1-2. Ovikwaye potuingi mbi tjitwa indu ovandu tji mave papitisiwa, nu matu kahungirira ku ye?

 HAPO wa rora okutarera otjimbumba tjovandu mbu mave papitisiwa? Nu o zuu ongamburiro ndji ve na yo momaraka wawo, indu tji mave ziri omapuriro yevari komurungu wombapitisimo. Nu o munu omuano omaṱunḓu wawo nomapanga mu ve nondjoroka tjinene. Indu ovapapitisiwa tji mave piti momeva, o zuu omuano ovandu mu mave tono omake nokumuna ondjoroka ndji ve na yo komirungu vyawo. Otjivike atjihe ovandu ovengi ve yandja omuinyo wawo ku Jehova nu ave papitisiwa otjOvahongonone ve.

² Tjike na ove? Indu tji mo ripura ohunga nokupapitisiwa, oove omundu omuhuze tjinene mouye ourunde mbwi, mena rokutja ove mo “paha Ndjambi.” (Eps. 14:1, 2) Orupa ndwi rwa tjangerwa ove, kutja oove omunene poo oove omuṱiṱi. Posi ya imba mba papitisiwa rukuru, wina mave yenene okukurisa onḓero yawo yokukarera Jehova nga aruhe. Ku nao, matu kahungirira komapu yetatu wokutja ongwaye tji matu vanga okukarera Jehova.

3. Ongwaye ovakarere va Jehova tji va suvera ouatjiri nousemba? (Epsalme 119:128, 163)

³ Jehova wa rakiza ovakarere ve ‘okusuvera ouatjiri.’ (Sak. 8:19) Jesus wa tunduuza ovemukongorere okutjita ousemba. (Mat. 5:6) Iho matji hee kutja ove mo hepa okukara nonḓero yomasa okutjita imbi mbi ri ovisemba, oviwa novikohoke komurungu wa Mukuru. Hapo ove wa suvera ouatjiri nousemba? Eṱe tu nongamburiro kutja ove wa tonda ovizeze noviṋa avihe ovivi novinaurunde. (Lesa Epsalme 119:128, 163.) Omundu ngu kora ovizeze u horera ku Satan omuhonapare wouye mbwi. (Joh. 8:44; 12:31) Ondando imwe ya Satan, okuyamburura ena  ra Jehova Mukuru eyapuke. Satan u handjaura ovizeze ohunga na Mukuru okuza kOtjikunino tja Eden. Eye u kondja okutjita kutja ovandu ve ripure kutja Jehova u ripurira ku ye omuini, omuhonapare ngu hi nouatjiri, nu ngu rurupara oviṋa oviwa kovandu. (Gen. 3:1, 4, 5) Ovizeze Satan mbye hungira ohunga na Jehova, vi kayenda komurungu okutjita kutja ovandu ve kare noumune ouvi ohunga na Mukuru. Indu ovandu tji va toorora okuhinokusuvera “ouatjiri,” Satan u yenena okuvehinga okutjita oviṋa avihe mbi he ri ovisemba novinaurunde.—Rom. 1:25-31.

4. Omomuano uṋe Jehova ma raisa kutja eye ‘ONdjambi omuṱakame’? (Wina tara kotjiperendero.)

⁴ Jehova ‘ONdjambi omuṱakame,’ nu eye nouharupu u honga imba mbe mu suvera ouatjiri. (Eps. 31:5) Mokutjita nao, eye u ve vatera kutja ave ha wovisiwa i yovizeze vya Satan. Jehova wina u honga ovakarere ve okukara nouatjiri nousemba. Iho tji ve vatera kutja ve ritjinde momuano wondengero nokukara nohange momuinyo. (Omiano 13:5, 6) Hapo eye we ku tjitira nao indu tjo rihongo Ombeibela? Ove we rihonga kutja omihingo vya Jehova omisemba kovandu avehe na kourike woye. (Eps. 77:13) Ku nao ove u vanga okutjita imbi Mukuru mbye tja ovisemba. (Mat. 6:33) Nu u vanga okutjiukisa ouatjiri nokuraisa kutja oviṋa Satan mbya hungira ohunga na Mukuru wetu Jehova vi ri posyo. Omomuano uṋe mu mo yenene okutjita nao?

5. Omomuano uṋe mu mo yenene okuraisa kutja u yandja oruvara kouatjiri nousemba?

⁵ Ove mo yenene okuhupa momuano mbu mau raisa kovandu avehe kutja u nakaura ovizeze vya Satan nu u yandja oruvara kouatjiri. Ove mo yenene okuraisa kutja u vanga kutja Jehova ma rire Omuhonapare woye nu u vanga okutjita imbi mbye tja ovisemba. Omomuano uṋe mu mo yenene okutjita nao? Omokukwizika ku Jehova mongumbiro kutja mo mu karere nga aruhe nokupapitisiwa. Orusuvero kouatjiri na ku imbi mbi ri ovisemba, ootjiṋa otjinamasa tji matji yenene okukuhinga okutoorora okupapitisiwa.

6. Omapu yeṋe nge ri mEpsalme 45:4 nge tjita kutja u suvere Jesus Kristus?

⁶ Omena raye tji wa suvera Jesus Kristus? Tara komapu omawa nge ri mEpsalme 45:4. (Lesa.) Jesus wa suvera ouatjiri, omerisusuparisiro nousemba. Indu ove tji wa suvera ouatjiri  nousemba, ku raisa oukahu kutja ove wina wa suvera Jesus Kristus. Ripura nouvanḓe Jesus mbwa raisa mokuyandja oruvara kouatjiri nousemba. (Joh. 18:37) Posi ya, omomuano uṋe Jesus me tunduuza omerisusuparisiro?

7. Otjikwaye tji tji ku tjatera ohunga nomerisusuparisiro wa Jesus?

⁷ Jesus u tunduuza omerisusuparisiro notjihorera tje. Otjotjihorera, eye u yandja ondjozikiro aihe ku Ihe nu kaku ye omuini. (Mar. 10:17, 18; Joh. 5:19) Ove u noumune uṋe ohunga nomerisusuparisiro wa Jesus? Tjiri iho tji ku hinga kutja u suvere Omuna wa Mukuru nokumukongorera. Ongwaye Jesus tje risusuparisa? Mena rokutja wa suvera Ihe ngu ri omurisusuparise, nu u horera ku ye. (Eps. 18:35; Hebr. 1:3) Hapo iho katji ku nanene ku Jesus, ngu horera kovikaṋena vya Jehova?

8. Ongwaye tji tu nondjoroka kutja Jesus Ombara yetu?

⁸ Eṱe twa suvera Jesus otjOmbara yetu mena rokutja Omuhonapare omusemba. Jehova omuini ongwa rongerisa Omuna we nu e mu ziki otjOmuhonapare. (Jes. 50:4, 5) Wina ripura norusuvero rwapeke Jesus ndwa raisa. (Joh. 13:1) Mena rokutja Jesus Ombara yoye, eye wa pwira orusuvero rwoye. Eye wa kahurura kutja imba mbe mu suvera tjiri omapanga we, nu ve raisa orusuvero rwawo mokuṱakamisa omatwako we. (Joh. 14:15; 15:14, 15) Tjiri ondjingonekero yapeke okurira epanga rOmuna wa Jehova.

9. Omomuano uṋe ombapitisimo yOvakriste mu i ri tjimuna oya Kristus?

⁹ Jesus wa rakiza ovemukongorere okupapitisiwa. (Mat. 28:19, 20) Eye wa twa po otjihorera. Momiano tjiva, ombapitisimo ye ya panguka ku indji yovemukongorere. (Tara kokawongo nga “ Omomuano uṋe ombapitisimo ya Jesus mu ya panguka ku indji yovemukongorere.”) Posi ya momiano vyarwe, i ri tjimwe. Indu tja papitisiwa, Jesus we riyandjera omuini okutjita ombango ya Ihe. (Hebr. 10:7) Momuano tjingewo, indu ovakongorere va Kristus tji va papitisiwa, ve raisa kutja owo va yandja omuinyo wawo ku Jehova Mukuru. Nu otjiṋa otjinanḓengu tjinene mehupo rawo, okutjita ombango ya Mukuru nu kayondji oyawo. Ku nao owo mave horere kotjihorera tjOmuhona wawo.

10. Ongwaye orusuvero ku Jesus tji maru sokukuhinga okupapitisiwa?

¹⁰ Ove u nongamburiro kutja Jesus Omuna omukwatwaerike wa Jehova nu u nondjoroka kutja eye Ombara ndja zikwa i Mukuru okuhonapara kombanda yetu. Ove u tjiwa kutja Jesus omurisusuparise, nu eye u horera ku Ihe. We rihonga kutja eye wa parura ovandu mba ṱire ondjara, wa huhumiṋa imba mba wire momuinyo, nu nandarire wa verukisa ovavere. (Mat. 14:14-21) Ove wa muna omuano eye me hongorera ombongo ndino. (Mat. 23:10) Nu u tjiwa kutja eye ma tjiti oviṋa oviwa moruyaveze otjOmbara yOuhona wa Mukuru. Omomuano uṋe mu mo yenene okuraisa orusuvero ku ye? Omokuhorera kotjihorera tje. (Joh. 14:21) Otjiṋa tjimwe tji mo yenene okutjita okuhorera kotjihorera tja Jesus, omokuriyandja ku Jehova nokupapitisiwa.

11. Epu enanḓengu tjinene ndi mari sokutuhinga okupapitisiwa ooriṋe nu omena raye?

¹¹ Epu riṋe enanḓengu tjinene ndi mari sokukuhinga okupapitisiwa? Jesus wa tja etwako enanḓengu pomatwako ayehe wa Mukuru oro ndi: “Suvera Muhona Ndjambi woye nomutima woye auhe, nomuinyo woye auhe, nozondunge zoye azehe, nomasa woye aehe!” (Mar. 12:30) Hapo omambo ngo maye raisa kutja ove wa suvera Mukuru momuano mbwo?

12. Ongwaye tji wa suvera Jehova? (Wina tara kotjiperendero.)

¹² Pe na omapu omengi ngu twa suverera Jehova. Otjotjihorera, ove wa zuva nawa kutja  eye ongu ri “oruharwi rwomuinyo” nokutja eye ongu ri Omuyandje ‘wotjiyandjewa atjihe otjiwa, notjipewa atjihe otjipwe.’ (Eps. 36:9; Jak. 1:17) Otjiṋa atjihe otjiwa tji tu yorokera, tji za ku Mukuru wetu omunarusuvero nomuharupu.

13. Ongwaye otjisuta tjonguturiro tji tji ri otjiyandjewa tjapeke?

¹³ Otjisuta tjonguturiro otjiyandjewa tjapeke Jehova tje tu pa. Ongwaye tji matu tja nao? Ripura ohunga noupanga wopopezu mbwa ri pokati ka Jehova nOmuna we. Jesus wa tja: “Tate we Ndji suvera” nu “Ami mba suvera Tate.” (Joh. 10:17; 14:31) Oupanga wawo we kurira ko indu tji va ri pamwe oure wozombura ozengi. (Omiano 8:22, 23, 30) Ripura ohunga nomuano Mukuru ma hihamwa tjinene okuyandjera Omuna we okutatumisiwa nokuṱa. Jehova we ku suvera nu wa suvera ovandu avehe tjinene. Ku nao opa zokuyandjera Omuna we omusuverwa otjombunguhiro kutja ove novandu varwe mu kahupe nga aruhe. (Joh. 3:16; Gal. 2:20) Tjiri indi eepu enanḓengu ndi twa suverera Mukuru.

14. Otjikwaye otjisemba tji mo sokutoorora okutjita mehupo roye?

¹⁴ Orusuvero rwoye ku Jehova ru kurira ko mena roviṋa ovingi mbi we rihonga ohunga na ye. Tjiri ove u vanga okutumbuka popezu na ye nai nga ko nga aruhe. Nu ove mo yenene. Eye norusuvero u ku tunduuza kutja u yorokise omutima we. (Omiano 23:15, 16) Ove mo  yenene okutjita nao momambo na wina movitjitwa vyoye. Omuano mbu hupa mau raisa kutja ove tjiri wa suvera Jehova. (1 Joh. 5:3) Iho ootjiṋa otjisemba tji mo sokutoorora okutjita mehupo roye.

15. Omomuano ouṋe ove mu mo yenene okuraisa orusuvero rwoye ku Jehova?

¹⁵ Mo yenene okuraisa vi orusuvero roye ku Jehova? Rutenga, ove u kumba okuraisa kutja we riyandja omuini ku Mukuru watjiri. (Eps. 40:8) Nu okuzambo, omeriyandjerero ngwa tjiti mongumbiro, u raisa mokupapitisiwa. Otja tji twa hungirire ko rukuru morupa ndwi, ombapitisimo yoye i rira oruveze rwondjoroka norunanḓengu mehupo roye. Ove u uta okuhupa otja kombango ya Jehova nungwari kayoye omuini. (Rom. 14:8; 1 Petr. 4:1, 2) Iho mape ya atji munika tjimuna otjiṋa otjinene okutjita nu tjiri otjingaperi. Posi ya okutjita nao ku tjita kutja u kare nehupo ewa tjinene. Omomuano uṋe?

16. Omomuano uṋe Jehova mu ma sere ondaya ku imba mbe toorora okumukarera otja kEpsalme 41:12?

¹⁶ Jehova Omundu omuharupu tjinene. Kainatja kutja ove we mu pe ye, eye aruhe me ku pe ovingi kombanda yanao. (Mar. 10:29, 30) Eye me ku sere ondaya nokukupa ehupo ewa tjinene nandarire nai, mouye ourunde mbwi. Ehupo roye rokukarera Jehova kari nokusokuyandera pombapitisimo yoye, nungwari oomautiro. Ove mo yenene okukayenda komurungu okukarera Iho omusuverwa nga aruhe. Orusuvero rwoye na Iho maru yenene okukayenda komurungu okukurira ko. Nu ove mo hupu orure otja ye.—Lesa Epsalme 41:12.

17. Ovikwaye mbi mo yenene okuyandja ku Jehova mbye hi na vyo rukuru?

¹⁷ Indu tji we riyandja ku Mukuru no papitisiwa, ove u nondjingonekero yokuyandja otjiṋa otjihuze tjinene ku Iho. Eye we ku pa oviṋa avihe oviwa ove mbi u yorokera. Ove mo yenene okuyandja kOmuute weyuru nehi otjiṋa eye tji hi na tjo rukuru, tjimuna omeriyandjerero woye nokumukarera mouṱakame. (Job 1:8; Omiano 27:11; Rom. 11:35, 36) Tjiri imbwi oomuano omusemba wokuhupa. Nokuhinomakeyakeyero, orusuvero rwoye ku Jehova eepu enanḓengu ndi mari sokukuhinga okupapitisiwa.

18. Omapuriro yeṋe ngu mape ya o ripura?

¹⁸ Omomuano uṋe mu mo yenene okuzira epuriro ndi, Hapo mo papitisiwa ruṋe? Ove erike ongu mo yenene okuzira epuriro ndo. Posi ya okuripura omuini kutja, ‘Ongwaye tji mbi undja okupapitisiwa?’ maku ku vatere. (Oviung. 8:36) Tara komapu yetatu ngu twa hungirire ko. Etenga, ove wa suvera ouatjiri nousemba. Ripura omuini kutja, ‘Hapo mbi vanga okumuna eyuva rimwe indu ovandu avehe tji mave hungire ouatjiri nokutjita ousemba?’ Oritjavari, ove wa suvera Jesus Kristus. Ripura omuini kutja, ‘Hapo mbi vanga kutja Omuna wa Mukuru ma rire Ombara yandje, nu mbi vanga okuhorera ku ye?’ Oritjatatu, epu enanḓengu tjinene, ove wa suvera Jehova. Ripura omuini kutja, ‘Hapo mbi vanga okuyorokisa omutima wa Jehova mokumukarera?’ Indu omaziriro woye komapuriro nga tje ri oii, ongwaye tji u hi nokupapitisiwa tjimanga?—Oviung. 16:33.

19. Ongwaye tji u ha sokukeyakeya okupapitisiwa? Sasaneka. (Johanes 4:34)

¹⁹ Indu tji mo keyakeya okupapitisiwa, tara kotjisasanekero Jesus tja ungurisa. (Lesa Johanes 4:34.) Jesus wa sasaneka okutjita ombango ya Ihe ku novikurya. Omena raye? Ovikurya vi tu etera ouwa. Jesus aa tjiwa kutja oviṋa avihe Jehova mbye tu ningira okutjita vi tu etera ouwa. Jehova ka vanga kutja eṱe tu tjite otjiṋa tji matji tu hihamisa. Hapo Jehova u vanga kutja tu papitisiwe? Ii. (Oviung. 2:38) Ku nao ove mo yenene okukara nongamburiro kutja okuṱakamisa etwako rokupapitisiwa maku ku etere ouwa. Indu tji u ha keyakeya okurya eriro ewa, ongwaye tji mo keyakeya okupapitisiwa?

20. Matu kahungirira ku ye morupa ndu maru kongorere ko?

²⁰ Ongwaye tjiva tji ve undja? Tjiva mape ya ave tja, “Ami hi ya yenena okupapitisiwa.” Omukambo wokuriyandja omuini ku Jehova oomukambo omunanḓengu mbu mo yenene okutjita. Ku nao, ove mo hepa okuripura nawa ohunga nomukambo mbwo, nu iho tji kambura oruveze nozongondjero kutja u papitisiwe. Posi ya indu tji u nonḓero tjiri yokupapitisiwa, ovikwaye mbi mo yenene okutjita nai okurirongerisa omuini? Matu kahungirira keziriro kepuriro ndo morupa ndu maru kongorere ko.