1. Ovanene Ovakriste ve vanga okutjiwa ye, ngunda ovanatje vawo ave hiya papitisiwa?

INDU Blossom Brandt tja tya kutja ma vanga okupapitisiwa, eye wa kahurura imbi mbya kayenda po, na tja: “Oure womieze omingi mba kara pokuraera mama na tate kutja mbi vanga okupapitisiwa, nowo aruhe aave hungire kuna ami ohunga nepu ndo. Owo aave vanga okutjiwa kutja ami tjiri ee tjiwa ounanḓengu womukambo mbu me vanga okutoora. Otjitjitwa otjinanḓengu tjinene mehupo randje, tja yenenisiwa tji ya ri 31 ku Desemba mombura ndji 1934.” Kundino, ovanene ovengi Ovakriste, ve nonḓero otjingeyo yokuvatera ovanatje vawo okutoora omikambo omisemba. Okuhina okuvanga okupapitisiwa, poo okuwomba okupapitisiwa, ku yenena okuzunḓa oupanga wovanatje kuna Jehova. (Jak. 4:17) Posi yokutja, ovanene ve vanga okutjiwa nawa ngunda ovanatje vawo ave hiya papitisiwa, kutja owo tjiri ve rirongera nawa okutoora omerizirira nge undjirwa ko kOvakriste avehe.

2. (a) Ongwaye ovatarere tjiva vorukondwa tji va raisa ongendo? (b) Matu kerihonga tjike morupa ndwi?

² Ovatarere tjiva vorukondwa va raisa ongendo, orondu ve hakaena ku nomitanda vyozombura 10 notjihupe nga kozombura 20, mbe kurisiwa  i yovanene Ovakriste, posi yokutja mbe hiya papitisiwa ngunda. Nu omitanda omingi mbi va hakaena, vi yenda kozombongarero zombongo nu vi kara norupa motjiungura tjokuzuvarisa. Owo nangarire ve rivara otjOvahongonone va Jehova. Posi yokutja, pena otjiṋa tji tji ve tjaera okuriyandja ku Jehova nokupapitisiwa. Nu hapo mape ya arire otjikeṋa? Povikando tjiva, ku rira mena rokutja ovanene vawo ve muna kutja ovanatje vawo kave ya yenena okupapitisiwa. Morupa ndwi matu katara koviṋa 4, mbi tjaera ovanene tjiva Ovakriste okuvatera ovanatje vawo okuvaza kombapitisimo.

3. Ovanene va Blossom va ri nozongendo zaye?

³ Ovanene va Blossom mba tamunwa moparagrafa ondenga, aave rikende kutja hapo omuatje wawo tjiri u tjiwa nawa omaheero wombapitisimo, nokutja u muna kutja imbwi omukambo omunanḓengu tjinene. Hapo ovanene mave yenene okutjiwa vi kutja omuatje wawo wa yenene okuriyandja ku Jehova?

4. Erakiza ra Jesus ndi ri mu Mateus 28:19, 20, mari vatere vi ovanene ndino?

⁴ Lesa Mateus 28:19, 20. Otja tji twa munu morupa ndwa kapita, Ombeibela kai yandja otjiwondo omundu mu ma sokupapitisiwa. Posi yokutja, ma rire nawa kovanene okuripura nawa ohunga nokutja, okuisa po ovandu ovahongewa ku heya tjike. Meraka rOtjigrike embo ndi ‘okuisapo ovandu ovahongewa’ nda ungurisiwa mu Mateus 28:19, ri heya okuhonga omundu nondando yokutja eye ma rire omuhongwa poo omuhongewa. Omuhongewa, omundu ngu rihonga nokuzuva nawa omahongero wa Jesus, nokuyeṱakamisa. Kunao, ovanene mave sokuhonga ovanatje vawo okuza kouṱiṱi, nondando yokuvevatera kutja ve riyandje ku Jehova nokurira ovakongorere va Kristus. Otjingaperi kutja, ounatje ouṱiṱi kamaau yenene okupapitisiwa. Posi yokutja, Ombeibela i raisa kutja ovanatje ovaṱiṱi ve yenena okuzuva Ombeibela nawa nokusuvera ouatjiri wayo.

5, 6. (a) Otjihorera tja Timoteus tji tji ri mOmbeibela tji tu honga tjike ohunga nombapitisimo ye? (b) Ovanene ozonongo mave yenene vi okuvatera ovanatje vawo?

⁵ Timoteus wa ri omuhongewa ngwa toorora okukarera Jehova ngunda e ri omuṱiṱi. Omuapostele Paulus wa tja Timoteus we rihonga ouatjiri wOmbeibela okuza kouṱiṱi we. Nandarire kutja ihe ya Timoteus kaa karere Jehova, ina na ina omunene mbaa ri Ovajuda, ve mu vatera okusuvera Embo ra Mukuru. Ihi tja tjita kutja ma kare nongamburiro yomasa. (2 Tim. 1:5; 3:14, 15) Indu tja ri nozombura ape 20, Timoteus wa ri Omukriste ngwa papitisiwa nu ngwaa yenene okupewa oviungura vyapeke mombongo.​—Oviung. 16:1-3.

⁶ Ovanatje va panguka. Owo kave kuru tjimwe. Ovanatje tjiva ve zuva omahongero wouatjiri wOmbeibela nawa, ave tjiti ozondando ozombwa, nave vanga okupapitisiwa ngunda ave ri omitanda. Varwe mape ya ave ha vanga okupapitisiwa, ngandu kombunda tji ve kuru kaṱiṱi. Kunao, ovanene ozonongo kave ṋiṋikiza ovanatje vawo okupapitisiwa. Nungwari, ve vatera omuatje auhe okukura pondondo ye omuini. Ovanene mave yenene okukara nondjoroka indu omuatje wawo tja ṱakamisa omambo nge ri mOmiano 27:11. (Lesa.) Posi yokutja, ngave zemburuke kutja ondando yawo oyokuvatera ovanatje vawo okurira ovahongewa. Kunao, ovanene mave sokuripurira kepuriro ndi, ‘Hapo omuatje wandje u nondjiviro ndja yenene okuriyandja omuini ku Mukuru nokupapitisiwa?’

7. Omundu ngu ma vanga okupapitisiwa u hepa okutjiwa Ombeibela aihe? Kahurura.

⁷ Otja ovanene tji mave hongo ovanatje vawo, owo mave sokukondja okuvatera ovanatje kutja ve tjiwe ouatjiri nawa. Nu ondjiviro ndji, i tjita kutja owo ve kare nonḓero yokuriyandja ku  Mukuru. Posi yokutja, ihi katji nakuheya kutja owo mave sokutjiwa omapu aehe mOmbeibela, amaave yenene okuriyandja ku Mukuru nokupapitisiwa. Kombunda yombapitisimo, omuhongewa auhe u hepa okukayenda komurungu okukurisa ondjiviro ye youatjiri. (Lesa Ovakolose 1:9, 10.) Nu hapo ondjiviro ndji ṱa pi, omundu ndje hepa okukara na yo amaa papitisiwa?

8, 9. Matu rihongere ko tjike kehungi ra Paulus nomutjevere wondeko?

⁸ Otjihorera tjeṱunḓu rimwe roruveze orukuru, matji yenene okuvatera ovanene ndino. (Oviung. 16:25-33) Mombura ape 50 O.Z., Paulus wa ya koFilipi, mouyenda we outjavari otjomuhindwa. Ngunda ave ri ngo, Paulus nomukwao ngu va ri pamwe, wena Silas, va kamburwa nave yumbwa mondeko, ave hina otjiṋa otjivi tji va tjiti. Ouṱuku mbo, pa kara omanyinganyingiro wehi nga zezerisa omazikameno wondeko tjinene nga omivero avihe tji vya paturuka. Omutjevere wondeko wa tjangovasi ovapandekwa avehe va hene, neye otja hara okurizepa. Nungwari Paulus we mu tjaera. Paulus na Silas va yenena okuzuvarisira omutjevere wondeko ngwi neṱunḓu re ouatjiri ohunga na Jesus. Ondangi ndji va ri na yo kouatjiri mbu ve rihonga ohunga na Jesus, ye ve hinga okutoora omukambo uṋe? Owo va papitisiwa nokuhina okuwomba. Hapo matu rihongere ko tjike kehungi ndi?

⁹ Pe munika tjimuna omutjevere wondeko ngwi rukuru wa ri omurwe wovita. Eye kaa tjiwa Omatjangwa nawa. Kunao, kutja ma kare nomazikameno womasa ohunga nondjiviro yOmatjangwa, eye aa hepa okurihonga ovirihongwa ovitenga vyouatjiri wOmbeibela. Nu aa hepa okuzuva nawa kutja Mukuru u undjira tjike kovakarere ve, nokutya okukara nonḓuviro komahongero wa Jesus. Oviṋa mbye rihonga mokaruveze okasupi ngo, vye mu hinga kutja ma papitisiwe. Otjiperi kutja, eye mape ya wa kayenda komurungu okuweza kondjiviro ye nandarire kombunda yombapitisimo. Nu hapo omuatje woye tje ku raere kutja ma vanga okupapitisiwa mena rokutja wa suvera Jehova nu ma vanga okukara nonḓuviro ku ye, hapo mo yenene okutjita vi? Mo yenene okumuraera kutja nga kahungire kuna ovanene vombongo, owo arire mba tye kutja eye ma yenene okupapitisiwa po indee. * Tjimuna Ovakriste varwe mba papitisiwa, eye wina ma kayenda komurungu okukurisa ondjiviro ye ohunga nondando ya Jehova mehupo re nai, nga konga aruhe.​—Rom. 11:33, 34.

10, 11. (a) Ovanene tjiva ve noumune uṋe? (b) Omunene u sokuyandja ombango ku ye rutenga?

¹⁰ Ovanene tjiva ve muna kutja onawa omuatje wawo rutenga tja munu omahongero kaaṋi wokombanda nokumuna oviungura oviwa, okuzambo ma papitisiwe. Ovanene mba mape ya kave nozondando ozombi, posi yokutja hapo oviṋa otja imbyo mavi vatere omuatje wawo okumuna ouṋingandu watjiri? Nu tjinenenene, oumune mbwo hapo u hitasana na imbi mbi tu rihonga mOmbeibela? Hapo Jehova u vanga kutja tu toore omuhunga uṋe mehupo retu?​—Lesa Omuzuvarise 12:1.

¹¹ Ounanḓengu tjinene kweṱe, okuzemburuka kutja ouye mbwi noviṋa avihe mbi ri mu wo, vi pirukira oviṋa Jehova mbye vanga nomuano mbwe ripura. (Jak. 4:7, 8; 1 Joh. 2:15-17; 5:19) Okukara noupanga wopopezu kuna Jehova, ootjiṋa tji matji vatere omuatje okupirukira Satan, nouye we, nomuano omuvi ovandu mouye mu ve ripura. Indu ovanene tji va twapo omerihongero wokombanda noviungura oviwa otjotjiṋa otjitenga kovanatje vawo, ku tjita kutja ovanatje ve ute okumuna kutja oviṋa mouye ovinanḓengu kombanda  youpanga wawo kuna Jehova. Nu ihi tji yeta oumba. Ovanene mba suvera ovanatje vawo, mape ya tjiri ave vanga kutja ouye mbwi u honge ovanatje vawo kutja ovikwaye mbi mavi ve etere ouṋingandu watjiri? Omuano auyerike mu matu yenene okurira ovaṋingandu nokumuna ondjoroka yatjiri, orondu tji twa twapo Jehova omutenga mehupo retu.​—Lesa Epsalme 1:2, 3.

12. Ongwaye ovanene tjiva tji ve muna kutja onawa omuatje wawo okuundja kaṱiṱi amaa papitisiwa?

¹² Omukazendu umwe omukambure wa kahurura kutja omena ratjike tje hina aa vanga kutja omuatje we ma papitisiwe. Eye wa tja: “Me ṱohoṋi okuhungira kutja epu enenenene, ra ri okutira kutja omuatje wandje ngaa kondwa kombongo.” Tjimuna omukazendu omukambure ngo, ovanene tjiva wina ve muna kutja onawa omuatje wawo okuundja kaṱiṱi ngandu tje kuru, na tja zu ko kozongaro zouyova, amaa papitisiwa. (Gen. 8:21; Omiano 22:15) Ovanene mbo ve muna kutja, ‘Omuatje wandje tje hiya papitisiwa, kamaa kondwa kombongo.’ Nu hapo ongwaye okuripura nao tje ri posyo?​—Jak. 1:22.

13. Hapo okuwomba okupapitisiwa, ku tjita kutja omundu a ha kara nomerizirira komurungu wa Jehova? Kahurura.

¹³ Otjiperi kutja, ovanene kamaave vanga kutja omuatje wawo ma papitisiwe, ngunda oruveze aru hiya yenena ku ye okuriyandja omuini ku Jehova. Posi yokutja ouposyo okumuna kutja omuatje woye kena omerizirira komurungu wa Jehova, mena rokutja keya papitisiwa. Ongwaye tji matu tja nao? Omundu ka hara omerizirira komurungu wa Jehova indu tja papitisiwa uriri. Nungwari, omuatje u kara nomerizirira komurungu wa Mukuru, indu tja utu okutjiwa kutja Jehova u vanga ye, nu kavanga ye. (Lesa Jakobus 4:17.) Kunao, ovanene ozonongo kave tjaere ovanatje kutja ave ha papitisiwa, nungwari ve kondja oukukutu okuraisa otjihorera otjiwa. Nangarire omuatje ngunda e ri omuṱiṱi, owo ve mu honga okusuvera oviṋa Jehova mbya suvera, nokutonda oviṋa Jehova mbya tonda, tjimuna owo tji ve tjita. (Luk. 6:40) Orusuvero omuatje woye ndwe na ro ku Jehova, maru mu tjevere kutja aha tjiti ouvi ounene, orondu ma kara nonḓero yokutjita imbi Jehova mbye vanga.​—Jes. 35:8.

14. Ovanene vombongo mave yenene vi okuyandja oruvara kozongondjero zovanene?

¹⁴ Ovanene vombongo mave yenene okuyandja oruvara kovanene, mokuhungira oviṋa oviwa ohunga nokutjita ozondando motjira tja Jehova. Omukazendu umwe omukambure, ngwa karera otjomukandjira oure wozombura zokombanda 70, u zemburuka ehungi nda kara na ro kuna Mbuti Charles T. Russell, indu tja ri nozombura 6 uriri. Eye wa tja: “Eye wa kambura ozominute 15, okuhungira kuna ami ohunga nozondando zandje motjira tja Jehova.” Oukahu kutja omambo omawa, nokutunduuzwa, ku yenena okuṱuna komundu oure womuinyo we. (Omiano 25:11) Ovanene vombongo wina mave yenene okuṋanga ovanene novanatje vawo okuvatera noviungura pEtuwo rOmerikotameneno. Nu wina mave yenene okuningira ovanatje okuungura oviṋa mbi nonḓengu yozombura zawo, nomasa wawo.

15. Varwe mombongo mave yenene vi okuvatera ovanatje ovaṱiṱi poo omitanda mombongo?

¹⁵ Hapo varwe mombongo mave yenene vi okuvatera? Owo mave yenene okuvatera, mokuraisa onḓero momitanda. Otjotjihorera, mo yenene okutara koviṋa mbi mavi raisa kutja oupanga womutanda worive kuna Jehova, mau kurire ko poo indee. Hapo eye wa yandja eziriro ewa pombongarero yombongo, poo wa ri norupa  momahungi nge yandjwa pombongarero yomokati kotjivike? Pe nomutanda ngwa zuvarisira ovakwao poskole, poo ngwa tjita otjiṋa otjiwa, indu tja rorwa okutjita otjiṋa otjivi? Tji peri nao, hakahana okumutanga! Nga rire ondando yetu okuhungira kuna ovanatje ovaṱiṱi poo omitanda, komurungu poo kombunda yombongarero yombongo. Indu tji twa tjiti nao, ovanatje mave utu okumuna kutja owo wina ve norupa “mombongo.”​—Eps. 35:18.

16, 17. (a) Ombapitisimo i na tjike noruyaveze rwomundu? (b) Ondjoroka yaye ovanene Ovakriste ndji mave yenene okukara na yo? (Tara kotjiperendero pomautiro worupa ndwi.)

¹⁶ Okukurisa ovanatje,“nokuvevyura nokuveronga otja Muhona pe vanga,” tjiri ondjingonekero onene kovanene Ovakriste. (Ef. 6:4; Eps. 127:3) Ovanatje vetu kave ri tjimuna ovanatje vOvaisrael, mbaave kwatwa otjovandu mbe riyandja ku Jehova, mena rokutja ovanene vawo va ri ave riyandja ku Jehova. Nu wina orusuvero ku Mukuru na kouatjiri wOmbeibela, katjiṋa ovanatje tji ve rumata kovanene vawo. Okuza koruveze omuatje tja zu nokukwatwa, ovanene ve sokukara nondando yokuvatera omuatje wawo okurira omuhongewa, nokumuvatera kutja me riyandje omuini ku Jehova nu ma papitisiwe. Nu hapo pe notjiṋa tjarwe otjinanḓengu pokutjita nao? Otjiṋa tji matji tjiti kutja omundu ma yamwe moruveze rondatumisire ondirise, orondu tje riyandja omuini ku Jehova, a papitisiwa, nemu karere nouṱakame.​—Mat. 24:13.

¹⁷ Indu Blossom Brandt tjaa vanga okupapitisiwa, ovanene ve aave vanga okutjiwa kutja, eye wa yenene tjiri okutoora omukambo omunanḓengu tjinene mbwi mehupo re. Indu tji va tjiwa kutja eye tjiri wa yenene okutjita nao, owo ve mu pa oruvara. Ongurova yokomurungu wombapitisimo ye, ihe wa tjita otjiṋa otjiwa tjinene. Blossom wa tja: “We tu ningira atuhe kutja tu wore ozongoro zetu, nu okuzambo wa kumba. Eye wa raera Jehova kutja wa ri nondjoroka ohunga nokanatje ke, ku ka toora omukambo wokuriyandja ku Ye.” Ozombura zokombanda 60 kombunda yanao, Blossom wa tja: “Mozombura azehe nḓu maze ya, ami tjiri himee zembi ko ongurova ndjo!” Vanene, matu zeri kutja eṋe wina mamu kara nondjoroka otjingeyo, tji mamu munu ovanatje veṋu amave riyandja ku Jehova nokupapitisiwa.