1. Otja ku Mateus 24:9, ongwaye tji matu sokuundjira ko okutondwa i yovandu mouye?

JEHOVA we tu mema nonḓero yokuraisasana orusuvero. Kunao, indu omundu tji me tu nyengwa, tji tu hihamisa poo nandarire atu tira. Otjotjihorera, omukazendu omukambure wena Georgina, ngwa tura mehi ra Europe, wa tja: “Indu tji mba ri nozombura 14, mama ee ndji tatumisa mena rokutja ee karere Jehova. Ami mba wire momuinyo tjinene nu ee munu kutja mutu kawami omundu omuwa.” * Omurumendu omukambure wena Danylo wa tja: “Indu ovasorondate tji ve ndji tona, ave ndji yamburura nokundjiraera kutja mave ndji hihamisa mena rokutja owami umwe wOvahongonone va Jehova, ami ee tira tjinene.” Ku tu hihamisa momuinyo okutjiwa kutja ovandu kave tu vanga, posi yokutja iho otjiṋa tji tu undjira ko. Jesus wa hunganeka kutja ovandu mave tu tondo.—Lesa Mateus 24:9.

2-3. Ongwaye ovakongorere va Jesus tji ve ha vangwa?

² Ovandu mouye va tonda ovakongorere va Jesus. Omena raye? Mena rokutja tjimuna Jesus, eṱe ‘kaweṱe owouye mbwi.’ (Joh. 15:17-19) Nandarire kutja tu raisa ondengero kouhonapare wovandu, eṱe katu rikotamene kuwo poo koviṋa mbi ungurisiwa okukuramena po ouhonapare wawo. Eṱe tu rikotamena ku Jehova erike. Tu yandja oruvara kousemba wa Mukuru womananeno, posi yokutja Satan ‘norukwato’ rwe kave yakura ousemba mbwo. (Gen. 3:1-5, 15) Eṱe tu zuvarisa kutja Ouhona wa Mukuru auyerike ombu mau zengurura omauzeu wovandu, nokutja Ouhona mbwo moruyaveze rwatjimanga mau ye ku nyona avehe mbe u pirukira. (Dan. 2: 44; Omavan. 19:19-21) Indjo ombuze ombwa ku imba mbe puratena ku Mukuru, posi yokutja ai rire ombuze ombi kovarunde.—Eps. 37:10, 11.

³ Eṱe wina katu vangwa mena rokutja tu kongorera omirari vya Mukuru omisemba. Omirari mbyo vya panguka ku imbi vyovandu mouye. Otjotjihorera, ovandu ovengi kave munu kutja o navi okukara norupa moruvakiro noviṋa oviyaukise mbya tjita kutja Mukuru ma nyone ovandu va Sodom na Gomora. (Judas 7) Mena rokutja katu kara norupa momeritjindiro otja ingo, ovandu ovengi ve tu nyekerera.—1 Petr. 4:3, 4.

4. Ovikaṋena viṋe mbi mavi tupe omasa indu ovandu tji mave tu nyengwa?

⁴ Hapo ovikwaye mbi mavi tu vatere okutuurunga indu ovandu tji mave tu nyengwa nokutuyamburura? Eṱe matu sokukara nongamburiro yomasa yokutja Jehova metu vatere. Tjimuna oruvao, ongamburiro yetu mai “sora okuzemisa oviku vyomuriro vyaingwi umwe Omurunde.” (Ef. 6:16) Posi yokutja eṱe katu hepa ongamburiro uriri. Wina tu hepa orusuvero. Omena raye? Mena rokutja orusuvero “karu handjisiwa.” Orwo ru zara oviṋa avihe nu ru nonḓaro orure nandarire tji matu tatumisiwa. (1 Kor. 13:4-7, 13) Nambano ngatu tare kutja omomuano uṋe orusuvero ku Jehova, kovakambure ovakwetu, nu nandarire kovanavita na eṱe mu maru tu vatere okutuurunga ondatumisire.

5. Ovikwaye Jesus mbyaa yenene okutjita mena rokutja wa suvera Ihe?

⁵ Ongurova ngunda ovanavita va Jesus ave hiye mu zepa, Jesus wa raera ovemukongorere kutja, “Ami mba suvera Tate. Opu mbi zokutjita avihe otja Eye punga ame Ndji rakiza.” (Joh. 14:31) Mena rokutja Jesus wa suvera Jehova, eye wa yenena okutuurunga omarorero. Orusuvero rwetu ku Jehova maru yenene okutuvatera momuano otjingewo.

6. Otja kOvaroma 5:3-5, ovakarere va Jehova ve noumune uṋe ohunga nokutuurunga ondatumisire mouye mbwi?

⁶ Orusuvero ku Mukuru ru vatera ovakarere va Jehova okutuurunga ondatumisire. Otjotjihorera, indu ovaapostele tji va raerwa i yotjira tjOvajuda otjinamasa kutja ngave ise okuzuvarisa, orusuvero rwawo ku Mukuru rwe ve hinga okukara “nonḓuviro ku Ndjambi komeho yokukara nonḓuviro kovandu.” (Oviung. 5:29; 1 Joh. 5:3) Orusuvero otja indwo wina ru vatera ovakambure okurira ovaṱakame, nandarire indu tji mave tatumisiwa i yozohoromende ozonamasa nu nḓe hi nombinḓu komutima. Indu ouye tji mau tu nyengwa eṱe katu u momuinyo, nungwari tu kara nondjoroka.—Oviung. 5:41; lesa Ovaroma 5:3-5.

7. Matu sokuraisa ongaro iṋe indu oveṱunḓu retu tji mave tu pirukire?

⁷ Indu oveṱunḓu retu tji mave tu pirukire, tjiri iho katjiṋa otjipupu okutjinda. Owo tji va munu kutja matu vanga okurihonga ohunga na Jehova, mape ya ave munu kutja twa pukisiwa. Nu varwe mape ya ave munu kutja twa vere oviyoze. (Sasaneka na Markus 3:21.) Owo mape ya ave tu hihamisa kotutu poo ave tu hihamisa nomambo. Katu sokutemwa indu tji matu munu omapirukiro otja ingo. Jesus wa tja: “Ovanavita tjinene na ingwi omuini wonganda mave rire imba ovondjuwo ye omuini.” (Mat. 10:36) Nandarire kutja oveṱunḓu retu ve noumune mbwo ohunga na eṱe, eṱe katu ve vara otjovanavita na eṱe. Nungwari otja orusuvero rwetu ku Jehova pu maru kurire ko, orusuvero rwetu kovandu wina rukurira ko. (Mat. 22:37-39) Posi yokutja, eṱe kamaatu isa okukongorera ozoveta nomirari mbi ri mOmbeibela mena rokutja matu vanga okuritjatisa kovandu.

8-9. Otjikwaye tji tja vatera omukazendu omukambure okuzikama kehi yomapirukiro omazeu?

⁸ Georgina ngwa tamunwa rukuru wa yenena okuzikama nandarire kehi yomapirukiro omazeu okuza ku ina. Georgina wa tja: “Ami na mama  twa uta okurihonga Ombeibela pu nOvahongonone va Jehova. Posi yokutja, kombunda yomieze hamboumwe indu tjee vanga okuyenda kozombongarero zombongo, mama wa uta okundjipirukira. Mba kamuna kutja eye aa hakaene ku novandu mba isa okurikotamena ku Jehova, nu aa ungurisa ovizeze mbyo indu tji ma hungire kuna ami. Eye wina ee ndji hungire omambo omavi, okunana ozondjise zandje, okundjisina nokuimbirahi omambo wandje nga zikamena kOmbeibela. Indu tji mba ri nozombura 15, ami mba papitisiwa. Mama we ndji twara konganda yovanatje omitanda, tjiva vawo mbaave ungurisa ovipurukise nokutjita oviṋa ovivi, otjomuano wokundjitjaera kutja e ha karere Jehova. Kaupupu okutjinda omapirukiro tjinenenene indu tji maye zu komundu ngu ma sokukusuvera nokurikendera ove.”

⁹ Hapo Georgina wa tuurunga vi ouzeu mbwo? Eye wa tja: “Eyuva mama nda uta okundjipirukira tjandje mba mana okulesa Ombeibela aihe. Mba ri nongamburiro okuura kutja mba munu ouatjiri nu ee munu kutja mbi noupanga ouwa kuna Jehova. Ee kumbu ku ye aruhe nu ee ndji zuvire. Indu tjee kara konganda mama ndje ndji hinda ko, omukazendu omukambure ee ndji ṋanga koye nu aatu rihongo pamwe Ombeibela. Ovakambure mombongo ve ndji yanḓiparisa tjinene oruveze ndwo. Ami mba ri orupa romaṱunḓu wawo. Yari oukahu kwami kutja Jehova u nomasa kombanda ya imba mbe tu pirukira, nandarire kutja owo oouṋe.”

10. Tu nongamburiro iṋe mu Jehova Mukuru wetu?

¹⁰ Omuapostele Paulus wa tjanga kutja kape notjiṋa tji matji ‘tupora korusuvero rwa Ndjambi ndu ri orwetu mu Kristus Jesus oMuhona wetu.’ (Rom. 8:38, 39) Nandarire kutja matu munu omauzeu, Jehova aruhe u ri mbo okutuhuhumiṋa nokutupa omasa. Nu otjihorera tja Georgina tja raisa kutja Jehova wina u tu vatera okupitira movakambure ovakwetu mombongo.

11. Omomuano uṋe orusuvero Jesus nda hungira mu Johanes 15:12, 13 mu maru vatere ovahongewa ve? Yandja otjihorera.

¹¹ Ongurova komurungu yonḓiro ye, Jesus wa zemburukisa ovemukongorere okusuverasana. (Lesa Johanes 15:12, 13.) Eye aa tjiwa kutja okuraisa orusuvero rwatjiri ku varwe maku ve vatere kutja ve kare nombwaneno, nu ve tuurunge ondatumisire okuza kovandu mouye. Tara kotjihorera tjombongo moTesalonika. Okuza koruveze indu ombongo ndjo tji ya zikamisiwa, ovakambure mbo aave tatumisiwa. Nungwari ovakambure va raisa otjihorera otjiwa tjouṱakame norusuvero. (1 Tes. 1:3, 6, 7) Paulus we ve tunduuza  kutja ve kayende komurungu okuraisasana orusuvero “tjinene.” (1 Tes. 4:9, 10) Orusuvero maru ve vatere okuhuhumiṋa imba mba u momuinyo nokuvatera imba ovingundi. (1 Tes. 5:14) Owo va ṱakamisa omambo wa Paulus ngo. Nu mena ra nao morutuu rwe orutjavari ndwa tjanga ape ombura imwe kombunda ya nao Paulus wa yenena okutja, “Orusuvero ndu mwa suverasana tjinga amaru takavarere ko.” (2 Tes. 1:3-5) Orusuvero rwawo rwe ve vatera okutuurunga omauzeu nondatumisire.

12. Omomuano uṋe ovakambure mehi rimwe mu va raisasana orusuvero, indu tji kwari ovita?

¹² Ngatu tare kotjihorera tja Danylo, ngwa tamunwa rukuru nomukazendu we. Indu ovita tji vya vaza kokahuro kawo, owo va kayenda komurungu okukara pozombongarero zombongo, okuzuvarisa otja pu mave yenene nokuhaṋasana ovikurya mbi vari navyo ku novakambure ovakwao. Eyuva rimwe ovarwe vovita mbaave tjindi ozondjembo ve ya konganda ya Danylo. Danylo wa tja: “Owo aave vanga kutja mbi ise okurira Omuhongonone wa Jehova. Indu tji mba panḓa ve ndji tona, nave ndji parwisa nohanga okundjiurumisa. Owo va tja mave kotoka okuyekutjera omukazendu wandje. Posi yokutja, ovakambure ovakwetu va hakahana okututwirika momahina kutja tu yende kokahuro karwe. Himee roro okuzemba orusuvero ovakambure ovakwetu ndu ve tu raisira. Indu tji twa vaza mokahuro ngo, ovakambure momaturiro ngo ve tupa ovikurya nave ndji vatere okupaha oviungura nopoṋa pu matu kara. Kunao, kombunda eṱe twa yenena okusekirisa ovakambure ovakwetu mbaave taura okuza kotuveze ku kwari novita.” Ovihorera otja imbyo vi raisa kutja orusuvero ndu tu naro kovakambure ovakwetu maru yenene okutuvatera okutuurunga ondatumisire.

13. Ombepo ondjapuke i tu vatera vi okutuurunga otjiungura tji tu ungurira Jehova, nandarire indu ovandu tji mave tu nyengwa?

¹³ Jesus wa raera ovemukongorere okusuvera ovanavita nawo. (Mat. 5:44, 45) Oupupu okutjita nao? Kako, kaupupu. Posi yokutja, nombatero yombepo ondjapuke okuza ku Mukuru matu yenene okutjita nao. Ovihape vyombepo ya Mukuru vi kamburira mo orusuvero, omuretima, oupore, omutima omuwa nomeritjaerero. (Gal. 5:22, 23) Ovikaṋena mbi vi tu vatera okuhinokutira onyengo. Ovandu ovengi va isa okutupirukira mena rokutja omurumendu, omukazendu, omuatje poo ovararanganda vawo va raisa ovikaṋena mbi. Nu ovengi vawo va rira ovakambure  ovakwetu. Kunao, indu tje rira ouzeu okusuvera imba mbu mave ku nyengwa mena rokutja u karera Jehova, ningira ombepo ondjapuke mongumbiro. (Luk. 11:13) Nu kara nongamburiro kutja okukara nonḓuviro ku Mukuru ootjiṋa otjisemba okutjita aruhe.—Omiano 3:5-7.

14-15. Omomuano uṋe Ovaroma 12:17-21 mu ra vatera Yasmeen okuraisa orusuvero komurumendu we nandarire kutja ee mu pirukire?

¹⁴ Tara kotjihorera tja Yasmeen, ngwa tura morukondwa ndwi Middle East. Indu tja rira umwe wOvahongonone va Jehova, omurumendu we aa munu kutja wa pukisiwa nu aa kondjo okumutjaera okukarera Jehova. Eye we mu yamburura nu aa kondjo okuungurisa ovazamumwe, omuhonge wokereka nondjai okumuraera kutja mave mu tjiti otjiṋa otjivi. Nu wina ee mukuminine kutja eye ongwa teya eṱunḓu rawo. Omurumendu we nandarire aa hungire omambo omavi kovakambure ngunda ave ri mombongarero yombongo. Yasmeen povikando ovingi aa riri mena rokutja kaa tjindwa nawa.

¹⁵ Yasmeen aa munu omahuhumiṋino nomasa okuza kovakambure ovakwao, pEtuwo rOmerikotameneno. Ovanene vombongo aave mu tunduuza kutja ma ṱakamise omambo nge ri mOvaroma 12:17-21. (Lesa.) Yasmeen wa tja: “Kaari oupupu. Posi yokutja, mba ningira Jehova okundjivatera nu e ungura pu me yenene okuṱakamisa imbi Ombeibela mbi mai hungire. Kunao, indu omurumendu wandje tja yumbu ondova owina mokombeisa, ei kohorora. Nu tje ndji hungire omambo omavi poo tje ndji rokohere, ami ee ziri momuano omuwa. Nu indu tja vere ee mu hungu.”

16-17. Ovikwaye mbi mo rihongo okuza kotjihorera tja Yasmeen?

¹⁶ Yasmeen wa muna ouwa mokuraisa orusuvero komurumendu we. Eye wa tja: “Omurumendu wandje wa uta okukara nongamburiro onyingi mu ami mena rokutja aa tjiwa kutja mbi hungira owatjiri aruhe. Eye wa uta okupuratena kwami nondengero indu tji me hungire ohunga nOmbeibela, nu wa yakura okutjita ohange. Nai u ndji tunduuza okuyenda kozombongarero zombongo nu wina tu noupanga ouwa kumwe nu pe nohange ponganda. Mbi zera kutja omurumendu wandje ma yakure ouatjiri nu tu karere pamwe Jehova.”

¹⁷ Otjihorera tja Yasmeen matji raisa kutja ‘orusuvero ru zara oviṋa avihe, ru nomaundjiro moviṋa avihe nu ru nonḓaro orure mu avihe.’ (1 Kor. 13:4, 7) Nandarire kutja okutatumisiwa poo okunyengwa ku hihamisa tjinene, posi yokutja indu tji twa raisire varwe orusuvero, owo mape ya ave isa okutupirukira. Nu tji twa kayenda  komurungu okutjita nao, ku yorokisa omutima wa Jehova. Posi yokutja, nandarire kutja ovetupirukire ve kayenda komurungu okutunyengwa, eṱe matu yenene okukayenda komurungu okukara nondjoroka. Omomuano uṋe?

18. Ongwaye tji matu yenene okukara nondjoroka nandarire kutja matu tondwa?

¹⁸ Jesus wa tja: “Mamu rire ovaṋingandu ovandu tji mave mu tondo.” (Luk. 6:22) Eṱe katu toorora okutondwa. Nu katu tjaterwa indu tji matu tatumisiwa mena rongamburiro yetu. Nungwari, ongwaye tji matu yenene okukara nondjoroka nandarire kutja ovandu mave tu tondo? Tara komapu yetatu nga. Otjitenga, indu tji twa tuurunga tu yorokisa omutima wa Mukuru. (1 Petr. 4:13, 14) Otjitjavari, ongamburiro yetu i harera ko omasa. (1 Petr. 1:7) Nu otjitjatatu, matu kamuna otjisuta tjomuinyo waaruhe.—Rom. 2:6, 7.

19. Ongwaye ovaapostele tji vari nondjoroka kombunda yokutonewa?

¹⁹ Katjisupi kombunda yombendukiro ya Jesus, ovaapostele va muna ondjoroka Jesus ndja hungira. Kombunda yokutonwa nokuraerwa kutja ngave ise okuzuvarisa, owo vari nondjoroka. Ongwaye? “Orondu Ndjambi tjinga e ve vara kutja owo va pwa pokutatumisirwa mena ra Jesus.” (Oviung. 5:40-42) Orusuvero ndu vari na rwo kOmuhona wawo rwari orunamasa tjinene pokutira ovanavita nawo. Owo “kaave isa” okuzuvarisa ombuze ombwa nu mena ra nao va raisa orusuvero rwawo. Ovakambure ovengi ndino ve kayenda komurungu okukarera Jehova nouṱakame, nandarire kehi yomauzeu. Owo ve tjiwa kutja Jehova kamaa zembi oviungura vyawo norusuvero rwawo kena re.—Hebr. 6:10.

20. Matu katara kuye morupa ndu maru kongorere ko?

²⁰ Ouye mau kayenda komurungu okututonda ngandu komaandero wouye mbwi. (Joh. 15:19) Posi yokutja eṱe katu sokutira. Otja tji matu katara morupa ndu maru kongorere ko, Jehova ma ‘zeuparisa . . . nokutjevera’ ovakarere ve ovaṱakame. (2 Tes. 3:3) Kunao ngatu kayende komurungu okusuvera Jehova, ovakambure ovakwetu nu nandarire ovanavita na eṱe. Indu tji twa kongorere eronga ndo, matu kara nombwaneno nu ongamburiro yetu mai harere ko omasa, matu yandja ohiviro ku Jehova nu matu raisa kutja orusuvero orunamasa tjinene pokutatumisiwa.