1. Embo ra Mukuru ri tupa ye?

EṰE MATU yenene okumuna ombatero komauzeu wetu aehe mena rokutja tu hongwa i Jehova Omuhonge wetu Omunenenene. (Jes. 30:20, 21) Embo re ri tu pa oviṋa avihe mbi matu hepa kutja tu ‘rire ovapyuke tjinene’ nu tu “rirongerere okuungura otjiungura ngamwa atjihe otjiwa.” (2 Tim. 3:17) Eṱe tji matu hupu otja komaronga nge ri mOmbeibela, tu rira ozonongo okukapita imba mbe tja tu sokuhupa otja ‘kounongo wouye mbwi.’​—1 Kor. 3:19; Eps. 119:97-100.

2. Morupa ndwi matu katara ku tjike?

² Otja tji matu katara, ounongo wouye mbwi u vanga kutja ovandu ve ripurire kozonḓuma zawo oveni. Mape ya a ku rire ouzeu kweṱe okunakaura omeripura otja ingo nokutjita oviṋa ovandu vouye mbi ve tjita. Mena ranao, Ombeibela i tja: “Takamiseye kutja ape ha ningi omundu ngu me mu pora ku Ye nomapopero woposyo nomapukise otja komihingo vyomahongero wovandu.” (Kol. 2:8) Morupa ndwi, matu katara komuano ovandu mu va uta okukambura movizeze 2 Satan mbye honga. Morupa aruhe rovizeze mbi, matu katara kutja ongwaye ounongo wouye mbwi tji u ri ouyova nokutja ongwaye ounongo wEmbo ra Mukuru tji u ri wokombanda tjinene okukapita oviṋa avihe ouye mbwi mbu u yandja.

3-4. Omarundurukiro wa ye nga tjitwa moAmerika ohunga nongaro yomeritjindiro pomautiro weserewondo oritja-20?

³ MoAmerika, pomautiro weserewondo oritja-20 oumune wovandu pokati kouwa nouvi ohunga nomahakaeneno womonyama wa runduruka tjinene. Rukuru, ovandu ovengi aave kambura kutja omahakaeneno womonyama ya ri pokati kovakupasane uriri,  nu kaa ri epu nda ri sokuhungirwa mokati kovandu. Posi yokutja omirari mbyo kavi ungurisiwa rukwao nu ovandu ve handjaura oumune wawo oveni ohunga nomahakaeneno womonyama.

⁴ Pokati kozombura nḓa 1920 no 1929, ongaro yovandu ohunga nomahahaeneno womonyama ya runduruka tjinene kombunda yomaandero wOvita vyOuye Ovitenga. Omukonḓonone umwe wa tja: “Oviperendero mbi nyinganyinga, omanyando, omaimburiro, omambo, nozombuze zovirandwa, vya uta okuraisa oviṋa ovingi ohunga nomahakaeneno womonyama.” Mozombura nḓo, omuano ovandu tjiva maave pundu aa ku tjiti kutja ovandu varwe ve ripure ohunga nomahakaeneno womonyama, nu ozombanda nḓaave zara kaza ri ozohirona. Otja Ombeibela pu ya kwizika kutja ovandu mave “rarukire oviṋa” momayuva omasenina.​—2 Tim. 3:4.

5. Omirari ohunga nongaro yomeritjindiro vya runduruka vi okuza kombura ndji 1960?

⁵ Okuza kombura ndji 1960, ovandu ovengi va uta okuhupa pamwe nokuhina okukupasana, omatundukasaneno wovavena novasuko nomateyero worukupo ya takavarere. Omanyando omengi aa ye raisa omahakaeneno womonyama tjinene otjoviṋa uriri. Oviṋa avihe mbi vya eta tjike? Omutjange umwe wa tjanga kutja pe noviṋa ovivi mbi yetwa indu ovandu tji va isa okukongorera omirari omiwa vyomeritjindiro. Otjotjihorera omaṱunḓu ye haṋika poo omunene umwe uriri ongu kurisa ovanatje, nu ovandu ve nomauzeu momuinyo poo va suvera okutarera oviperendero vyakamuzu aruhe. Pe nomitjise omingi mbi za momahakaeneno womonyama tjimuna ehinga. Tjiri oviṋa avihe ouye mbi tunduuza vi munika tjimuna oviwa, nungwari vi raisa oukahu kutja ounongo wouye ouyova.​—2 Petr. 2:19.

6. Omomuano uṋe oumune wouye ohunga nomahakaeneno womonyama tje ri otjiṋa Satan tje vanga?

⁶ Oumune wouye ohunga nomahakaeneno womonyama otjiṋa Satan tje vanga. Satan tjiri wa suvera okumuna ovandu tji mave ungurisa omahakaeneno womonyama momuano omuvi nu mbu hi nokuraisa ondangi kotjiyandjewa tjorukupo Mukuru tja yandja kovandu. (Ef. 2:2) Indu ovandu tji mave tjiti oruvakiro ve raisa kutja kave nondangi kotjiyandjewa tjokukara novanatje morukupo, nu owo mape ya ave ha kamuna omuinyo waaruhe.​—1 Kor. 6:9, 10.

7-8. Ongwaye oumune wOmbeibela ohunga nomahakaeneno womonyama tje ri omawa tjinene poumune wouye?

⁷ Ovandu mbe kongorera oumune wouye ve  nyekerera omirari vyOmbeibela ohunga nongaro ombwa yomeritjindiro, mokutja omirari mbyo kaviungura. Ovandu otja imbo mape ya ave pura kutja, ‘Ongwaye Mukuru tje tu ungura nozonḓuma zonyama nu okuzambo e tu tjaere okuzekovisa?’ Owo ve pura epuriro ndi mena rokutja ve noumune woposyo wokutja ovandu tji mave vanga okutjita otjiṋa ve sokutjitjita. Posi yokutja Ombeibela kai tja nao. Oyo i tja katu nokuhepa okukovisa ozonḓuma zetu azehe nḓu tuna zo, posi yokutja matu yenene okuzerwisa kokutja atu ha tjiti oviṋa ovivi. (Kol. 3:5) Okuweza ko, Jehova wa yandja otjiyandjewa tjorukupo kokutja ovandu ve yenene okukovisa ozonḓuma zawo momuano omusemba. (1 Kor. 7:8, 9) Momuano mbwi, ovakupasane mave yenene okukara nomahakaeneno womonyama nokuhina omuhihamwatima poo omakeyakeyero nge yetwa i yoruvakiro.

⁸ Oumune wOmbeibela wa panguka tjinene koumune wouye, owo u honga omuano omuwa wokukara nomahakaeneno womonyama mbu ha hihamisa ovandu. Oyo i tja omahakaeneno womonyama maye veetere ondjoroka. (Omiano 5:18, 19) Nungwari Ombeibela i tja: “Omurumendu auhe u sokutjiwa kutja ma sokuhupa mouyapuke na mondjozikiro komukazendu we, nu kamomananukiro wozonḓuma otja ovanavisenginina mbe ha tjiwa Ndjambi.”​—1 Tes. 4:4, 5.

9. (a) Omomuano uṋe ovakarere va Jehova pomautiro weserewondo oritja-20 mu va vaterwa okukongorera ounongo wEmbo ra Mukuru mbwa kapita ounongo auhe? (b) Mu 1 Johanes 2:15, 16 mu neronga riṋe? (c) Otja tji pa tamunwa mOvaroma 1:24-27, ovitjitwa viṋe vyotuvakiro mbi tu sokunakaura?

⁹ Pomautiro weserewondo oritja-20, ovakarere va Jehova kave pukisirwe i youmune wovandu mbe ha ri ‘nohoṋi nangarire kaṱiṱi.’ (Ef. 4:19) Owo aave kondjo okukakatera komirari vya Jehova. Okambo nga Watch Tower ka 15 Mei 1926 ka tja: “Omurumendu poo omukazendu ve sokurira ovakohoke momeripura nomeritjindiro, tjinenenene ku nomundu ngu he ri omukazendu poo omurumendu we.” Nandarire kutja pa ri oviṋa mbyaa vi tjitwa mouye ongandoroka nawo, ovakarere va Jehova va kongorera ounongo wEmbo ra Mukuru mbwa kapita ounongo auhe. (Lesa 1 Johanes 2:15, 16.) Tjiri tu nondangi kEmbo ra Mukuru! Eṱe wina tu nondangi kutja Jehova u tupa omahongero okukurisa oupanga wetu kuna ye moruveze ndu ri ro, okutuvatera kutja atu ha pukisiwa i youmune wouye mbwi ohunga nongaro yomeritjindiro. *​—Lesa Ovaroma 1:24-27.

10-11. Ombeibela ya rakiza kutja momayuva omasenina ma mu tjitwa tjike?

¹⁰ Ombeibela ya rakiza kutja momayuva omasenina ovandu mave rire “overisuvere.” (2 Tim. 3:1, 2, EEP) Tjiri iho katjikumise okumuna omuano ouye mu u handjaura ongaro yokurisuvera omuini. Embo rimwe ra tja, okuza mombura ndji 1970 “omambo nge yandja omaronga ohunga nomuano wokukara nehupo eṋingandu ya takavarere.” Omambo tjiva aaye “tunduuza ovandu okuhinokurundurura otjiṋa ohunga nawo oveni poo okuripura kutja ka pe notjiṋa otjivi ohunga na wo.” Otjotjihorera embo rimwe ra tja: “Risuvera omuini mena rokutja oove omuwa tjinene nu oove omusemba tjinene.” Wina ri tja: “Omundu u sokutoorora kutja me ri tjindi vi, nokutjita imbi mbi ma munu kutja oviwa poo kaviwa otja kombango ye.”

¹¹ Hapo omambo ngo wa rora okuyezuva? Satan wa raera Eva kutja ma tjite otjiṋa otja iho. Eye wa tja: ‘Ma sana ku Ndjambi omuini na tjiwa ouwa nouvi.’ (Gen. 3:5) Ndino, ovengi ve ri vara pondondo yokombanda tjinene, nu ve muna kutja kape nomundu ngu ma sokuveraera kutja otjikwaye tji tji ri otjiwa poo otjivi, nandarire Mukuru. Otjotjihorera, ongaro otja indjo i  munika tjinene moumune wovandu ohunga norukupo.

12. Ouye u tunduuza oumune uṋe ohunga norukupo?

¹² Ombeibela i yandja omaronga kovakupasane kutja ve sokuraisasana ondengero nokuṱakamisa omakwizikiro ngu va tjita indu tji va kupasana. Oyo i tunduuza ovakupasane kutja ve sokukara pamwe nga aruhe, nomambo nga: “Omurumendu opu ma zu okuisa ihe na ina na kakatere komukazendu we, nowo mave rire onyama imwe.” (Gen. 2:24) Posi yokutja, imba mba pukisiwa i youmune wouye mbwi ve handjaura oumune mbwa panguka, wokutja omundu auhe morukupo ma sokuripurira kozonḓero ze omuini. Momahi tjiva, ovandu tji mave kupasana ve tjita oruyano komurungu wovandu rokutja mave kara pamwe oure womuinyo. Ovandu ovengi va rundurura omakwizikiro ngo mokutja owo mave kara morukupa indu tji pe norusuvero uriri. Oumune otja imbo wa tjita kutja omaṱunḓu ye haṋike, nu otjiṋa ho tja hihamisa ovandu ovengi tjinene. Tjiri oukahu kutja oumune wouye ohunga norukupo u yeta ombandjarero.

13. Ongwaye Jehova tja tonda ovandu overitongamise?

¹³ Ombeibela i tja: “Muhona wa tonda omundu auhe ngu ritongamisa.” (Omiano 16:5) Ongwaye Jehova tja tonda ovandu overitongamise? Epu rimwe orondi rokutja imba mbe ritongamisa nokutunduuza ongaro yokuripurira kuwo oveni ve raisa ongaro ya Satan. Ripura uriri omuano Satan maa ri omuritongamise tjinene nga tja munu kutja Jesus mape ya a woro ozongoro ne rikotamene ku ye! (Mat. 4:8, 9; Kol. 1:15, 16) Imba mbe noumune wokuripurira kuwo oveni ve raisa oukahu kutja ounongo wouye kounanḓengu pu imbwi owa Mukuru.

14. Etjangwa rOvaroma 12:3 ma ri tu vatera vi kutja tu kare noumune ouwa ohunga na eṱe oveni?

¹⁴ Ombeibela i tu vatera kutja tu kare noumune ouwa ohunga na eṱe oveni. Oyo i tja kanavi okurisuvera omuini. Jesus wa tja: “Suvera omukweṋu otja tji we risuvera omuini,” ihi matji raisa kutja kanavi okuripa ombango. (Mat. 19:19) Posi yokutja Ombeibela i tu honga kutja katu sokurimuna kutja oweṱe ovananḓengu tjinene povandu  varwe. Nungwari oyo i tja: “Amu tjiti otjiṋa ngamwa mokurivara oveni poo mokurihiva oveni, nungwari zarasaneye nomerisusuparisiro, aruhe ovakweṋu amamu ve vara otja ovanene pu eṋe.”​—Fil. 2:3; lesa Ovaroma 12:3.

15. Ongwaye tji mo munu kutja omirari mbi ri mOmbeibela ohunga nokuripurira kove omuini omisemba?

¹⁵ Ndino, ovandu ovengi nandarire imba mba hongwa ve tja omirari vyOmbeibela kavi vatere. Owo ve tja tji mo vara ovandu varwe pondondo yokombanda ku tjita kutja owo ve ku ungurise otjomukarere. Posi yokutja ovikwaye mbi etwa i yongaro ndji handjaurwa i youye wa Satan? Ove wa muna tjike? Ovandu mbe ripurira ku wo oveni ve nondjoroka po? Hapo owo ve nouṋingandu meṱunḓu? Owo ve nomapanga omawa tjiri? Owo ve noupanga wopopezu kuna Mukuru? Otja tji u muna, hapo mo munu kutja okokuwa okukongorera oumune wovandu poo okokuwa okukongorera ounongo wa Mukuru mbu ri mEmbo re?

16-17. Tu nondangi ku ye, nu omena ra tjike?

¹⁶ Ovandu mbe puratena kozondunge za imba mbe varwa i youye kutja ozonongo, ve ri tji muna omuryange ngu ma ningire omuhunga komuryange omukawo ngunda ama tjiwa kutja eye wina wa pandjara. Jesus wa tja ohunga novarumendu “ozonongo” woruveze rwe: “Owo ovanane ovapoṱu vovapoṱu; nomupoṱu tji ma nana omukwao korupangu, indino aveyevari mave wire motjitoto.” (Mat. 15:14) Tjiri oukahu kutja ounongo wouye mbwi owo ouyova komurungu wa Mukuru.

¹⁷ Ounongo mbu ri mOmbeibela u raisa oukahu kutja u “nonḓengu onene yokuhonga ouatjiri nokupirukira omahongero woposyo, nokuvyura ozondataiziro, nokukuna ongarero osemba.” (2 Tim. 3:16.) Tjiri tu nondangi ku Jehova kutja u tu tjevera koumune wouye mbwi, okupitira motjira tje! (Ef. 4:14) Omahongero aehe ngu tu muna okukurisa oupanga wetu kuna Jehova ye tupa omasa ngu matu hepa okukongorera omirari mbi ri mEmbo re. Tjiri ondjingonekero yapeke okuhongorerwa po i younongo mbu ri mOmbeibela!