya oviwaviwa mbi ve na vyo kovayenda vawo, amaave ripurire keṱunḓu rawo. Posi yokutja momahi warwe, ovandu avehe ve rya ovikurya vimwe. Momaturiro tjiva omuyenda u parura omunionganda. Nu momaturiro warwe omunionganda ka vanga kutja omuyenda ma eterere otjiṋa. Mozombazu tjiva, ovandu mba ṋangwa ve yenena okutja kako momuano omuwa komaṋangero omatenga noyetjavari. Posi yokutja mozombazu zarwe, okutja kako ku raisa ovikaro ovivi. Kunao, matu sokutjita kutja omundu ngwe tu ṋanga ma kare nondjoroka kutja we tu ṋanga.

22. Ongwaye tjeri otjiṋa otjinanḓengu ‘okusekirisasana’?

²² Petrus wa tja: “Ondjandero yoviṋa avihe ya tumbuka.” (1 Petr. 4:7) Nai, omaandero tjiri ye ri popezu nomasa. Tu muna omauzeu omanene tjinene nge hiya rora okukara ko. Otja ouye mbwi pu mau yende amau ririre ko ouvi, matu sokukurisa orusuvero rwetu kovakambure ovakwetu. Matu sokukayenda komurungu okuṱakamisa erakiza ra Petrus, ndi tja: “Sekirisasaneye.” (1 Petr. 4:9) Okusekirisasana otjiṋa tji tji eta ondjoroka, nu tji matu sokuraisa mehupo retu nai, nga aruhe.