1. Otjikwaye tjimwe otjinyandise tjomutima ohunga na Jesus? Kahurura.

OTJIKAṊENA tjimwe otjinyandise tjomutima ohunga na Jesus, eye u tjiwa omauzeu ngu tu muna otjovandu mbu tu he ri ohomonena. Indu Jesus tja ri kombanda yehi, eye aa ‘nyanda pamwe na imba mbe nenyando, nu aa riri pamwe novarire.’ (Rom. 12:15) Otjotjihorera, indu ovahongewa va Jesus 70 tji va kotoka nenyando kombunda yomazuvarisiro wawo omawa, Jesus “wa yoroka.” (Luk. 10:17-21) Momuano otjingewo, Jesus wa “kurungisiwa tjinene mombepo,” indu tja muna omuano onḓiro ya Lasarus mu ya ṱuna kovasuverwa ve.​—Joh. 11:33.

2. Otjikwaye tji tja vatera Jesus okuraisa otjari nondjenda kovandu?

² Nanadarire kutja Jesus wa ri omundu ohomonena, eye wa ri notjari tjinene nu aa raisa ondjenda kovandu mbu ve he ri ohomonena. Otjikwaye tji tje mu vatera okukara nao? Jesus wa suverere ovandu, nu ihi ootjiṋa tjimwe otjinanḓengu tji tje mu vatera. Otja tji pa raisiwa morupa ndwa kapita, Jesus wa ri ‘nondjoroka novandu.’ (Omiano 8:31) Orusuvero rwe kovandu rwe mu hinga kutja ma tjiwe nawa omuano ovandu mu ve ripura. Omuapostele Johanes wa tja: “Iya tjiwa imbi mbi ri momitima vyovandu.” (Joh. 2:25) Jesus wa ri notjari tjinene kovandu varwe. Ovandu aave yenene okumuna orusuvero rwe ndo nu aave puratene nawa kombuze yOuhona. Indu tji twa kara norusuvero kovandu tjimuna Jesus, matu yenene okuvatera ovandu motjiungura tjokuzavarisa.​—2 Tim. 4:5.

3-4. (a) Indu tji tu rikendera kovandu, matu kara noumune uṋe ohunga notjiungura tjetu tjokuzuvarisa? (b) Morupa ndwi matu katara ku tjike?

³ Omuapostele Paulus aa tjiwa nawa kutja okuzuvarisa ootjiungura tja sokutjita, nu eṱe wina matu tjiwa kutja matu sokuzuvarisa. (1 Kor. 9:16) Posi yokutja, indu tji tu rikendera kovandu, eṱe katu vara otjiungura tjokuzuvarisa otjotjiṋa tji matu sokutjita  uriri. Nungwari tu vanga okuraisa kutja tjiri tu notjari novandu nu tu vanga okuvevatera. Tu tjiwa kutja “mokuyandja mu nenyando tjinene pokupewa.” (Oviung. 20:35) Indu tji matu zuvarisa mena rokutja matu vanga okuvatera ovandu, iho tji tjita kutja tu yorokere otjiungura tjokuzuvarisa.

⁴ Morupa ndwi, matu ke rihonga omuano mu matu yenene okuraisa otjari nondjenda motjiungura tjetu tjokuzuvarisa. Otjitenga, matu katara kutja matu rihongere kotjike komuano Jesus ma tjindi ovandu. Okuzambo, matu tara komiano 4 mu matu yenene okuhorera kotjihorera tje.​—1 Petr. 2:21.

5-6. (a) Jesus wa raisa ondjenda kovangendu? (b) Omena ratjike Jesus tja ṱondjenda novandu mba zuvarisa ko, otja tji pa kwizikwa mu Jesaja 61:1, 2?

⁵ Tara komuano Jesus ma ṱondjenda novandu. Otjikando tjimwe, Jesus novaapostele ve va ri a va urwa tjinene mena rokutja va zuvarisa ombuze ombwa nokuhina okusuva. Owo kana va ri “noruveze nangarire ingwi okurya ovikurya.” Kunao Jesus wa twara ovaapostele ve ‘koṋa ku mave kakara aveyerike peke,’ nu ve ‘suve kaṱiṱi.’ Posi yokutja, otjimbumba otjingi tjovandu tja tupuka komurungu wawo, koṋa Jesus novahongewa ve kaave i. Indu Jesus tja vaza mbo nu a munu otjimbumba tjovandu, eye wa raisa ongaro iṋe nu wa tjita vi? Eye “we ve ṱira ondjenda *, orondu owo va ri otja ozonḓu nḓe hi nomurise. Eye otja uta okuvehonga oviṋa ovingi.”​—Mar. 6:30-34.

⁶ Ongwaye Jesus tja ṱondjenda novandu mba? Eye wa muna kutja ovandu mbo va ri “otja ozonḓu nḓe hi nomurise.” Mape ya kutja Jesus wa muna kutja tjiva va ri ovasyona nu aave ungura ozoiri ozonde okuvatera omaṱunḓu wawo. Mape ya varwe va wire momuinyo mena rokuzepaisa ovasuverwa vawo. Jesus tjiri aa tjiwa ongaro ovandu mba mu va ri. Otja tji pa raisiwa morupa ndwa kapita, Jesus mape ya wa muna omauzeu tjiva nga mehupo re omuini. Jesus aa ṱondjenda novandu varwe, nu ihi tje mu  hinga kutja me ve huhumiṋe.​—Lesa Jesaja 61:1, 2.

7. Matu horere vi kotjihorera tja Jesus?

⁷ Matu rihongere kotjike kotjihorera tja Jesus? Tjimuna Jesus, ovandu ongondoroka na eṱe ve ri tjimuna “ozonḓu nḓe hi nomurise.” Owo ve tjinda omauzeu omengi. Eṱe tu na imbi mbi mave hepa, ndji ri ombuze yOuhona. (Omavan. 14:6) Kunao mokuhorera kOmuhona wetu, eṱe tu zuvarisa ombuze ombwa mena rokutja tu ‘tjariparera omusyona nomuhepe.’ (Eps. 72:13) Eṱe tu ṱondjenda novandu, nu tu vanga okutjita otjiṋa okuvevatera.

8. Omomuano uṋe umwe mu matu yenene okuraisa ondjenda motjiungura tjokuzuvarisa? Yandja otjihorera.

⁸ Otjikwaye tji ma tji tu vatere okuraisa ondjenda kovandu mbu tu zuvarisa ko? Matu vanga okuritwa mozongaku zovandu mbu tu hakaena nawo motjiungura tjokuzuvarisa, nokuvetjinda momuano eṱe mbwa tja tu vanga okutjindwa. * (Mat. 7:12) Ngatu tare komiano 4 mu matu yenene okutjita nao. Otjitenga, tara kouhepe womundu kourike we. Indu tji matu zuvarisa ombuze ombwa, otjiungura tjetu tji ri tjimuna iho tjonganga. Onganga ombwa i ripurira kouhepe womuvere auhe kourike we. Oyo i pura omapuriro nu ai puratene nawa otja omuvere tji me rihepura ouzeu we. Pendje nokuyandja omiti ngamwa avihe komuvere we, onganga mape ya ai undju kaṱiṱi okutara kutja pe noviraisiro vyarwe vyomutjise mbu mape ya omuvere a kara nawo, nu okuzambo ai yandja omapangero omasemba. Momuano otjingewo, eṱe katu sokuungurisa omuano umwe wokuuta ehungi kuna ovandu avehe mbu twa hakaene motjiungura tjokuzuvarisa. Posi yokutja, tu sokukondja okuzuva ongaro omundu auhe me ri noumune we.

9. Otjikwaye tji tu ha sokutjita? Kahurura.

⁹ Indu tji wa hakaene ku nomundu motjiungura tjokuzuvarisa, o hakahana okumuna kutja motjiuwa ongaro omundu ngo me ri poo ongamburiro ye nokutja ongwaye tje kambura nao. (Omiano 18:13) Nungwari, pura omapuriro nounongo kokutja u tjiwe otjiṋa ohunga nomundu ngo nokutja u kambura mu ye. (Omiano 20:5) Tje ri otjiṋa otjiyakurwa mombazu yeṋu, mu pura ohunga noviungura vye, eṱunḓu re, omuano mbwe kurisiwa, na wina oumune we. Indu tji matu pura omapuriro, tu ve pa oruveze okuturaera kutja ongwaye tji mave hepa ombuze ombwa. Indu tji twa tjiwa otjiṋa ho, eṱe tu yenena okuveraisira ondjenda nu tu yenena okuvepa ombatero ndji mave hepa, tjimuna Jesus tjaa tjiti.​—Sasaneka 1 Ovakorinte 9:19-23.

10-11. Otja 2 Ovakorinte 4:7, 8, omuano uṋe outjavari mu matu yenene okuraisa ondjenda ku varwe? Yandja otjihorera.

¹⁰ Otjitjavari, kondja okuripura kutja ehupo rawo riri vi. Mozongaro tjiva, eṱe mape ya atu tjiwa omauzeu ngu ve muna. Kombanda yanao, eṱe wina kaweṱe ohomonena nu tu  muna omauzeu tjimuna ovandu avehe. (1 Kor. 10:13) Eṱe tu tjiwa kutja ehupo mouye ri yenena okurira ezeu. Nombatero ya Jehova tu yenena okupanḓera po. (Lesa 2 Ovakorinte 4:7, 8.) Nungwari ripura ohunga novandu mbe hi noupanga wopopezu kuna Jehova. Tjiri ouzeu ku wo okuhupa mouye mbwi nokuhina ombatero Ye. Tjimuna Jesus, eṱe wina tu ve ṱira ondjenda, nu ihi tji tu hinga kutja tu ve raere “ombuze yohange noyondjamo.”​—Jes. 52:7.

¹¹ Tara kotjihorera tja mbuti Sergey. Ngundee mbuti Sergey ke rihonga ouatjiri, eye wa ri omundu wohoṋi nu ngwa mwina. Ya ri ouzeu ku ye okuhungira ku novandu varwe. Otja oruveze tjaaru kayenda, eye wa yakura okurihonga Ombeibela. Sergey wa tja: “Otja tjee rihongo Ombeibela, mba muna kutja omerizirira wOmukriste auhe okuraera varwe ohunga nongamburiro ye. Ami tjiri ee munu kutja hi nokuyenena okutjita nao.” Posi yokutja, eye ee ripura novandu mbe hiya zuva ouatjiri ngunda, nu wa muna kutja ehupo rawo ezeu tjinene mena rokutja kave nokutjiwa Jehova. Eye wa tja: “Oviṋa ovipe mbye rihongo vye ndji pa ondjoroka onene nu mba ri nohange momuinyo. Ee tjiwa kutja varwe aave hepa okurihonga ouatjiri mbwi wina.” Otja Sergey tjee ripurire kovandu nokuveṱira ondjenda, ouvanḓe we wokuzuvarisa otji we kurira ko. Sergey wa tja: “Tjiri okuraera varwe ohunga nOmbeibela kwa tjita kutja e ha tira okuhungira ku novandu rukwao. Wina tja tjita kutja mbi kare nongamburiro yomasa mu Mukuru.” *

12-13. Ongwaye tji matu sokukara nomuretima na imba mbu tu honga motjiungura tjokuzuvarisa? Kahurura.

¹² Otjitjatatu, kara nomuretima na imba mbu mohongo. Zemburuka kutja owo mape ya kave ya rora okuripurira kouatjiri mbu ri mOmbeibela eṱe mbu matu tjiwa nawa. Nu ovengi ve nongamburiro yomasa moviṋa mbi va hongwa. Owo mape ya ave munu kutja ongamburiro yawo i ve wanisa kuna omaṱunḓu wawo, otuzo twawo, na wina ovandu mbu ve kara pamwe. Matu ve vatere vi?

¹³ Tara kotjisasanekero hi: Hapo ondopa ndja kurupa nu ndji he ri mongaro osemba i tjitwa vi?  Povikando ovingi, pe utwa okutungwa ondopa ombe ngunda indji onguru amai ungurisiwa. Indu ondopa indji ombe tji ya manuka, indji onguru i teyewa. Momuano otjingewo, ngunda atu hiya ningira ovandu okuisa ongamburiro yawo “onguru,” eṱe rutenga matu sokukondja okuvevatera kutja ve tjiwe, ve suvere, nokukara nongamburiro yomasa mouatjiri “oupe” okuza mOmbeibela, mbu ve hina aave tjiwa rukuru. Tji twa tjiti nao otji mave kara nouvanḓe wokuisa ozongamburiro zawo ozonguru. Mape ya a ku kambura oruveze ovandu okutjita omarundurukiro otja ingo.​—Rom. 12:2.

14-15. Omomuano uṋe mu matu vatere imba mbe nondjiviro onḓiṱi, poo mbe hi nokutjiwa otjiṋa ohunga nomaundjiro wokukahupa nga aruhe moparadisa kombanda yehi? Yandja otjihorera.

¹⁴ Indu tji tu nomuretima novandu mbu tu hakaena motjiungura tjokuzuvarisa, eṱe kamaatu undjire ko ku wo okuzuva poo okuyakura ouatjiri wOmbeibela otjikando otjitenga tji ve u zuu. Nungwari, mena rondjenda yetu kuwo eṱe tu ve vatera okuripurira ko oukoto ku imbi Ombeibela mbi i honga otja oruveze tji maru kayenda. Otjotjihorera, tara komuano mu mape ya atu vatere omundu okuzuva ohunga nomaundjiro womuinyo waaruhe moparadisa kombanda yehi. Ovengi ve nondjiviro onḓiṱi uriri poo kave tjiwa otjiṋa ohunga nomahongero nga. Owo mape ya ve kambura kutja omundu tja koka wa koka, kamaa hupu rukwao. Poo owo ve ripura kutja ovandu avehe ovawa ve yenda keyuru. Ove mo yenene vi okuvevatera?

¹⁵ Tara komuano omukambure umwe me vatera ovandu okuzuva nawa ohunga nomaundjiro wokukahupa nga aruhe kombanda yehi. Rutenga, eye u lesa Genesis 1:28. Okuzambo, a pura omunionganda kutja, Mukuru wa vanga kutja ovandu ve hupire pi nu wa vanga kutja ve kare nehupo nda sana pi. Ovandu ovengi ve zira kutja, “Kombanda yehi, nu ve kare nehupo ewa.” Okuzambo, omukambure u lesa Jesaja 55:11 nu a pura kutja ondando ya Mukuru ya runduruka. Potuingi, omunionganda u zira kutja kako. Korusenina, eye u lesa Epsalme 37:10, 11 nu a pura kutja ovandu moruyaveze mave kara mongaro ndja sana pi. Mokuungurisa Ombeibela momuano mbwi, eye wa vatera ovandu ovengi okuzuva kutja ngamba Mukuru u vanga kutja ovandu ovawa ve hupe nga aruhe mOparadisa kombanda yehi.

16-17. Otja kOmiano 3:27, omomiano viṋe mu matu yenene okuraisa ondjenda? Kahurura.

¹⁶ Otjitjaine, paha omiano vyokuraisa kutja u ripurira ku wo. Otjotjihorera, hapo twa rora okavarura ovandu moruveze ndu he ri rwo? Eṱe matu yenene okuningira ondjesiro nu atu ningire okukotoka rukwao oruveze rwarwe. Hapo nu tjike indu omunionganda tji ma hepa okuvaterwa notjiṋa kaaṋi? Poo tjike indu omunionganda tjaa vera poo tjaa kurupa nu ma hepa okuvaterwa nokukaranderwa oviṋa vye poo okutjitirwa oviṋa vyarwe? Mozongaro otja inḓo, eṱe matu yenene okuvatera omundu ngo.​—Lesa Omiano 3:27.

 ¹⁷ Omukambure umwe omukazendu wa muna ouwa indu tja tjita otjiṋa tja tji munika tjimuna katjinanḓengu. Mena rokutja e ripurire keṱunḓu nda zepaisa okanatje kawo meyuva ndi kakwatwa, eye wa tjanga orutuu. Morutuu ndo mwa ri nomazeva wOmbeibela omahuhumiṋe. Hapo orutuu ndo rwa ṱuna vi keṱunḓu ndi? Omukazendu ngwa zepaisa okanatje ke wa tja: “Ami erero mba ri neyuva evi tjinene. Tjiri orutuu rwoye ndo rwe tu vaterere tjinene. Ami tjiri mbi nondangi tjinene komahuhumiṋino ngu twa munine morutuu ndo. Mbe ru lesere povikando ape 20 erero. Orutuu ndo rwe ndji yanḓiparisa tjiri. Ndangi tjinene.” Nokuhina omakeyakeyero, eṱe matu yenene okumuna ouwa indu tji twe ri twa mozongaku zovandu mbe ri mouzeu nu okuzambo atu tjiti otjiṋa okuvevatera.

18. Otja 1 Ovakorinte 3:6, 7, otjikwaye tji matu vanga okuzemburuka ohunga notjiungura tjetu tjokuzuvarisa, nu omena ratjike?

¹⁸ Otjingaperi kutja matu vanga okukara noumune ouwa ohunga nokutja Jehova u undjira kotjike kweṱe motjiungura tjokuzuvarisa. Eṱe matu yenene okukara norupa mokuvatera ovandu okurihonga ohunga na Mukuru, posi yokutja kaweṱe mbu tu ungura orupa orunanḓengu tjinene motjiungura hi. (Lesa 1 Ovakorinte 3:6, 7.) Jehova ongu nanena ovandu ku ye. (Joh. 6:44) Komaandero, matji zu kourekoto womundu omuini kutja ma yakura ombuze ombwa poo indee. (Mat. 13:4-8) Zemburuka kutja ovandu ovengi kave yakurire ombuze ya Jesus, nandarire kutja eye ongwa ri omuhonge omusembasemba ngwa hupire! Okutja, eṱe katu sokuteka ombango indu ovandu ovengi mbu matu vanga okuvatera tji ve hi nokupuratena kombuze yetu.

19. Ouwa waye mbu matu munu mokuraisa ondjenda kovandu motjiungura tjokuzuvarisa?

¹⁹ Indu tji matu raisa ondjenda kovandu motjiungura tjokuzuvarisa, matu munu mouwa. Eṱe matu kara nondjoroka tjinene motjiungura tjokuzuvarisa, nu wina matu muna enyando enene ndi za mokuyandja. Nu tu tjita kutja i rire oupupu ku imba “mba toororerwa omuinyo waaruhe” okuyakura ombuze ombwa. (Oviung. 13:48) Kunao “ngunda atu noruveze, ngatu tjite ouwa ku avehe.” (Gal. 6:10) Tji twa tjiti nao matu kara nenyando mena rokutja twa tjiti kutja Tate wetu womeyuru ma hivirikwe.​—Mat. 5:16.