Omena raye omurumendu ngwa isanewa “mukwetu” tjaa tja ma ‘pandjarisa’ eṱa re indu tja kupu Rut? (Rut 4:1, 6)

Moruveze rwOmbeibela, omurumendu ngwa kupa tja ṱu nokuhinovanatje, omapuriro ngu maye kongorere mba aaye hepa okuzirwa: Mape tjitwa tjike kehi re? Hapo ena romuhoko we mari zemi nga aruhe? Omatwako wa Moses aaye vatere okuzira omapuriro ngo.

Aape tjitwa tjike kehi romurumendu ngwa ṱu poo ngwa randisa ehi re mena rousyona? Erumbi re, poo omuzamumwe we wopopezu aa yenene okuranda ehi ndo, kokutja ehi ri kare meṱunḓu ndo.—Lev. 25:23-28; Num. 27:8-11.

Okutjita nao aaku vatere vi kutja ena romuhoko womurumendu ngwa ṱu ari ha zemi? Erumbi poo omuangu womurumendu ngwa ṱu aa sokukupa omuhepundu ngo, tjimuna tji pa tjitwa ku Rut. Eye aa tjiti nao kutja ve kare nomuatje kumwe ngu ma kambura ena romurumendu ngwa ṱu, nokurumata ouini we. Okutjita nao wina aaku tjevere omukazendu omuhepundu ngo.—Deut. 25:5-7; Mat. 22:23-28.

Tara kotjihorera tja Naomi. Eye wa kupirwe i yomurumendu wena Elimelek. Indu omurumendu we novanatje ve vevari ovazandu tji va ṱa, kapa ri nomundu ngwaa yenene okumuparura. (Rut 1:1-5) Indu tja kotoka koJuda, Naomi wa raera omukwe we Rut okuningira Boas okutja ma randurure ehi rawo. Eye wa ri omuzamumwe wopopezu wa Elimelek. (Rut 2:1, 19, 20; 3:1-4) Nungwari Boas aa tjiwa omuzamumwe warwe wopopezu Ombeibela mu i isana kutja “mukwetu,” ngwa ri wopopezu tjinene. Eye ongwa ri nouyara wokutya kutja ma randurura ehi poo indee.—Rut 3:9, 12, 13.

Rutenga, “mukwetu” wa ri nonḓero yokuvatera. (Rut 4:1-4) Eye aa tjiwa kutja ma hepa ovimariva okuranda ehi, nu wina aa tjiwa kutja Naomi kamaa yenene okupanduka omuatje ngu ma yenene okurumata ehi ra Elimelek. Mukwetu atja yenena okukambura ehi ndo, nu a ririre orupa rwotjirumatwa tje, ku nao iho atja tji weza ombwikwo ye.

Posi yokutja mukwetu wa tya okuhinokurandurura ehi, indu tja muna kutja eye ma sokukupa Rut. Eye wa tja: “Ami hi nakuungurisa ousemba wandje wokuranda ehi romakunino ndi; orondu ami me hiti moumba wokupandjarisa eṱa randje omuini.” (Rut 4:5, 6) Ongwaye tja rundurura oumune we?

Indu mukwetu poo omurumendu warwe tja kupu Rut, nu Rut a panduka omuatje omuzandu, omuatje ngo ma rumata ehi ra Elimelek. Hapo otjiṋa hi matji ‘pandjarisa’ vi “eṱa” ra mukwetu? Ombeibela kai hungire, posi ya mape ya pe nomapu tjiva nga tjitira nao.

• Etenga, eye ma pandjara ovimariva mbi ma ungurisa okurandurura ehi ra Elimelek, mena rokutja ehi ndo kamaari karira ore. Oro mari karira ouini womuatje omuzandu wa Rut.

• Oritjavari, eye ma kara nomerizirira wokutumba nokutjevera ooNaomi na Rut

• Oritjatatu, indu Rut tja kapanduka ovanatje varwe ku na mukwetu, owo atja ve haṋasana otjirumatwa ku novanatje ve varwe.

• Oritjaine, indu mukwetu tje hi novanatje varwe, omuatje wa Rut omuzandu atja kara nousemba kehi ra Elimelek, na indi ora mukwetu. Indu eye tja ṱu, ehi re atja ri rira oromuatje ngu nena ra Elimelek, nu ndi he ri ore. Mukwetu kaa vanga okupandjara eṱa re mokuvatera Naomi. Eye opa zokuyandjera Boas okukambura omerizirira ngo. Boas, eye wa tjita nao mena rokutja aa vanga ‘okuṱiza eṱa reṱunḓu romurumendu ngwi ngwa ṱa.’—Rut 4:10.

Mape ya kutja mukwetu aa vanga okuṱiza ena re neṱa re. Eye ee ripurire ku ye omuini. Nandarire kutja mukwetu wa ungura oukukutu okuṱiza ena re, ndino ena re kari tjiukwa. Eye wina ka munine ondjingonekero yapeke Boas ndja muna, yokurira umwe wooihe mukururume wa Messias, Jesus Kristus. Tjiri ya ri otjiṋa otjihihamise indu mukwetu tje ripurira ku ye omuini nokuhinonḓero yokuvatera omundu ngu ma hepa ombatero.—Mat. 1:5; Luk. 3:23, 32