JESUS wa hunganeka kutja momayuva omasenina nga, ovemukongorere mave yorokere otjiungura otjingi tjomakondero. (Mat. 9:37; 24:14) Tara komuano omambo ngo mu ya rira ouatjiri momuano wapeke motjihuro tja Transcarpathia, mo Ukraine. Mokati kovihuro oviraranganda vitatu, pe nozombongo 50 novazuvarise vokombanda 5 400. * Tjiri ihi otjivarero otjihimise, omundu umwe movandu vane movihuro vitatu mbyo Omuhongonone wa Jehova!

Ovandu ve puratena pu pe ṱa pi movihuro mbyo? Omukambure omukwetu wena Vasile wa tja “Ovandu ve nondengero kOmbeibela, va suvera ousemba, ve nongaro youzapamwe, nu ve kondja okuvaterasana komutima tjiri.” Eye wa weza na tja: “Kaaruhe tji ve kupasana nomahongero wetu. Posi yokutja tji we ve raisire otjiṋa okuza mOmbeiela, owo ve puratena nombango.”

Otjiperi kutja ovakambure ovakwetu ve muna omauzeu warwe tji mave zuvarisa morukondwa mu mu novazuvarise ovengi povature vorukondwa ndo. Otjotjihorera, ombongo imwe i novazuvarise 134 posi yokutja morukondwa mu i zuvarisa mu nozonganda 50! Hapo nu ovazuvarise ve tjinda vi otjiṋa hi?

Ovakambure ovengi ve yenda kotuveze ku ku nouhepe owingi wovazuvarise okukavatera. Omurumendu omukambure wozombura 90, Ionash wa tja “Otjivarero tjovazuvarise tji wa sasaneke ku nai tjo tjovandu pozonganda ma rire omuzuvarise umwe kovandu vevari pondjiwo aihe. Ami mbi kara ambi zuvarisa mouresevate, ngunda ouvere wandje a u hi ya rira ouvi, ee i omukato wozokilometa 160 kotukondwa ku ku ha zuvarisiwa aruhe, okukazuvarisa meraka rOtjihungaria.” Ovazuvarise ma ve sokutjita ozongondjero okukazuvarisa kotukondwa twarwe. Ionash wa we za na tja: “Mbi penduka rukuru po 4:00 yomuhuka omunene okuyenda komahina, nu mbi kazuvarisa nga mo 6:00 yomapeta indu omahina tji mai kotoka nguno. Mbi tjita nao ovikando vivari poo vitatu otjivike atjihe.” Hapo eye u muna kutja ozongondjero ze za ri omungandjo? Eye wa tja “Mba muna ondjoroka onene okuzuvarisa omuhingo mbo. Nu mbi tjaterwa tjinene okuvatera ovandu vokokure okurihonga ouatjiri.”

Otja tji matu tjiwa, ka vandu avehe mbe yenena okuyenda kokure tjinene okukazuvarisa. Posi yokutja atuhe, nandarire ovakurundu, ve kondja nomasa okuzuvarisa morukondwa ropopezu aruhe okumana. Mena ra nao, mombura ndji 2017, ovihuro vitatu mbyo vya kara nOmariro Omayapuke pamwe, nu otjivarero tjovandu mbu ve ya tja ri ovikando vivari kombanda ya ihi tjovazuvarise poo ape ohinga yovature avehe. Vakwetu ovasuverwa, akuhe ku tu ri, nga tu ‘ungurire Muhona nokuhaurwa.’—1 Kor. 15:58.