1-3. (a) Otja kEpsalme 5:4-6, Jehova u noumune uṋe ohunga nokutjita ourunde? (b) Ongwaye tji matu tja omatjerero wovanatje ye vetasana otjiuru ‘netwako ra Kristus’?

JEHOVA MUKURU wa tonda ourunde ngamwa auhe. (Lesa Epsalme 5:4-6.) Eye tjiri wa tonda ovanatje okutjerewa nokutatumisiwa, ihi otjiṋa tji tji mu yaukisa tjinene! Mena rokutja oweṱe Ovahongonone va Jehova eṱe tu horera ku Ye mokutonda omatatumisiro wovanatje, nu katu ye yakura mombongo yOvakriste.​—Rom. 12:9; Hebr. 12:15, 16.

² Omatjerero ngamwa aehe wovanatje tjiri ye vetasana otjiuru ‘netwako ra Kristus’! (Gal. 6:2) Ongwaye tji matu tja nao? Otja tji twe rihongo morupa ndwa kapita, etwako ra Kristus ri kamburira mo oviṋa avihe Jesus mbya hongo momambo na movitjitwa vye, avihe mbi vya zikamena korusuvero nu vi tunduuza ousemba. Mena rokutja Ovakriste vatjiri ve ṱakamisa etwako ndi, owo ve tjinda ovanatje momuano mu mave munu kutja ve ri mondjeverero nokutja va suverwa tjiri. Posi yokutja omundu ngu tjera ovanatje u ripurira ku ye omuini nu u tjita otjiṋa otjivi, tji tji tjita kutja omuatje ma mune kutja ke ri mondjeverero nu keya suverwa.

³ Otjihihamise kutja omatjerero wovanatje otjiṋa tji tji tjitwa mouye auhe, nu Ovakriste vatjiri va hihamisiwa i yondjito ndjo. Omena ratjike? “Ovandu ovarunde novanavineya” va takavara, nu tjiva mape ya ave kondjo okurira ouṋepo wombongo nondando yokutjita oviṋa ovivi mbyo. (2 Tim. 3:13) Epu rarwe orondi rokutja imba mbaave karere Jehova va kongorera ozonḓuma za wo zonyama nga tji mave tjere ovanatje. Indjo tu tare kutja ongwaye omatjerero wovanatje tje ri ourunde ouvi tjinene. Matu katara komuano ovanene vombongo mu ve tjinda ondjito yourunde ounene  tjimuna omatjerero wovanatje, nokutja ovanene mave tjevere vi ovanatje vawo. *

4-5. Ongwaye omatjerero tje ri ondjito ombi ndji tjitwa komuhinandjo?

⁴ Okutjera omuatje ku hihamisa omuatje oure woruveze orure. Nu wina ku hihamisa ovandu avehe mbe mu suvera tjimuna omaṱunḓu novakambure ovakwao. Omatjerero wovanatje ourunde ouvi tjinene.

⁵ Omatjerero ondjito ombi ndji tjitwa komuhinandjo. * Owo ourunde mbu hihamisa varwe nokuveetera omihihamo. Otja tji matu katara korupa ndu ma ru kongorere ko, omundu ngwa tjere omuatje u mu hihamisa momuano omuvi tjinene. Eye u tjita kutja omuatje aha kara nongamburiro movandu rukwao nokurimuna kutja ke ri mondjeverero. Ovanatje mave sokutjeverwa kozondjito ozombi otja inḓo, nu imba mba tjerewa ve hepa omahuhumiṋino nombatero.​—1 Tes. 5:14.

6-7. Ongwaye omatjerero wovanatje tje ri ondjito ombi ndji ṱuna kombongo na kouhonapare?

⁶ Omatjerero ondjito ombi ndji tjitwa kombongo. Indu omundu mombongo tja munikwa ondjo yokutjera omuatje, otjiṋa hi tji eta ondjambu kombongo. (Mat. 5:16; 1 Petr. 2:12) Tjiri kama rire otjiṋa otjiwa komangete wovakambure ovakwetu mbe ‘rwira ongamburiro’ poo mbe kondja ouzeu okutjita imbi mbi yandja ondjozikiro ku Jehova! (Judas 3) Eṱe katu yandjere ovandu mbe tjita oviṋa ovivi otja imbyo nu mbe he ritananura, okukara mombongo.

⁷ Omatjerero ondjito ombi ndji ṱuna kouhonapare. Ovakriste ve ‘sokuriwisa kehi youhonapare.’ (Rom. 13:1) Indu tji matu raisa ondengero nokuṱakamisa ozoveta zohoromende tu raisa kutja tu riwisa kehi youhonapare. Omundu umwe mombongo tje ha ṱakamisire ozoveta nḓo, tjimuna tja tjere, eye u katuka ozoveta zohoromende. (Sasaneka nOviungura 25:8.) Ovanene vombongo kave nousemba wokupangura ovandu mbe teya ozoveta zohoromende, nu owo wina kave tjaere omutjere okumuna omberero ye okuza kouhonapare. (Rom. 13:4) Omutjite wouvi u konda imbi mbya kunu.​—Gal. 6:7.

8. Jehova u noumune uṋe ohunga nouvi mbu tjitwa kovandu?

⁸ Tjinenenene, omatjerero ondjito ombi ndji ṱuna ku Mukuru. (Eps. 51:4) Indu omundu tja tjiti ouvi komukwao, eye wina u tjita ouvi ku Jehova. Tara kotjihorera tjOmatwako Mukuru nga yandja kOvaisrael. Omatwako ngo aa ye tja omundu tja vaka poo tja tjiti otjineya komukwao eye we “riturisa ondjo ku Muhona.” (Lev. 6:2-4) Tjiri, omundu mombongo tja tjere omuatje, eye u tjita kutja omuatje ma mune kutja ke ri mondjeverero nu ovitjitwa vyomundu ngo vi raisa kutja ka mu ṱakame ku Mukuru. Omutjere ngo u yamburura ena ra Jehova. Mena repu ndo, omatjerero otjiṋa otjiyaukise komurungu wa Mukuru nu matu sokunakaura ondjito otja indjo.

9. Omapu yeṋe otjira tja Jehova tji tja zikamisa okuza kOmatjangwa otja ozombura tji ze kayenda, nu omena ratjike?

⁹ Otja ozombura tji maze kayenda, otjira tja Jehova tja pitisa omapu omengi nga zikamena kOmatjangwa ohunga nomatjerero wovanatje. Otjotjihorera, otupa tu tu ri moumbo mbwi Oruhungu no-Awake! twa hungirira komuano imba mba tjerewa mu mave yenene okutjinda omihihamo vyawo mbyo, nokutja varwe mave ve vatere vi nokuvetunduuza, nokutja ovanene  mave tjevere vi ovanatje vawo. Ovanene vombongo va muna omahongero nga zikamena kOmatjangwa ohunga nokutja mave tjiti vi indu omundu tja tjere. Otjira tji kayenda komurungu okutara komuano ozombongo mu ze ṱuna ongaro ndjo. Omena ratjike? Ihi ve tji tjitira kutja ovanene vombongo ve ṱakamise etwako ra Kristus aruhe, nu ve raise orusuvero nousemba indu tji pa kara omatjerero mombongo.

10-12. (a) Ovanene vombongo mave sokuzemburuka ye indu tji mave ṱunu ouvi mbwa tjitwa, nu otjikwaye otjinahepero tji mave sokutjita? (b) Otja ku Jakobus 5:14, 15, ovanene vombongo ve kondja okutjita vi?

¹⁰ Indu ovanene vombongo tji mave ṱunu ouvi mbwa tjitwa, mave sokuzemburuka kutja etwako ra Kristus ri tja mave sokutjinda auhe mombongo norusuvero nokutjita imbi mbi ri ovisemba komurungu wa Mukuru. Indu owo tji va tjiwa kutja omukambure wa tjiti ouvi ounene mave sokuripura nongengezero koviṋa tjiva. Otjiṋa otjinanḓengu ovanene vombongo ku ve yandja kombango okuyandja ondjozikiro kena ra Jehova. (Lev. 22:31, 32; Mat. 6:9) Owo wina ve rikendera koupanga wovakambure ovakwao kuna Jehova mombongo, nu ve huhumiṋa nokuvatera imba avehe mba tjerewa.

¹¹ Porumwe omundu ngwa tjere eye okaṋepo kombongo, ovanene vombongo ve kondja okutara kutja eye tjiri we ritanaura, kokutja ve mu vatere okuṱuna oupanga we kuna Jehova. (Lesa Jakobus 5:14, 15.) Omukambure ngu twarwa na hemenwa i ozonḓuma ze zonyama ngandu tja tjiti ouvi ounene u ri tjimuna omundu ngwa vera. Ihi matji hee kutja ke noupanga ouwa kuna Jehova. * Komuhingo mbwi, ovanene vombongo ve ri tjimuna ozonganga. Owo ve kondja okuverukisa omundu “ngwa vera,” poo omundu ngwa tjiti ouvi ounene. Owo ve yenena okuungurisa omirari vyOmbeibela okuvatera omundu ngwa tjiti ouvi ounene okuṱuna oupanga we kuna Mukuru, posi yokutja mave yenene okutjita nao indu omundu tje ritanaura tjiri.​—Oviung. 3:19; 2 Kor. 2:5-10.

¹² Otjiperi kutja ovanene vombongo ve nomerizirira omananḓengu. Owo tjiri va suvera ombongo mena rokutja Jehova wa yandja omerizirira ku wo okutjevera nokutjinda ovakambure ovakwao momuano worusuvero nousemba. (1 Petr. 5:1-3) Owo wina ve vanga kutja ovakambure ve mune kutja ombongo ooruveze rwondjeverero. Nu mena repu ndo ovanene vombongo ve hakahana okutoora omukambo indu tji va tjiwa kutja omundu umwe wa tjiti ouvi ounene, tjimuna okutjera omuatje. Owo ve tjita vi? Tara komapuriro pomautiro  woparagrafa 13,  15, no  17.

13-14. Hapo ovanene vombongo ve kongorera ozoveta zehi zokurapota omatjerero wovanatje kouhonapare? Kahurura.

 ¹³ Hapo ovanene vombongo ve kongorera ozoveta zehi zokurapota omatjerero wovanatje kouhonapare? Ii. Momahi tjiva muno zoveta nḓe tja omundu u sokurapota kouhonapare indu omuatje tja tjerewa, ovanene vombongo momahi ngo ve kongorera ozoveta nḓo. (Rom. 13:1) Ozoveta otja inḓo kaze vetasana otjiuru nozoveta za Mukuru. (Oviung. 5:28, 29) Indu ovanene vombongo tji va tjiwa kutja umwe mombongo wa tjerewa owo ve hakahana okupaha omuhunga okuza korutavi romberoo okupura kutja nga ve tjite vi mokurapota otjiṋa hi.

¹⁴ Ovanene vombongo ve tunduuza omuhinandjo ngo, novanene ve na varwe mbu mave tjiwa ohunga notjiṋa hi, kutja ve nousemba wokurapota ondjito ndjo kouhonapare. Hapo nu tjike indu omundu ngwa rapotwa tje ri okaṋepo kombongo, nu otjiṋa hi a tji tjiukwa kotjiwaṋa? Omukriste ngwa rapota ondjito ndji u sokumuna kutja  ma yamburura ena ra Jehova po? Kako. Omutjere omuini ongwa eta ondjambu kena ra Jehova.

15-16. (a) Otja ku 1 Timoteus 5:19, ongwaye tji mape sokukara ozohatoi 2 ngunda ovanene vombongo ave hiya zikamisa okomiti ombangure? (b) Ovanene vombongo ve tjita vi indu tji va tjiwa kutja omundu mombongo mape ya wa tjere?

 ¹⁵ Ongwaye ovanene vombongo tji mave sokukara nozohatoi 2 okuraisa kutja omundu ngo wa tjiti ouvi ounene? Omena rokutja Ombeibela i nomirari ominanḓengu ohunga nousemba. Indu omundu tji ma pataṋa kutja kaye ngwa tjiti ouvi ounene, mape sokukara ozohatoi 2, ngunda ovanene vombongo ave hiya zikamisa okomiti ombangure. (Deut. 19:15; Mat. 18:16; lesa 1 Timoteus 5:19.) Hapo ihi matji hee kutja pe sokukara ovandu 2 okuhatoi omatjerero ngunda omutjere e hiya rapotwa kouhonapare? Kako. Ozo kaze nokuheperwa po indu ovanene vombongo poo ovandu varwe tji mave vanga okurapota omakuminino ohunga nondjito ombi ndji.

¹⁶ Ovanene vombongo tji va tjiwa kutja omundu mombongo ma hakerwa mokutjera omuatje, owo ve kondja okukongorera ozoveta zehi mokurapota otjiṋa hi, nu okuzambo ve tjita omakonḓononeno warwe ohunga nondjito ndjo nu ave toora omikambo mbya zikamene kOmatjangwa. Ovanene vombongo rutenga ve pura omuhakerwamo, nu tja pataṋa, ovanene vombongo ve pura kovandu mbu mape ya ave tjiwa kutja pa kayenda ye. Indu omurapote nohatoi ndji mai raisa kutja omundu ngo wa tjere poo wa tjerere omuatje warwe, ovanene vombongo ve kara nouhatoi mbwa yenene okuzikamisa okomiti ombangure. * Tji pe hi nohatoi oitjavari, ihi katji hee kutja ingwi ngwe mu rapota ke nouatjiri. Nandarire kutja kape nozohatoi 2 okuraisa kutja omundu ngo wa tjere omuatje, ovanene vombongo ve tjiwa kutja omundu ngo mape ya wa tjiti otjiṋa otjivi tjinene tji tja hihamisa varwe. Ovanene vombongo ve kayenda komurungu okuhuhumiṋa nokuvatera imba mba hihamisiwa. Kunao ovanene vombongo ve tjevera ombongo nongengezero koumba warwe mbu mape ya omuhakerwamo ngo a tjiti.​—Oviung. 20:28.

17-18. Kahurura kutja okomiti ombangure i nomerizirira wa ye.

 ¹⁷ Okomiti ombangure i nomerizirira wa ye? Embo ndi “ombangure” ka ri hee kutja ovanene vombongo ve pangura, poo ve tya kutja ingwi ngwa tjere u sokupewa omberero i youhonapare mena rokutja wa teya oveta. Ovanene vombongo kave rihitisa moviṋa mbi mavi tjama nohoromende, owo ve isa oviposa otja imbyo kouhonapare. (Rom. 13:2-4; Titus 3:1) Nungwari, ovanene vombongo ve pangura poo ve tya kutja omundu ngo ma kayenda komurungu okurira okaṋepo kombongo poo indee.

¹⁸ Ovanene vombongo mbe ri mokomiti ombangure, ve pangura oviṋa mbi ma vi tjama noupanga womundu ngo kuna Mukuru uriri. Owo ve ungurisa Ombeibela okutya kutja omutjere we ritanaura poo indee. Eye tje hi nokuvanga okuritanaura, ovanene vombongo ve mu konda kombongo nu ave tjivisa ombongo kutja eye ka mu hongonone wa Jehova rukwao. (1 Kor. 5:11-13) Eye tje ritanaura, mape ya a kara mombongo. Posi yokutja, ovanene vombongo mave mu raere kutja ke nokuyenena okukara nomerizirira mombongo oure wozombura ozengi poo oure womuinyo we. Mena rokutja ovanene vombongo ve na konatja nondjeverero yovanatje, owo ve rakiza ovanene vovanatje mombongo kutja ve sokukengeza indu ovanatje vawo tji ve ri ongondoroka nomundu ngo. Ovanene vombongo tji mave rakiza ovanene mba, ve kengeza kutja ave ha twako omana wa imba mba hihamisiwa poo mba tjerewa.

19-22. Ovanene mave yenene okutjita tjike kutja ve tjevere ovanatje vawo? (Tara kotjiperendero tjokombanda yokambo nga.)

¹⁹ Oouṋe mbe nomerizirira tjinene wokutjevera ovanatje koumba? Ovanene wovanatje. * Ovanatje voye otjiyandjewa, nu “ouo otjirumatua tja Jehova.” (Eps. 127:3, EEP) Jehova we ku pa omerizirira wokutjevera ovanatje voye. Mo yenene okutjita tjike kutja u tjevere ovanatje voye kutja ave ha tjerewa?

²⁰ Rutenga, rihonga omuini ohunga nomatatumisiro wovanatje. Rihonga ohunga novandu mbe tatumisa ovanatje nomiano mbi ve ungurisa okutjita ovineya ku wo. Tjevera ovanatje voye kozongaro ozonaumba poo ovandu ovanaumba. (Omiano 22:3; 24:3) Zemburuka kutja povikando ovingi, omutjere u rira omundu omuatje ngu ma tjiwa rukuru nu me nongamburiro mo.

²¹ Otjitjavari, hungira oupaturuke ku novanatje voye nu ve tunduuza okutjita nao wina. (Deut. 6:6, 7) Mo sokurira omupuratene omuwa. (Jak. 1:19) Zemburuka kutja povikando tjiva ovanatje ve tira okuhungira kutja va tjerewa. Mena rokutja ve tira kutja kape nomundu ngu ma kambura mu wo, poo omutjere rumwe u ve tirisa kutja me ve tjiti otjiṋa otjivi tji va raere ovandu. Indu tji mo munu kutja pe notjiṋa otjivi tji tja tjitwa komuatje woye, mu pura omapuriro momuano omuwa nu okuzambo u puratene komaziriro we nomuretima.

²² Otjitjatatu, honga ovanatje voye. Ve raera imbi mbi mave hepa okutjiwa ohunga nomahakaeneno womonyama, ondjiviro ndji mo vepe mai haṋika otja kozombura zawo na imbi mbi mave yenene okuzuva. Honga ovanatje voye kutja nga ve tje vi, nu nga ve tjite vi indu omundu tji me ve ṱunu momuano mu ve hi nokuvanga. Ungurisa ondjivisiro ndji twa pewa i otjira tja Mukuru ohunga nomuano mu mo yenene okutjevera ovanatje voye.—Lesa okaongo nga “ Rihonga omuini nu u honge ovanatje voye.”

23. Oumune uṋe mbu tu na wo ohunga nomatjerero wovanatje, nu matu katara kepuriro riṋe morupa ndu ma ru kongorere ko?

²³ OtjOvahongonone va Jehova, tu sokuvara omatjerero wovanatje otjourunde ouvi tjinene. Mena rokutja tu hongorerwa po i yetwako ra Kristus, ozombongo zetu kaze undike oviṋa ovivi omundu mbya tjiti nomberero ndji ma sokumuna. Hapo matu vatere vi omukambure omukwetu ngwa tjerewa? Orupa ndu ma ru kongorere ko ma ru kazira epuriro ndo.