1. Omauzeu yeṋe tjiva ovakarere va Jehova ngu mape ya ave munu?

HAPO ove u nouzeu? Mape ya kutja ove wa hihamisiwa i yomukambure omukweṋu mombongo. (Jak. 3:2) Mape ya kutja ovandu mbu mu ungura pamwe poo ovanatje koskole ve ku nyekerera mena rokutja u karera Jehova. (1 Petr. 4:3, 4) Poo eṱunḓu roye ri kondja okukutjaera okuhinokuyenda kozombongarero zombongo, poo okuhungira kuna varwe ohunga nongamburiro yoye. (Mat. 10:35, 36) Indu tji u ri kehi youzeu tjinene, ove mape ya omunu kutja onawa okuisa okukarera Jehova. Nandarire kutja u ri kehi yomauzeu yeṋe, kara nongamburiro kutja Jehova me kupe ounongo okutjita ozondando ozombwa nu wina me kupe omasa okutuurunga ouzeu woye mbwo.

2. Otja kOvaroma 15:4, okulesa Embo ra Mukuru maku tu vatere vi?

² MOmbeibela mu novihorera vyovandu mbe he ri ohomonena, nu mba tuurunga omauzeu. Ongwaye tji mu novihorera mbyo? Kokutja tu rihongere ku vyo. Kunao, Jehova wa hinga omuapostele Paulus okutjanga omambo nge ri mOvaroma 15:4. (Lesa.) Indu tji matu lese ovihorera mbyo mavi yenene okutuyanḓiparisa nokutupa omaundjiro. Posi yokutja, kutja tu mune ouwa movihorera mbyo, eṱe matu sokutjita ovingi pendje nokulesa Ombeibela uriri. Eṱe matu sokutjita kutja Omatjangwa ye rundurure omuano mbu tu ripura nongaro yetu. Otjotjihorera, hapo eṱe matu tjiti vi indu tji matu hepa omuhunga ohunga nokutjinda ouzeu mbu tu nawo? Matu yenene okutjita oviṋa vine mbi: (1) Kumba, (2) Tjita tjimuna u ri mbo, (3) Okuripurira ko oukoto, (4) nOkuṱakamisa. Ngatu tara komiano mu matu yenene okuungura oviṋa vine  mbyo. * Nu wina matu kaungurisa omiano mbyo okurihongera koviṋa mbya tjitwa kOmbara David nomuapostele Paulus.

3. Ngunda au hiya uta okulesa Ombeibela ovikwaye mbi mo sokutjita, nu omena raye?

³ (1) Kumba. Ngunda au hiya uta okulesa Ombeibela yoye, ningira ku Jehova okukuvatera okumuna ouwa mu imbi mbi mo lese. Otjotjihorera, indu tji mo paha ombatero okutjinda ouzeu woye, ningira ku Jehova okukuvatera okumuna omirari mEmbo re, mbi mavi ku vatere okutjiwa kutja mo sokutjita vi.—Fil. 4:6, 7; Jak. 1:5.

4. Ovikwaye mbi mavi ku vatere okutjita tjimuna u ri mbo, indu tji mo lese ehungi rOmbeibela?

⁴ (2) Tjita tjimuna u ri mbo. Jehova we tu ungura nounongo wokuripurira koviṋa. Indu tji mo lese ehungi rOmbeibela tjita tjimuna uri mbo. Kondja okuripura ohunga na imbi mbi mavi tjitwa nu tjita aayo ove omundu ngo. Nu wina kondja okumuna oviṋa mbi ma munu nokukara mongaro ndje ri mo.

5. Okuripurira ko oukoto ku heya tjike, nu omomuano uṋe mu mo yenene okutjita nao?

⁵ (3) Okuripurira ko oukoto. Okuripurira ko oukoto ku heya, okuripurira ko nawa ku imbi mbi mo lese nokutja ovyo mavi ṱunu vi kove. Okutjita nao ku ku vatera okuyeta omapu kumwe nokuzuva nawa imbi mbi mo lese. Kutja u ripurire ko oukoto nawa, ove mo yenene okuripura omuini omapuriro nga: ‘Hapo ovikwaye omundu mehongwa ndi mbya tjiti okurivatera omuini? Omomuano uṋe Jehova me mu vatere? Hapo me ungurisa vi oviṋa mbi mbe rihongo okutjinda omauzeu wandje?’

6. Ongwaye tji matu sokuṱakamisa imbi mbi twe rihongo?

⁶ (4) Okuṱakamisa. Jesus wa tja indu tji tu hi nokuṱakamisa oviṋa mbi matu rihongo, eṱe twa sana nomurumendu ngu tunga ondjuwo ye meheke. Eye u ungura oukukutu posi yokutja ozongondjero ze omungandjo. Omena raye? Mena rokutja indu otjivepo otjinamasa nomupupo tji vye rivete mondjuwo ye, oyo mai hahauka. (Mat. 7:24-27) Momuano otjingewo, indu tji twa kumbu, atu tjiti tjimuna tu ri mbo nokuripurira ko oukoto, posi yokutja atu ha ṱakamisa imbi mbi matu rihongo, ozongondjero zetu maze rire omungandjo. Kunao, indu tji matu munu omauzeu poo tji matu tatumisiwa, ongamburiro yetu kamaai kara nomasa. Nungwari indu tji matu konḓonona nokuṱakamisa imbi mbi matu rihongo, tu tjita ozondando ozombwa, tu kara nohange nu ongamburiro yetu i kurira ko. (Jes. 48:17, 18) Ngatu katare komuano mu matu yenene okuungurisa oviṋa vine mbyo, otja tji matu tara ku imbi mbya tjitwa mehupo rOmbara David.

7. Matu katara kehungi riṋe rOmbeibela nai?

⁷ Hapo ove wa rora okuhihamisiwa i epanga roye poo omuzamumwe woye? Indu tji pe ri nao, tara ku imbi Ombara David mbya tjita indu omuatje we omuzandu Absalom tje mu hihamisa, nu tjaa kondjo okurira ombara.—2 Sam. 15:5-14, 31; 18:6-14.

8. Ovikwaye mbi mo yenene okutjita okumuna ombatero ya Jehova?

⁸ (1) Kumba. Raera Jehova kutja omuano mbu wa tjindwa navi we ku ṱuna vi, otja tji mo ripurire kehongwa ndo. (Eps. 6:6-9) Mu raera oumune woye auhe. Nu okuzambo mu ningira okukuvatera kutja u mune omirari mbi mavi ku vatere okutjinda ouzeu woye mbwo.

9. Hapo pa kayende ye pokati ka David na Absalom?

 ⁹ (2) Tjita tjimuna u ri mbo. Ripura ohunga noviṋa mbya kayenda po, nokutja Ombara David wa ri mongaro iṋe. Omuatje wa David Absalom wa ungura oure wozombura ozengi okutjita kutja ovandu ve mu suvere. (2 Sam. 15:7) Indu Absalom tja muna kutja oruveze rwa yenene, eye wa hinda ozohoze mouparanga wa Israel okukarongerisa ovandu okumuyakura otjombara. Eye nandarire wa ṋiṋikiza Ahitofel, ngwa ri epanga ra David ropopezu nomuyandja ndunge we, okupirukira David. Absalom ee ri isana kutja ombara, nu okuzambo wa kondja okukambura nokuzepa David, ngu mape ya oruveze ndwo wa verere tjinene. (Eps. 41:1-9) David wa zuva imbi Absalom mbyaa tjiti nu wa hena okupita moJerusalem. Korusenina, otjimbumba tjovarwe wovita tja Absalom tja rwisa otjimbumba tjovarwe wovita tja David. Otjimbumba tja Absalom tja pandjara, nu eye wa ṱa.

10. Hapo Ombara David a tja raisa ongaro iṋe?

¹⁰ Ripura kutja David wa ri noumune uṋe, indu tjaa munu oviṋa avihe mbi tji mavi tjitwa ku ye. Eye wa suverere Absalom nu wa ri nongamburiro mu Ahitofel. Nandarire nao, aveyevari ve mu tjita ovineya. Owo ve mu hihamisa tjinene nu nandarire aave kondjo okumuzepa. David a tja pandjara ongamburiro ye momapanga we warwe, mokumuna kutja owo wina ve rikutu kuna Absalom. Eye mape ya e tje ripurira ku ye omuini, nokuvanga okutaurira kehi rarwe erike. Poo a yumbu ohama. Posi yokutja David ka tjitire oviṋa mbyo. Kunao, wa tuurunga omauzeu ngo. Ovikwaye mbye mu vatera okutuurunga omauzeu ngo?

11. David wa tjita vi mongaro onḓeu maari?

¹¹ (3) Okuripurira ko oukoto. Omirari viṋe mbi mo rihongo okuza kehungi ndwo? Ripura kutja, “David wa tjita vi okurivatera omuini?” David kaurumine nokuhakahana okutjita ozondando nḓe he ri ozosemba. Nungwari, wa kumba ku Jehova okumuvatera. Eye wina wa ningira ombatero okuza komapanga we. Nu wa hakahana okutoorera ko omukambo ku imbi mbya tya okutjita. Nandarire kutja David wa hihamenwe tjinene, eye wa kayenda komurungu okukara nongamburiro movakwao nu kee ve tondo. Nu wina wa ri nongamburiro mu Jehova.

12. Jehova wa vatera David momuano uṋe?

¹² Omomuano uṋe Jehova ma vatera David? Indu tji wa tjiti omakonḓononeno, mo rihongo omuano Jehova ma yandja omasa ku David nga hepa okutuurunga. (Eps. 3:1-8) Jehova wa sera David ondaya kozondando nḓa tjita. Nu wa vatera omapanga wa David omaṱakame indu tjaave rwire ombara yawo.

13. Omomuano uṋe mu mo yenene okuhorera ku David, indu omundu tje ku hihamisa tjinene? (Mateus 18:15-17)

¹³ (4) Okuṱakamisa. Ripura omuini kutja, ‘Hapo me horere vi ku David?’ Ove mo sokuhakahana okutoora omukambo kutja u zengurure ouzeu mbu ri po. Otja kongaro ndji u ri mo, mo yenene okuṱakamisa eronga ra Jesus ndi ri ri mu Mateus ekondwa 18. (Lesa Mateus 18:15-17.) Nungwari o hakahana okutjita ozondando indu tji wa pindike. Kumba ku Jehova okukuvatera kutja u pore momuinyo nokutjiwa kutja mo sokutjita vi okutjinda ouzeu mbwo. O isa okukara nongamburiro momapanga woye. Nu yakura ombatero aihe ndji mo pewa. (Omiano 17:17) Otjiṋa otjinanḓengu tjinene, okukongorera omirari mbi ri mEmbo ra Mukuru.—Omiano 3:5, 6.

14. Omozongaro zeṋe 2 Timoteus 1:12-16; 4:6-11, 17-22 mu mari ku yanḓiparisa?

¹⁴ Hapo eṱunḓu roye ri kupirukira mena rokutja u karera Jehova? Poo wa tura  mehi oviungura vyovakarere va Jehova tjiva mu vi yandjerwa poo mu vi ha yandjerwa oparukaze? Tji pe ri nao, ove mape ya otunduuzwa indu tji wa lese 2 Timoteus 1:12-16, 4:6-11, 17-22. * Paulus wa tjanga Omatjangwa ngo ngunda e ri motjovakamburwa.

15. Ovikwaye mbi mo yenene okupura Jehova?

¹⁵ (1) Kumba. Ngunda au hiya lesa otupa two, raera Jehova ohunga nomauzeu noumuṋe woye auhe. Okuzambo ningira Jehova okukuvatera okupaha omirari momahungi ohunga noviṋa mbya tjitwa ku Paulus mbi mavi ku vatere okutjiwa kutja ngo tjite vi indu tji u ri mouzeu.

16. Ovikwaye mbya tjitwa ku Paulus?

¹⁶ (2) Tjita tjimuna u ri mbo. Ripura kutja andakuzu oove Paulus. Paulus wa kutwa noviketanga nu u ri motjovakamburwa moRoma. Eye wa rora okukara motjovakamburwa rukuru, posi yokutja otjikando hi ma tjiwa kutja ma zepewa. Ovandu tjiva mbu va ri puna ye ve mwesa, nu eye wa urwa tjinene.—2 Tim. 1:15.

17. Paulus a tja tjita vi?

¹⁷ Paulus e tje ripurira koviṋa mbya tjitwa morukapitaveze, nokumuna kutja andakuzu kaari Omukriste omupyuke eye katja kamburwa. Eye a tja pindikira ovarumendu vorukondwa rwa Asia mbe mwesa, nu a isa okukara nongamburiro momapanga we warwe. Posi yokutja Paulus ka tjitire oviṋa mbyo. Ongwaye eye tjaari nongamburiro kutja omapanga we maye rire omaṱakame ku ye nokutja Jehova me mu sere ondaya?

18. Paulus wa tjita vi mongaro onḓeu ndjo?

¹⁸ (3) Okuripurira ko oukoto. Ripura nepuriro ndi, “Omomuano uṋe Paulus me rivatera omuini?” Nandarire kutja Paulus aa tjiwa kutja ma ṱu, eye ka zembire ounahepero wokuyandja ohiviro ku Jehova. Nu wa kayenda komurungu okuripurira komuano mu ma yenene okuyanḓiparisa varwe. Eye we riyamekere ku Jehova mokukumba ku ye aruhe. (2 Tim. 1:3) Paulus kee ripurire kovakambure mbe mwesa. Nungwari, wa ri nondangi tjinene komuano omapanga we mu ve mu pa omasa nokumuvatera. Nu wina Paulus wa kayenda komurungu okukonḓonona Embo ra Mukuru. (2 Tim. 3:16, 17; 4:13) Nu tjinenenene, wa ri nongamburiro okuura kutja Jehova na Jesus ve mu suvera. Wina wa ri nongamburiro kutja owo mave mu sere ondaya kouṱakame we, nokutja kave mwesire.

19. Omomuano uṋe Jehova ma vatera Paulus?

¹⁹ Jehova wa rakiza Paulus kutja ma tuurunga ondatumisire mena rokurira Omukriste. (Oviung. 21:11-13) Omomuano uṋe Jehova ma vatera Paulus? Eye wa zira ozongumbiro za Paulus, nu we mu pa omasa. (2 Tim. 4:17) Paulus wa raerwa kutja, mena rokutja wa ungura oukukutu eye ma munu otjisuta tje. Jehova wina wa ungurisa omapanga wa Paulus okumuvatera.

20. Omomuano uṋe mu matu yenene okuhorera kongamburiro ya Paulus, otja kOvaroma 8:38, 39?

²⁰ (4) Okuṱakamisa. Ripura omuini kutja, ‘Omomuano uṋe mu me yenene okuhorera ku Paulus?’ Tjimuna Paulus, matu sokuundjira ko okutatumisiwa mena rokutja tu karera Jehova. (Mar. 10:29, 30) Kutja tu rire ovaṱakame ku Jehova indu tji tu ri kehi yomauzeu, eṱe matu hepa okukayenda komurungu okukumba ku ye nokukonḓonona Embo re aruhe. Nu matu sokuzemburuka aruhe kutja otjiṋa tjimwe otjinanḓengu tji matu yenene okutjita okuyandja ohiviro ku Jehova. Matu yenene okukara nongamburiro kutja Jehova ke nokutwesa ko nokutja kape nomundu ngu ma yenene okutupora korusuvero rwe kweṱe.—Lesa Ovaroma 8:38, 39; Hebr. 13:5, 6.

21. Ovikwaye mbya vatera Aya na Hector okutuurunga omauzeu ngu va muna?

²¹ Ovihorera vyOmbeibela mavi yenene okutupa omasa kutja tu tuurunge ongaro aihe mu tu ri. Otjotjihorera, Aya omukandjira ngwa tura mehi ndi Japan, wa tja otjihorera tja Jona tje mu vatera kutja ma ise okutira okuzuvarisa momivanda vyotjihuro. Hector, omutanda ngwa tura mehi ndi Indonesia wovanene mbe ha karere Jehova, wa tja otjihorera tja Rut tji mu vatera kutja ma vange okurihonga ohunga na Jehova nokumukarera.

22. Ovikwaye mbi mavi ku vatere kutja u mune ouwa momanyando wOmbeibela, poo membo ndi “Horereye kongamburiro yawo”?

²² Ovihorera vyOmbeibela mbi mavi kupe omasa mo vi vaza pi? Ouvidio wetu, omanyando omapuratenwa nembo ndi “Horereye kongamburiro yawo” mavi tu vatere. * Ngunda au hiya tarera, okupuratena poo okulesa oviṋa mbya rongerisiwa nawa, ningira Jehova okukuvatera okumuna omapu omananḓengu ngu mo yenene okuungurira ko. Ritwa mozongaku zomundu ngu mo lese. Ripurira ko oukoto koviṋa ovakarere va Jehova mba mbi va tjita, nomuano eye me ve vatera okutuurunga omauzeu. Okuzambo ungurisa oviṋa mbi we rihongo otja kongaro ndji u ri mo. Kara nondangi kombatero Jehova ndji me ku pe. Nu raisa kutja u nondangi mokupaha omiano vyokuyanḓiparisa nokuvatera varwe.

23. Jehova wa kwizika kutja me tu tjitire ye otja ku Jesaja 41:10, 13?

²³ Mena rokutja ouye u ri kehi ya Satan, ehupo povikando ri rira ezeu nu nandarire atu ha tjiwa kutja ngatu tjite vi. (2 Tim. 3:1) Posi yokutja ka hepero okurikenda poo okutira. Jehova u tjiwa omauzeu ngu tu muna. Indu tji matu hepa ombatero, eye wa kwizika kutja me tu vatere. (Lesa Jesaja 41:10, 13.) Eṱe tu nongamburiro kutja Jehova me tu vatere, nu Ombeibela i tu pa omasa ngu matu hepa okutuurunga omauzeu ngamwa aehe.