1-2. Indu tji mo munu kutja ko ya yenena okupapitisiwa, ongwaye tji u ha sokuwa momuinyo? (Tara kotjiperendero tjokombanda yokambo nga.)

 INDU tji mo vanga okupapitisiwa, indjo tjiri ondando ombwa. Hapo ove wa rongere okupapitisiwa tjamwa oruveze? Ove tji mo munu nao nu ovanene vombongo ave yakura, ove o keyakeya okupapitisiwa pomaworonganeno ngu maye ya. Indu tji wa tjiti nao, ove mo munu ozondaya ozengi motjiungura tja Jehova.

² Hapo wa rora okuraerwa kutja mo hepa okutjita omarundurukiro ngunda au ha papitisiwa? Poo ove omuini wa rora okumuna nao? Indu tji pe ri nao, o u momuinyo. Ove mo yenene okutjita omarundurukiro kutja u yenenise ondando onanḓengu ndjo, nandarire kutja oove omunene poo omuṱiṱi.

3. Omurumendu ombondo nOmuetiopi wa pura iye ku Filipus, nu epuriro riṋe ndi matu yenene okuripura? (Oviung. 8:36, 38)

³ Lesa Oviungura 8:36, 38. Omurumendu ombondo Omuetiopi wa pura Filipus omuzuvarise kutja: ‘Otjikeṋa tji matji ndji tjaere okupapitisiwa?’ Omurumendu Omuetiopi wa ri nonḓero yokupapitisiwa, posi ya hapo eye tjiri wa ri aa rongere okutoora omukambo omunanḓengu mbwo?

4. Omurumendu Omuetiopi wa raisa vi kutja wa ri nonḓero yokukayenda komurungu okurihonga?

⁴ Omurumendu Omuetiopi wa ya ‘koJerusalem okukerikotamena ku Ndjambi.’ (Oviung. 8:27) Ku nao, eye wa yakurire ongamburiro yOvajuda nu we rihonga ohunga na Jehova okuza kOmatjangwa Omayapuke wOtjiheberi. Nandarire nao, eye wa ri nonḓero yokurihonga ovingi. Indu Filipus tja hakaena ku nomurumendu ngo mondjira, hapo eye we mu vaza ama ungura ye? Eye tjandje ma lese membo romuprofete Jesaja.  (Oviung. 8:28) Imbwo wa ri ouatjiri oukoto wOmbeibela. Omurumendu ombondo ngwo kaa vanga okurihonga oviṋa oviṱiṱi uriri vyOmbeibela. Eye aa vanga okukayenda komurungu okurihonga.

5. Omurumendu Omuetiopi wa tjita tjike ohunga noviṋa mbye rihonga?

⁵ Omurumendu omunanḓengu ngwi wa ri omuhona ombondo wa Etiopie, ngwa ri “omunene momatjeverero wovihuze vyombara oserekaze yaEtiopie.” (Oviung. 8:27) Ku nao, eye wa ri omurumendu woviungura ovingi ngu nomerizirira omengi. Posi ya, eye aa twa po oruveze okurikotamena ku Jehova. Eye kaa vanga okurihonga ouatjiri uriri, nungwari aa toorere ko omikambo ku imbi mbi me rihongo. Ku nao, eye aa toora ouyenda oure okuza ku Etiopie kutja ma yenene okurikotamena ku Jehova kondjuwo ondjapuke moJerusalem. Ouyenda mbwo aau hepa oruveze oruingi novimariva, posi ya omurumendu ngwo aa vanga okurikotamena ku Jehova, nandarire kutja ouyenda mbwo aau kamburire mo oviṋa ovingi.

6-7. Omomuano uṋe orusuvero rwomurumendu Omuetiopi ku Jehova maa ru kurire ko?

⁶ Omurumendu Omuetiopi we rihonga ouatjiri ounanḓengu okuza ku Filipus. Nu ouatjiri umwe mbwi, wa ri wokutja Jesus ongwaa ri Messias. (Oviung. 8:34, 35) Omurumendu ombondo ngwi tjiri wa ri nondjoroka okurihonga ohunga noviṋa Jesus mbye mu tjitira. Eye wa tjita tjike tja za nokurihonga ohunga noviṋa mbi? Eye mape ya atja kayenda komurungu okurira omundu ngwa tengwa mongamburiro yOvajuda. Posi ya, orusuvero rwe ku Jehova na kOmuna we, rwe kurira ko. Nu iho tje mu hinga okutjita ondando onanḓengu kutja ma papitisiwe otjomukongorere wa Jesus Kristus. Filipus wa muna kutja omurumendu ngwi wa rongere okupapitisiwa, ku nao eye we mu papitisa.

⁷ Otjihorera tjomurumendu Omuetiopi ngo, matji ku vatere okurirongerisa kombapitisimo. Ove wina mo yenene okuhungira nongamburiro yatjiri kutja, ‘Otjikeṋa tji matji ndji tjaere okupapitisiwa?’ Matu katara komuano ove mu mo yenene okutjita oviṋa omurumendu Omuetiopi mbya tjita mbi: Eye wa kayenda komurungu okurihonga, wa ṱakamisa imbi mbyee rihongo nokukurisa orusuvero rwe ku Mukuru.

8. Ovikwaye mbi mo sokutjita otja ku Johanes 17:3?

⁸ Lesa Johanes 17:3. Hapo omambo Jesus nga hungira ngo ye ku vatera kutja u rihonge Ombeibela? Iho ouatjiri kovengi vetu. Posi ya, hapo omambo ngo wina ye tu raera kutja ngatu kayende komurungu okurihonga? Otjingaperi. Eṱe kamaatu isa ‘okutjiwa  . . . Ndjambi watjiri.’ (Omuzuv. 3:11) Eṱe matu kayenda komurungu okurihonga nga ko nga aruhe. Otja pu matu rihongo ovingi, opu matu tumbuka popezu na Jehova.—Eps. 73:28.

9. Matu hepa okutjita vi kombunda yokurihonga ovirihongwa ovitenga vyOmbeibela?

⁹ Indu tji matu utu okurihonga ohunga na Jehova, eṱe tu rihonga omahongero omatenga wOmbeibela uriri. Morutuu rwe kOvaheberi, omuapostele Paulus wa isana omahongero omatenga wOmbeibela otja “ovirihongwa ovitenga.” Eye kaa hee kutja “ovirihongwa ovitenga” kavinanḓengu, nungwari wa raisa kutja ovyo vi ri tjimuna omaihi nge kurisa okanatje. (Hebr. 5:12; 6:1) Posi ya, eye wina wa tunduuza Ovakriste avehe okuhinokurihonga ovirihongwa ovitenga uriri, nungwari ve rihonge ouatjiri oukoto wEmbo ra Mukuru. Hapo u zera okurihonga ovirihongwa ovikoto vyOmbeibela? Hapo u nonḓero okukurisa oupanga woye ku na Mukuru mokukayenda komurungu okurihonga ohunga na Jehova nondando ye?

10. Ongwaye tje ri ouzeu kovandu tjiva okurihonga?

¹⁰ Ouzeu kovengi vetu okurihonga. Ove u noumune uṋe ohunga nokurihonga? Hapo ove poskole we rihonga okulesa nokukonḓonona nawa? Hapo ove u kara nondjoroka tji mo rihongo nu u muna kutja we rihongo ovingi? Poo u muna kutja ko rihongo nawa okuza momambo? Tji pe ri nao, kaove erike. Nungwari, Jehova ma yenene okukuvatera. Eye ohomonena nu Omuhonge omusemba.

11. Jehova u raisa vi kutja “Omuhonge woye omunenenene”?

¹¹ Jehova omuini ma tja “Omuhonge woye omunenenene.” (Jes. 30:20, 21, NWT) Eye Omuhonge ngu nomuretima, wotjari, nu ngu tu zuva nawa. Eye u paha ouwa movahongwa ve. (Eps. 130:3) Neye ka undjire ko ovingi okukapita imbi mbi matu yenene okutjita. Zemburuka kutja eye wa mema ouruvi woye, tji tji ri otjiyandjewa otjiwa. (Eps. 139:14) Eṱe tu nonḓero okurihonga. Omuute wetu u vanga kutja tu kayende komurungu okurihonga nga aruhe, nokuyorokera omerihongero wetu. Ku nao, onawa ‘okuzera’ ouatjiri wOmbeibela nai. (1 Petr. 2:2) Twa po ozondando nḓu mo yenene okuyenenisa, nu kongorera oprograma yokulesa nokukonḓonona Ombeibela aruhe. (Jos. 1:8) Nombatero ya Jehova ove mo yenene okuyorokera okulesa nokurihonga ohunga na ye tjinene.

12. Ongwaye tji matu sokukonḓonona ehupo notjiungura tja Jesus tjokuzuvarisa?

¹² Aruhe twa po oruveze okuripurira ko oukoto kehupo notjiungura tja Jesus tjokuzuvarisa. Ounanḓengu tjinene okuhorera ku Jesus indu tji matu vanga okukarera Jehova, nu tjinene moruveze oruzeu ndwi. (1 Petr. 2:21) Jesus wa raera ovahongewa ve kutja mave munu omauzeu. (Luk. 14:27, 28) Nungwari, eye wa ri nongamburiro kutja ovakongorere ve vatjiri mave panḓere pouṱakame ku Mukuru, tjimuna eye tja tjita. (Joh. 16:33) Konḓonona ehupo ra Jesus oukoto, nu twa po ozondando nḓu maze ku vatere okuhorera ku ye mehupo roye.

13. Otjikeṋa tji mo sokuningira ku Jehova aruhe, nu omena raye?

¹³ Ondjiviro aiyerike kai ya yenena. Epu ndi mo hepere ondjiviro, omena rokutja mo yenene okurihonga ovingi ohunga na Jehova nokukurisa ovikaṋena tjimuna okumusuvera nokukara nongamburiro mu ye. (1 Kor. 8:1-3) Otja tji mo kayenda komurungu okurihonga, ningira ku Jehova aruhe kutja me ku vatere okukurisa ongamburiro yoye. (Luk. 17:5) Eye u zira ozongumbiro otja inḓo. Ongamburiro ndji ha teratera ndja zikamena kondjiviro yatjiri ya Mukuru wetu, i tu vatera kutja tu kayende komurungu okutjita omarundurukiro.—Jak. 2:26.

14. Omomuano uṋe omuapostele Petrus ma ṋunisa ounanḓengu wokuṱakamisa imbi mbi twe rihongo? (Wina tara kotjiperendero.)

¹⁴ Omuapostele Petrus wa ṋunisa omuano omunanḓengu ovakongorere va Kristus mu ve sokuṱakamisa imbi mbi ve rihongo. Eye wa hungirira kehungi rOmbeibela ohunga na Noa. Jehova wa raera Noa kutja, okupitira momupupo eye ma kayandeka ovandu ovarunde voruveze ndwo. Noa neṱunḓu re aave hepa okutjita otjiṋa kutja ve yamwe, nandarire kutja aave tjiwa kutja omupupo mau ya. Arikana tjiwa kutja Petrus aa hungire ohunga noruveze komurungu womupupo ngunda Noa aa “ungura ihi otjitendeze.” (1 Petr. 3:20) Otjiperi kutja Noa neṱunḓu re va ṱakamisa imbi mbi ve rihonga okuza ku Mukuru mokutunga otjitendeze, oskepi onene. (Hebr. 11:7) Ku nao, Petrus wa sasaneka imbi Noa mbya tjita ku nombapitisimo, indu tja tjanga nai: “Nomeva nga owo otjiraisiro tjombapitisimo nambano ndji mai mu yama.” (1 Petr. 3:21) Momuano tjingewo, matu yenene okusasaneka oviungura ove mbi u ungura nai okurirongerisa kombapitisimo ku noviungura Noa neṱunḓu re mbi va ungura oure wozombura ozengi, indu tjaave ungura otjitendeze. Oviungura viṋe mbi mo hepa okuungura kokutja u rirongerise kombapitisimo?

15. Matu raisa vi kutja tjiri twe ritanaura?

¹⁵ Tjimwe tjoviṋa mbi matu sokutjita, okuritanaura komauvi wetu. (Oviung. 2:37, 38) Indu tji we ritanaura tjiri, mo yenene okutjita omarundurukiro. Hapo ove wa isa okutjita oviṋa mbi hihamisa Jehova, tjimuna okukara motuvakiro, okuungurisa omakaya, poo okutukana nokuungurisa eraka etwe? (1 Kor. 6:9, 10; 2 Kor. 7:1; Ef. 4:29) Indu tji u hi ya tjita nao, kayenda komurungu okukondja okutjita omarundurukiro. Hungira ku nomundu ngu mu rihonga pamwe Ombeibela, poo pura ovanene vombongo okukuvatera. Indu tji u ri omuṱiṱi nu u kara pu novanene voye ponganda, pura ovanene voye okukuvatera kutja u ise ozongaro nḓu maze yenene okukutjaera kutja o ha papitisiwa.

16. Matu sokutjita vi indu tji matu vanga okurikotamena ku Jehova aruhe?

¹⁶ Ounahepero tjinene okutjita oviṋa mbi kurisa oupanga wetu ku na Jehova. Iho matji  kamburire mo okuyenda kozombongarero zombongo, nokukara norupa mu zo. (Hebr. 10:24, 25) Indu tji u yenena okukara norupa motjiungura tjokuzuvarisa, tjita nao aruhe. Indu tji mo kara norupa motjiungura tjokuzuvarisa, ove mo utu okutjaterwa tjinene okutjiungura. (2 Tim. 4:5) Tji u ri omuṱiṱi nu u kara ponganda ripura nai: ‘Ovanene vandje ve sokundjizemburukisa okuyenda kozombongarero poo okukazuvarisa? Poo mbi tjita nao kwami omuini?’ Tji u tjita nao kove omuini, mo raisa ongamburiro, orusuvero, nondangi ku Jehova koviṋa mbye ku pa. Imbyo oviyandjewa ‘mbi tjata ku Ndjambi.’ (2 Petr. 3:11; Hebr. 13:15) Oviyandjewa avihe mbi tu yandja nokuhinokuṋiṋikiziwa vi tjata ku Mukuru wetu. (Sasaneka 2 Ovakorinte 9:7.) Tu tjita nao mena rokutja tu kara nenyando indu tji matu yandja ku Jehova otja pu matu yenene.

17-18. Otjikaṋena tjiṋe tji matji ku vatere kutja u papitisiwe nomena raye? (Omiano 3:3-6)

¹⁷ Otja tji mo kayenda komurungu okutjita omarundurukiro kutja u papitisiwe, ove mo munu omarorero. Ovandu tjiva mape ya ave ku tjiti ouhahu mena rongamburiro yoye ombe, nu nandarire ave ku tatumisa. (2 Tim. 3:12) Otja tji mo kondjo okuisa ongaro ombi, povikando tjiva mape ya o tjiti otjiṋa ho. Poo mape ya o kara nokuhinomuretima nokukurungisiwa kutja komoo kaisa otjiṋa ho. Otjikwaye tji matji ku vatere okuhinokuyumba ohama? Otjikaṋena otjinanḓengu tji matji ku vatere, orusuvero ku Jehova.

¹⁸ Orusuvero rwoye ku Jehova, otjikaṋena otjiwa notjinahepero. (Lesa Omiano 3:3-6.) Orusuvero ndwo kamaaru za po, nu komoo isa okukarera Jehova nandarire kutja u nomauzeu. Ombeibela povikando ovingi i tamuna orusuvero oruṱakame rwa Jehova kovakarere ve. Mena rorusuvero ndwo, eye kamaa isa ovakarere ve. (Eps. 100:5) Ove wa ungurwa kosaneno ya Mukuru. (Gen. 1:26) Ove mo yenene okuraisa vi orusuvero ndwo?

19. Mo yenene vi okuraisa ondangi ku imbi avihe Jehova mbye ku tjitira? (Ovagalate 2:20)

¹⁹ Uta nondangi. (1 Tes. 5:18) Eyuva arihe ripura kutja, ‘Jehova we ndji raisira vi orusuvero?’ Itja ndangi ku Jehova mozongumbiro zoye, nu tamuna oviṋa mbye ku tjitira. Tjiwa kutja Jehova u tjita oviṋa mbyo mena rokutja we ku suvera, tjimuna omuapostele Paulus tja muna. (Lesa Ovagalate 2:20.) Ripura kutja, ‘Ami wina etje vanga okuraisira Jehova orusuvero  rwandje?’ Orusuvero rwetu ku Jehova maru tu vatere okunakaura omarorero nokupanḓera po nondoṋeno. Maru tu hingi okurikotamena ku Jehova aruhe nokumuraisira eyuva arihe kutja twe mu suvera.

20. Mo sokutjita vi kutja u riyandje ku Jehova nu omukambo mbwo omunahepero pu pe ṱeki pi?

²⁰ Otja oruveze tji maru kayenda, orusuvero rwoye ku Jehova maru ku hingi okukumba ongumbiro yapeke ku Jehova. Ove mo riyandja ku Mukuru. Zemburuka kutja tji we riyandja ku Jehova, ove mo kara nomaundjiro wokurikotamena ku ye nga aruhe. Indu tji we riyandja ku Jehova, ove u kwizika okumukarera, nandarire kehi yomauzeu. Ko hepa okutjita omakwizikiro ngo rukwao. Otjingaperi kutja, tji twa tjiti omeriyandjero tu toora omukambo omunene. Ripurira ku imbi: Ove mo yenene okutoora omikambo pekepeke mehupo roye tjiva oviwa, posi ya kape nomukambo omuwa mbwa kapita omeriyandjerero woye ku Jehova. (Eps. 50:14) Satan u kondja okungundiparisa orusuvero rwoye ku na Tate woye, kutja o ha rire omuṱakame ku ye. O yandjere Satan okutaara. (Job 27:5) Orusuvero rwoye ku Jehova maru ku vatere kutja u rire omuṱakame komeriyandjero woye, nokutja u tumbuke popezu na Tate woye womeyuru.

21. Ongwaye tji matu tja ombapitisimo kamaandero, posi ya omautiro?

²¹ Ove tji we riyandja ku Jehova, hungira ku novanene vombongo ohunga nomukambo omunanḓengu mbu mo vanga okutoora. Aruhe zemburuka kutja ombapitisimo omautiro nu kamaandero. Omautiro wondjira onde yokurikotamena ku Jehova. Okutja nai pamisa orusuvero rwoye ku na Iho. Twa po ozondando nḓu maze ku vatere kutja orusuvero rwoye ru kure eyuva arihe. Ozondando nḓo maze ku vatere kutja u papitisiwe. Indo mari ririre eyuva ewa tjinene. Posi ya inga omautiro. Kayende komurungu okukurisa orusuvero rwoye ku Jehova na kOmuna we nga aruhe.