1-2. (a) Paulus wa ri mongaro iṋe indu tja tjanga kOvaefese, nu omena raye tje ve tjangera? (b) Omapuriro yeṋe ngu matu katara ko?

 INDU tjaa ri omukamburwa woponganda moRoma, omuapostele Paulus aa vanga okutunduuza ovakambure ovakwao. Eye kaa yenene okuveryangera, ku nao ee ve tjangere otutuu. Eye wa tjanga orutuu otja indo kOvaefese mombura ndji 60 poo 61 O.Z.—Ef. 1:1; 4:1.

² Ozombura ape omurongo komurungu yanao, Paulus wa ri moEfesus oure woruveze kaaṋi ama zuvarisa nokuhonga ombuze ombwa. (Oviung. 19:​1, 8-10; 20:​20, 21) Eye wa suverere ovakambure ovakwao tjinene nu aa vanga okuvevatera okukayenda komurungu okurira ovaṱakame ku Jehova. Posi ya omena raye tja tjangera Ovakriste ovatwirisiwa ohunga nonḓorera nondjerera? Nu ovikwaye Ovakriste avehe mbi mave yenene okurihonga okuza ku imbi eye mbya tjanga? Ngatu katare omaziriro komapuriro nga.

OKUZA MO MONḒORERA OKUYENDA KONDJERERA

3. Omambo yeṋe Paulus nga ungurisa morutuu rwe kOvaefese?

³ Paulus wa tjanga kOvakriste Ovaefese kutja: “Rukuru eṋe oveni mwa ri monḓorera, nungwari . . . nambano mu ri mondjerera.” (Ef. 5:8) Paulus wa ungurisa omambo nga ‘onḓorera’ ‘nondjerera’ okusasaneka omuano Ovaefese mu va runduruka. Ngatu katare kutja omena raye Paulus tja tja Ovaefese ‘va ri monḓorera.’

4. Omomuano uṋe Ovaefese mu va ri monḓorera?

⁴ Ongamburiro yoposyo. Ngunda Ovaefese ave hi ye rihonga  ouatjiri nokurira Ovakriste, owo aave kambura mozongamburiro zoposyo nu va ri novizerika. Motjihuro tja Efesus mwa ri oruveze ovandu kaave ve kerikotamenena komukuru wotjisenginina wena Artemis, nu ovandu ovengi oruveze ndwo aave munu kutja oruveze ndwo rwa ri oruwa tjinene. Ovandu aave i kondjuwo ndjo okukerikotamena koomukuru vovisenginina. Ovandu mbaave ungura oviṋa vyokomake aave tjiti ovimariva ovingi mokurandisa oviserekarera vyondjuwo ndjo notjiserekarera tjomukuru oserekaze Artemis. (Oviung. 19:​23-27) Ovandu ovengi moEfesus wina aave tjiti oundjai.—Oviung. 19:19.

5. Omomuano uṋe Ovaefese mu va ri monḓorera?

⁵ Okuhinokuhupa otja komirari vya Jehova. Ovandu moEfesus aave tjiti oruvakiro nu nandarire kaave ṱohoṋi nongaro yawo ombi ndjo. Omanyando novitjitwa vyawo vyozongamburiro potuingi vya ri ohunga nomahakaeneno womonyama. (Ef. 5:3) Ovaefese ovengi ‘kava ri nohoṋi nangarire kaṱiṱi,’ tji tji heya kutja “kava ri nomuhihamwatima mena roviṋa ovivi mbyaave tjiti.” (Ef. 4:​17-19) Ngunda ave hi ye rihonga omirari vya Jehova ohunga na imbi mbi ri ovisemba na imbi mbi he ri ovisemba, omeritjiviro wawo womomutima kaaye ve vere indu tji va tjiti oviṋa ovivi. Owo wina kaave ripura ohunga nomuano Jehova maa fula mena rovitjitwa vyawo. Paulus opa zokutja “omeripuriro wawo owo onḓorera. Nowo kave norupa mongaro Ndjambi ndje yandja.”

6. Omena raye Paulus tja yenene okutja Ovaefese ‘nambano ve ri mondjerera’?

⁶ Posi ya, Ovaefese tjiva kave karerere monḓorera. Paulus wa tjanga kutja “tjinga amwa rira otjiwaṋa tjaMuhona, nambano mu ri mondjerera.” (Ef. 5:8) Owo nambano aave hupu otja kEmbo ra Jehova, nda ri tjimuna ondjerera ndjaai ve hongorere po. (Eps. 119:105) Ovaefese mba va isa ovitjitwa vyongamburiro yoposyo ndjo nomeritjindiro omavi. Owo ‘aave horere’ ku Mukuru nokutjita otja pu mave yenene okurikotamena ku Jehova nokumuyorokisa.—Ef. 5:1.

7. Omomuano uṋe ongaro yetu mu i ri tjimuna yOvakriste Ovaefese ovengi?

 ⁷ Momuano tjingewo, ngunda atu he rihonga ouatjiri, twa ri mozongamburiro zoposyo nu kaatu hupu otja komirari vya Jehova. Tjiva vetu aatu zemburuka ovitjitwa vozongamburiro zoposyo poo aatu hupu moruvakiro. Posi ya indu tji twe rihonga ohunga nomirari vya Jehova, eṱe twa tjita omarundurukiro. Eṱe twa uta okuhupa momuano eye me vanga. Nu mena ranao, eṱe tu muna ouwa. (Jes. 48:17) Posi ya tu muna omauzeu. Eṱe matu sokukara kokure nonḓorera ndji twa isa kongotwe natu kayenda komurungu okurira “ovandu vondjerera.” Omomuano uṋe mu matu yenene okutjita nao?

KARA KOKURE NONḒORERA

8. Otja kOvaefese 5:​3-5, ovikwaye Ovaefese mbyaave hepa okunakaura?

⁸ Lesa Ovaefese 5:​3-5. Kokutja ve yenene okuhupa otja komirari vya Jehova, Ovakriste Ovaefese aave hepa okukayenda komurungu okunakaura oviṋa avihe mbi ha tjata ku Jehova. Iho aatji kamburire mo oruvakiro nu wina okuhinokuhungira omambo omavi. Paulus wa zemburukisa Ovaefese kutja mave sokunakaura oviṋa otja imbyo kutja ve pewe “otjirumatwa mouhona waKristus na Ndjambi.”

9. Omena raye tji matu hepa okukengeza kutja atu ha tjiti otjiṋa tji mape ya atji tjiti kutja tu tjite ouhakohoke?

⁹ Eṱe wina matu sokukayenda komurungu okukengeza kutja atu ha tjiti ‘oviungura vyomungandjo vyonḓorera.’ (Ef. 5:11) Otjingaperi kutja, indu omundu tji ma tara nokupuratena, poo okuhungira ohunga noviṋa ovihakohoke, i rira oupupu ku ye okutjita oviṋa mbi he ri ovisemba. (Gen. 3:6; Jak. 1:​14, 15) Mehi rimwe, otjimbumba tjOvahongonone va Jehova va uta okuhindasana ozombuze okupitira morungovi rwomahakaeneno. Pomautiro, ovengi vawo aave hungire ohunga na Jehova nouatjiri. Posi ya, otja oruveze tjaaru kayenda owo va uta okuhungira ohunga noviṋa mbi ha tjata ku Jehova. Omahungi yawo tjinene ya ri ohunga nomahakaeneno womonyama. Ovengi vawo kombunda va tja omahungi omahakohoke nga ya tjita kutja ve tjite oruvakiro.

10. Satan u vanga kutja tu kare noumune uṋe? (Ovaefese 5:6)

¹⁰ Ouye wa Satan u kondjisa okutjita kutja tu kambure kutja imbi Jehova mbye tja ovihakohoke kavihakohoke oparukaze. (2 Petr. 2:19) Otjiṋa hi katji tu temisa. Omudiaboli aruhe u kondjisa okukurungisa ovandu kutja ave ha munu ombangu pokati kaimbi mbi ri ovisemba na imbi mbe he ri ovisemba. (Jes. 5:20; 2 Kor. 4:4) Katjikumise kutja ozomuvi ozengi, ozoprograma zotiivii notungovi tu handjaura oumune mbu pirukira omirari vya Jehova omisemba. Satan u vanga kutja tu mune kutja omeritjindiro omahakohoke kaye ri posyo, posi ya omawa nu ye tu pa ondjoroka.—Lesa Ovaefese 5:6.

11. Omomuano uṋe otjihorera tja Angela mu matji raisa ounanḓengu wokuṱakamisa eronga ndi ri mOvaefese 5:7? (Wina tara kotjiperendero.)

¹¹ Satan u vanga kutja tu kare pu novandu mbe tjita kutja i rire ouzeu kweṱe okukara nonḓuviro komirari vya Jehova. Paulus opa zokutunduuza Ovaefese kutja ‘ave ha wana novandu’ mbe tjita oviṋa ovivi komurungu wa Mukuru. (Ef. 5:7) Nungwari eṱe matu hepa okukengeza tjinene okukapita Ovaefese voruveze orukuru, mena rokutja omapanga wetu kawomba mbu tu kara pamwe uriri, posi ya wina owomba mbu tu hakaena motungovi twomahakaeneno. Angela a ngwa tura moAsia, wa muna omuano otungovi twomahakaeneno  mu matu yenene okurira otunaumba. Eye wa tja: “Ya rundurura omeripura wandje kouṱiṱiṱiṱi. Moruveze orusupi, kaatji ndji ṱunu okukara nomapanga motungovi twomahakaeneno nge ha ri nondengero komirari vyOmbeibela. Korusenina, ami mba uta okuripura kutja kanavi okuhupa ehupo ndi ha tjata ku Jehova.” Posi yokutja, ovanene tjiva vombongo va vatera Angela norusuvero okutjita omarundurukiro nga hepa okutjita. Eye wina wa tja: “Ami nai mbi yandja ombango ku Jehova nomeripura we pendje nokuyandja ombango kotungovi twomahakaeneno.”

12. Otjikwaye tji matji tu vatere kutja tu kongorere omirari vya Jehova vyouwa nouvi?

¹² Eṱe matu sokurwisa ouripura wouye wokutja omeritjindiro omahakohoke kamavi. Eṱe matu tjiwa kutja okutjita nao katjiṋa otjiwa. (Ef. 4:​19, 20) Onawa okuripura oveni kutja: ‘Hapo mbi kondja kutja e ha kara tjinene pu novandu mbu tu ungura pamwe, novandu mbu tu hita pamwe oskole, poo na imba mbe hi nondengero komirari vya Jehova omisemba? Hapo ami mbi kongorera omirari vya Jehova nouvanḓe, nandarire kutja tjiva mape ya ave tja hi puratene koumune wawo?’ Otja tji pa hungira mu 2 Timoteus 2:​20-22, eṱe wina matu sokukengeza indu tji matu toorora omapanga mombongo. Eṱe matu sokukara noumune wokutja tjiva mape ya ave he tu vatere kutja tu kayende komurungu okurira ovaṱakame ku Jehova.

KAWONDJEYE “OTJA OVANDU VONDJERERA”

13. Maku hee tjike ‘okukara otja ovandu vondjerera’? (Ovaefese 5:​7-9)

¹³ Paulus wa tunduuza Ovakriste va Efesus okunakaura onḓorera nu wina okukawondja “otja ovandu vondjerera.” (Lesa Ovaefese 5:​7-9.) Hapo iho matji hee tjike? Iho matji hee kutja matu sokuritjinda otjOvakriste vatjiri oruveze aruhe. Otjiṋa tjimwe tji matji tu vatere okutjita nao, okulesa nokukonḓonona Ombeibela nawa pamwe nomambo wetu nga zikamena kOmbeibela. Tjiri ounanḓengu tjinene kweṱe okuyandja ombango kotjihorera nomahongero wa Jesus Kristus ngu ri “ondjerera youye.”—Joh. 8:12; Omiano 6:23.

14. Omomuano uṋe ombepo ondjapuke mu mai yenene okutuvatera?

 ¹⁴ Eṱe wina tu hepa ombatero yombepo ondjapuke ya Muhona kutja tu kayende komurungu okuritjinda “otja ovandu vondjerera.” Omena raye? Mena rokutja ouzeu okupanḓera poukohoke mouye wourunde mbwi. (1 Tes. 4:​3-5, 7, 8) Ombepo ondjapuke mai yenene okutuvatera kutja atu he ripura tjimuna ovandu mouye mbe he ripura tjimuna Jehova. Ombepo ondjapuke wina mai yenene okutuvatera kutja tu kare ‘noviṋa ngamwa avihe vyouwa nousemba.’—Ef. 5:9.

15. Omomiano viṋe mu matu yenene okumuna ombepo ondjapuke? (Ovaefese 5:​19, 20)

¹⁵ Omuano umwe mu matu yenene okumuna ombepo ondjapuke, omokuningira okupitira mongumbiro. Jesus wa tja Jehova ma yandja “Ombepo ondjapuke” ku imba mbu mave mu ningire. (Luk. 11:13) Nu indu eṱe tji matu tanga Jehova pozombongarero zombongo, eṱe wina tu muna ombepo ondjapuke. (Lesa Ovaefese 5:​19, 20.) Ombepo ondjapuke mai tu vatere okuhupa momuano mbu mau yorokisa Mukuru.

16. Ovikwaye mbi mavi yenene okutuvatera okutjita ozondando ozosemba? (Ovaefese 5:​10, 17)

¹⁶ Indu tji matu sokutoora omikambo ominanḓengu, eṱe matu hepa ‘okutjiwa imbi Muhona mbi ma vanga kutja tu tjite’ nokutoorera ko omukambo. (Lesa Ovaefese 5:​10, 17.) Indu tji twa paha omirari vyOmbeibela mbi matu yenene okuungurisa mongaro mu tu ri, eṱe mouatjiri tu paha ouripura wa Mukuru. Nu tji twa ṱakamisa omirari vye, tu yenena okutjita ozondando ozosemba.

17. Omomuano uṋe mu matu yenene okuungurisa oruveze rwetu momuano omuwa? (Ovaefese 5:​15, 16) (Wina tara kotjiperendero.)

¹⁷ Paulus wa ronga Ovakriste moEfesus okuungurisa oruveze rwawo momuano omuwa. (Lesa Ovaefese 5:​15, 16.) Satan ngu ri “umwe Omunaurunde” nomunavita na eṱe, u vanga kutja tu ungure ovingi mouye kokutja  atu ha kara noruveze motjiungura tja Mukuru. (1 Joh. 5:19) Omukriste mape ya a utu okuripurira kovimariva, omerihongero, poo oviungura, pendje nokuungurira Jehova momiano omingi pekepeke. Eye tja tjiti nao, iho otjiraisiro tjokutja eye wa utu okuripura tjimuna ovandu mbe ha karere Jehova. Otjingaperi kutja oviṋa mbi kavivi, posi ya kavi sokurira oviṋa ovinanḓengu mehupo retu okukapita okukarera Jehova. Kutja tu kayende “otja ovandu vondjerera” matu hepa ‘okuungurisa oruveze ndu tu na rwo momuhingo omusemba,’ mokuyandja ombango ku imbi mbi ri ovinanḓengu.

18. Ovikwaye Donald mbya tjita kutja ma yenene okuungurisa oruveze rwe momuano omuwa?

¹⁸ Paha omiano mu mo yenene okukarera Jehova okuura. Donald ngwa tura moSouth Africa wa tjita nao. Eye wa tja: “Ami mbi ripura ohunga nehupo randje nu mba kumba tjinene ku Jehova okundjivatera okuungura ovingi motjiungura tjokuzuvarisa. Ami mba kumba kutja mbi kare noviungura mbi mavi ndji yandjere kutja mbi kare noruveze oruingi okuzuvarisa. Nombatero ya Jehova, ami mba muna oviungura mbi ri vyo. Ami nomukazendu wandje twa uta okukarera Jehova oruveze aruhe.”

19. Omomuano uṋe mu matu yenene okukayenda komurungu “otja ovandu vondjerera”?

¹⁹ Orutuu rwa Paulus kOvaefese rwe ve vatera kutja ve rire ovaṱakame ku Jehova. Nu oro wina maru yenene okutuvatera. Orwo maru yenene okutuvatera okutoorora omanyando wetu poo omapanga wetu nawa. Orwo maru yenene okututunduuza okukayenda komurungu okukonḓonona Ombeibela aruhe, kutja tu kare mondjerera youatjiri ndji tu hongorera po moviṋa avihe mbi matu tjiti. Nu orwo wina ru hungirira kounanḓengu wombepo ondjapuke ndji tjita kutja tu kare novikaṋena oviwa. Okuungurisa oviṋa Paulus mbya tjanga, maku yenene okutuvatera kutja tu toore omikambo omisemba mbi hitasana nouripura wa Jehova. Mokutjita oviṋa mbi, maku tu vatere kutja tu nakaure onḓorera youye mbwi nokukayenda komurungu okukara mondjerera.