1. Ovakarere va Jehova tjiva ovaṱakame mape ya ave kara nomeripura yeṋe?

 TJIRI otjiṋa otjiyanḓiparise okutjiwa kutja Jehova u nonyuṋe movakarere ve. Ombeibela i tja: “Muhona u nonyuṋe motjiwaṋa tje.” (Eps. 149:4) Posi yokutja, povikando tjiva mape ya ave kara nomakeyakeyero wokutja Jehova u nonyuṋe mu wo kourike wawo. Ovakarere va Jehova ovengi ovaṱakame mba tamunwa mOmbeibela va ri nouzeu wokukambura kutja Jehova u nonyuṋe mu wo.—1 Sam. 1:​6-10; Job 29:​2, 4; Eps. 51:11.

2. Jehova u nonyuṋe movandu veṋe?

² Ombeibela i raisa oukahu kutja Jehova ma yenene okumuna onyuṋe movandu mbe he ri ohomonena. Omomuano uṋe? Eṱe matu sokukara nongamburiro mu Jesus nokupapitisiwa. (Joh. 3:16) Tji twa tjiti nao, tu raisira varwe kutja twe ritanaura komauvi wetu nu twa tjita omakwizikiro wokutjita ombango ya Mukuru. (Oviung. 2:38; 3:19) Jehova u tjaterwa indu tji matu toora omikambo vyokutja tu kare noupanga ouwa ku na ye. Indu tji matu ungura oukukutu mokuyenenisa omakwizikiro wetu wokumukarera, Jehova ma kara nonyuṋe mweṱe nu me tu vara otjomapanga we wopopezu.—Eps. 25:14.

3. Omapuriro yeṋe yetatu ngu matu kahungirira ko?

³ Omena raye tjiva tji mape ya ave munu kutja Mukuru ke nonyuṋe mu wo? Omiano viṋe Jehova me raisa kutja u nonyuṋe mweṱe? Nu omomuano uṋe Omukriste mu ma yenene okukurisa ongamburiro ye yokutja Mukuru u nonyuṋe mu ye?

OMENA RAYE TJIVA TJI MAPE YA AVE MUNU KUTJA JEHOVA KE NONYUṊE MU WO?

4-5. Nandarire kutja matu munu kutja katu nonḓengu, matu yenene okukara nongamburiro mu ye?

⁴ Okuza kouṱiṱi ovengi vetu tu fula okuhinonḓengu. (Eps. 88:15) Omurumendu omukambure wena Adrián wa tja: “Ami  aruhe ee rimunu okuhinonḓengu. Indu tji mba ri omuṱiṱi, mbi zemburuka okukumbira eṱunḓu randje kutja ri kahupe mOparadisa, nandarire kutja ee rimunu okuhinonḓengu okukahupa mo.” Tony, ngu hi na wa kurisiwa i yOvahongonone va Jehova, wa tja: “Ovanene vandje kaave ndji raere kutja ve ndji suvera poo ve nonyuṋe mwami. Ami ee muna kutja kape notjiṋa tji me yenene okutjita kutja ve kare nonyuṋe mwami.”

⁵ Indu povikando tjiva tji matu munu kutja katu nonḓengu, matu sokuzemburuka kutja Jehova omuini ongwe tu nanena ku ye. (Joh. 6:44) Eye u muna ovikaṋena oviwa mweṱe nu utu tjiwa nawa kutja oweṱe ovandu mbu tu ri vi. (1 Sam. 16:7; 2 Ekuruh. 6:30) Okutja, eṱe matu sokukara nongamburiro mu ye, indu tji ma tja oweṱe ovihuze ku ye.—1 Joh. 3:​19, 20.

6. Hapo Paulus wa ri noumune uṋe ohunga nomauvi nga tjita morukapitaveze?

⁶ Ngunda atu hi ye rihonga ouatjiri, ovengi vetu twa tjita oviṋa mbi mape ya avi tjita kutja tu rimune ondjo. (1 Petr. 4:3) Varwe mbe karera Jehova nouṱakame mape ya ngamba ve kondja noungundipare kaaṋi. Tjike ohunga na ove? Hapo povikando tjiva u fula kutja Jehova kemee ku isire? Tji pe ri nao, otjihuhumiṋe okutjiwa kutja ovakarere va Jehova ovaṱakame aave kondjo noumune otja imbwo. Otjotjihorera, omuapostele Paulus aa fula navi indu tje ripurire koungundipare we. (Rom. 7:24) Otjingaperi kutja Paulus we ritanaura komauvi we na papitisiwa. Posi ya, eye wa tja: “Owami omuhinanḓengu tjinene povaapostele avehe.” Nu wina wa tja: “Owami ngu mbi ri omunauvi tjinene pu avehe.” (1 Kor. 15:9; 1 Tim. 1:15)

7. Hapo matu sokuzemburuka ye ohunga nomauvi wetu ngu twa tjita morukapitaveze?

⁷ Tate wetu womeyuru wa kwizika kutja me tu isire indu tji twe ritanaura. (Eps. 86:5) Ku nao, indu tji twe ritanaura tjiri komauvi ngu twa tjita, eṱe matu yenene okukara nongamburiro momambo wa Jehova kutja ouatjiri nu eye we tu isire.—Kol. 2:13.

8-9. Hapo eṱe matu yenene vi okuisa omeripura wokutja katu nokuyenena okuungura pu pa yenene okuyorokisa Jehova?

⁸ Eṱe atuhe tu vanga okukarera Jehova otja pu matu yenene. Posi ya, tjiva ve muna kutja kamaa ve yenene okuungura pu pa yenena kokutja eye ma kare nonyuṋe mu wo. Omukazendu omukambure wena Amanda wa tja: “Ami ee ripura kutja okuungurira Jehova ku heya kutja aruhe me hepa okuungura ovingi. Ku nao, potuingi ee kondjo okuungura ovingi nandarire kutja hi nokuyenena. Indu tji mbe hi nokuyenenisa oviṋa mbi me sokutjita, ee munu kutja Jehova ke nonyuṋe mwami.”

⁹ Hapo eṱe matu yenene vi okuisa omeripura wokutja katu nokuyenena okuungura pu pa yenene okuyorokisa Jehova? Zemburuka kutja Jehova ke tu ṋiṋikiza. Eye ka undjira ko ovingi kweṱe mbi tu ha yenene okutjita. Eye u kara nonyuṋe mu avihe mbi matu mu ungurire otja pu matu yenene. Wina, ripurira kovihorera mOmbeibela vyaimba mba karera Jehova nomitima vyawo avihe. Otjotjihorera, ripura ohunga na Paulus. Eye wa ungurire oukukutu oure wozombura ozengi, aa kayenda ouyenda oure, nu wa zikamisire ozombongo ozengi. Posi ya, indu ehupo re tji ra runduruka na indu tje hi na a yenene okuzuvarisa otja pu ma yenene, hapo iho aatji hee kutja Jehova kaari nonyuṋe mu ye rukwao? Kako. Eye wa kayenda komurungu okuungura otja pu ma yenene, nu Jehova we mu sera ondaya. (Oviung. 28:​30, 31) Momuano tjingewo, imbi matu yenene okuungurira Jehova mape ya avi runduruka. Posi yokutja, otjiṋa otjinanḓengu ku ye otjo hi tjokutja ongwaye tji tu mu karera. Nambano, ngatu katare komiano tjiva Jehova me tu raisira kutja u nonyuṋe mweṱe.

 OMOMUANO UṊE JEHOVA ME RAISA KUTJA U NONYUṊE MWEṰE?

10. Matu yenene vi okuzuva omambo wa Jehova ngu ma raisa kutja eye u nonyuṋe mweṱe? (Johanes 16:27)

¹⁰ Omokupitira mOmbeibela. Jehova u paha omiano okuraisira ovakarere ve kutja eye we ve suvera nu nonyuṋe mu wo. Omatjangwa ye hungirira kovikando vivari indu tja raera Jesus kutja eye Omuna we omusuverwa nu u nonyuṋe mu ye. (Mat. 3:17; 17:5) Mo vanga okuzuva Jehova tji me ku kwizikire kutja u nonyuṋe move? Jehova ka hungire ku na eṱe okuza keyuru, nungwari u hungira okupitira mEmbo re, Ombeibela. Indu tji matu lese omambo wa Jesus worusuvero tji ma hungire kovahongewa ve, i ri tjimuna Jehova ma hungire omambo ngo kweṱe. (Lesa Johanes 16:27.) Jesus aa horere kovikaṋena vya Ihe. Ku nao, indu tji matu lese omuano Jesus maa raisa kutja u nonyuṋe movahongewa ve ovaṱakame mbe ha ri ohomonena, matu yenene okuripura aayo Jehova ma hungire omambo ngo kweṱe.—Joh. 15:​9, 15.

11. Omena raye indu tji matu munu omauzeu, tji ku ha hee kutja Jehova ke nonyuṋe mweṱe? (Jakobus 1:12)

¹¹ Eye u tu pa imbi mbi matu hepa. Jehova u nonḓero okutuvatera noviṋa mbi matu hepa. Jehova mape ya povikando tjiva a yandjere kutja oviṋa ovivi vi tjitwe kweṱe, tjimuna tja tjita ku Job. (Job 1:​8-11) Indu tji tu ri kehi yomarorero, katji nokuheya kutja Mukuru ke nonyuṋe mweṱe. Nungwari, owo ye tjita kutja tu raise kutja twa suvera Mukuru nu tu nongamburiro mu ye. (Lesa Jakobus 1:12.) Tji tu ri momarorero, eṱe tu muna omuano eye me tu suvera nomuano me tu vatera kutja tu tuurunge omarorero.

12. Matu yenene okurihongera tjike kotjihorera tja Dmitrii?

¹² Ripura ohunga na imbi mbya tjitwa komurumendu omukambure wena Dmitrii ngwa tura moAsia. Eye wa pandjara oviungura vye nu ka yenene okumuna vyarwe oure womieze omingi. Eye wa tya okuraisa kutja u nongamburiro mu Jehova mokuungura ovingi motjiungura tjokuzuvarisa. Pa kapita omieze omingi nokuhinokumuna oviungura. Okuzambo, eye wa verere tjinene nga tje hi na aa yenene okupenduka. Eye wa uta okukeyakeya nokumuna kutja ke nonḓengu yokuvarwa otjomurumendu omusemba poo ihe omusemba, naa munu kutja Jehova ke nonyuṋe mu ye rukwao. Okuzambo, ongurova imwe omuatje we omukazona wa pirinda omambo wa Jesaja 30:15 pombapira nge tja: “Omasa weṋu maye zu mokuporimana  na mokuriyameka.” Omukazona ngo wa eta ombapira ndjo ku ye na tja: “Papa, indu tji mo fula navi, zemburuka etjangwa ndi.” Dmitrii wa muna kutja eṱunḓu re ri novikurya mbya yenene, ozombanda, nopoṋa okukara, mena rombatero ya Jehova. Eye wa tja: “Otjiṋa tjee hepa okutjita ya ri okuporimana, nokukayenda komurungu okuriyameka ku Mukuru wandje.” Indu tji mo tuurunga omauzeu tjingewo, kara nongamburiro kutja Jehova u rikendera ove nu me ku vatere kutja u panḓere po.

13. Jehova mape ya a ungurisa uṋe okuraisa kutja u nonyuṋe mweṱe nu omomuano uṋe?

¹³ Omokupitira movakambure ovakwetu. Jehova u ungurisa ovakambure ovakwetu okuraisa kutja u nonyuṋe mweṱe. Otjotjihorera, eye mape ya a ungurisa varwe okutuyanḓiparisa moruveze orusemba. Ihi tja tjitwa komukazendu omukambure moAsia, indu tja ri nombameno onene. Eye wa pandjara oviungura vye nu wa verere tjinene. Okuzambo, omurumendu we wa tjitire ouvi ounene nu kaa yenene okukarera otjomunene wombongo rukwao. Eye wa tja: “Ami hee zuu nawa kutja ongwaye oviṋa mbi tjaavi tjitwa. Ami ee ripura kutja ngahino mbi noviṋa ovivi mbi mba tjiti, nu Jehova ke nonyuṋe mwami rukwao.” Omukazendu omukambure we riyarikaṋa ku Jehova me mu raisire kutja u nonyuṋe mu ye. Omomuano uṋe Jehova ma tjita nao? Omukazendu omukambure wa tja: “Ovanene vombongo va hungira ku na ami, nu ve ndji vatera okumuna kutja Jehova ngamba we ndji suvera.” Nungwari, kombunda yoruveze kaaṋi, eye wa ningira ombatero ku Jehova rukwao. Eye wa tja: “Meyuva tjingero mba muna orutuu okuza kokambumba kovakambure mombongo. Otja tjee lese omambo wawo omahuhumiṋe, ami mba muna kutja Jehova we ndji zuvire.” Otjiperi kutja Jehova potuingi u tu raisira kutja u nonyuṋe mweṱe  okupitira momambo omawa okuza ku varwe.—Eps. 10:17.

14. Omomuano uṋe warwe Jehova me raisa kutja u nonyuṋe mweṱe?

¹⁴ Jehova wina u tu raisira kutja u nonyuṋe mweṱe mokuungurisa ovakambure ovakwetu okutuvyura indu tje ri ohepero. Otjotjihorera, meserewondo etenga, Jehova wa ungurisa omuapostele Paulus okutjanga otutuu 14 kovakambure ovakwao. Motutuu two, Paulus wa vyura ovakambure ovakwao oukukutu, posi ya momuano orusuvero. Ongwaye Jehova tja hinga Paulus okutjanga omavyuriro ngo? Jehova oIhe omuwa neye u vyura ovanatje ve eye “me nonyuṋe.” (Omiano 3:​11, 12) Ku nao, indu omundu tji ma ungurisa Ombeibela okutuvyura, iho katji nokuheya kutja Jehova wa pindike na eṱe, nungwari matji raisa kokutja Jehova ngunda we tu suvera. (Hebr. 12:6) Omomiano viṋe vyarwe Jehova me raisa kutja u nonyuṋe mweṱe?

OMIANO VYARWE MBI RAISA KUTJA JEHOVA U NONYUṊE MWEṰE

15. Jehova u yandja ombepo ye ondjapuke ku uṋe, nu omena raye otjiṋa hi tji matji yenene okutupa ongamburiro?

¹⁵ Jehova u yandja ombepo ye ondjapuke ku imba eye me nonyuṋe. (Mat. 12:18) Ripura ohunga nepuriro ndi, ‘Hapo ami mbi raisa ovikaṋena tjiva mbi za kovihape vyombepo ondjapuke ya Mukuru mehupo randje?’ Hapo u muna kutja ove u nomuretima na varwe okukapita indu tji wa uta okutjiwa Jehova? Otjiperi kutja otja tji mo raisa ovikaṋena vyombepo ya Mukuru, otji u kurisa ongamburiro yoye kutja Jehova u nonyuṋe move.—Tara kokawongo nga “ Ovihape vyOmbepo ovyombi . . . ”

16. Jehova u ungurisa uṋe okuzuvarisa ombuze ombwa, nu ove u noumuṋe uṋe ohunga notjiṋa ho? (1 Ovatesalonika 2:4)

¹⁶ Jehova u nonyuṋe okuyandja omerizirira wokuzuvarisa ombuze ombwa ku imba eye me nonyuṋe. (Lesa 1 Ovatesalonika 2:4.) Tara komuano omukazendu omukambure wena Jocelyn ma muna ouwa okuza mokuzuvarisa ombuze ombwa ku varwe. Eyuva rimwe, Jocelyn wa penduka ama pama momuinyo. Eye wa tja: “Ami hi na mba ri nomasa morutu, nu ee rimunu kutja hi nombatero. Posi yokutja, ami mba ri omukandjira nu eyuva ndo ee sokupita motjiungura tjokuzuvarisa. Ku nao, ami mba kumba ne piti motjiungura tjokuzuvarisa.” Omuhuka omunene mbwo Jocelyn wa hakaene ku na Mary, omukazendu womutima omuwa, ngwa yakura okurihonga Ombeibela.  Omieze tjiva kombunda yanao, Mary wa tja eye aa kumbu ku Mukuru okumuvatera indu Jocelyn tja kongora pomuvero we. Jocelyn we rihonga tjike okuza kotjiṋa hi? Eye wa tja: “Ami ee munu kutja Jehova ee ndji raere kutja ‘Ami mbi nonyuṋe move.’” Otjiperi kutja kavandu avehe mbu mave puratene kombuze ndji tu ve zuvarisa. Posi yokutja, eṱe matu yenene okukara nongamburiro yokutja Jehova u nonyuṋe, indu tji matu kondjo pu matu yenene okuzuvarisa ombuze ombwa ku varwe.

17. Ove we rihongo tjike okuza komambo wa Vicky ohunga notjisuta tjonguturiro? (Epsalme 5:12)

¹⁷ Jehova u ungurisa onḓengu yotjisuta tjonguturiro ku imba eye me nonyuṋe. (1 Tim. 2:​5, 6) Posi ya tjike indu ngamba tji tu muna kutja Jehova ke nonyuṋe mweṱe, nandarire kutja tu nongamburiro motjisuta tjonguturiro nu twa papitisiwa? Zemburuka kutja, kaaruhe tji matu yenene okukara nongamburiro mweṱe oveni, posi ya matu yenene okukara nongamburiro mu Jehova. Eye u vara imba mbe nongamburiro motjisuta tjonguturiro kutja ovasemba nu wa kwizika okuvesera ondaya. (Lesa Epsalme 5:12; Rom. 3:26) Okuripurira ko oukoto kotjisuta tjonguturiro kwa vatera omukazendu omukambure wena Vicky. Eyuva rimwe, ee tja za nokuripura oukoto ohunga notjisuta tjonguturiro, eye wa tja: “Jehova we ndji raisira omuretima oruveze orure. . . . Posi yokutja ya ri tjimuna ami ee mu raere kutja, ‘Orusuvero rwoye karu nonḓengu ku ami. Ombunguhiro yOmuna woye kai nonḓengu yokuisa po omauvi wandje.’” Eye wa uta okumuna kutja Jehova we mu suvera mokuripurira ko oukoto kotjisuta tjonguturiro. Eṱe wina tu muna kutja Jehova we tu suvera nokutja u nonyuṋe mweṱe otja tji matu ripurire kotjisuta tjonguturiro.

18. Otjikwaye tji matu yenene okukara nongamburiro mo indu tji twa kayenda komurungu okusuvera Tate wetu womeyuru?

¹⁸ Nandarire kutja mape ya twa kondjo oukukutu okuungurisa oviṋa mbi twe rihongo morupa ndwi, povikando tjiva mape ya atu u momuinyo, nu atu ripura kutja hapo Jehova u nonyuṋe mweṱe. Iho tji tja tjitwa kove, zemburuka kutja eye nonyuṋe mu imba “mbe Mu suvera.” (Jak. 1:12) Okutja, kayende komurungu okutumbuka popezu na Jehova nokupaha omiano eye me ku raisira kutja u nonyuṋe move. Aruhe zemburuka kutja Jehova “ke ri kokure na eṱe atuhe.”—Oviung. 17:27.