1-2. Otja tji pa raisiwa mOviungura 8:27-31, 35-38, otjikeṋa tji tja tjita kutja omuungure wohoromende ya Etiopie ma papitisiwe?

OVE mo vanga okupapitisiwa otjomuhongewa wa Kristus? Orusuvero nondangi rwa vatera ovengi okutoora omukambo mbo. Tara kotjihorera tjomuungure wohoromende ngwa ungurire pombara oserekaze ya Etiopie.

² Omuetiopie ngwi wa papitisiwa tjimanga tja za nokurihonga okuza mOmatjangwa kutja u sokutjita nao. (Lesa Oviungura 8:27-31, 35-38.) Otjikwaye tji tje mu hinga? Eye tjiri wa raisa ondangi kEmbo ra Mukuru, nu aa lese omazeva okuza membo ra Jesaja indu tjaa hingi etemba re. Nu Filipus tja hungira kuna ye, omurumendu ngwi wa raisa ondangi koviṋa Jesus mbye mu tjitira. Hapo ongwaye omurumendu ngwi tja ya ko Jerusalem? Omena rokutja eye wa suverere Jehova. Hapo eṱe matu tjiwa vi? Eye aa i ko Jerusalem okukerikotamena ku Jehova. Pe munika aayo omurumendu ngwi wa isa ongamburiro ma kwatwa nu we rikuta ku notjiwaṋa tjaa tji rikotamene ku Mukuru watjiri. Ya ri orusuvero otjingero ndo ku Jehova ndwa tjita kutja ma toore omukambo warwe omunanḓengu, wokupapitisiwa nokurira omuhongewa wa Kristus.—Mat. 28:19.

3. Otjikeṋa tji mape ya atji tjaere omundu okupapitisiwa? (Lesa okaongo nga “ Ovikeṋa mbi ri momutima woye?”)

³ Orusuvero ku Jehova maru yenene okukuhinga kutja u papitisiwe. Posi yokutja orusuvero wina maru yenene okukutjaera kutja o ha tjiti nao. Omomuano uṋe? Tara kovihorera tjiva mbi. Ove mape ya osuvere eṱunḓu nomapanga woye mbe he ri Ovahongonone va Jehova tjinene, nu mape ya orikende  kutja ove tji wa papitisiwa owo mave ku tondo. (Mat. 10:37) Poo mape ya o suvere ozongaro nḓu motjiwa kutja Mukuru ke ze vanga, nu mape ya a rire ouzeu okupoka kuzo. (Eps. 97:10) Poo mape ya we kurira motuzo tu tu tjama nozongamburiro zoposyo. Ove mape ya ozemburuka oviṋa oviwa ohunga novitjitwa mbyo. Kunao, mape ya a rire ouzeu kove okupoka kotuzo tu tu yaukisa Jehova. (1 Kor. 10:20, 21) Ove mo sokuripura omuini kutja, “Otjikeṋa poo ouṋe ngu mba suvera tjinene?”

4. Epu riṋe enanḓengu ndi mari tjiti kutja u papitisiwe?

⁴ Pe noviṋa ovingi oviwa mbi mo sokuraisa ko orusuvero nondangi. Otjotjihorera ove ngunda au hiya uta okurihonga ku nOvahongonone va Jehova, mape ya wa suverere Ombeibela tjinene. Nu mape ya wa suverere Jesus. Nu nai tji wa tjiwa Ovahongonone va Jehova, mape ya wa suvera okukara puna wo. Posi yokutja okusuvera oviṋa oviwa mbyo kamaa ku tjiti kutja u riyandje omuini ku Jehova nokupapitisiwa. Epu enanḓengu tjinene ndi mari tjiti kutja u papitisiwe okusuvera Jehova Mukuru. Tji wa suvere Jehova kombanda yoviṋa avihe komoo yandjere otjiṋa poo omundu okukutjaera kutja u mu karere. Orusuvero ku Jehova maru ku hingi kutja u papitisiwe nu wina maru ku vatere okurira omuṱakame kombunda yombapitisimo.

5. Matu katara komapuriro yeṋe?

⁵ Jesus wa tja matu sokusuvera Jehova nomutima wetu auhe, nomuinyo wetu auhe, nozondunge zetu azehe nomasa wetu aehe. (Mar. 12:30) Hapo mo rihongo vi okusuvera nokuyozika Jehova tjinene nao? Tjitwe ripurire komuano Jehova mbwe tu suvera matji tu vatere kutja tu mu suvere wina. (1 Joh. 4:19) Orusuvero orunanḓengu ndo maru kupe oumune nongaro iṋe? *

6. Otja kOvaroma 1:20, omomuano uṋe umwe mu matu yenene okurihonga ohunga na Jehova?

⁶ Rihonga ohunga na Jehova okuza koviutwa vye. (Lesa Ovaroma 1:20; Omavan. 4:11) Ripura ohunga nomiti novipuka Jehova mbya ungura ovyo mbi raisa kutja eye u nounongo tjiri. Rihonga ohunga nomuano omuwa orutu roye mu rwa memwa. (Eps. 139:14) Ripura nomasa Jehova nga twa meyuva, nu eyuva oro irimwe rozonyose omahavarwa. * (Jes. 40:26) Tji mo ripurire koviutwa vya Jehova ove mo mu yozikire ko tjinene. Omautiro woupanga woye kuna Jehova orondu tji wa tjiwa kutja eye onongo nu omunamasa. Kutja u kurise orusuvero rwoye ku Jehova ove mo sokumutjiwa nawa.

7. Ovikwaye mbi mo hepa okutjiwa, kutja u suvere Jehova tjinene?

⁷ U sokukambura kutja Jehova tjiri we ku suvera. Hapo ouzeu okukambura kutja Omuute weyuru nehi me ku tjiwa nu u rikendera kove? Ndovazu pe ri nao, zemburuka kutja Jehova “ke ri kokure na eṱe atuhe.” (Oviung. 17:26-28) Eye ‘ma tjiwa omeripuriro woye nozonḓero zoye azehe,’ nu we ku kwizikira kutja “tji mo Mu paha, Eye me rimunikisa kove.” (1 Ekuruh. 28:9) Kombanda ya nao, epu ove ndi u rihongera Ombeibela nai omena rokutja Jesus wa tja: “Kape nomundu ngu ma sora okuya ku Ami tje ha nanenwe i Tate.” (Joh. 6:44) Pu mo yende a mo tjiwa nawa oviṋa Jehova mbye ku tjitira, orusuvero rwoye ku ye opu maru kurire ko.

8. Mo raisa vi kutja u nondangi korusuvero rwa Jehova?

 ⁸ Omuano umwe wokuraisa ondangi korusuvero rwa Jehova okukumba ku ye. Orusuvero rwoye ku Jehova maru kurire ko, tji mo mu raere ohunga noviṋa mbi ku kendisa nokutja ndangi koviṋa avihe mbye ku tjitira. Nu oupanga pokati koye na Jehova mau kurire ko tji mo munu omuano me zira ozongumbiro zoye. (Eps. 116:1) Ove mo kara nongamburiro kutja eye u ku zuva. Kutja u tumbuke popezu na Jehova, ove mo hepa okutjiwa ouripura we. Nu mo hepa okutjiwa kutja eye u undjira ko tjike kove. Omuano auyerike mu mo yenene okutjiwa avihe mbi okurihonga Embo re Ombeibela.

9. Hapo mo raisa vi kutja wa suvera Ombeibela?

⁹ Rihonga okusuvera Embo ra Mukuru Ombeibela. Ombeibela aiyerike ondji nouatjiri ohunga na Jehova nondando ye kove. U raisa kutja wa suvera Ombeibela indu tji mo i lese eyuva arihe, tji mo rirongerisa komerihongero woye wOmbeibela, na tji mo toorere ko omikambo koviṋa mbi we rihongo. (Eps. 119:97, 99; Joh. 17:17) Hapo u noprograma yomalesero wOmbeibela woye omuini? Hapo u lesa Ombeibela yoye eyuva arihe?

10. Otjikwaye tjimwe tji tji tjita kutja Ombeibela i rire embo rapeke?

¹⁰ Tjimwe tji tji tjita kutja Ombeibela i rire embo rapeke, omena rokutja i nondjivisiro okuza kovandu mba muna Jesus. Oro ondi ri embo ariyerike nda kahurura oukahu ohunga noviṋa Jesus mbye ku tjitira. Otja tji mo rihongo ohunga noviṋa Jesus mbya hungira na mbya tjita, ove mape ya ovanga okutunga oupanga kuna ye.

11. Otjikeṋa tji matji ku vatere okusuvera Jehova?

¹¹ Rihonga okusuvera Jesus, nu orusuvero roye ku Jehova otji maru kuru. Ongwaye tji matu tja nao? Omena rokutja Jesus aa horere kovikaṋena vya Ihe nawa. (Joh. 14:9) Otja tji mo rihongo ohunga na Jesus, otji mo yenene okutjiwa nokusuvera Jehova nawa. Ripura ohunga notjari Jesus tja raisa kovandu mbaave humbwa mena rousyona, ouvere noungundipare. Wina ripura ohunga nondunge ndje ku pa okukuvatera mehupo  roye, nomuano ehupo roye mu ri runduruka indu tji mo puratene ku ye.—Mat. 5:1-11; 7:24-27.

12. Indu tji mo rihongo ohunga na Jesus mape ya ovanga okutjita ye?

¹² Orusuvero roye ku Jesus mape ya aru kurireko indu tji mo ripurire ko oukoto kombunguhiro ndja tjita kokutja omauvi wetu ye isirwe. (Mat. 20:28) Indu tji wa zuu nawa kutja Jesus wa ri nonḓero yokuṱira ove, ove mape ya ovanga okuritanaura nokuningira ondjesiro ku Jehova. (Oviung. 3:19, 20; 1 Joh. 1:9) Otja orusuvero roye ku Jesus na Jehova tji maru kurireko, opu mo vanga okukara pu novandu mba suvera wo wina.

13. Otjikeṋa Jehova tje kupa?

¹³ Rihonga okusuvera imba mba suvera Jehova. Eṱunḓu roye nomapanga woye mbe he ri Ovahongonone va Jehova, mape ya ave ha zuu nawa kutja ongwaye tji mo vanga okuriyandja omuini ku Jehova. Owo mape ya ave ku pirukire. Jehova me ku vatere okutjita kutja ovakambure ovakweṋu mombongo ve rire otja eṱunḓu roye. Ove tji wa kara popezu novakambure ovakweṋu, mo munu orusuvero nombatero ndji mo hepa. (Mar. 10:29, 30; Hebr. 10:24, 25) Otja oruveze tji maru kayenda, eṱunḓu roye mape ya a ri utu okukarera Jehova nokukongorera omirari vye.—1 Petr. 2:12.

14. Otja ku 1 Johanes 5:3, otjikwaye tji wa muna ohunga nomirari vya Jehova?

¹⁴ Rihonga okuraisa ondangi nokuyenenisa omirari vya Jehova. Ngunda au hiya tjiwa Jehova mape ya oo rityere omuini kutja mo kongorere omirari viṋe, nungwari nai u muna kutja omirari vya Jehova ombi ri omisemba. (Eps. 1:1-3; lesa 1 Johanes 5:3.) Ripura ohunga nomirari mbi ri mOmbeibela kovakupasane, kovanene novanatje. (Ef. 5:22–6:4) Hapo eṱunḓu roye ra uta okukara nondjoroka mena rokukongorera omirari mbyo? Hapo ongaro yoye ya runduruka mena rokutja u kongorera omirari vya Jehova ohunga nokutoorora omapanga woye nongengezero? Hapo ove wa uta okukara nondjoroka nai? (Omiano 13:20; 1 Kor. 15:33) Mape ya kutja eziriro komapuriro ngo o ii.

15. Otjikwaye tji mo yenene okutjita indu tji mo hepa ombatero mokuyenenisa omirari vyOmbeibela?

¹⁵ Povikando tjiva, mape ya a rire ouzeu okutjiwa kutja mo yenenisa vi omirari vyOmbeibela mbi u rihonga. Nu mena ra nao Jehova u ungurisa otjira tje okukupa omambo nga zikamena kOmbeibela okukuvatera okuhaṋa pokati kouwa nouvi. (Hebr. 5:13, 14) Indu tji mo lese nokukonḓonona omambo ngo, mokamuna omiano omikahu mbi mo yenene okuungurisa nu mape ya ovanga okurira orupa rotjira tja Jehova.

16. Omomuano uṋe Jehova me hongorera ovandu ve?

¹⁶ Rihonga okusuvera nokuyandja oruvara kotjira tja Jehova. Jehova wa woronganisa ovandu ve mozombongo, Omuna we Jesus ongu ri otjiuru tjawo avehe. (Ef. 1:22; 5:23) Jesus wa zika okambumba okaṱiṱi kovarumendu ovatwirisiwa mbe hongorera po oviungura eye mbye vanga kutja vi ungurwe ndino. Jesus wa isana okambumba kovarumendu nga kutja “omukarere omuṱakame nomunazondunge,” nu owo ve ungura oukukutu okukuvatera kutja u tumbuke popezu na Mukuru nokutjita kutja u tjevere oupanga woye kuna ye. (Mat. 24:45-47) Omuano umwe omukarere omuṱakame me ku vatera omokuzika ovanene vombongo mbu mave ku hongorere nokukutjevera. (Jes. 32:1, 2; Hebr. 13:17; 1 Petr. 5:2, 3) Ovanene vombongo ve nonḓero yokukuvatera otja pu mave yenene, okukuyanḓiparisa nokukuvatera kutja u tumbuke  popezu na Jehova. Posi yokutja, otjiṋa otjinanḓengu tji mave yenene okukutjitira okukuvatera okuhonga varwe ohunga na Jehova.—Ef. 4:11-13.

17. Otja kOvaroma 10:10, 13, 14, ongwaye tji tu hungira kuna varwe ohunga na Jehova?

¹⁷ Vatera varwe okusuvera Jehova. Jesus wa raera ovemukongorere okuhonga varwe ohunga na Jehova. (Mat. 28:19, 20) Mape ya atu kara nonḓuviro kerakiza ndo mena rokutja matu tjiwa kutja twa sokutjita nao. Posi yokutja orusuvero roye ku Jehova tji maru kurireko, ove mo kara noumune umwe tjimuna omuapostele Petrus na Johanes, mba tja: “Eṱe kamaatu sora okuhinakuhungira imbi mbi twa muna na imbi mbi twa zuva oveni.” (Oviung. 4:20) Tjiri tji tupa ondjoroka indu tji twa vatere omundu okusuvera Jehova. Ripura nondjoroka Filipus ndja ri nayo indu tja vatera Omuetiopi okurihonga ouatjiri mbwa ri mOmatjangwa nokupapitisiwa. Indu tji wa horere ku Filipus nokukara nonḓuviro kerakiza ra Jesus rokuzuvarisa, ove u raisa kutja mo vanga okurira Omuhongonone wa Jehova. (Lesa Ovaroma 10:10, 13, 14.) Momuano mbwo ove mape ya opura epuriro Omuetiopi nda pura kutja, ‘Otjikeṋa tji matji ndji tjaere okupapitisiwa?’—Oviung. 8:36.

18. Matu katara ku ye morupa ndu maru kongorere ko?

¹⁸ Indu tji wa tye okupapitisiwa mo toora omukambo omunanḓengu tjinene mehupo roye. Mena rokutja omukambo mbo omunahepero tjinene, ove mo hepa okuripura nawa kutja mau hee tjike. Ovikeṋa mbi mo hepa okutjiwa ohunga nombapitisimo? Ovikeṋa mbi mo hepa okutjita komurungu na kombunda yombapitisimo? Omapuriro ngo maye kazirwa morupa ndu maru kongorere ko.