1. Ovandu ve muna tjike indu tji ve ya pozombongarero otjikando otjitenga? (Wina tara kotjiperendero.)

 RIPURA novakupasane mbe ya petuwo romerikotameneno rOvahongonone va Jehova otjikando otjitenga. Ovakupasane mave tjaterwa i yomuano omuwa mu va yakurwa, norusuvero ovakambure ndu mave raisasana. Mondjira okuyaruka konganda okuza kombongarero, omukazendu wa tja nai komurumendu we, ‘Ovandu mba va panguka kovandu varwe mbu tu hakaena. Nu ami tjiri mba nenyando okukara pu na wo.’

2. Ongwaye tjiva tji va isa okukarera Jehova?

² Orusuvero ndu ri mokati kovakarere va Jehova orwapeke. Otjiperi kutja Ovahongonone va Jehova kavandu ohomonena. (1 Joh. 1:8) Ku nao, otja tji matu tjiwa imba mbe ri mombongo nawa, matu munu oungundipare wawo. (Rom. 3:23) Nu otjihihamise, tjiva va yandjera oungundipare wavarwe okutjita kutja ve ise okukarera Jehova.

3. Otjikwaye tji tji raisa ovakongorere va Jesus vatjiri? (Johanes 13:34, 35)

³ Tara rukwao ketjangwa ku kwa zikamene orupa ndwi. (Lesa Johanes 13:34, 35.) Ovandu mave yenene okumuna vi Ovakriste vatjiri? Owo mave raisasana orusuvero. Ombeibela kai tja owo mave rire ohomonena. Nu wina Jesus ka tjere: ‘Indino amuhe otji mamu tjiwa kutja oweṋe ovahongewa vandje.’ Nungwari eye wa tja: “Indino avehe otji mave tjiwa kutja oweṋe ovahongewa vandje.” Ku nao, Jesus wa raisa kutja kavemukongorere aveyerike mbu mave munu ovemukongorere vatjiri, nungwari imba mbe heri orupa rwombongo mave munu orusuvero rwapeke ndu ve raisasana wina.

4. Ovandu tjiva mape ya ave vanga okutjiwa tjike ohunga nOvakriste vatjiri?

 ⁴ Ovandu tjiva mbe he ri Ovahongonone va Jehova mape ya ave ripura kutja, ‘Orusuvero ru tu vatera vi okumuna ovakongorere va Jesus vatjiri? Jesus wa raisa vi orusuvero kovaapostele ve? Nu hapo matu yenene vi okuhorera kotjihorera tja Jesus ndino?’ Ovahongonone va Jehova, ve hepa okuripurira komaziriro womapuriro ngo. Okutjita nao maku tu vatere okuraisa orusuvero, tjinene indu tji matu ṱunwa i yomaungundipare wavarwe.—Ef. 5:2.

5. Kahurura omambo wa Jesus nge ri mu Johanes 15:12, 13.

⁵ Jesus wa kahurura kutja ovemukongorere mave suverasana momuano wapeke. (Lesa Johanes 15:12, 13.) Jesus we ve rakiza kutja, “suverasaneye otja punga ambe mu suvera.” Ihi matji hee tjike? Jesus wa kayenda komurungu okukahurura kutja indwi orusuvero rwapeke. Orusuvero ndu hinga Omukriste nandarire okuriyandjera okuṱira omukambure omukwao indu tje ri ohepero. b

6. Embo ra Mukuru ri raisa vi ounanḓengu worusuvero?

⁶ Embo ra Mukuru ri tu honga kutja orusuvero orunahepero. Otjotjihorera, ovandu ovengi va suvera omazeva wOmbeibela tjimuna nga: “Ndjambi . . . orusuvero.” (1 Joh. 4:8) “Suvera omukweṋu otja tji we risuvera omuini.” (Mat. 22:39) ‘Orusuvero ru vandeka omauvi omengi.’ (1 Petr. 4:8) “Orusuvero kamaaru yanda ko.” (1 Kor. 13:8) Omazeva nga na yarwe ye raisa oukahu kutja ounanḓengu tjinene okuraisa otjikaṋena otjiwa hi.

7. Omena raye Satan tje ha yenene okuhonga ovandu okusuverasana nokukara nombwaneno?

⁷ Ovandu ovengi ve pura kutja, ‘Hapo me yenene vi okutjiwa kutja ongamburiro youatjiri oiṋe? Ozongamburiro azehe ze tja ze honga  ouatjiri, posi yokutja oyo aihe i honga oviṋa pekepeke ohunga na Mukuru.’ Satan wa ungura ozongamburiro ozengi zoposyo, nu ihi tji tjita kutja i rire ouzeu kovandu okutjiwa kutja ongamburiro youatjiri oiṋe. Posi yokutja, eye kamaa yenene okuungura otjimbumba tjovakambure mouye auhe mba suverasana. OJehova erike ngu ma yenene okutjita nao. Eṱe matu tjiwa otjiṋa hi, mena rokutja orusuvero ru za ku Jehova. Imba Jehova mbe sera ko ondaya nu mbe nombepo ye ombu mave yenene okukara norusuvero rwatjiri mokati kawo. (1 Joh. 4:7) Mena ranao, Jesus wa tja ovemukongorere aveyerike ombu mave suverasana norusuvero rwatjiri.

8-9. Ovandu ovengi va ṱunwa vi i yorusuvero ndu ve muna mokati kOvahongonone va Jehova?

⁸ Otja Jesus pa hunganeka, ovandu ovengi va muna ovemukongorere vatjiri mena rorusuvero rwatjiri ndu ve raisa mokati kawo. Otjotjihorera, omurumendu omukambure wena Ian wa zemburuka otjikando otjitenga tja kara pomaworonganeno worukondwa nga ri morutjandja rwotjimbere popezu nonganda ye. Momieze mbya kapita, Ian wa ri porutjandja ndwo okutarera enyando. Eye wa tja: “Ovandu pomaworonganeno worukondwa aave ritjindi momuano wapeke kovandu mbaave tarere enyando. Ovahongonone va Jehova va ri nongaro ombwa, ve rihwikikire nawa, nu ovanatje vawo aave ritjindi nawa.” Eye wina wa tja: “Ovandu mba aave munika kutja va kowa momuinyo nu ve nohange. Iho otjiṋa tjee vanga mehupo randje. Ami hi zemburuka omahungi nga yandjewa eyuva ndo, posi yokutja ami ngamba mbi zemburuka omuano Ovahongonone va Jehova mu ve ritjinda.” c Tjiri, omeritjindiro ngo omena rorusuvero rwatjiri ndu tu na rwo mokati ketu. Mena rokutja eṱe twa suvera ovakambure ovakwetu, tu ve tjinda momuano omuwa nondengero.

⁹ Omurumendu omukambure wena John wa ri noumune otjingewo, indu tja uta okukara pozombongarero zombongo. Eye wa tja: “Ami ee tjaterwa i yovikaro oviwa ovandu avehe mba ri mbo mbi va ri na vyo. Nu ee ripura kutja owo tjiri kave nouvi mbu ve tjita. Orusuvero rwawo rwatjiri ndu va ri na rwo rwa tjita kutja mbi mune kutja mba muna ongamburiro youatjiri.” d Ovihorera mbi na vyarwe ovingi vi raisa kutja ovakarere va Jehova Ovakriste vatjiri.

10. Oruṋe tji matu yenene okuraisa orusuvero rwOukriste? (Wina lesa omambo wokehi.)

¹⁰ Otja tji pa tamunwa rukuru, kape nomukambure omukwetu umwe ngu ri ohomonena. Povikando tjiva ovakambure ovakwetu mape ya ave tjiti poo ave hungire otjiṋa tji matji tu pindikisa. e (Jak. 3:2) Mozongaro otja inḓo, eṱe matu yenene okuveraisira kutja twe ve suvera, momuano mbu matu ritjindi, noviṋa mbi matu hungire. Iho tji tja tjitwa, matu yenene vi okurihongera kotjihorera tja Jesus?—Joh. 13:15.

11. Jakobus na Johanes va raisa ovikaṋena viṋe ovivi? (Wina tara kotjiperendero.)

¹¹ Jesus ka undjire ko kutja ovakongorere ve ve rire ohomonena. Nungwari, eye we ve vatera kutja ve ungurire koungundipare wawo, nokutjita omarundurukiro kokutja ve yorokise omutima wa Jehova. Oruveze rumwe, ovaapostele vevari, Jakobus na Johanes, va karaera ina okuningira Jesus kutja me ve pe ovihavero ovinanḓengu mOuhona wa Mukuru. (Mat. 20:20, 21) Jakobus na Johanes va raisa  ombepo yomeritongamisiro nokutja aave vanga okurira ovananḓengu povakwao.—Omiano 16:18.   

12. Jakobus na Johanes aveyerike omba raisa ovikaṋena ovivi? Kahurura.

¹² Jakobus na Johanes kawo aveyerike mba raisa ovikaṋena ovivi otjikando ho. Tara kutja ovaapostele varwe va ri noumune uṋe: “Novahongewa mba ovakwao omurongo tji va zuvire otjiṋa ho, va pindikira ovakwao vevari mba.” (Mat. 20:24) Mape ya Jakobus, Johanes, novaapostele varwe va posa nomapindi. Owo mape ya ve ve pura kutja, ‘Mamu munu kutja oweṋe ovasemba pu eṱe? Opu ma sokuningira ovihavero ovinanḓengu mOuhona wa Mukuru? Kaweṋe amuyerike mbu mwa ungura oukukutu pu na Jesus. Eṱe wina twa pwira okupewa ovihavero ovinanḓengu.’ Kainatja kutja ve ripura nokuhungira tjike otjikando ho, owo va zemba kutja ve sokuraisirasana orusuvero nouwa aruhe.

13. Jesus wa ri noumune uṋe ohunga nozondataiziro zovaapostele ve? (Mateus 20:25-28)

¹³ Jesus wa tjita vi? Eye ke na pe ve pindikira. Eye ke na pa tja ma kapaha ovaapostele varwe ovasemba, mbu mave raisa omerisusuparisiro nu aruhe mbu mave tjindasana norusuvero. Posi yokutja, Jesus wa hungira ku na wo nomuretima mena rokutja aa tjiwa kutja owo aave vanga okuungura imbi mbi ri ovisemba. (Lesa Mateus 20:25-28.) Eye wa kayenda komurungu okuvetjinda momuano worusuvero, nandarire kutja ihi katja ri otjikando otjitenga notjisenina ovaapostele mu va ri nozombata  kutja owaṋi pu wo avehe ngu ri omunenenene.—Mar. 9:34; Luk. 22:24.

14. Ovaapostele va Jesus ve kurira mongaro iṋe?

¹⁴ Jesus tjiri aa zemburuka kutja ovaapostele va ṱunwa i yombazu mu ve kurira. (Joh. 2:24, 25) Ozonongo zomatwako zOvajuda nOvafarisei aave hongo kutja ovandu ovananḓengu indu tji ve novihako vyokombanda. (Mat. 23:6; sasaneka okavidio nga The Front Seats in the Synagogue mo-study note ya Mateus 23:6.) Ovanane vozongamburiro zOvajuda mbo wina aave ripura kutja owo va ri ovasemba povakwao. f (Luk. 18:9-12) Jesus aa tjiwa kutja ouripura mbwo mape ya au ṱunu komuano ovaapostele ve maave rivara nokuvara varwe. (Omiano 19:11) Eye ke na pa undjire ovahongewa ve okuhinokutjita ozondataiziro, nu eye wa ri nomuretima ku na wo indu tji va tataiza. Eye aa tjiwa kutja owo aave vanga okutjita ouwa. Ku nao eye we ve honga nomuretima, okurisusuparisa, nokuraisirasana orusuvero pendje nokupaha kutja ngu ri omunene povakwao ouṋe.   

15. Matu yenene okurihonga tjike okuza ku imbi mbya tjitwa pokati ka Jakobus, Johanes, novahongewa varwe?

¹⁵ Matu yenene okurihonga ovingi okuza ku imbi mbya tjitwa i Jakobus na Johanes. Owo va ri posyo okuningira otjihako tjokombanda mOuhona wa Mukuru. Ovaapostele varwe va ri posyo wina. Owo kave kondjere okukara nombwaneno. Posi yokutja, Jesus wa tjinda ovaapostele avehe 12 momuano omuwa nu worusuvero. Matu rihongere ko tjike? Otjiṋa otjinahepero, kavyo mbi varwe mbi ve tjita uriri, nungwari omuano mbu matu ritjindi kozondataiziro nomaungundipare wavarwe. Otjikeṋa tji matji yenene okutuvatera? Indu tji twa pindike ku nomukambure omukwetu, matu yenene okuripura oveni omapuriro nga: ‘Ongwaye otjiṋa tja tjiti tji matji ndji pindikisa tjinene? Matji raisa kutja mbi noungundipare mbu me hepa okuungurira ko? Hapo omundu ngwe ndji hihamisa mape ya u nomauzeu kaaṋi? Nandarire kutja ami me munu kutja mbi nousemba wokupindika, hapo mape ya e raisa orusuvero nu e isire omundu ngo?’ Indu tji matu raisa orusuvero ku varwe, matu raisa kutja oweṱe ovakongorere va Jesus vatjiri.

16. Ovikeṋa vyarwe mbi matu rihongere okuza kotjihorera tja Jesus?

¹⁶ Otjihorera tja Jesus wina tji tu honga okutjiwa ovakambure ovakwetu nawa. (Omiano 20:5) Jesus aa yenene okutjiwa imbi mbi ri momitima vyovandu. Eṱe katu yenene okutjita nao. Posi yokutja, eṱe matu yenene okukara nomuretima indu ovakambure ovakwetu tji ve tu pindikisa. (Ef. 4:1, 2; 1 Petr. 3:8) Ma rire oupupu okutjita nao indu tji twe ve tjiwa nawa. Ngatu tare kotjihorera.

17. Omutarere ngu varura ozombongo wa muna vi ouwa mokutjiwa omukambure omukwao nawa?

¹⁷ Omutarere ngu varura ozombongo wa kavarura ombongo koutjiro wa Africa nu u zemburuka omurumendu omukambure eye ngwa munu kutja wa ri nongaro ombi. Omutarere ngo wa tjita vi? Eye wa tja: “Pendje nokukara kokure nomukambure omukwao ngo, ami mba tanda okumutjiwa nawa.” Mokutjita nao, omutarere worukondwa we rihonga oviṋa tjiva ohunga nomuano omurumendu omukambure me kurisiwa, mbi vi ṱuna komuano me tjinda varwe. Omutarere worukondwa wa kayenda komurungu a tja: “Otja tji  mba uta okutjiwa kutja kaya ri oupupu komukambure omukwetu okutjinda varwe nawa, nu tjiri aa kondjisa oukukutu okutjita omarundurukiro, iho tja tjita kutja mbi kare nondengero na ye. Eṱe twa rira omapanga omawa.” Tjiri, indu tji matu kondjisa oukukutu okutjiwa ovakambure ovakwetu nawa, iho tji tjita kutja i rire oupupu kweṱe okuveraisira orusuvero.

18. Omapuriro yeṋe ngu matu yenene okuripura oveni, indu tji twa hihamisiwa i yomukambure omukwetu? (Omiano 26:20)

¹⁸ Povikando tjiva mape ya atu vanga okuhungira pu nomukambure omukwetu ngwe tu hihamisa. Rutenga, onawa tji twe ripura oveni omapuriro otja inga: ‘Hapo me tjiwa kutja pa kayenda ye?’ (Omiano 18:13) ‘Ngahino kandja ri ondando ye okundjihihamisa?’ (Omuzuv. 7:20) ‘Hapo mba rora okutjita ondataiziro otja indjo?’ (Omuzuv. 7:21, 22) ‘Indu tji mba hungire ku nomundu ngo ohunga nouzeu mbwo, hapo katji nokutuetera ouzeu warwe? (Lesa Omiano 26:20.) Indu tji twa toora oruveze okuripurira komapuriro ngo, mape ya atji tu vatere okumuna kutja orusuvero ru yenene okutuhinga kutja atu he ripure ku imbi mbya tjitwa.

19. We rimanene okutjita tjike?

¹⁹ Otjotjimbumba, Ovahongonone va Jehova ve raisa kutja ovahongewa va Jesus vatjiri mokuraisasana orusuvero. Atuhe kourike wetu tu raisa kutja oweṱe ovakongorere va Jesus vatjiri, indu tji matu raisa orusuvero kovakambure ovakwetu, nandarire kutja ve zunḓa. Otja tji matu tjiti nao, eṱe tu vatera varwe okumuna ongamburiro yatjiri nokutja ve rikotamene ku Jehova Mukuru worusuvero pu na eṱe. Ngatu rimanene okukayenda komurungu okuraisa orusuvero ndu raisa kutja Ovakriste vatjiri ooveṋe.