1. Jehova wa tjiukisa ye ohunga nomunavita motjikunino tja Eden?

ADAM aa tjiwa nawa kutja onyoka ka mai yenene okuhungira. Okutja mape ya wa muna kutja tjimwe tjoviutwa vyombepo tja hungire ku Eva okupitira monyoka. (Gen. 3:1-6) Adam na Eve kaave tjiwa otjiṋa ohunga notjiutwa tjombepo hi. Nandarire nao, Adam wa tya okurikuta ku nomundu eye ngwe hi nokutjiwa, na pirukire Ihe omunarusuvero womeyuru. (1 Tim. 2:14) Tjimanga, Jehova wa tjiukisa omunavita ngwi, ngwa pukisa Adam na Eva, nu wa kwizika kutja ma yandekwa. Posi yokutja Jehova wina wa rakiza kutja otjiutwa tjombepo hi tji tja hungira okupitira monyoka ma tji honapara okaruveze okasupi, na tji kara nomasa wokupirukira ovakarere va Mukuru.—Gen. 3:15.

2, 3. Omena ratjike, Satan tje ha tamuninwe tjinene komurungu womeero wa Messias?

² Jehova kena pe tu raera ohunga nena romuengeli ngwe mu pirukira. * Nu kombunda yozombura 2 500, kombunda yomapirukiro nga tjitwa mu Eden, Jehova otja tjiukisa ena romumupirukire ngwi. (Job 1:6) Mouatjiri, ena ndi Satan, ndi heye “omupirukire,” ri tamunwa momambo yetatu uriri yOtjiheberi nga 1 Ekuruhungi,  Job na Sakarja. Hapo ongwaye omunavita wetu ngwi tje ha tamuninwe tjinene komurungu womeero wa Messias?

³ Pe munika kutja Jehova kaari nonḓero yokuyandja ombango ku Satan noviungura vye, mokuurisa Omatjangwa wOtjiheberi ohunga na Satan. Jehova wa ri nondando yokutja orupa orwingi rOmatjangwa wOtjiheberi ru yandje ombango koviuṋe mbi mavi tjama na Messias, nokutja ovandu va Mukuru ve yenene okumuzemburuka. (Luk. 24:44; Gal. 3:24) Nu Messias tja za nokuya, Jehova we mu ungurisa novaapostele ve okutjiukisa Satan novaengeli ovavi mbe rikuta kuna ye. * Nu omambo tjiri, mena rokutja Jehova ma ka ungurisa Jesus novatwirisiwa mbu mave honapara puna ye okunyona Satan novemukongorere.—Rom. 16:20; Omavan. 17:14; 20:10.

4. Ongwaye tji tu ha sokutira Omudiaboli?

⁴ Omuapostele Petrus wa handjaura Satan Omudiaboli “otja ongeyama, ndji mai tye ovimboro,” nu Johanes wa tja “otjitjupamuriro” nu “onyoka onguru.” (1 Petr. 5:8; Omavan. 12:9) Posi yokutja kape nohepero yokutira Omudiaboli, orondu omasa we ye nopoṋa pu ye yandera. (Lesa Jakobus 4:7.) Tu vaterwa i Jehova, Jesus, novaengeli ovaṱakame. Nombatero yawo ndji, eṱe matu yenene okupirukira omunavita wetu. Posi yokutja ngunda, matu hepa okutjiwa oviṋa vitatu mbi: Satan u tupukisa pu pe ṱa pi? Eye u kondja vi okutupukisa kourike wetu? Nu omasa we ya yandera pi? Otja tji matu tara komapuriro nga, wina matu kaṱuna koviṋa vyarwe mbi matu rihongereko.

5, 6. Ongwaye ozohoromende zovandu tji ze hina maa ze yenenisa ovihepwa vyovandu?

⁵ Ovaengeli ovengi tjinene ve rikuta ku na Satan. Komurungu womupupo, Satan wa pukisa tjiva okukara notuvakiro ku novakazona vovandu. Ombeibela i vandurura ouatjiri mbwi movisasanekero, kutja otjitjupamuriro tja nanena orukondo orutjatatu rwozonyose kombanda yehi. (Gen. 6:1-4; Judas 6; Omavan. 12:3, 4) Indu ovaengeli mbo tji va isa eṱunḓu ra Mukuru, owo ve ritwa kehi youhonapare wa Satan. Ngaa tu nangarasi otjimbumba tjovapirukire mba otjimbumba uriri tji tji hi nomuhunga. Satan wa horera omaunguriro wOuhona wa Mukuru okutwapo omaunguriro we, nu eye ombara mouhona we. Momaturiro wawo wozombepo, Satan wa haṋa ozondemone motupa twomananeno, neve pe ouvara, nu eve tjiti kutja ve rire ovahonapare vouye puna ye.—Ef. 6:12.

⁶ Mokupitira motjira tje tjozombepo, Satan wa yandja ouvara kozohoromende zovandu. Otjiṋa hi tja raisiwa oukahu indu Satan tja raisira Jesus “omauhona aehe wouye” na tja: “Ami me Ku pe ouvara auhe mbwi nounene wawo auhe, orondu vya yandjewa ku ami, nu me vi yandja ku ngamwa auhe ngu mba vanga.” (Luk. 4:5, 6) Nakombanda yomapukisiro wa Satan, ozohoromende ozengi ze tjitira ovature va zo oviṋa oviwa. Nu wina ovanane va zo ve yenena okukara nozondando ozombwa. Posi yokutja kape nohoromende na imwe poo omunane ngu nomasa nomasorero wokuyenenisa ovihepwa vyovandu.—Eps. 146:3, 4; Omavan. 12:12.

7. Satan u ungurisa vi ozongamburiro zoposyo nozongetjefa? (Tara kotjiperendero pomautiro worupa ndwi.)

⁷ Satan nozondemone kave ungurisa ozohoromende uriri, nungwari wina ve ungurisa ozongamburiro zoposyo notjitamba tjomarandisasaneno okupukisa “ouye auhe.” (Omavan. 12:9) Okupitira mozongamburiro zoposyo, Satan u kaenda komurungu okukora ovizeze ohunga na Jehova. Kombanda ya nao, Omudiaboli  u tjita kutja ovandu ovengi ve zembe ena ra Mukuru. (Jer. 23:26, 27) Mena ra nao, ovandu ovawa mbe nangarasi ve rikotamena ku Mukuru, mouatjiri va pukisiwa nu ve rikotamena kozondemone. (1 Kor. 10:20; 2 Kor. 11:13-15) Satan wina u handjaura ovizeze okupitira motjitamba tjozongetjefa. Otjotjihorera, ouye mbwi u honga ovandu kutja omuano omuwa wokukara nouṋingandu, eendu tji va rambere ovimariva nokukara nomawini omengi. (Omiano 18:11) Imba mbe kambura movizeze mbi, ve kara pokurambera ‘ovimariva’ nu kave paha Mukuru. (Mat. 6:24) Korusenina, okusuvera oviṋa vyomautumbe ku ṋeya orusuvero ndu va ri na ro ku Mukuru.—Mat. 13:22; 1 Joh 2:15, 16.

8, 9. (a) Ovikwaye vivari mbi matu ri hongere ku Adam na Eva, novaengeli mba pirukira Jehova? (b) Okutjiwa kutja omapukisiro wa Satan ye yandera pi ma ku tu vatere vi?

⁸ Otjihorera tja Adam na Eva, novaengeli mba pirukira Jehova tji tu honga oviṋa vivari ovinanḓengu. Otjitenga, pe nominda vivari nu tu hepa okutoora omunda umwe. Okutoorora okukarera Jehova poo okuritwa momake wa Satan. (Mat. 7:13) Otjitjavari, imba mbe karera Satan kave munu ouwa waaruhe. Adam na Eve va pewa ouyara wokuritoororera oveni pokati kouwa nouvi. Nu ozondemone za pewa ouyara wokuhonaparera ozohoromende zovandu. (Gen. 3:22) Posi yokutja, Satan aruhe u morosa omasa nomiinyo vyovandu mbe mu karera, nu e ve pe oviṋa mbi hi nonḓengu ongarerere.—Job 21:7-17; Gal. 6:7, 8.

⁹ Okutjiwa kutja omapukisiro wa Satan ye yandera pi ma ku tu vatere vi? Ku tu vatera okukara noumune ouwa ohunga nomauhonapare wouye, nu ku tu hinga okukaenda komurungu notjiungura tjetu tjokuzuvarisa. Tu tjiwa kutja Jehova u vanga kutja tu yandje ondengero komauhonapare wouye mbwi. (1 Petr. 2:17) Nu u undjira kweṱe okuṱakamisa ozoveta zohoromende, ndovazu ozo ka ze nokuvetasana oviuru nomirari vya Jehova. (Rom. 13:1-4) Nu wina tu tjiwa kutja ka tu sokukara nomunda moviṋa vyopolitika poo okutoorora ovandu okutuhonaparera. (Joh. 17:15, 16; 18:36) Mena rokutja tu muna oviṋa Satan mbye kondja okutjita kena ra Jehova noviungura vye, ihi tji tu hinga tjinene okuhonga varwe ouatjiri ohunga na Mukuru wetu. Tu nomutongatima okutjiukirwa kena re nokuriungurisa, orondu tu tjiwa kutja okumusuvera kwa kapita okusuvera ovimariva poo omawini, nu mu nondjambi onene.—Jes. 43:10; 1 Tim. 6:6-10.

10-12. (a) Satan mape ya wa toṋa vi okupukisa ovaengeli ovakwao? (b) Omuano ovaengali ovengi mu va pukisiwa mau tu hongo tjike?

¹⁰ Satan u ungurisa omiano mbi ungura tjiri, okutupukisa kourike wetu. Otjotjihorera, eye u  ungurisa ombate okutjita kutja tu tjite oviṋa otja kombango ye. Nu wina u kondja okuṋiṋikiza ovandu kutja ve riwise kehi ye.

¹¹ Ripura nomuano Satan mbwa toṋa mokupukisa ovaengeli ovakwao ovengi tjinene. Eye mape ya we ve konḓonona, nu we ve tjiwa nawa ngunda e hi ya uta okuvepukisa kutja ve toorore omunda we. Indu tjiva wovaengeli mba tji va pukisiwa na ve kara notukatuko ku novakazona vovandu, owo va kara novanatje ovanene tjinene motutu mba rira ovanamasa tjinene povandu va kauriri. (Gen. 6:1-4) Mape ya kutja Satan ka rorere ovaengeli mba nozonḓuma zotukatuko uriri, nungwari we ve kwizikira okuvepa omasa wokutja mave yenene okuhonaparera ovandu wina. Momuano mbwi, Satan mape ya aa vanga kutja ondando ya Jehova ohunga ‘norukwato romukazendu’ ndwa kwizikwa ai ha yenenisiwa. (Gen. 3:15) Momuano auhe mbwa kara po, Jehova wa eta omupupo okuisapo otjineya ho, nu imbwi tjiri wa ri omukambo mbwa eta ondjandero kozongondjero za Satan novaengeli ovapirukire mbo.

¹² Matu rihongere tjike kovitjitwa mbi? Ngoo roro onyeṋuṋa ombate yoruvakiro poo oumba mbu za momeritongamisiro. Oure woruveze orure, ovaengeli mbe rikuta kuna Satan, owo rutenga wina aave karere Mukuru. Nandarire kutja va ri meyuru popezu na Mukuru omuini, otjingi tja wo va yandjera ozonḓuma ozombi okukura mu wo. Eṱe wina, mape ya kutja twa karera Mukuru ozombura ozengi motjira tje tjokambanda yehi. Nandarire kutja tu ri mongaro ombwa yopopambepo ndji, ozonḓuma ozombi mape ya aze kuru mweṱe. (1 Kor. 10:12) Okutja tjiri ounanḓengu kweṱe okukonḓonona omitima vyetu, nokunakaura omeripura omavi wourunde, nomeritongamisiro omavi!—Gal. 5:26; lesa Ovakolose 3:5.

13. Ombate iṋe yarwe Satan ndje ungurisa, nu matu i nakaura vi?

¹³ Ombate yarwe Satan ndje ungurisa, okukuna onḓero movandu yokuvanga okutjiwa ovingi ohunga noundjai. Ndino, Satan ka ungurisa ozongamburiro zoposyo uriri okukurisa onḓero mozondemone, nungwari wina u ungurisa ovitamba vyomanyando. Ozomuvi, omanyando womouyendjezewa, noviṋa vyarwe vyotungovi vi tjita kutja oviṋa vyoundjai vi nane ombango yovengi. Matu pirukire vi ombate ndji? Eṱe kaama tu sokuundjira ko kutja otjira tja Jehova ma tji sokutupa ondeto yomanyando ngu tu sokunyanda na ngu tu ha sokunyanda. Auhe wetu ma sokurongerisa omeritjiviro we omuini womomutima ye hitasane nomirari vya Mukuru. (Hebr. 5:14) Posi yokutja, ma rire nawa tji twa ungurisa eronga romuapostele Paulus, rokutja orusuvero rwetu ku Mukuru ngaru “kare nokuhinotjavivi.” (Rom. 12:9) Ngatu ripure oveni kutja: ‘Hapo  omanyando ngu mbi tarera nokunyanda ye raisa kutja owami omunatjavivi? Omuhongwa wandje wOmbeibela poo warwe ngu me ndji tjiwa, tja munu omanyando ngu menyanda poo ngu me tarere, hapo ke nokuripura kutja mbi honga oviṋa mbi mbi ha tjiti?’ Tji matu kongorere omirari mbi tu honga varwe okutjita, i rira oupupu kweṱe okunakaura ombate ya Satan.—1 Joh. 3:18.

14. Satan u kondja okutuṋiṋikiza vi, nu imbi matu vi tjindi vi?

¹⁴ Pendje nokuungurisa ozombate ze nḓa, Satan u kondja okutuṋiṋikiza kutja atu ha rire ovaṱakame ku Jehova. Otjotjihorera, eye u yenena okuhinga ozohoromende okutjaera otjiungura tjetu tjokuzuvarisa. Poo u tjita kutja ovandu mbu tu ungura pamwe poo mbu tu hita pamwe oskole ve ute okututjita ouhahu, mena ronḓero yokuhupa otja komirari vyOmbeibela. (1 Petr. 4:4) Satan wina u yenena okuungurisa ovazamumwe vetu vopopezu okututeya ombango okuyenda kozombongarero zombongo. (Mat. 10:36) Matu tjindi vi ongaro ndji? Otjitenga, ngatu rirongere okuyakura ondatumisire ndjo, orondu Satan u rwa kuna eṱe. (Omavan. 2:10; 12:17) Okuzambo, oviṋa mbi ngatu vi tare neho rarwe. Satan u tja eṱe tu karera Jehova indu tje ri oupupu okumukarera uriri. Eye u tja, tji twa ṋiṋikiziwa momuano umwe poo omukwao, matu isa okukarera Mukuru. (Job 1:9-11; 2:4, 5) Otjisenina, matu sokuṱaṱera ku Jehova kutja metu pe omasa, tu rwise omarorero aehe nga. Zemburuka kutja eye kemee twe sa ko.—Hebr. 13:5.

15. Hapo Satan ma yenene okutuṋiṋikiza okutjita oviṋa kombango ye? Kahurura.

¹⁵ Satan kamaa yenene okuṋiṋikiza ovandu okuungura oviṋa mbi ve hi nokuvanga. (Jak. 1:14) Ngunda ama ve tjiwa oviṋa Mukuru mbya tonda, ovandu ve riyandjera oveni okutjita oviṋa otja kombango ya Satan. Nungwari tji va zu nokurihonga ouatjiri, auhe u toora ondando ye kutja ma vanga okukarera uṋe. (Oviung. 3:17; 17:30) Indu tji twe rimanena okutjita ombango ya Mukuru, Satan kena otjiṋa okutjita okuteya ouṱakame wetu.—Job 2:3; 27:5.

16, 17. (a) Omasa wa Satan nozondemone ya yandera pi? (b) Ongwaye tji tu ha sokutira okupaturura ovinyo vyetu mongumbiro ku Jehova?

¹⁶ Omasa wa Satan nozondemone ye na pu ya yandera. Otjotjihorera, Ombeibela kai na pu i raisa kutja Satan nozondemone ve tara omitima nouripura wovandu. O Jehova na Jesus mbe yenena okutjita nao uriri. (1 Sam. 16:7; Mar. 2:8) Tjike nambano nokupaturura ovinyo vyetu atu kumbu ku Jehova? Hapo tu sokutira kutja Omudiaboli nozondemone mave tu zuu tji matu kumbu, nu ave hiti pokati kongumbiro yetu na Jehova? Kako. Omena raye? Tara, eṱe katu tira okuungurira Jehova oviṋa oviwa mena rokutja Omudiaboli metu munu. Momuano tjingewo, kamaa tu sokutira okupaturura ovinyo vyetu okukumba nomasa mena rokutja Omudiaboli me tu zuu. Mouatjiri, Ombeibela ina ovihorera ovingi vyovakarere va Mukuru mba kumba nomasa, nu kape notjiraisiro tjokutja Omudiaboli we ve zuva. (1 Ozomb. 8:22, 23; Joh. 11:41, 42; Oviung. 4:23, 24) Tji twa kumbu nokutjita oviṋa otja kombango ya Mukuru, tjiri matu kara nongamburiro kutja Jehova ke nokuyandjera Omudiaboli okututjita otjipo.—Lesa Epsalme 34:7.

¹⁷ Matu hepa okutjiwa omunavita wetu, nungwari katu nokumutira. Nombatero ya Jehova, ovandu ovahahomonena mave yenene okurwisa Satan ave taara. (1 Joh. 2:14) Tji twe mu pirukire, ma tupuka a zu po pu eṱe. (Jak. 4:7; 1 Petr. 5:9) Nu Satan tjinene wa humisa omitanda. Nu hapo omitanda ma vi yenene okutjita ye okurwisa Omudiaboli? Orupa ndu maru kongorere ko maru kahungirira kotjiṋa ho.