1. Otjikeṋa otjinanḓengu tji tji ṱuna kongaro yetu?

 KAINATJA kutja twa papitisiwa oupe poo oure wozombura ozengi, eṱe atuhe matu sokuzera okurira ovandu vongaro Jehova ndja suvera. Kokutja tu rire ovandu ohamukwao na imbo, eṱe matu hepa okukara nomeritjaerero momeripura wetu. Omena raye? Mena rokutja otjiṋa otjinanḓengu tji tji hongorera po ongaro yetu, omeripura wetu. Indu eṱe aruhe tji matu ripurire komuano mbu matu kovisa ozonḓuma zetu zonyama, eṱe matu utu okuhungira nokutjita oviṋa ovivi. (Ef. 4:17-19) Posi yokutja, tji twe urisa omeripura wetu noviṋa oviwa, eṱe matu utu okuhungira nokutjita oviṋa momuano mbu mau tjata ku Tate wetu, Jehova.—Gal. 5:16.

2. Matu kahungirira komapuriro yeṋe morupa ndwi?

² Otja tji twe rihongo morupa ndwa kapita, eṱe kamaatu yenene okutjaera omeripura ayehe omavi okuya mourizemburuka wetu. Nungwari matu yenene okutoorora okuhina okutoorera ko omukambo komeripura ngo. Ngunda atu hi ya papitisiwa, matu sokuisa okuhungira omambo omavi nokutjita oviṋa Jehova mbya tonda. Imbwo omukambo omunanḓengu tjinene nomutenga wokuhukura omundu omukuru novikaro vye. Kokutja tu yorokise Jehova tjiri, matu sokukara nonḓuviro keronga ndi: “Rihuikikeje omundu omupe.” (Kol. 3:10, EEP) Morupa ndwi, matu kazira omapuriro nga: Okurihwikika “omundu omupe” ku heya tjike? Matu rihwikike vi omundu omupe nokuhina okumuhukura?

3. Otja kOvagalate 5:22, 23, okurihwikika “omundu omupe” ku heya tjike, nu omomuano uṋe mu mo yenene okurihwikika omundu omupe?

³ Okurihwikika “omundu omupe” ku heya okuripura nokutjita  oviṋa momuano mbu mau raisa ovikaṋena vya Jehova. Omundu u rihwikike omundu omupe mokuraisa ovihape vyombepo ya Mukuru, nu u yandjera kutja ombepo ondjapuke i rundurure omeripura we, oumune we, novitjitwa vye. (Lesa Ovagalate 5:22, 23.) Otjotjihorera, eye wa suvera Jehova novakarere ve. (Mat. 22:36-39) Omundu ngo u kara nondjoroka nandarire tje ri momarorero. (Jak. 1:2-4) Eye wa suvera okutjita ohange. (Mat. 5:9) Eye u tjinda varwe nomuretima notjari. (Kol. 3:13) Eye wa suvera okutjita ouwa. (Luk. 6:35) Eye u raisa movitjitwa vye kutja u nongamburiro onamasa mu Ihe weyuru. (Jak. 2:18) Eye u ritjinda oukozu tja pindikisiwa, nu u kara nomeritjaerero tji ma rorwa.—1 Kor. 9:25, 27; Tit. 3:2.

4. Ongwaye tji matu hepa okuraisa ovikaṋena avihe mbya tamunwa mOvagalate 5:22, 23 na momatjangwa warwe wOmbeibela kokutja tu rihwikike omundu omupe?

⁴ Kokutja tu rihwikike omundu omupe, eṱe matu hepa okukara novikaṋena avihe mbya tamunwa mOvagalate 5:22, 23 na momatjangwa warwe wOmbeibela. * Ovikaṋena mbi kavi ri tjimuna ozombanda nḓu tu hwikika koimweimwe uriri. Nungwari ovikaṋena vyovihape vyombepo mo vi vaza movihape vyarwe. Otjotjihorera, indu tji wa suvera omukweṋu, ove mo kara nomuretima na ye nu mo mu raisire ouwa. Nu kokutja u rire omundu omuwa tjiri, ove mo sokukara noupore nomeritjaerero.

5. Okukara “nomeripura wa Kristus” ku heya tjike, nongwaye tji matu sokurihonga ehupo ra Jesus? (1 Ovakorinte 2:16)

⁵ Lesa 1 Ovakorinte 2:16. * Eṱe matu hepa okukara “nomeripura wa Kristus” kutja tu rihwikike omundu omupe. Pu mape hee kutja matu sokurihonga omuano Jesus mee ripura nokuhorera ku ye. Jesus wa raisa ovihape vyombepo ya Mukuru okuura. Tjimuna otjispili otjikohoke tji tji ku raisira ombuniko yoye otja tji i ri, eye u raisa ovikaṋena vya Jehova otja tji vi ri. (Hebr. 1:3) Otja pu matu kondjo okuripura tjimuna Jesus, eṱe opu matu yenene okuhorera ku ye, neṱe opu matu toṋa okuraisa ovikaṋena vye.—Fil. 2:5.

6. Ovikeṋa mbi matu sokuzemburuka indu tji matu kondjo okurihwikika omundu omupe?

⁶ Hapo tjiri mape ya atu horere ku Jesus? Eṱe mape ya atu ripura kutja, ‘Jesus  ohomonena. Ami kawami ohomonena tjimuna ye.’Ndoovazu u noumune mbwo, zemburuka omapu nga. Etenga, ove wa utwa kosaneno ya Jehova na Jesus. Ku nao, ove mo yenene okuhorera ku wo, nu mo yenene okutoṋa okutjita nao nga pondondo kaaṋi. (Gen. 1:26) Oritjavari, ombepo ya Mukuru ondjapuke i nomasa tjinene okukapita otjiṋa ngamwa atjihe meyuru na kombanda yehi. Nombatero yombepo ye, ove mo yenene okuyenenisa oviṋa mbi u hi nokuyenena okutjita nomasa woye omuini. Oritjatatu, Jehova ka undjire ko kutja u raise ovihape vyombepo ondjapuke nai nokuhina okutataiza. Nungwari, Tate wetu worusuvero wa twa po ozombura 1 000, kutja imba mbe nomaundjiro wokukahupa kombanda yehi ve karire ohomonena. (Omavan. 20:1-3) Otjiṋa Jehova tje undjira ko ku eṱe nai, okukondja pu matu yenene nokuriyameka kombatero ye.

7. Matu katara ku ye nai?

⁷ Hapo matu yenene vi okuhorera ku Jesus? Matu kakonḓonona ousupi ovikaṋena vine vyovihape vyombepo ya Mukuru ondjapuke. Nu matu katara komuano Jesus ma raisa ovikaṋena mbyo otja tji matu konḓonona atjihe peke. Nu wina matu katara komapuriro tjiva ngu maye yenene okutuvatera okukonḓonona kutja tu ungura vi mokurihwikika omundu omupe.

8. Jesus wa raisa vi orusuvero?

⁸ Orusuvero rwatjiri Jesus ndwe na ro ku Jehova, rwe mu hinga okutjita atjihe Ihe tjaa undjire ku ye, nokuriyandjera omuinyo we mena retu. (Joh. 14:31; 15:13) Jesus wa raisa orusuvero rwe kovandu momuano mbwaa hupu indu tja ri kombanda yehi. Eye aruhe aa raisa orusuvero nu aa ṱondjenda novandu, nandarire imba mbaave mu pirukire. Omuano omunanḓengu mbwaa raisa kutja wa suvera ovandu, omokuvehonga ohunga nOuhona wa Mukuru. (Luk. 4:43, 44) Jesus wina wa raisa orusuvero orunene ku Mukuru na kovandu, indu tje riyandjera okutatumisiwa nokuṱa momake wovarunde. Ku nao, eye wa tjita kutja atuhe tu mune omuinyo waaruhe.

9. Omomuano uṋe mu matu yenene okuraisa orusuvero otja Jesus tja tjita?

⁹ Eṱe twe riyandja oveni ku Jehova natu papitisiwa mena rokutja twa suvera Tate wetu weyuru. Ku nao, eṱe tu sokuraisa orusuvero ku Jehova tjimuna Jesus, momuano mu tu tjinda varwe. Omuapostele Johanes wa tjanga kutja: “Orondu tje hi nokusuvera omukwao ngwe mu muna, ma sora vi okusuvera Ndjambi ngwe ha munu.” (1 Joh. 4:20) Matu yenene okuripura oveni kutja, ‘Hapo mbi raisa orusuvero rwatjiri ku varwe? Hapo mbi raisa otjari momuano mu mbi tjinda varwe, nandarire kutja kave nokundjitjinda nawa? Hapo orusuvero ru ndji hinga okuungurisa oruveze rwandje noviṋa mbi mbi na vyo okuvatera varwe okurihonga ohunga na Jehova? Ami mbi nonḓero okutjita oviṋa mbi, nandarire kutja ovandu ovengi kave nondangi kongondjero yandje, poo indu tji mave ndji pirukire? Hapo me yenene okupaha omiano vyokuungura ovingi motjiungura tjokuzuvarisa?’—Ef. 5:15, 16.

10. Omomuano uṋe Jesus maa tjiti ohange?

¹⁰ Jesus wa ri omundu ngwa suverere okutjita ohange. Indu ovandu tjaave mu tjindi navi eye kaa yarura ouvi mouvi. Posi yokutja, eye aa ungura ovingi kombanda yanao. Eye aa tenge po okupaha okuhangana nu aa tunduuza varwe okuzengurura ozombata. Otjotjihorera, eye we ve honga kutja ngave hangane novakambure ovakwao, indu tji mave vanga kutja Jehova ma yakure omerikotameneno wawo. (Mat. 5:9, 23, 24) Nu wa kara pokuvatera ovaapostele okuzengurura ombata ndji va kara na yo, ohunga nokutja ouṋe ngu ri omunenenene mokati kawo.—Luk. 9:46-48; 22:24-27.

11. Omomuano uṋe mu matu yenene okurira ovatjite vohange?

 ¹¹ Katu nokuhepa okuyepa ozombata uriri kokutja tu rire ovandu mbe tjita ohange. Nungwari matu sokurira ovatenga okutoora omikambo okutjita ohange na varwe, nokutunduuza ovakambure ovakwetu kutja ve zengurura ozombata. (Fil. 4:2, 3; Jak. 3:17, 18) Eṱe matu yenene okuripura oveni omapuriro nga: ‘Ozongondjero zeṋe nḓu me hepa okutjita kutja mbi tjite ohange ku novakwetu? Indu omukambure omukwetu tje ndji hihamisa, hapo mbi kara nongore? Hapo mbi undja kutja omukwetu warwe ma tenge po okutoora omukambo okuhangana? Poo mbi tenga po okutoora omukambo, nandarire kutja mape munika aayo eye ongwa etisa ouzeu mbwo? Indu tje ri ohepero, mbi tunduuza imba mbe nombata okuhangana?’

12. Omomuano uṋe Jesus ma raisa otjari?

¹² Jesus wa ri notjari. (Mat. 11:28-30) Eye wa raisa otjari mokurira ongozu, nokuripurira ku varwe nandarire kehi yongaro onḓeu. Otjotjihorera, indu omukazendu Omukanaan tje riheka ku ye okumuverukisira omuatje we, Jesus rutenga wa nakaura omaningiriro we. Posi yokutja indu omukazendu tja raisa ongamburiro yomasa, Jesus wa raisa otjari na verukisa omuatje we. (Mat. 15:22-28) Nandarire kutja Jesus wa ri notjari, eye ngunda aa yenene okuyandja omaronga ku varwe. Povikando tjiva aa raisa otjari mokuvyura imba mba suvera. Otjotjihorera, indu Petrus tja kondja okutjaera Jesus okutjita ombango ya Jehova, Jesus we mu vyura komurungu wovahongewa imba ovarwe. (Mar. 8:32, 33) Otjiṋa hi ka tjitire mokuvanga okuṱisa Petrus ohoṋi, nungwari omena rokutja aa vanga okumuhonga, nokurakiza ovahongewa varwe kutja ave he ritongamisa. Otjiperi kutja Petrus wa ṱohoṋi, posi ya eye wa muna ouwa momavyuriro ngo.

13. Omomuano uṋe mu matu yenene okuraisa otjari?

¹³ Povikando tjiva tu hepa okuyandja omaronga ku imba mbu twa suvera, otjomuano wokuveraisira ouwa. Indu tji mo tjiti nao, horera ku Jesus mokuzikamisira omaronga woye komirari mbi ri mEmbo ra Mukuru. Raisa oupore. Undjira ko ouwa ku wo, nu kara nongamburiro yokutja imba mba suvera Jehova nu mbe ku suvera, mave yakura omaronga woye worusuvero. Ripura omuini omapuriro nga: ‘Hapo mbi kara nouvanḓe wokuhungira indu tji mba munu omundu ngu mba suvera ama tjiti ouvi? Indu tji me hepa okuyandja omaronga, mbi hungira notjari poo mbi hungira nomazenge? Otjikwaye tji matji ndji hingi okuyandja eronga? Me mu rongo mena rokutja we ndji kurungisa, poo mena rokutja me vanga okumuvatera?’

14. Omomuano uṋe Jesus ma raisa ouwa?

¹⁴ Jesus u tjiwa ouwa nu wina u u tjita. Jesus wa suvera Ihe, ku nao eye aruhe u tjita ouwa ama hingwa i yondando ombwa. Omundu omuwa aruhe u paha omiano vyokuvatera varwe nu u ve tjitira oviṋa oviwa. Okutjiwa okutjita ouwa uriri kaku ya yenena, nungwari eṱe matu sokutjita ouwa nondando ombwa. Mape ya o pura kutja, ‘Mape ya omundu a tjiti ouwa nokuhina okuhingwa i yondando ombwa?’ Ii, mape ya. Otjotjihorera, Jesus wa hungira ohunga na imba mbaave yandja kovasyona, posi ya mbaave kondjo kutja varwe ve tjiwe mbyaave yandja. Nandarire kutja aave ungura oviungura oviwa, Jehova kaa ri nonyuṋe na wo.—Mat. 6:1-4.

15. Matu yenene vi okutjita ouwa?

¹⁵ Eṱe matu yenene okurira ovandu ovawa, indu tji matu tjiti imbi mbi ri ovisemba nokuhina okuripurira ku eṱe oveni. Mape ya o ripura omuini kutja, ‘Hapo ami mbi tjiwa kutja otjiṋa otjisemba okutjita ootjiṋe nu wina e yenene okutjitjita? Hapo otjikeṋa tji tji ndji hinga okutjita ouwa?’

16. Matu sokutjita vi eyuva arihe, nu omena ratjike?

¹⁶ Eṱe katu sokumuna kutja okurihwikika omundu omupe ku yandera pombapitisimo uriri. Okurihwikika omundu omupe, ku ri tjimuna ombanda ombe ndji matu sokuṱiza mongaro ombwa. Omuano umwe mu matu yenene okutjita nao, omokukondja okuraisa ovihape vyombepo ya Mukuru eyuva arihe. Omena ratjike? Mena rokutja Jehova u ungurisa ombepo ye ondjapuke okutjita oviṋa. (Gen. 1:2) Ku nao, otjihape atjihe tjombepo matji sokutuhinga kutja tu tji ungurise mehupo retu. Otjotjihorera, omuhongewa Jakobus wa tjanga kutja: “Ongamburiro nokuhinoviungura wina otjinga aya koka.” (Jak. 2:26) Otjingaperi nao wina kovihape vyarwe vyombepo ya Mukuru. Otjikando atjihe tji matu vi raisa, tu raisa kutja ombepo ya Mukuru mai ungura mu eṱe.

17. Matu sokutjita vi indu tji tu ha raisire ovihape vyombepo?

¹⁷ Nandarire Ovakriste mba papitisiwa ozombura ozengi povikando kave raisa ovihape vyombepo. Posi yokutja, ounanḓengu okukondja okukayenda komurungu okuraisa ovikaṋena mbyo. Tara komasasanekero nga. Hapo indu ombanda yoye ndji wa suvera tji ya tauka, mo hakahana okuiimbirahi? Kako. Posi yokutja, mo kondjo okuiyatata pu ya tauka, ndoovazu mo yenene. Nu okuzambo, mo tjevere kutja ai ha tauka. Momuano otjingewo, o u momuinyo, indu povikando tjiva tji u ha raisire otjari, omuretima poo orusuvero ku varwe. Okuningira ondjesiro okuza komutima maku tjiti kutja mu kare noupanga ouwa rukwao. Nu rimanena okutjita ouwa moruyaveze.

18. Matu sokukara nongamburiro mu ye?

¹⁸ Eṱe tjiri tu nondangi kotjihorera tja Jesus. Otja pu matu kayenda komurungu okuhorera komeripura novitjitwa vye, ma rire oupupu ku eṱe okuritjinda tjimuna Jesus. Ma rire oupupu okurihwikika omundu omupe indu tji matu horere ku Jesus. Morupa ndwi, twe rihongo ovikaṋena vine uriri vyovihape vyombepo ya Mukuru. Ongwaye tji u hi nokupaha oruveze okukonḓonona ovikaṋena vyarwe vyovihape vyombepo nokutara kutja mo vi ungurisa vi mehupo roye? Mo vaza mo otupa otuingi mOkambo komakonḓononeno kOvahongonone va Jehova, kehi yepu ndi “Ongaro yehupo rOvakriste,” kehi yomambo nga “Ovihape vyombepo.” Kara nongamburiro kutja indu tji mo rihwikike omundu omupe nokuhina okumuhukura rukwao, Jehova me ku vatere.