1. Ongwaye Jesus tja kumba ku Jehova okutjevera ovahongewa ve?

ONGUROVA osenina ngunda e hiya ṱa, Jesus ee ripura ohunga nomauzeu ngu mape ya ovahongewa ve ave munu. Mena rokutja wa suverere ovahongewa ve, Jesus wa ningira Jehova kutja me “ve tjevere ku ingwi Omurunde.” (Joh. 17:14, 15) Jesus aa tjiwa nawa kutja tja yaruka meyuru, Satan Omudiaboli ma kayenda komurungu okurwisa imba mbe vanga okukarera Jehova. Kunao, ovakarere va Jehova mave hepa okutjeverwa.

2. Ongwaye tji tu nongamburiro kutja Jehova ma zuvire ozongumbiro zetu?

² Jehova wa zira ongumbiro ya Jesus mena rokutja wa suvera Omuna we. Indu tji twa kondjo pu matu yenene okuyorokisa Jehova, eye wina me tu suvere. Nu ma yandja ombango kozongumbiro zetu, indu tji matu ningire ombatero nondjeverero. Jehova ma kayenda komurungu okutjevera ovanatje ve norusuvero, otja Otjiuru tjeṱunḓu tji tji rikendera eṱunḓu ratjo. Indu tje ha tjitire nao, maku zunḓa ena re.

3. Ongwaye tji tu hepa ondjeverero okuza ku Jehova ndino?

³ Eṱe tu hepa ondjeverero okuza ku Jehova, nu tjinenenene moruveze ndwi. Satan wa rambwa meyuru nu “u nomazenge omanene.” (Omavan. 12:12) Eye u tjita kutja ovandu ve mune kutja, indu tji mave tu tatumisa owo mave “karere Ndjambi.” (Joh. 16:2) Varwe mbe ha karere Mukuru ve tu tatumisa, mena rokutja twa panguka ku wo. Nandarire kutja ovandu mave tu tatumisa, eṱe katu tira. Omena ratjike? Mena rokutja Embo ra Mukuru ri tja: “Muhona Eye omuṱakame; Eye me mu zeuparisa nu me mu tjevere ku ingwi Omurunde.” (2 Tes. 3:3) Omomiano viṋe Jehova me tu tjevera? Matu kahungirira koviṋa vivari eye mbye tupa.

4. Otja kOvaefese 6:13-17, ovikwaye Jehova mbye tu pa okututjevera?

⁴ Jehova we tu pa ovirwise vyombepo, mbi mavi yenene okututjevera komatjendje wa Satan. (Lesa Ovaefese 6:13-17.) Ovirwise vyombepo mbi okuza ku Mukuru vi nomasa nu mavi yenene okutuvatera. Posi yokutja, matu sokukayenda komurungu okuungurisa ovirwise avihe, indu tji matu vanga kutja vi tu tjevere. Hapo otjirwise atjihe tji kuramena poye? Ngatu katare kotjirwise atjihe kourike watjo.

5. Ekwamo rouatjiri ri kuramena poye, nu ongwaye tji matu sokurihwikika?

⁵ Ekwamo rouatjiri ri kuramena po ouatjiri mbu tu muna mEmbo ra Mukuru Ombeibela. Ongwaye tji matu sokuzara ekwamo ndi? Mena rokutja Satan ‘oihe yovizeze avihe.’ (Joh. 8:44) Eye wa kora ovizeze oure wozombura ozengi nu wa pukisa “ouye auhe.” (Omavan. 12:9) Posi yokutja, ouatjiri mbu ri mOmbeibela u tu tjevera kutja atu ha pukisiwa. Omomuano uṋe mu tu zara ekwamo rouatjiri ndi? Eṱe tu tjita nao mokurihonga owatjiri ohunga na Jehova, okurikotamena ku ye “mOmbepo na mouatjiri,” nokutjita imbi mbi ri ovisemba oruveze aruhe.—Joh. 4:24; Ef. 4:25; Hebr. 13:18.

6. Ombanda yotjitenda yomorukoro yousemba i kuramena poye, nu ongwaye tji matu sokuizara?

⁶ Ombanda yotjitenda yomorukoro yousemba i kuramena po omirari vya Jehova vyousemba. Ongwaye tji matu sokuzara ombanda ndjo? Tjimuna ombanda yomorukoro yotjitenda tji i tjevera omutima womurwe wovita, ombanda yomorukoro yotjitenda yousemba i tu tjevera kokutja oviṋa vyouye ourunde mbwi avi he tu zunḓa. (Omiano 4:23) Jehova u vanga kutja tu mu suvere nokumukarera nomutima auhe. (Mat. 22:36, 37) Kunao, Satan u kondja kutja tu ise okukarera Jehova nomutima wetu auhe, mokutjita kutja tu suvere oviṋa mouye mbwi Jehova mbya tonda. (Jak. 4:4; 1 Joh. 2:15, 16) Nu imbyo tji vi ha ungurire, eye u kondja okutuṋiṋikiza okutjita oviṋa Jehova mbye ha vanga.

7. Omomuano uṋe mu tu zara ombanda yotjitenda yomorukoro yousemba?

⁷ Eṱe tu zara ombanda yotjitenda yomorukoro yousemba mokuyakura omirari vya Jehova nokuhupa otja ku vyo. (Eps. 97:10) Ovandu tjiva mape ya ve muna kutja omirari vya Jehova, kavi ve pe ouyara wokutjita oviṋa avihe mbi mave vanga. Posi yokutja, indu tji twa isa okuṱakamisa omirari vyOmbeibela mehupo retu, eṱe matu sana ku nomurwe wovita ngu hukura ombanda ye yotjitenda yomorukoro ngunda e ri movita mena rokutja ma munu kutja onḓeu. Tjiri okutjita nao ouyova. Posi yokutja indu tji twa suvera Jehova, omatwako we kamaaye rire ‘omazeu okuyeṱakamisa.’ Nungwari maye tu yama.—1 Joh. 5:3.

8. Omerirongerero wokuzuvarisa ombuze ombwa yohange otja ozongaku kozombaze ku heya tjike?

⁸ Paulus wina we tu tunduuza okuzara omerirongerero wokuzuvarisa ombuze ombwa yohange otja ozongaku kozombaze. Omambo ngo maye hee kutja, matu sokurirongera aruhe okuzuvarisa ombuze ombwa yOuhona. Indu tji twa raere varwe ombuze yOmbeibela, ongamburiro yetu i harera ko omasa. Eṱe tu yanḓiparisiwa indu tji matu munu omuano ovakarere va Jehova mouye ongondoroka, mu ve ungurisa oruveze ndu va munu okuzuvarisa akuhe ku ve ri. Otjotjihorera, owo ve zuvarisa poviungura poo poskole, indu tji va i kondjuwo nondjuwo poo kotuveze twozongetjefa. Nu wina indu tji mave karanda, tji mave karyangera ovazamumwe mbe he ri Ovahongonone va Jehova poo tji mave hungire ku novandu mbu mave tjiwa. Indu tji matu tira nu atu isa okuzuvarisa, eṱe matu sana ku nomurwe wovita ngu hukura ozongaku ze ngunda e ri movita. Omurwe wovita tja tjiti nao u hihamisa  ozombaze ze. Kunao, ma rire ouzeu kuye okuritjevera indu tji ma rwisiwa nu ma rire ouzeu okukongorera omarakiza ngu ma munu okuza komumuhongore.

9. Ongwaye tji matu sokutjinda oruvao rwongamburiro?

⁹ Oruvao rwongamburiro ru kuramena po ongamburiro ndji tu nayo mu Jehova. Tu nongamburiro kutja eye ma yenenisa omakwizikiro ye aehe. Ongamburiro ndjo mai tu vatere “okuzemisa oviku vyomuriro vyaingwi umwe Omurunde.” Ongwaye tji matu hepa okutjinda oruvao ndwi? Mena rokutja ru tu tjevera kutja omahongero wovandu mba isa okurikotamena ku Mukuru aye he tu pukisa, nokutja atu ha u momuinyo indu ovandu tji mave tu nyekerere. Nokuhinongamburiro, eṱe kamaatu kara nomasa okukara nonḓuviro ku Jehova, indu varwe tji mave tu ṋiṋikiza kutja atu ha kara nonḓuviro ku ye. Ongamburiro yetu i tu vatera kutja atu ha tjiti oviṋa Jehova mbye hi nokuvanga, poviungura poo poskole. (1 Petr. 3:15) Nu i tu vatera kutja atu ha yakura oviungura mbi mavi vetasana otjiuru nomerikotameneno wetu ku Jehova, nandarire kutja mavi sutu ovimariva ovingi. (Hebr. 13:5, 6) Oyo i tu vatera kutja tu karere Jehova nandarire kehi yomapirukiro.—1 Tes. 2:2.

10. Ekori rotjitenda rondjamo ri kuramena poye, nu ongwaye tji matu sokurizara?

 ¹⁰ Ekori rotjitenda rondjamo ri kuramena po omaundjiro Jehova nge tu pa. Omaundjiro wokutja eye ma sere ondaya ku avehe mbe tjita ombango ye nu nandarire tji twa ṱu eye me tu pendura. (1 Tes. 5:8; 1 Tim. 4:10; Tit. 1:1, 2) Tjimuna ekori rotjitenda tji ri tjevera otjiuru tjomurwe wovita, omaundjiro wondjamo ye tjevera ouripura wetu. Omomuano uṋe? Omaundjiro ngo ye tu vatera kutja tu yandje ombango komakwizikiro wa Mukuru nokutja atu he rikende tjinene. Omomuano uṋe mu tu zara ekori rotjitenda ndi? Eṱe tu tjita nao mokukara noumune tjimuna owa Jehova ohunga noviṋa. Otjotjihorera, omaundjiro wetu kaye zikamene koutumbe mbu hi nomazikameno, nungwari ye zikamena ku Mukuru.—Eps. 26:2; 104:34; 1 Tim. 6:17.

11. Engaruvyo rombepo ri kuramena poye, nu ongwaye tji matu sokuriungurisa?

¹¹ Engaruvyo rombepo Embo ra Mukuru, Ombeibela. Engaruvyo ndwo ri nomasa okutjiukisa ovizeze, nokukutura ovandu komahongero woposyo nozongaro ozombi. (2 Kor. 10:4, 5; 2 Tim. 3:16, 17; Hebr. 4:12) Eṱe tu rihonga okuungurisa engaruvyo ndwo nawa, okupitira momakonḓononeno wetu wOmbeibela nomahongero ngu tu muna okuza kotjira tja Mukuru. (2 Tim. 2:15) Jehova wina u tu pa otjirwise tjarwe otjinamasa okututjevera. Nu hapo otjirwise ho ootjiṋe?

12. Otjikwaye tjarwe tji tu hepa, nu ongwaye?

¹² Omurwe wovita omuwa u tjiwa kutja kamaa rwisa otjimbumba otjinene tjovarwe wovita kuye omuini. Nu u tjiwa kutja ma hepa ombatero yovakwao. Momuano otjingewo, eṱe kamaatu yenene okurwisa Satan novemukongorere ve atuyerike, nungwari matu hepa ombatero. Jehova we tu pa ‘ovanangamburiro ovakwetu’ mouparanga wouye okutuvatera.—1 Petr. 2:17.

13. Otja kOvaheberi 10:24, 25, omomiano viṋe ozombongarero zombongo mu ze tu vatera?

¹³ Omuano umwe mu matu yenene okumuna ombatero omokukara pozombongarero zombongo. (Lesa Ovaheberi 10:24, 25.) Eṱe atuhe povikando tu wa momuinyo. Iho tji tja tjitwa, ozombongarero zombongo maze yenene okutuyanḓiparisa. Eṱe tu yanḓiparisiwa i yomaziriro ovakambure ovakwetu ngu ve yandja okuza komutima. Omahungi wawo wOmbeibela novihorera vyovitjitwa vi tu hinga kutja tu kayende komurungu okukarera Jehova. Nu tu yanḓiparisiwa indu tji matu hungire kuna wo komurungu na komaandero wombongarero yombongo. (1 Tes. 5:14) Ozombongarero zombongo ze tjita kutja tu vatere varwe nu otjiṋa ho tji tjita kutja tu kare nondjoroka. (Oviung. 20:35; Rom. 1:11, 12) Ozombongarero zombongo ze tu vatera momiano vyarwe wina. Ozo ze tu vatera kutja tu rire ovazuvarise novahonge ovawa. Otjotjihorera, tu rihonga okuungurisa Oviungurisiwa vyetu vyOkuhonga nawa. Kunao rirongera nawa kozombongarero zombongo nu yandja ombango. Kombunda yombongarero yombongo ungurisa oviṋa mbi we rihongo. Tji wa tjiti oviṋa mbyo mo rire “omurwe omuṱakame wa Kristus Jesus.”—2 Tim. 2:3.

14. Ombatero iṋe yarwe ndji tu muna?

¹⁴ Eṱe wina tu muna ombatero okuza kovaengeli ovengi ovanamasa. Ripura ohunga noviṋa omuengeli umwe mbi ma yenene okutjita. (Jes. 37:36) Nambano ripura na imbi otjimbumba tjovaengeli ovanamasa mbi matji yenene okutjita. Kape nomundu poo ondemone ndji mai yenene okurwisa otjimbumba otjinamasa tja Jehova. Jehova Omunamasaehe. Kunao, indu tje ri puna eṱe, eṱe aruhe matu rire ovanamasa povetupirukire, nandarire kutja owo i vengapi motjivaro. (Ovapang. 6:16)  Tjiri imbwo owatjiri. Ripura notjiṋa ho indu tji wa hungirwa poo tji wa tjitwa otjiṋa i yomundu ngu mu ungura pamwe, ngu mu hita pamwe oskole poo omuzamumwe ngu he ri Omuhongonone wa Jehova. Zemburuka kutja kaove erike motjirwa hi. Ove u kongorera omuhunga wa Jehova.

15. Otja ku Jesaja 54:15, 17, ongwaye tji pe hi nomundu ngu ma yenene okutjaera ovakarere va Mukuru okuzuvarisa?

¹⁵ Ouye mbu ri kehi youvara wa Satan mbwi, u nomapu omengi wokutunyengwa. Eṱe katu yandja oruvara kovira vyopolotika nu katu kara norupa movita. Eṱe tu tjiukisa ena ra Mukuru, nokutja Ouhona we auyerike ombu mau yeta ohange. Nu wina tu ṱakamisa omirari vye vyousemba. Eṱe tu raisira ovandu kutja omuhonapare wouye mbwi omunavizeze nu omuzepe. (Joh. 8:44) Nu tu tjiukisa kutja ouye wa Satan katjisupi mau yandekwa. Posi yokutja, Satan novemukongorere kamaave roro okutjaera otjiungura tjetu tjokuzuvarisa. Nungwari, matu kayenda komurungu okuyozika Jehova, momiano avihe mu matu yenene. Nandarire kutja Satan u nomasa, eye kamaa yenene okutjaera ombuze yOuhona okuvaza kovandu mouye auhe. Imbi mavi yenene okutjitwa uriri, mena rokutja Jehova u tu tjevera.—Lesa Jesaja 54:15, 17.

16. Omomiano viṋe Jehova mu ma yama ovakarere ve mondatumisire ondirise?

¹⁶ Ovikwaye mbi mavi tjitwa moruyaveze rwopopezu? Mondatumisire ondirise, Jehova me tu yama momiano vivari ovihimise. Otjitenga, eye ma yama ovakarere ve ovaṱakame indu tji ma tjiti kutja ozombara zokombanda yehi ze nyone Babilon Otjinene, tji tji kuramena po ozongamburiro azehe zoposyo. (Omavan. 17:16-18; 18:2, 4) Nu okuzambo, mu Armagedon eye ma nyono imba avehe mbe ri orupa rwa Satan.—Omavan. 7:9, 10; 16:14, 16.

17. Okukara popezu na Jehova maku tu vatere vi?

¹⁷ Indu tji twa kayenda komurungu okukara popezu na Jehova, Satan ke nokuyenena okutuhihamisa momuano omukarerere. Nungwari eye ongu ma kanyonwa nga aruhe. (Rom. 16:20) Kunao, hwikika ovirwise vyoye nu kayende komurungu okuviungurisa. O kondjo okurwisa Satan nouye we mbwi kove omuini. Vatera ovakambure ovakweṋu. Nu kongorera omuhunga wa Jehova. Indu tji wa tjiti nao, kara nongamburiro kutja iho womeyuru worusuvero me kupe omasa nu me ku tjevere.—Jes. 41:10.