1-2. Ouṋe ngu ma yenene okuvatera omuhongwa wOmbeibela okuvaza pondondo yokupapitisiwa?

AMY ngwa tura mehi ndi Fiji wa tja: “Ami mba suverere oviṋa mbye rihongo okuza momahongero wandje wOmbeibela. Ami ee tjiwa kutja oviṋa mbi me rihongo ouatjiri. Posi yokutja, indu tji mba uta okukara tjinene pu novakambure, kwe ndji vatera kutja mbi tjite omarundurukiro nokupapitisiwa.” Otjihorera tja Amy matji tu hongo epu enanḓengu. Indu omuhongwa wOmbeibela tji ma munu ombatero okuza ku varwe mombongo, ku mu vatera tjinene okuvaza pondondo yokupapitisiwa.

² Omuzuvarise auhe ma yenene okuvatera imba ovape okurira orupa rwombongo. (Ef. 4:16) Omukandjira wena Leilani, ngwa tura mehi ra Vanuatu, wa tja: “Omunwe umwe kau toora ona. Momuano otjingewo, ami mbi muna kutja ku kambura ombongo aihe okuyeta omundu mouatjiri.” Tjimuna ovanene, ovazamumwe, omapanga weṱunḓu nozomiṱiri poskole tji ve heperwa po okuvatera omuatje okurira omundu omunene womerizirira. Owo ve tjita nao mokutunduuza omuatje nokumuhonga oviṋa ovinanḓengu mehupo. Momuano otjingewo, ovakambure mombongo mave yenene okuyandja ondunge, okutunduuza nokuraisa otjihorera otjiwa komuhongwa wOmbeibela, okumuvatera kutja ma vaze pondondo yokupapitisiwa.—Omiano 15:22.

3. Ove we rihongo tjike okuza komambo wa Ana, Dorin na Leilani?

³ Ongwaye omuzuvarise ngu nomuhongwa wOmbeibela tji ma sokutjaterwa indu varwe mombongo tji mave vatere omuhongwa we wOmbeibela? Omukandjira wapeke wena Ana, ngwa tura mehi ndi Moldova, wa tja: “Omuhongwa wOmbeibela u hepa ombatero  onyingi nu irira ouzeu tjinene komumuhonge okumupa ombatero ndjo erike.” Omukandjira wapeke ngwa tura mehi otjingero wena Dorin, wa tja: “Povikando, ovazuvarise varwe ve hungira oviṋa mbi ṱuna komutima womuhongwa, oviṋa ami mbi mbi ha rora okuripurira ko.” Leilani ngwa tamunwa rukuru wina wa tja: “Indu ovakambure tji mave raisire omuhongwa orusuvero, ku mu vatera kutja ma mune kutja oweṱe ovakarere va Jehova tjiri.”—Joh. 13:35.

4. Matu kahungirira kuye morupa ndwi?

⁴ Ove mape ya oripura kutja, ‘Ami me vatere vi omuhongwa wOmbeibela okukurisa oupanga we kuna Jehova, indu tje heri ami ngu mbi mu honga Ombeibela?’ Ngatu tare ku imbi mbi matu yenene okutjita indu tji twa ṋangwa okukara pomahongero womuhongwa wOmbeibela. Nokutja eṱe matu yenene okutjita vi indu eye tja utu okukara pozombongarero zombongo. Nu wina matu katara kutja ovanene vombongo mave yenene vi okuvatera ovahongwa vOmbeibela okuvaza pondondo yokupapitisiwa.

5. Otjikwaye tji mo yenene okutjita indu tji wa ṋangwa okukara pomahongero womuhongwa wOmbeibela?

⁵ Pomahongero womuhongwa wOmbeibela, omumuhonge ongu nomerizirira wokumuvatera okuzuva Embo ra Mukuru. Indu omumuhonge tje ku ṋanga okuyenda puna ye, omerizirira woye okumuvatera. (Omuzuv. 4:9, 10) Hapo ovikwaye mbi mo yenene okutjita okurira omuvatere omuwa indu omuhongwa tji me rihongo Ombeibela?

6. Indu tji wa ṋangwa komahongero wOmbeibela, ove mo yenene vi okuṱakamisa omurari mbu ri mOmiano 20:18?

⁶ Rirongerisa komahongero wOmbeibela. Rutenga, ningira omuzuvarise okukuraera oviṋa ohunga nomuhongwa. (Lesa Omiano 20:18.) Ove mo yenene okupura kutja, “Ovikwaye mbi mo tjiwa ohunga nomuhongwa? Ehongwa riṋe ndi mamu ke rihonga? Mo vanga kutja omuhongwa me rihonge ye okuza kehongwa ndi? Hapo pe noviṋa mbi me sokuhungira poo mbi mbi ha sere okuhungira ngunda amatu rihongo? Ovikwaye mbi mape ya avi tunduuza omuhongwa okukurisa ongamburiro ye mu Jehova?” Otjingaperi kutja omuzuvarise ke nokukuraera oviṋa oviundikwa ohunga nomuhongwa, posi yokutja imbi mbi me ku raere mape avi ku vatere. Omuhindwa wena Joy, u hungira ohunga noviṋa mbyo puna imba mbu va i pamwe komuhongwa we wOmbeibela. Eye wa tja: “Okukara nomahungi otja ingo ku nomundu ngu matu i pamwe, ku tjita kutja eye ma kare nonḓero momuhongwa, nokutjiwa kutja ma yenene vi okukara norupa indu tji matu rihongo.”

7. Ongwaye tji mo sokurirongerisa indu tji mo i ku nomuzuvarise komuhongwa we?

⁷ Indu tji wa ṋangwa okukara norupa momahongero wOmbeibela, ma rire nawa tji we rirongerisa komurungu yoruveze. (Esra 7:10) Omurumendu omukambure Dorin ngwa tamunwa rukuru,  wa tja: “Ami mbi tjaterwa indu omundu ngu twa piti pamwe tje rirongerisa komerihongero wOmbeibela. Indu tja tjiti nao, eye ma yenene okuyeta omapu ngu maye vatere omuhongwa.” Nu omuhongwa mape ya a munu omuano eṋe amuyevari mu mwe rirongerisa nawa, nu atji mu tunduuza okutjita nao. Nandarire kutja ko nokuyenena okurirongera nawa kehongwa ndo, ove mo yenene okuungurisa oruveze oruṱiṱi okupaha omapu omananḓengu.

8. Mo yenene vi okukumba momuano mbu mau ṱunu komutima womuhongwa?

⁸ Mena rokutja ongumbiro orupa orunanḓengu momerihongero wOmbeibela, onawa okuripurira ko komurungu woruveze kutja mo tamuna ye mongumbiro yoye indu tji wa ningirwa okukumba. Indu tji wa tjiti nao, ongumbiro yoye mape ya ai ṱunu komutima womuhongwa. (Eps. 141:2) Hanae, ngwa tura mehi ndi Japan, ngamba u zemburuka ozongumbiro zomukazendu omukambure ngwe ya pu nomumuhonge wOmbeibela. Eye wa tja: “Ozongumbiro ze aaze raisa kutja u noupanga wopopezu kuna Jehova, nu ee vanga okukara tjimuna ye. Ami wina ee munu orusuvero ndwe naro indu tja tamuna ena randje mozongumbiro ze.”

9. Otja ku Jakobus 1:19, mo yenene vi okuvatera omuhongwa womukweṋu ngu mwa piti pamwe?

⁹ Vatera ingwi ngu ma hongo. Omukandjira wapeke ngwa tura mehi ndi Nigeria wena Omamuyovbi wa tja: “Omukambure omukweṋu ngu mwe ya pamwe, u vatera tjinene indu tja puratene nawa momerihongero wOmbeibela. Eye u hungira oviṋa mbi mavi ṱunu komutima womuhongwa, posi yokutja ka hungire tjinene nu u tjiwa kutja eye ka ngu ri omuhonge womuhongwa ngo.” Kunao, oruṋe tji mo sokuhungira nu oruṋe tji mo sokumwina? (Omiano 25:11) Puratena nawa indu omuzuvarise nomuhongwa we tji mave hungire. (Lesa Jakobus 1:19.) Tji wa tjiti nao, mo yenene okuvatera oruveze ndu ri ro. Otjingaperi kutja, ove rutenga mo sokuripura ngunda au hiya hungira. Otjotjihorera, ko sokuhungira tjinene, okurya eraka ra ingwi ngu ma hongo poo okuuta okuhungirira kepu rarwe. Posi yokutja, mo yenene okuhungira otjiṋa otjisupi, okuyandja otjisasanekero poo okupura epuriro kutja u vatere omuhongwa okuzuva epu nawa. Povikando tjiva, mape ya o ha tjiwa kutja ngo tje vi ohunga nepu ndo. Posi yokutja, indu tji wa tanga omuhongwa nokumuraisira onḓero, ove mo mu vatere tjinene kutja ma kayende komurungu okukurisa oupanga we kuna Jehova.

10. Mo yenene vi okuvatera omuhongwa wOmbeibela indu tji we mu raere ohunga naove omuini?

¹⁰ Mu raera ohunga naove omuini. Indu tji mape ya a ku vatere omuhongwa, raera omuhongwa ousupi ohunga nomuano mbwe rihonga ouatjiri, omatokero ngu wa tuurunga poo omuano Jehova mee ku vatera mehupo roye. (Eps. 78:4, 7) Oviṋa mbi mo mu raere mape ya avi rire oviṋa mbi ma hepa okuzuva oruveze ndwo. Ovyo mape ya avi pamisa ongamburiro ye poo okumutunduuza kutja ma kayende komurungu okuvaza pondondo yokupapitisiwa. Nu mavi yenene okumuraisira  omuano mu ma yenene okutuurunga omatokero ngu ma munu. (1 Petr. 5:9) Omukandjira wena Gabriel, ngwa tura mehi ndi Brazil, u zemburuka oviṋa mbye mu vatera indu tjee rihongo Ombeibela. Eye wa tja: “Indu tjee puratene koviṋa ovakambure mbi va tuurunga, tje ndji honga kutja Jehova u tjiwa omauzeu ngu tu muna. Nokutja indu owo tji mave yenene okuyetuurunga, ami wina me yenene okuyetuurunga.”

11-12. Ongwaye tji matu sokuyakura ovahongwa vOmbeibela norusuvero mbe ya kozombongarero zombongo?

¹¹ Omuhongwa wOmbeibela kutja ma vaze pondondo yokupapitisiwa, eye ma sokukara pozombongarero zombongo aruhe nokumuna ouwa mu zo. (Hebr. 10:24, 25) Ingwi ngu mu honga, mape ya ongu ma rire omutenga okumuṋanga kombongarero yombongo. Indu omuhongwa tja utu okuya kozombongarero zombongo, eṱe atuhe matu sokumutunduuza kutja ma kayende komurungu okutjita nao. Omomiano viṋe mu matu yenene okutjita nao?

¹² Yakura omuhongwa norusuvero. (Rom. 15:7) Indu omuhongwa tja yakurwa nawa pozombongarero zombongo, eye mape ya a kayenda komurungu okuya kuzo. Kutja omuhongwa e heri kara, mu korisa norusuvero nokumuwanisa kuna varwe. Hungira kuna ye, mena rokutja ingwi ngu mu honga mape ya ngunda kaa vaza poo u nomerizirira warwe ngu ma ungura. Yandja ombango ku imbi mbi ma hungire, nu raisa onḓero mu ye. Omuano mu mo yakura omuhongwa norusuvero, maku mu vatere vi? Ngatu tare kotjihorera tja Dmitrii, ngwa papitisiwa ozombura ozonḓiṱi nḓa kapita nu ngu karera otjomuvatere wombongo. Indu tji ma zemburuka ohunga nombongarero ye ondenga, eye wa tja: “Omurumendu omukambure we ndji muna amba kurama pendje yEtuwo rOmerikotameneno ame tira, nu wa hita puna ami moukoto. Ovengi veya kwami okundjikorisa. Ami tjiri kee undjire ko. Mba tjaterwa tjinene nga tje zeri kutja ombongarero yombongo i tjitwe eyuva arihe. Ami hiya rora okukara mongaro tjimuna ndjo.”

13. Otjihorera tjoye otjiwa matji vatere vi omuhongwa wOmbeibela?

¹³ Kara notjihorera otjiwa. Omuano mbu mo ritjindi maku yenene okuvatera omuhongwa wOmbeibela okukara nongamburiro kutja oweṱe Ovakriste vatjiri. (Mat. 5:16) Vitalii, omukandjira ngwa tura moMoldova, wa tja: “Ami mba muna omuano varwe mombongo maave hupu, oumune nomeritjindiro wawo. Otjiṋa hi tje ndji pa ongamburiro kutja Ovahongonone va Jehova tjiri ongamburiro yatjiri.”

14. Omomuano uṋe otjihorera tjoye mu matji vatere omundu okukayenda komurungu okuvaza pondondo yokupapitisiwa?

¹⁴ Ngunda omuhongwa wOmbeibela e hiya papitisiwa, eye ma hepa okuṱakamisa oviṋa mbi me rihongo. Kaupupu okutjita nao. Posi yokutja, indu omuhongwa tji ma munu omuano omirari vyOmbeibela mu vi ku vatera indu tji mo vi  ṱakamisa, eye mape ya a vanga okuhorera kove. (1 Kor. 11:1) Tara kotjihorera tja Hanae, ngwa tamunwa rukuru. Eye wa tja: “Ovarumendu novakazendu ovakambure aave ṱakamisa oviṋa ami mbye rihongo. Ami mba muna omuano mu me yenene okurihongera ku wo mokutunduuza varwe, okuveisira nokuraisa orusuvero. Owo aruhe aave hungire oviṋa oviwa ohunga na varwe. Ami ee vanga okuhorera kuwo.”

15. Omiano 27:17 mari tu vatere vi okumuna ounahepero wokurira omapanga womuhongwa otja tji ma kayenda komurungu okukara pozombongarero zombongo?

¹⁵ Rira epanga romuhongwa. Otja omuhongwa tji ma kayenda komurungu okukara pozombongarero zombongo, kayende komurungu okumuraisira onḓero. (Fil. 2:4) Ove mo yenene okumuraera omuano mbu nondjoroka mena romarundurukiro nga tjita. Mo yenene okumupura ohunga nomerihongero we wOmbeibela, eṱunḓu re noviungura vye. Posi yokutja, u sokutjevera kutja ohe mu pura omapuriro ngu maye mu ṱisa ohoṋi. Omahungi otja ingo mape ya aye tjiti kutja mu kare noupanga ouwa kumwe. Indu tji wa tjiti nao, mo vatere omuhongwa okuvaza pondondo yokupapitisiwa. (Lesa Omiano 27:17.) Hanae nai omukandjira woruveze aruhe. Tji ma zemburuka indu tja uta okuyenda kozombongarero zombongo, eye wa tja: “Indu tji mba uta okukara nomapanga mombongo, tja tjita kutja mbi kare nonḓero okuyenda kozombongarero zombongo, nandarire indu tji mba urwa. Ee tjaterwa okukara pu nomapanga wandje omape, nu tje ndji vatera kutja mbi ise okurira omapanga kuna imba mbe he rikotamene ku Jehova. Ee vanga okutumbuka popezu na Jehova novakambure ovakwetu. Kunao, mba tya okupapitisiwa.”

16. Omomiano viṋe vyarwe mu mo yenene okuvatera omuhongwa okurimuna kutja eye orupa rwombongo?

¹⁶ Otja omuhongwa tji ma kayenda komurungu okukurisa oupanga we kuna Jehova nokutjita omarundurukiro, mu vatera kutja ma mune kutja eye orupa rwombongo. Ove mo yenene okutjita nao mokumusekirisa po yoye. (Hebr. 13:2) Denis, ngwa tura moMoldova, u zemburuka oruveze ndwee rihongo, eye wa tja: “Povikando tjiva, ami nomukazendu wandje aatu ṋangwa i yovakambure pozoyawo. Owo aave tu raere omuano Jehova me ve vatera, nu aa tji tu tunduuza tjinene. Eṱe twa uta okukara nongamburiro kutja matu vanga okukarera Jehova nokutja matu kara nehupo ewa indu tji twa tjiti nao.” Indu omuhongwa tja rire omuzuvarise ngu hiya papitisiwa, ove mo yenene okupita kuna ye motjiungura tjokuzuvarisa. Diego, omuzuvarise okuza koBrazil, wa tja: “Ovakambure ovengi aave ndji ṋanga okupita motjiungura tjokuzuvarisa. Momuano mbo, ee yenene okuvetjiwa nawa. Tji tja tjita kutja mbi rihonge ovingi nokutumbuka popezu na Jehova na Jesus.”

17. Ovanene vombongo mave yenene vi okuvatera ovahongwa vOmbeibela?

¹⁷ Tjita oruveze kovahongwa vOmbeibela. Vanene vombongo, indu tji mamu raisa orusuvero  nokurikendera ovahongwa, eṋe mamu yenene okuvevatera kutja ve vaze pondondo yokupapitisiwa. Ove mo yenene okuhungira aruhe ku novahongwa vOmbeibela pozombongarero zombongo. Owo mave munu kutja u nonḓero mu wo indu tji wa zemburuka ena rawo, tjinene indu tji va utu okuyandja omaziriro. Ove wina mo yenene okutjita oruveze okupita pu nomuzuvarise indu tji me ke rihonga pu nomuhongwa we. Okutjita oviṋa mbyo mape ya a ku vatere omuhongwa tjinene. Omukandjira wena Jackie, ngwa tura moNigeria, wa tja: “Ovahongwa ovengi kave undjire ko indu tji va tjiwa kutja omundu ngu twa ri pamwe omunene wombongo. Omuhongwa umwe wOmbeibela wa tja: ‘Omuhonge wokereka yandje kamaa roro okutjita nao. Eye u ryangera imba mba tumba nu mbu mave yenene okumusuta.’” Omuhongwa ngo nai, u kara pozombongarero zombongo.

18. Ovanene vombongo mave yenene okuungurisa vi omambo nge ri mOviungura 20:28?

¹⁸ Honga nokutunduuza omuzuvarise. Ovanene vombongo ve nomerizirira omananḓengu wokuvatera ovazuvarise okuungura nawa motjiungura tjawo tjokuzuvarisa, tji matji kamburire mo okurihonga Ombeibela ku novandu. (Lesa Oviungura 20:28.) Indu omuzuvarise tji ma tira okuhonga omuhongwa we komurungu woye, ningira okumuvatera. Jackie, ngwa tamunwa rukuru, wa tja: “Ovanene vombongo aruhe ve ndji pura ohunga novahongwa vandje vOmbeibela. Indu tji mbi nouzeu wokuhonga omundu, owo ve ndji vatera mokundjipa ondunge.” Ovanene vombongo mave vatere tjinene indu tji va tunduuza ovazuvarise. (1 Tes. 5:11) Jackie wa tja: “Ami mbi tjaterwa indu ovanene vombongo tji mave ndji tunduuza nokundjiraera kutja ve nondangi komuano mbu mbi ungura oukukutu. Omambo wawo ya sana nokunwa omeva omatarazu tji wa ṱonyota. Omambo wawo omawa ngo, ye ndji vatera okumuna kutja mbi ungura otjiungura otjiwa okuhonga ovandu Ombeibela. Nu otjiungura ho tji ndji pa ondjoroka onyingi.”—Omiano 25:25.

19. Eṱe atuhe matu yenene okukara nondjoroka iṋe?

¹⁹ Nandarire kutja katu nomuhongwa wOmbeibela, eṱe matu yenene okuvatera omundu warwe okuvaza pondondo yokupapitisiwa. Nokuhinokuhungira tjinene, eṱe matu yenene okuvatera ingwi ngu ma hongo indu tji twe rirongerisa nawa. Eṱe matu yenene okurira omapanga wovahongwa indu tji veya pozombongarero zombongo, nu matu yenene okurira ovihorera oviwa ku wo. Ovanene vombongo mave yenene okutunduuza ovahongwa. Nu mave yenene okutunduuza ovazuvarise mokuvehonga nokuvetanga. Tjiri tu kara nondjoroka onyingi indu tji matu yenene okutjita otjiṋa, nandarire kutja otjiṱiṱi okuvatera omundu okusuvera nokukarera Jehova.