Tjiva mbe lesa etjangwa ndo nohakahana ve kara nepuriro ndo. Posi yokutja momazeva ngo mwa tamunwa ovarumendu vevari mba ri nena ndi Mefiboset, neṱe matu yenene okurihonga ovingi indu tji twa konḓonona kutja pa tjitwa tjike.

Ombara Saul wa Israel wa ri novanatje ovazandu hambombari novakazona vevari. Omuatje wa Saul otjiveri wa ri Jonatan. Kombunda Ombara Saul wa kakara nomuatje omuzandu wena Mefiboset, ngwa isa momukazendu we omumbanda wena Rispa. Posi yokutja Jonatan wina wa ri nomuatje omuzandu wena Mefiboset. Ku nao Ombara Saul wa ri nomuatje omuzandu wena Mefiboset nomuatje womuatje we wena ndo wina.

Oruveze rumwe Ombara Saul wa uta okutonda Ovagibeon mba turire mokati kOvaisrael, nu aa vanga okuvezepa avehe. Nu pe munika aayo ovengi vawo va zepewa. Iho tja ri otjiṋa otjivi. Omena raye? Mena rokutja oruveze Josua tja ri nomuinyo, ovanane wOvaisrael va tjitire omerikutiropamwe wohange ku nOvagibeon.—Jos. 9:3-27.

Omerikutiropamwe ngo ngunda aaye ungura, oruveze Ombara Saul tja ri nomuinyo. Mokuteya omerikutiropamwe ngo ombara ya kondja okuzepa Ovagibeon avehe. Otjiṋa ho tja tjita kutja ‘Saul neṱunḓu re ve kare nondjo yokuzepa.’ (2 Sam. 21:1) Korusenina, David wa karira ombara. Ovagibeon mba hupire va hungira ku ye ohunga notjiṱiro ho. David we ve pura kutja nge ve tjitire tjike kouvi ounene Saul mbwa tjita, kutja Jehova ma sere ehi ondaya rukwao. Moruveze rwokuningira ovimariva, Ovagibeon va ningira ovazandu hambombari vomurumendu ‘ngwa vanga okuveyandeka’ kutja ve yandjewe ku wo nu ve ṱe. (Num. 35:30, 31) David wa yakura omaningiriro wawo.—2 Sam. 21:2-6.

Moruveze ndwo, Saul na Jonatan tjandje va ṱa movita, posi yokutja omuzandu wa Jonatan Mefiboset wa ri nomuinyo. Eye wa remanene mena roumba mbwa munine tja ri omuṱiṱi. Ku nao eye kaari norupa movita mbya utwa i ihe omukururume vyokuzepa Ovagibeon. David wa tjita omerikutiropamwe woupanga ku na Jonatan, nu omerikutiropamwe ngo maye eta ouwa kozondekurona za Jonatan, mu ma mu kamburirwa mo Mefiboset. (1 Sam. 18:1; 20:42) Etjangwa mari tja: “Mena romakwizikiro omayapuke nga tjitire na Jonatan, David opa yamena Mefiboset, omuzandu waJonatan, ondekurona yaSaul.”—2 Sam 21:7

Posi ya David wa yenenisa omaningiriro wOvagibeon. Eye wa yandja ovanatje va Saul vevari ovazandu, umwe ngwa ri Mefiboset, novanatje wovanatje va Saul vetano. (2 Sam. 21:8, 9) Omukambo wa David mbwo wa tjita kutja ma isa po ondjo yokuzepa mehi.

Ehungi ndi kakuruhungi uriri. Etwako ra Mukuru ra ri ekahu. Oro mari tja: ‘Ovanatje ngaave ṱire ouvi wooihe.’ (Deut 24:16) Jehova katja yandjera ovanatje va Saul vevari ovazandu novanatje vovanatje ve vetano okuṱa andakuzu kava ri nondjo. Etwako ndo komurungu ra tja: “Auhe nga ṱire ouvi we omuini.” Pe munika aayo ozondekurona za Saul hambombari nḓa ṱa, va ri norupa motjiṱiro otjindjandja tjOvagibeon. Ku nao owo va suta ouvi mbu va tjita.

Ehungi ndi, mari tu raere kutja omundu kamaa tjiti ouvi nokutja wa ri a ma kongorere omirari mbya pewa uriri. Omambo yemwe younongo ya tja: “Ripura nawa imbi mbi mo tye, nu ngamwa mbi mo tjiti ngavi rire ovisemba.”—Omiano 4:24-27; Ef. 5:15.