1, 2. (a) Jesus wa haṋasana ye ku novahongewa ve, komurungu onḓiro ye? (Tara kotjiperendero pomautiro worupa ndwi.) (b) Ongwaye tji twa sokutjiwa omapu ngu tu zuvarisira? (c) Morupa ndwi matu katara ku ye?

ONGUROVA osenina komurungu yonḓiro ye, Jesus wa kara nehungi ere ku novaapostele ve, mokuveyanḓiparisa ohunga norusuvero rwe rwatjiri kuna wo. Nu wina, we ve raera ohunga notjisasanekero tjomuvite, otja tji twa tara korupa ndwa kapita. Okupitira motjisasanekero tji, Jesus wa tunduuza ovahongewa ve ‘okuyeta ovihape ovingi,’ nokukara nonḓaro orure mokuzuvarisa ombuze yOuhona.—Joh. 15:8.

² Jesus kena pa raera ovahongewa ve oviṋa mbyaa ve hepa okutjita uriri, nungwari we ve raera kutja ongwaye tji mave so kutjita nao. Eye we ve pa omapu wokuyenenisa otjiungura tja wo tjokuzuvarisa. Ounanḓengu waye eṱe okuripurira komapu ngo? Indu tji twa tjiwa kutja ongwaye tji matu sokukayenda komurungu okuzuvarisa, tji tu hinga okukara nonḓaro orure mokuyandja “omahongononeno koviwaṋa avihe.” (Mat. 24:13, 14) Morupa ndwi matu katara komapu yane yOmatjangwa, yokutja ongwaye tji tu  zuvarisa. Nu wina, matu ka konḓonona oviyandjewa vine okuza ku Jehova, mbi tu vatera okuyeta ovihape monḓaro orure.

3. (a) Epu riṋe ndi tu zuvarisira otja ketjangwa ra Johanes 15:8? (b) Omandjembere motjisasanekero tja Jesus ye kuramena po ye, nu ongwaye imbi tji vi hitasana?

³ Otjiṋa otjnanḓengu tji tu zuvarisira, okuyandja ondjozikiro ku Jehova nokuyapura ena re komurungu wovandu. (Lesa Johanes 15:1, 8.) Jesus wa sasaneka Ihe, Jehova, kuna omuungure wotjikunino ngu kuna omandjembere. Jesus we ri sasaneka kuna omuvite, poo otjiunda tjomuti, nu ovemukongorere kuna otutavi. (Joh. 15:5) Kunao, omandjembere ye kuramena po ovihape vyOuhona mbi etwa i yovakongorere va Kristus. Jesus wa raera ovaapostele ve kutja: “Ma rire ondjozikiro onene ku Tate indu tji mamu eta ovihape ovingi.” Otja omuvite tji wa twako ovihape oviwa tji u eta ondjozikiro komukune, eṱe wina otjinga tu yandja ondjozikiro poo ohiviro ku Jehova indu tji matu zuvarisa ombuze yOuhona nomasa wetu aehe.—Mat. 25:20-23.

4. (a) Omomiano viṋe mu tu yapura ena ra Mukuru? (b) Ove u muna ko vi okukara norupa rwokuyapura ena ra Mukuru?

⁴ Omomuano uṋe otjiungura tjetu tjokuzuvarisa mu tji yapura ena ra Mukuru? Eṱe ka maa tu yenene okutjita kutja ena ra Mukuru ri rire ko eyapuke. Oro ekohoke poo eyapuke rukuru pondondo yokombanda. Tara ku imbi omuprofete Jesaja mbya hungira: “Muhona Omunamasaaehe owAmi omuyapuke.” (Jes. 8:13) Tu yapura ena ra Mukuru, mokuritjinda momuano wa peke pomana warwe aehe, nu tu vatera varwe ve ri vare otjena eyapuke. (Mat. 6:9.) Otjotjihorera, mokuzuvarisa ouatjiri ohunga na Jehova novikaṋena vye oviwa, nondando ye ndji ha runduruka kovandu, tu rwira ena ra Mukuru kovizeze vya Satan nondjambu ndja eta ku ro. (Gen. 3:1-5) Wina, indu tji tu noupyuke wokuzuvarisira ovandu kutja Jehova “wa pwa ondjozikiro nondengero nomasa,” tu yapura ene ra Mukuru. (Omavan. 4:11) Omukambure wena Rune, ngwa kara omukandjira oure wozombura 16, wa tja: “Tjiri mbi nondangi kutja owami omuhongonone wOmuute wevaverwa arihe. Ihi tji ndji pa onḓero yokuzuvarisa aruhe.”

5. (a) Epu riṋe ndi tu zuvarisira otja ketjangwa ra Johanes 15:9, 10? (b) Jesus wa ṋuṋisa vi ounahepero wonḓaro orure?

⁵ Lesa Johanes 15:9, 10. Orusuvero rwetu ku Jehova na Jesus eepu enanḓengu ndi tu zuvarisira ombuze yOuhona. (Mar. 12:30; Joh. 14:15) Jesus wa raere ovahongewa ve kutja ngave ‘kare morusuvero rwe,’ nungwari ka ku musuvera uriri. Ongwaye? Mena rokutja okuhupa otjomuhongewa wa Kristus ombura nga kombura, ku hepa onḓaro orure. Jesus wa ṋuṋisa ounanḓengu wonḓaro orure indu tjaa ungurisa embo ndi “kareye,” povikando ovingi otja tji pe raisiwa momahungi we nga tjangwa mu Johanes 15:4-10.

6. Tu raisa vi kutja tu vanga okukara morusuvero rwa Kristus?

⁶ Matu yenene vi okuraisa kutja tu vanga okukara morusuvero rwa Kristus nokuyakurwa i ye? O mokuṱakamisa omatwako we. Jesus wa raisa ousupi na tja, ‘Kareye nonḓuviro ku ami.’ Jesus utu ningira okutjita oviṋa eye omuini mbya tjita, nu eye wa tja: “Ami punga amba ṱakamisa omatwako wa Tate ne kara morusuvero rwe.” Jesus wa twapo otjihorera kweṱe.—Joh. 13:15.

7. Orusuvero nonḓuviro vi yenda vi kumwe?

⁷ Mena rokutja orusuvero nonḓuviro vi yenda kumwe, Jesus wa raera ovaapostele ve kutja: “Ingwi ngu ma yakura omatwako wandje ne ye ṱakamisa, eye we Ndji suvera.” (Joh. 14:21) Nakombanda ya nao, mokuṱakamisa erakiza ra  Jesus rokukazuvarisa, tu raisa orusuvero rwetu ku Mukuru orondu omatwako we ye raisa omuano Ihe mbwe ripura. (Mat. 17:5; Joh. 8:28) Mena rokutja ve muna omuano mbu tu ve raisira orusuvero, Jehova na Jesus ve tu ṱizira morusuvero rwawo.

8, 9. (a) Epu riṋe rarwe ndi tu zuvarisira? (b) Ongwaye omambo wa Jehova nge ri mu Esekiel 3:18, 19 no 18:23 tji maye tu hingi kutja tu kayende komurungu okuzuvarisa?

⁸ Tu na epu rarwe ndi tu zuvarisira. Okurakiza ovandu. Ombeibela, i tja Noa wari “omuzuvarise.” (Lesa 2 Petrus 2:5.) Otjiungura tje tjokuzuvarisa komurungu womupupo wina tja ri nerakiza romayandekero ngu maye ya. Ongwaye tji matu munu nao? Jesus wa tja: “Omayuva nga wokomurungu womupupo ovandu iyave ri nokunwa, novarumendu novakazendu iyave kupasana nga keyuva ndi Noa nda hitire motjitendeze. Nungwari owo kave tjizire imbi mbiyavi tjitwa nga omupupo tji we ya nau ve twara avehe. Otjinga amape kara nao indu Omuna wOmundu tje ya.” (Mat. 24:38, 39) Nandarire kutja ovandu kaave puratene, Noa wa yandja erakiza ra Jehova nouṱakame.

⁹ Ndino, wina tu zuvarisa ombuze yOuhona okuyandja oruveze kovandu ve rihonge ohunga nondando ya Mukuru ku wo. Tjimuna Jehova, eṱe tjiri tu vanga ovandu ve puratene kutja ve “kare nomuinyo.” (Esek. 18:23) Nu wina, indu tji matu zuvarisa ondjuwo nondjuwo na momivanda, tu rakiza ovandu ovengi kutja Ouhona wa Mukuru tjamwa oruveze mau yandeke ouye mbu ha yozike Mukuru mbwi.—Esek. 3:18, 19; Dan. 2:44; Omavan. 14:6, 7.

10. (a) Epu ndi tu zuvarisira nda tamunwa mu Mateus 22:39 ooriṋe? (b) Serekarera kutja Paulus na Silas va vatera vi omutjevere wondeko mo Filipi.

¹⁰ Indi wina epu rarwe ndi tu hinga okuzuvarisa: Twa suvera ovakwetu. (Mat. 22:39) Orusuvero ndwi ru tu hinga kutja tu kare nonḓaro orure motjiungura tjokuzuvarisa, ama tu zemburuka kutja ovandu mave yenene okurundurura omitima vyawo indu ozongaro mehupo rawo tji za runduruka. Tara ku imbi mbya tjitwa komuapostele Paulus na Silas. Owo va yumbwa mondeko i ovanavita na wo motjihuro tja Filipi. Okuzambo, mangara ouṱuku, pa kara omanyinganyingiro wehi omazeu nga tjita kutja omivero vi paturuke tjimanga. Omutjevere wondeko wa penduka na tjangovasi ovapandekwa va hene, na hara okurizepa omuini. Nungwari Paulus wa ravaera na tja: “O ritjiti omuini otjipo!” Momburuma omutjevere wondeko wa pura kutja: “Hi tjite vi kutja mbi hupisiwe?” Owo va tja: “Kambura mu Muhona Jesus, nu mo hupisiwa.”—Oviung. 16:25-34.

11, 12. (a) Otjihorera tjomutjevere wondeko tji tuṋa vi kotjiungura tjetu tjokuzuvarisa? (b) Tu vanga okukara kovitonge okuungura tjike?

¹¹ Otjihorera tjomutjevere wondeko tji tuṋa vi kotjiungura tjetu tjokuzuvarisa? Ripurira ku imbi: Omutima womutjevere wondeko wa runduruka indu tja ningira ombatero kombunda womanyinganyingiro wehi. Momuano tjingewo, ovandu tjiva mbu ve ha vanga okupuratene kombuze yOmbeibela, mave yenene okurundurura omitima vyawo, na ve paha ombatero,  indu ehupo rawo tji ra runduruka mena rovitjitwa kaaṋi mbi vya tjitwa mehupo rawo. Otjotjihorera, ovandu tjiva momaturiro woye mape ya va pandjara oviungura nokuhina okuundjira ko. Varwe mape ya ave kara nongurunguse yorukupo rwawo ndwa teka. Nu wina varwe mape ya ave kara nouzeu wouvere, po nandarire ve nomwihamwatima mena rokutja va zepaisa omusuverwa wawo. Oviṋa otja imbyo tji vya tjitwa, ovandu ve uta okupura omapuriro ohunga nondando yokuhupa, mena rozombameno nḓu ve nazo. Rumwe ve ripura kutja, ‘Hapo hi tjite vi kutja mbi hupisiwe?’ Tji twa hakaene novandu otja imbo, owo mape ya ave utu okuvanga okupuratena kombuze yomaundjiro ndji tu nayo.

¹² Okutja tjiri, tji matu kayenda komurungu okuzuvarisa nouṱakame, tu kara kovitonge okuyandja omahuhumiṋino kovandu oruveze ndu mave vanga okutupuratena. (Jes. 61:1) Charlotte, ngwa kara motjiungura tjokuzuvarisa oruveze aruhe, oure wozombura 38, wa tja: “Ovandu tjiri va pandjara. Owo tjiri ve hepa oruveze okuzuva ombuze ombwa.” Omukambure wena Ejvor, ngwa kara omukandjira ozombura 34, wa tja: “Ndinondi, ovandu ovengi va wa momiinyo. Ami tjiri mbi vanga okuvevatera. Nu ihi tji ndji hinga kutja mbi zuvarise.” Tjiri okusuvera ovakwetu, otjiṋa tji matji sokutuhinga okukayenda komurungu okuzuvarisa!

13, 14. (a) Otjiyandjewa tjiṋe tji tja tamunwa mu Johanes 15:11? (b) Ondjoroka ya Jesus mai rire vi oyetu? (c) Ondjoroka i ṱuna vi kotjiungura tjetu tjokuzuvarisa?

¹³ Mongurova osenina komurungu onḓiro ye, Jesus wa tamunina ovaapostele ve oviyandjewa mbi mavi ve vatere okuyeta ovihape monḓaro orure. Oviyandjewa mbi ovikwaye, nu hapo mavi tu vatere vi?

¹⁴ Ondjoroka. Hapo okuṱakamisa omatwako wa Jesus mape ya a rire otjiṋa otjizeu? Kako. Kombunda yotjisasanekero tjomuvite, Jesus wa tja ovazuvarise vOuhona mave kara nondjoroka. (Lesa Johanes 15:11.) Mouatjiri, Jesus we tu raera kutja ondjoroka ye mai rire oyetu wina. Omomuano uṋe? Otja tji pa raisiwa rukuru, Jesus we ri sasaneka komuvite nu ovahongewa ve we ve sasaneka kotutavi. Omuvite u yandja omasa kotutavi. Ndovazu otutavi matu kakatere komuvite, oto matu munu omeva nu matu nyomoka. Momuano tjingewo, eṱe tji twa kara moruwano rwa Kristus na tu kongorere ozondambo ze popezu, matu munu ondjoroka eye wina ndje muna mokutjita ombango ya Ihe. (Joh. 4:34; 17:13; 1 Petr. 2:21) Omukambure wena Hanne, ngwa kara otjomukandjira ozombura zokombanda 40, wa tja: “Ondjoroka ndji mbi muna tji mbazu kotjiungura tjokuzuvarisa i ndji pomasa kutja mbi kayende komurungu okukarera Jehova.” Tji tu nondjoroka komutima tjiri, i tupa omasa kutja tu zuvarise nandarire kutja ovandu kave nokupuratena.—Mat. 5:10-12.

15. (a) Otjiyandjewa tjiṋe tji tja tamunwa mu Johanes 14:27? (b) Ongwaye ohange tji tu vatera okuyeta ovihape?

¹⁵ Ohange. (Lesa Johanes 14:27.) Mongurova osenina komurungu onḓiro ye, Jesus wa raera ovaapostele ve kutja: “Ohange yandje me yandja ku eṋe.” Otjiyandjewa tjohange, tji yeta vi ovihape? Tji matu panḓerepo, tu kara nohange yaaruhe ndji za mokutjiwa kutja twa yakurwa i Jehova na Jesus. (Eps. 149:4; Rom. 5:3, 4; Kol. 3:15) Omukambure wena Ulf, ngwa kara oruveze aruhe motjiungura tjokuzuvarisa oure wozombura 45, wa tja: “Otjiungura tjokuzuvarisa tji tjita kutja mbi urwe, posi yokutja tji ndji pa ohange ya tjiri momuinyo.” Tjiri tu nondangi kutja twa serwa ondaya okukara nohange ya tjiri ndji!

16. (a) Otjiyandjewa tjiṋe tji tja tamunwa mu Johanes 15:15? (b) Otjikwaye tji tja vatera ovaapostele okurira omapanga wa Jesus?

 ¹⁶ Oupanga. Kombunda Jesus tja za nokuhungira ohunga nondjoroka yovaapostele ndji ‘mai urisiwa,’ eye we ve kahurura ounanḓengu wokuraisa orusuvero ku varwe. (Joh. 15:11-13) Okuzambo, Jesus wa tja: “Ami me mu tja oweṋe omapanga wandje.” Tjiri otjiyandjewa tja peke okurira epanga ra Jesus! Ovaapostele aave sokutjita vi, kutja ve karerere omapanga we? Owo aave ‘sokuyenda nu ve karuke ovihape ovingi.’ (Lesa Johanes 15:14-16.) Ozombura mbari komurungu, Jesus wa rakiza ovaapostele ve na tja: “Kazuvariseye mu tje: ‘Ouhona womayuru wa tumbuka!’” (Mat. 10:7) Ongurova osenina, eye we ve tunduuza okupanḓera po moviungura mbi va uta. (Mat. 24:13; Mar. 3:14) Okuyenenisa erakiza ra Jesus ka tja ri otjiṋa otjipupu, posi yokutja aave yenene okutoṋa nokurira omapanga we. Omomuano uṋe? Nombatero yotjiyandjewa tjarwe.

17, 18. (a) Otjiyandjewa tjiṋe tji tja tamunwa mu Johanes 15:16? (b) Otjiyandjewa hi matji vatere vi ovahongewa va Jesus? (c) Oviyandjewa viṋe mbi tu pa omasa ndino?

¹⁷ Ozongumbiro nḓe zuvirwa. Jesus wa tja: “Tate me mu pe ngamwa atjihe tji mamu ningire mena randje.” (Joh. 15:16) Tjiri omakwizikiro nga ya yanḓiparisa ovaapostele! * Ovaapostele kaa ve tjiwa nawa kutja Jesus mape ya a ṱu tjimanga. Posi yokutja onḓiro ye kai hee kutja ma ve isiwa nokuhina ombatero. Jehova wa ri kamwaha okuzira ozongumbiro zawo, nokuvevatera notjiungura tjokuzuvarisa ombuze yOuhona. Nu tjiri, okaruveze okasupi kombunda ya nao, owo va muna omuano Jehova ma zira ozongumbiro zawo.—Oviung. 4:29, 31.

¹⁸ Omambo ngo wina ouatjiri kweṱe ndino. Otja tji matu panḓerepo okuyeta ovihape, tu kara nondjoroka okurira omapanga wa Jesus. Nu wina, tu nongamburiro tjiri kutja Jehova u ri kamwaha okuzuvira ozongumbiro zetu zokuningira ombatero, indu tji twa munu omauzeu motjiungura tjetu tjokuzuvarisa ombuze ombwa yOuhona. (Fil. 4:13) Tu nondangi tjinene kutja twa serwa ondaya kutja Mukuru u zuvira ozongumbiro zetu nokutja tu kara noupanga ouwa kuna Jesus! Oviyandjewa mbi okuza ku Jehova vi tu pa omasa okukayenda komurungu okuyeta ovihape.—Jak. 1:17.

19. (a) Ongwaye tji tu kara norupa motjiungura tjokuzuvarisa? (b) Otjikwaye tji tji tu vatera okuyenenisa otjiungura tja Mukuru hi?

¹⁹ Otja tji twa tara morupa ndwi, eṱe tu kara norupa motjiungura tjokuzuvarisa, okuyozika Jehova nokuyapura ena re. Nu wina tu raisa orusuvero rwetu ku Jehova na Jesus, nokuyandja omarakiza nga yenene nokuraisira varwe orusuvero. Okuweza ko, oviyandjewa mbi tu muna tjimuna, ondjoroka, ohange, oupanga ouwa, nozongumbiro zetu okuzuvirwa, vi tupa omasa okuyenenisa otjiungura tja Mukuru. Tjiri Jehova u kara nonyuṋe mweṱe indu tji ma munu ozongondjero nḓu tu tjita nomutima wetu auhe ‘okuyeta ovihape ovingi’!