AUHE wetu u vanga kutja ovandu varwe ve mune kutja oweṱe ovandu ovawa. Posi yokutja, katjiṋa otjipupu okurira omundu omuwa mouye mbwi. Epu rimwe orondi rokutja ovandu ovengi va “tonda ouwa.” (2 Tim. 3:3) Owo ve pirukira omirari vya Jehova, mokutja “ouvi owo ouwa, nouwa owo ouvi.” (Jes. 5:20) I rira ouzeu wina okuraisa ouwa mena roviṋa ovivi mbya tjitwa kweṱe morukapitaveze nokutja kaweṱe ohomonena. Kunao, eṱe mape ya atu utu okurimuna tjimuna Anne, * nandarire kutja eye wa karera Jehova oure wozombura ozengi, eye u tja: “Tjiri ouzeu kwami okukambura kutja me yenene okurira omundu omuwa.”

Ombuze ombwa oyo ndji yokutja atuhe matu yenene okurira ovandu ovawa! Ombepo ondjapuke ya Mukuru ondji tu pa omutima omuwa, nu ombepo Ye onamasa tjinene okukapita ovandu ongondoroka na eṱe mbe nombepo ombi poo omeripura wetu omavi. Ngatu katare kutja omutima omuwa u heya tjike nokutja matu yenene vi okuraisa otjikaṋena ho nawa.

Omutima omuwa otjikaṋena poo omuano wokuraisa ouwa. Omutima omuwa u kamburira mo ongaro yomeritjindiro ombwa, ousore, nokuhina okutjita oviṋa ovivi poo oviyaukise. Omundu omuwa aruhe u paha omiano vyokuvatera varwe nu u ve tjitira oviṋa oviwa.

Hapo tji matu vatere varwe tji heya kutja oweṱe ovandu ovawa po? Kutja tu rire ovandu ovawa komurungu wa Jehova, katu sokutjita oviṋa oviwa komaṱunḓu na komapanga wetu uriri. Mouatjiri, kaaruhe omundu tje raisa ouwa, orondu Ombeibela mai tja: “Kape nomundu omusemba kombanda yehi ngu tjita ouwa porwawo, nu ngu ha tjiti ouvi wina.” (Omuzuv. 7:20) Omuapostle Paulus wa tja: “Ami me tjiwa nawa kutja ouwa mu ami kau tura.” (Rom. 7:18) Kunao, tji matu vanga okukara notjikaṋena ho, matu sokurihongera ku Jehova ngu ri Omburo youwa auhe.

Jehova Mukuru wa twapo omirari vyokutja ovikeṋa mbi ri oviwa. Ombeibela i tja ohunga na Jehova: “Ove u nouwa nu u tjita ouwa, ndji honga omazikamisiro woye.” (Eps. 119:68) Matu kakonḓonona oviṋa 2 ohunga nouwa wa Jehova mbwa tamunwa mezeva ndo.

Jehova u nouwa. Jehova omuwa tjinene nga indu tje ri ouzeu ku Ye okuhina okutjita ouwa. Ovikaṋena vye vyarwe vi hitasana nouwa we. Tara ku imbi mbya tjitwa indu Jehova tja tja ku Moses: “Ami me kapitisa ongeṋangeṋeno yandje momurungu woye.” Jehova wa raisira Moses ongeṋageṋeno Ye ndja i kamburire mo ouwa we. Moses wa zuva eraka nda tja: “Muhona, Muhona, ongu ri Ndjambi ngu ri omunaunyaṋutima nomunatjari, ngu nomuretima, nu ngwa tumba otjari nouṱakame. Eye ongu ma ṱakamisire omayovi otjari tje, nongu ma isire ouhasemba nozongatukiro nouvi, nu, vari, ngu hi nokuisa omunandjo nokuhaverwa.” (Eks. 33:19; 34:6, 7) Ihi tji raisa nawa kutja Jehova omuwa momiano avihe. Nandarire kutja Jesus aa raisa ouwa tjimuna ovandu, eye wa tja: “Kape nomundu omuwa posi ya Ndjambi erike.”​—Luk. 18:19.

Jehova u tjita ouwa. Oviṋa avihe Jehova mbye tjita oviwa. “Muhona omuwa kovandu avehe, nu u ṱondjenda noviṋa avihe mbya uta.” (Eps. 145:9)  Mena rokutja Jehova omuwa nu ka raisa ombangu, Eye wa yandja omuinyo kovandu noviṋa mbi mave hepa kutja ve hupe. (Oviung. 14:17) Indu tji me tu isire Eye wina u raisa ouwa we. Omutjange umwe wEpsalme wa tjanga kutja: “Muhona, oOve omuwa, nu u isira.” (Eps. 86:5) Eṱe matu yenene okukara nongamburiro yokutja Jehova “ka rurupara oviṋa oviwa ku imba mbe ryanga mousemba.”​—Eps. 84:11.

Eṱe twa memwa otja kosaneno ya Mukuru, kunao matu yenene okurira ovandu ovawa nokutjita oviṋa oviwa. (Gen. 1:27) Kombanda yanao, Embo ra Mukuru ri rakiza ovakarere ve ‘okurihonga okutjita ouwa.’ (Jes. 1:17) Matu yenene vi okurihonga okutjita ouwa? Tara komiano 3 mbi mavi tu vatere okutjita nao.

Otjitenga, matu sokuningira ombepo ondjapuke, ndji mai yenene okuvatera Ovakriste okukara nomutima omuwa tjiri. (Gal. 5:22) Otjingaperi kutja, ombepo ya Mukuru mai yenene okutuvatera okusuvera ouwa nokutonda ouvi. (Rom. 12:9) Kombanda yanao, Ombeibela i raisa kutja Jehova ma yenene ‘okutuzeuparisa kutja aruhe tu tjite nu tu hungire imbi mbi ri oviwa’​—2 Tes. 2:16, 17.

Otjitjavari, matu sokulesa Embo ra Mukuru. Tji matu tjiti nao, Jehova ma yenene okutuhonga “ondjira ndji twara kouṋingandu” nokuturongerisira “otjiungura ngamwa atjihe otjiwa.” (Omiano 2:9; 2 Tim. 3:17) Indu tji matu lese Ombeibela nokuripurira ko oukoto koviṋa mbi matu lese, omutima wetu u kara noviṋa oviwa ohunga na Mukuru nombango Ye. Kunao tu kara novihuze mbi matu yenene okukaungurisa tji matu hepa okuviungurisa.​—Luk. 6:45; Ef. 5:9.

Otjitjatatu, eṱe tu kondja pu matu yenene ‘okuhorera kouwa.’ (3 Joh. 11) MOmbeibela mu novihorera mbi matu yenene okuhorera ko. Otjingaperi kutja, Jehova na Jesus ovihorera ovisembasemba. Posi yokutja wina matu yenene okutara kovihorera vyovandu varwe wovihorera oviwa. Ovandu 2 mbu matu yenene okuripurira ko ooTabita na Barnabas. (Oviung. 9:36; 11:22-24) Ove mo yenene okumuna ouwa movihorera vyawo oviwa indu tji wa konḓonona kutja Ombeibela i tja vi ohunga nawo, nokutja ovikwaye mbi va tjita okuvatera varwe. Tara kutja omomuano uṋe ove mu mo yenene okuvatera tjiva meṱundu roye poo mombongo. Otja tji mo konḓonona ohunga noviṋa mbya tjitwa ku Tabita na Barnabas mena rokutja aave tjiti ouwa ku varwe, ove wina mo yenene okumuna ouwa otjingewo.

Eṱe wina matu yenene okuripurira kovihorera vyovandu ndino mbe tjita ouwa. Otjotjihorera, tara kovanene vombongo mbe ungura oukukutu mombongo nu mba ‘suvera ouwa.’ Wina ripurira kovakazendu ovakambure ovaṱakame mbe ri “otjihorera  otjiwa,” moviṋa mbi ve hungira nokutjita. (Titus 1:8; 2:3) Omukazendu omukambure wena Roslyn wa tja: “Epanga randje ri tjita ozongondjero okuvatera nokutunduza ovakambure varwe mombongo. Eye u ripurira kozongaro zawo nu povikando tjiva u ve pa ouyandjewa ouṱiṱi okuveraisira kutja u ripurira ku wo poo u ve vatera momiano vyarwe. Ami mbi muna kutja tjiri eye omundu omuwa.”

Jehova u tunduuza ovakarere ve ‘okupaha ouwa.’ (Amos 5:14) Indu tjitwa tjiti nao, ma ku tu vatere okusuvera oviṋa Jehova mbye tja oviwa, nu wina matu kara nonḓero yokutjita ouwa.

Kutja tu rire ovandu ovawa, eṱe katu hepa okutjita oviṋa mbi mavi nana ombango ya varwe poo okuyandja oviyandjewa vyondiru. Otjotjihorera, omupeinde woviperendero ka ungurisa oukombo wokupeinda 2 uriri. Nungwari eye u ungurisa oukombo wokupeinda owingi. Momuano otjingewo, tji matu vatere varwe moviṋa pekepeke, vi raisa kutja oweṱe ovandu ovawa.

Ombeibela i tu tunduuza kutja tu ‘ṱunwe’ i yozongaro varwe mu ve ri, ‘nokurirongerera’ okutjita ouwa. (2 Tim. 2:21; Titus 3:1) Tji twa yandja ombango ku imbi mbi mavi tjitwa ku varwe, eṱe mape ya atu kara nomiano mu matu yenene okuvatera otja “kombwiro yawo, kokutja tu ve tunge mongamburiro.” (Rom. 15:2) Ihi mape ya a tji kamburire mo okuvepa otjiṋa tji tu natjo. (Omiano 3:27) Eṱe mape ya atu ṋanga omundu okuyekurya pamwe poo okuya pamwe kutja tu yanḓiparisasane. Indu tji twa zuu kutja omundu ngu matu tjiwa wa vera, eṱe matu yenene okumuhindira okakarata, okukemuryangera poo okumutonena ongoze. Otjingaperi kutja matu yenene okupaha omiano omingi mu matu yenene okuhungira ‘omambo omawa nomatunge otja pu pe ri ohepero, kokutja inga ngu matu hungire, ye yandje onyuṋe kovapuratene.’​—Ef. 4:29.

Tjimuna Jehova, eṱe tu paha okutjita ouwa kovandu avehe. Kunao ka tu tjindi ovandu varwe nombangu. Omuano umwe omusemba mu matu yenene okutjinda varwe nokuhina ombangu tjimuna Jehova, eendu tji matu ve zuvarisire ohunga nombuze ombwa yOuhona wa Mukuru. Otja Jesus tja rakiza, eṱe wina tu paha okutjita ouwa nandarire ku imba mbe tu tonda. (Luk. 6:27) Katjiṋa otjivi okurira omundu womutima omuwa nokutjitira varwe oviṋa oviwa, mena rokutja “omatwako kaye kuramene oviṋa otja imbi momurungu.” (Gal. 5:22, 23) Tji matu tjiti oviṋa oviwa nandarire indu tji ma tu tjindwa navi poo tji matu munu omauzeu, eṱe mape ya atu nanene varwe kouatjiri na tu hivirike Mukuru.​—1 Petr. 3:16, 17.

“Ingwi omusemba u nohange nozondjito ze.” (Omiano 14:14) Ouwa waye mbu matu munu? Indu tji matu tjiti ouwa ku varwe, owo mape ya ave tu raisire ouwa wina. (Omiano 14:22) Nandarire kutja tjiva kave nokuturaisira ouwa, tu sokukayenda komurungu okuvetjitira oviṋa oviwa. Indu tji twa tjiti nao, owo mape ya ave rundurura ongaro yawo nu ave utu okututjinda nawa.​—Rom. 12:20.

Ovakambure ovakwetu ovengi va muna ouwa mbu za mokutjita imbi mbi ri oviwa nokunakaura imbi ovivi. Tara kotjihorera tja Nancy. Eye wa tja: “Indu tjee kuru mba ri omundu ngwe ripurire kwami omuini, ngwe tjiti oviṋa ovihakohoke nu hi mba ri nondengero. Posi yokutja, tji mba uta okurihonga omirari vya Mukuru nokuviṱakamisa mehupo randje, ami mba kara nondjoroka. Nai mbi ri muna kutja mbi nonḓengu komurungu wa Jehova.”

Epu enanḓengu ndi tjita kutja tu kondje okukara nomutima omuwa, omena rokutja okutjita nao ku eta ondjoroka ku Jehova. Nandarire kutja ovandu ovengi kave munu ouwa mbu tu tjita, Jehova u umuna. Eye u tjiwa oviṋa avihe oviwa mbi tu tjita nomeripura wetu omawa. (Ef. 6:7, 8) Ouwa waye mbu tu muna? “Muhona u nonyuṋe momundu omusemba.” (Omiano 12:2) Kunao ngatu kayende komurungu okukara nomutima omuwa. Jehova wa kwizikira “ondjozikiro nohange ku imba avehe mbe tjita ouwa.”​—Rom. 2:10.