1. Otjikeṋa tji u hi na oo undjire ko indu tji wa uta okuzuvarisa ombuze yOmbeibela ku varwe?

HAPO ove u zemburuka otjikando tjoye otjitenga indu tji wa muna kutja oviṋa mbi u rihonga okuza mOmbeibela ouatjiri? Ya ri oupupu kove okuzuva nawa oviṋa avihe mbyoo rihongo okuza mOmbeibela. Nu oomunu kutja ovandu avehe mave kara nondjoroka okuvanga okurihonga. Ove wa ri nongamburiro kutja ombuze yOmbeibela mai ve vatere okukara nehupo ewa nai na moruyaveze. (Eps. 119:105) Kunao, ove wa raera omapanga woye aehe novazamumwe ohunga nouatjiri mbu werihonga. Hapo owo va raisa ongaro iṋe? Ouhumandu ovengi kave puratenene.

2-3. Hapo ovandu ovengi moruveze rwa Jesus aave ripura tjike ohunga na ye nombuze ndjaa zuvarisa?

² Eṱe katu sokutemwa indu ovandu tji mave pirukire ombuze ndji matu zuvarisa. Indu Jesus tja ri kombanda yehi, ovandu ovengi ve mu pirukira nandarire kutja aa tjiti ovihimise mbyaavi raisa kutja aa vaterwa i Mukuru. Otjotjihorera, Jesus wa pendura Lasarus tji tja ri otjihimise otjikahu kovemupirukire. Nu ovanane vOvajuda kaave kambura kutja Jesus ongu ri Messias. Owo nandarire aave vanga okuzepa Jesus na Lasarus.—Joh. 11:47, 48, 53; 12:9-11.

³ Jesus aa tjiwa kutja ovandu ovengi kamaave kambura kutja eye ongu ri Messias. (Joh. 5:39-44) Eye wa raera otjimbumba tjovahongewa va Johanes omupapitise kutja, ‘Omuṋingandu ingwi ngu hi nokuivaiva mu Ami!’ (Mat. 11:2, 3, 6) Ongwaye ovandu ovengi tji va pirukira Jesus?

4. Matu katara ku tjike morupa ndwi?

⁴ Morupa ndwi, na indwi ndu maru kongorere ko matu kakonḓonona omapu tjiva wokutja ongwaye ovandu ovengi meserewondo etanga tji ve ha ri nongamburiro mu Jesus. Nu wina matu  katara kutja ongwaye ovengi ndino tji ve ha yakura ombuze yetu. Tjarwe otjinanḓengu, matu kerihonga kutja ongwaye tji matu yenene okukara nongamburiro yomasa mu Jesus kokutja atu ha isa okumukongorera.

5. Ongwaye ovandu tjiva tjaave munu kutja Jesus kangu ri Messias ngwa hunganekwa?

⁵ Ovengi va pirukira Jesus mena rokoṋa ke kurira. Owo va yakura kutja Jesus aa tjiti ovihimise nokutja wa ri omuhonge omuwa. Posi yokutja ku wo, eye wa ri omuatje womuhonge womiti uriri. Nu ngwa zire koNasaret, tji tja ri otjihuro ovandu ovengi tjaave munu kutja otjihuro tjonḓengu yokehi. Nandarire Natanael ngwa karira omuhongewa wa Jesus, poutenga eye wa tja: “Indu nai moNasaret mamu sora okuza otjiṋa otjiwa are?” (Joh. 1:46) Natanael mape ya aa munu kutja otjihuro Jesus ma turire katja ri otjihuro tjonḓengu. Poo mape ya ee ripura ohunga nomaprofetero nge ri mu Mika 5:2, nga hunganeka kutja Messias ma kwaterwa moBetlehem, nungwari ka moNasaret.

6. Ovikeṋa mbya tja vi vatera ovandu okutjiwa kutja Jesus ongu ri Messias?

⁶ Hapo Omatjangwa ye tja vi? Omuprofete Jesaja wa hunganeka kutja ovanavita va Jesus ‘kave na ku ninga ko na tja na ye.’ (Jes. 53:8) Omaprofetere omengi otja ingo ya hunganekerwe rukuru. Andakuzu ovandu mbo va twapo oruveze okukonḓonona ouatjiri auhe, owo atjave tjiwa kutja Jesus wa kwaterwa moBetlehem nu wa ri ondekurona yOmbara David. (Luk. 2:4-7) Kunao, Jesus wa kwaterwa poruveze ndwa tamunwa momaprofetero nge ri mu Mika 5:2. Hapo nu ouzeu wa ri pi? Owo va hakahana okutoora omukambo nokuhina ondjivisiro aihe. Nu mena ra nao owo va pirukira Jesus.

7. Ongwaye ovandu ovengi ndino tji ve pirukira ovakarere va Jehova?

⁷ Hapo ovandu ve raisa ongaro otjingeyo ndino? Ii. Ovakarere va Jehova ovengi ovandu mbe hi noviṋa ovingi mehupo poo mbe he ri ovananḓengu motjiwaṋa. Kunao, ovandu ovengi ve muna kutja owo “ovandu uriri mbe hi na indu va hongerwe.” (Oviung. 4:13) Ovandu tjiva ve muna kutja ovakarere va Jehova kave sokuhonga Ombeibela, mena rokutja kave hitire ozoskole nḓe honga ohunga nozongamburiro. Ovandu varwe ve tja Ovahongonone va Jehova “ongamburiro ndja za koAmerica.” Posi yokutja, Ovahongonone va Jehova ovengi kave kara mehi ndi oUnited States. Nu varwe ve tja Ovahongonone va Jehova kave kambura mu Jesus. Oure wozombura ozengi, ovandu ve tja Ovahongonone va Jehova “okereka yovaapa,” nu ndji “haṋa omaṱunḓu” nokutja i “nOmbeibela yayo oini.” Kunao, ovengi kave vanga okurira ovakarere va Jehova mena romahungi otja ingo, nu kave tjiwa ouatjiri ohunga novakarere va Jehova.

8. Otja kOviungura 17:11, ovikwaye ovandu mbi mave sokutjita indu tji mave vanga okutjiwa kutja oouṋe mbe ri ovakarere va Mukuru ndino?

⁸ Ovikwaye mbi mavi vatere omundu kutja aha u mongamburiro? Ovandu mave sokukonḓonona ouatjiri auhe. Iho ootjiṋa omutjange wOmbeibela Lukas tje rimanena okutjita. Eye wa kondja oukukutu ‘okukonḓonona oviṋa avihe mbi okuza kombutiro.’ Eye aa vanga kutja ovalese ve ve “tjiwe imbwi ouatjiri auhe” mbu va zuva ohunga na Jesus. (Luk. 1:1-4) Ovajuda mba turire mu Berea otjikuru va ri tjimuna Lukas. Otjikando otjitenga tji va zuva ombuze ombwa ohunga na Jesus, owo va sasaneka ombuze ndjo ku nOmatjangwa wOtjiheberi okutara kutja imbi mbi va raerwa tjiri ouatjiri poo indee. (Lesa Oviungura 17:11.) Momuano otjingewo, ovandu ndino ve hepa okukonḓonona ouatjiri auhe. Owo mave sokusasaneka imbi mbi va hongwa i yovakarere va Mukuru ku nOmatjangwa. Nu wina mave sokukonḓonona oviṋa ovakarere va Jehova mbi ve ungura ndino. Indu tji va tjiti omakonḓononeno nawa  ohunga nOvahongonone va Jehova, owo kamaave yandjere oumune wovandu okutjita kutja ongamburiro yawo mu Jehova i ngundipare.

9. Hapo pa tjitwa tjike indu Jesus tja panḓa okuraisa otjiraisiro okuza keyuru?

⁹ Indu Jesus tja ri kombanda yehi ovandu tjiva kava ri nohange nomahongero we. Owo aave vanga ovingi. Kunao, aave vanga kutja Jesus ma raise kutja eye ongu ri Messias mokuvetjitira “otjiraisiro tji matji zu keyuru.” (Mat. 16:1) Mape ya aave vanga kutja ma tjite nao mena ra imbi mbi va lesa mu Daniel 7:13, 14. Nungwari, kaya ri oruveze rwa Jehova komaprofetero ngo okuyenenisiwa. Oviṋa Jesus mbyaa hongo aavi sokuraisa oukahu kutja eye ongu ri Messias. Posi yokutja indu tja panḓa okuvetjitira otjihimise, owo ve mu pirukira.—Mat. 16:4.

10. Omomuano uṋe Jesus ma yenenisa imbi Jesaja mbya tjanga ohunga na Messias?

¹⁰ Hapo Omatjangwa ye tja vi? Omuprofete Jesaja wa tjanga ohunga na Messias kutja, “Eye ke nokuura poo okuravaera nomasa; ke nokuzuvakisa eraka re momivanda.” (Jes. 42:1, 2) Jesus wa ungura otjiungura tje tjokuzuvarisa nokuhina okunana ombango ku ye omuini. Eye katungire ozondjuwo ozonene zomerikotameneno, kee rihwikike ozombanda nḓu maze mu tjiukisa kutja eye okaṋepo kongamburiro kaaṋi nu kena pa rakiza ovandu okumuisana kutja muhonge poo omaisaneno warwe wondjozikiro. Indu tjaa pangurwa, Jesus wa panḓa okuritjatisa kOmbara Herodes mokutjita otjihimise, nandarire kutja omuinyo we wa ri moumba. (Luk. 23:8-11) Otjingaperi kutja Jesus wa tjita ovihimise, posi yokutja okuzuvarisa ombuze ombwa otji tja ri otjiungura otjinanḓengu ku ye. Eye wa raera ovahongewa ve kutja, “Orondu ootjiṋa tji mbe era.”—Mar. 1:38.

11. Omeripura yeṋe woposyo tjiva ngu ve nawo ndino?

¹¹ Hapo ovandu ve raisa ongaro otjingeyo ndino? Ii. Ndino ovandu ovengi ve nanukirwa i yozondjuwo zomerikotameneno ozonene ovandu nḓu ve tunga, omuano ovanane vozongamburiro mu ve nomaisaneno wapeke novitjitwa poo omazemburukiro ovengi ngu ve ha tjiwa kutja ya za pi poo ye nomaheero yeṋe.  Posi yokutja ovandu mbe yenda kozongamburiro nḓo, kave rihongo ovingi ohunga na Mukuru nondando ye. Nungwari, imba mbe hita ozombongarero zetu zOukriste ve rihonga ohunga nokutja Jehova u undjira ko tjike kweṱe, nomuano mu matu yenene okuhupa otja kombango ye. Omatuwo wetu wOmerikotameneno omakohoke, nu kaye ya harekwa noviṋa vyondiru. Imba mbe hongorera po ombongo kave zara ozombanda zapeke poo okuisanewa omana wondjozikiro. Ongamburiro yetu noviṋa mbi tu honga vya zikamena kOmbeibela. Nandarire nao, ovengi ndino ve pirukira ombuze yetu mena rokutja omuano wetu womerikotameneno kau ve nana ombango. Nu oviṋa mbi tu honga ka mbi ve vanga okuzuva.

12. Otja komakahururiro nge ri mOvaheberi 11:1, 6, ongamburiro yetu i sokuzikamena ku ye?

¹² Ovikwaye mbi mavi tu vatere kutja atu ha u mongamburiro? Omuapostele Paulus wa raera Ovakriste moRoma kutja, “Ongamburiro otji i za momazuvarisiro omundu ngu ma zuu, nomazuvarisiro ngu tu zuva owo omazuvarisiro wa Kristus.” (Rom. 10:17) Kunao, eṱe tu kurisa ongamburiro yetu mokukonḓonona Omatjangwa, nungwari kaku kara norupa movitjitwa mbi ha zikamene kOmatjangwa nandarire kutja ovinanambango. Eṱe matu sokukara nongamburiro yomasa ndja zikamena kondjiviro youatjiri, mena rokutja “kape nomundu ngu tjata ku Ndjambi e hi nongamburiro.” (Lesa Ovaheberi 11:1, 6.) Kunao, katu hepa otjiraisiro otjihimangongo okuza keyuru okuturaisira kutja tu ri mongamburiro yatjiri. Omakonḓononeno omawa wOmbeibela ya yenene okuturaisira kutja tu nouatjiri nokuisapo omakeyakeyero ngamwa ngu tu nawo.

13. Ovikwaye mbya tjita kutja ovengi ve pirukire Jesus?

¹³ Indu Jesus tja ri kombanda yehi, ovahongewa va Johanes omupapitise va temenwe i yokutja ovahongewa va Jesus kaave ritjaere kovikurya. Jesus wa kahurura kutja kahepero ku wo okuritjaera kovikurya, ngunda eye e nomuinyo. (Mat. 9:14-17) Nandarire nao, Ovafarisei na varwe mbaave pirukire Jesus ve mu nakaura, mena rokutja kaa kongorere ozombazu notuzo twawo. Owo aave pindike indu Jesus tja verura  ovandu mEsabata. (Mar. 3:1-6; Joh. 9:16) Owo aave tja va tenga eyuva rEsabata, posi yokutja kava ri nouzeu okukara norupa momarandisiro ngaaye tjitirwa mondjuwo ondjapuke ya Muhona. Owo va pindika indu Jesus tje ve raera kutja ve ri posyo. (Mat. 21:12, 13, 15) Nu imba mba ri pondjuwo yomawongarero wombongo moNasaret, va pindikire tjinene indu Jesus tja ungurisa ovihorera vyOvaisrael ovakuru okuraisa kutja owo aave ripurire ku wo oveni nu kava ri nongamburiro. (Luk. 4:16, 25-30) Ovandu ovengi va pirukira Jesus mena rokutja katjitire imbi mbyaave undjire ko.—Mat. 11:16-19.

14. Ongwaye Jesus tja nakaura otuzo twovandu tu tu hi na twa zikamenene kOmatjangwa?

¹⁴ Hapo Omatjangwa ye tja vi? Jehova wa hungira okupitira momuprofete Jesaja kutja, “Otjiwaṋa hi tji tja tji rikotamena ku Ami, nungwari tjandje tji rikotamena ku Ami nomambo womungandjo uriri, nomitima vyatjo avi ri kokure na Ami. Ongamburiro yawo katjiṋa, oyo omihingo notuzo ovandu mbi ve rizemburuka na vyo uriri.” (Jes. 29:13) Jesus wa ri nawa okunakaura otuzo twovandu tu tu hi na twa zikamenene kOmatjangwa. Imba mbaave munu kutja ozoveta notuzo twovandu vya ri ovinanḓengu pOmbeibela va nakaura Jehova na ingwi ngwa hindwa otja Messias.

15. Ovikwaye mbi tjita kutja ovandu ovengi ndino ve tonde Ovahongonone va Jehova?

¹⁵ Hapo ovandu ve raisa ongaro otjingeyo ndino? Ii. Ovengi kave kara nohange indu Ovahongonone va Jehova tji ve hi nokukara norupa momazemburukiro nge ha zikamene kOmbeibela, tjimuna omazemburukiro wongwatero nOkresmesa. Varwe ve pindika indu Ovahongonone va Jehova tji ve hi nokukara norupa momazemburukiro wovitjitwa vyehi, poo tji ve hi nokukongorera ovizerika mbi tjitwa pozombakero mbi ha hitasana ku nEmbo ra Mukuru. Imba mbe hi nohange nOvahongonone va Jehova mena romapu ngo, mape ya ave munu kutja Mukuru u yakura omuano wawo womerikotameneno. Posi yokutja, owo kamaave mu yorokisa indu tji ve tjaterwa okukara norupa movitjitwa vyombazu ovandu mbi ve zemburuka mouye, kombanda yokupuratena komahongero omakahu nge ri mOmbeibela.—Mar. 7:7-9.

16. Otja kEpsalme 119:97, 113, 163-165, ovikeṋa mbi matu sokutjita na mbi matu sokupirukira?

¹⁶ Ovikwaye mbi mavi tu vatere kutja atu ha u mongamburiro? Eṱe matu sokukurisa orusuvero rwetu komatwako nomirari vya Jehova. (Lesa Epsalme 119:97, 113, 163-165.) Indu tji twa suvera Jehova, eṱe matu pirukire otuzo ngamwa tu tu ha tjata ku ye. Nu katu nokuyandjera otjiṋa ngamwa okurira otjinanḓengu tjinene porusuvero rwetu ku Jehova.

17. Ovikwaye ovengi mbyaave undjire ko ku Messias okutjita, indu Jesus tja ri kombanda yehi?

¹⁷ Indu Jesus tja ri kombanda yehi tjiva aave vanga omarundurukiro wa tjimanga kohoromende. Owo aave undjire ko kutja Messias me ve kutura kouhonapare wOvaroma mbwaau ve ṋiṋikiza. Posi yokutja indu tji va kondja okuzika Jesus otjombara, eye wa panḓa. (Joh. 6:14, 15) Ovapristeri na varwe aave tira kutja Jesus mape ya a rundurura oviṋa mohoromende, nu iho atji tjiti kutja Ovaroma ve pindike nu ve isako ouyara mbu va yandja kovapristeri. Mena ranao, Ovajuda ovengi va pirukira Jesus.

18. Omaprofetero yeṋe ohunga na Messias ovengi ngu ve hi na va yandja kombango?

¹⁸ Hapo Omatjangwa ye tja vi? Nandarire kutja omaprofetero omengi ya hunganeka kutja Messias ma rire Omutoṋe, omaprofetero warwe ye raisa kutja eye rutenga ma sokuṱira omauvi wetu. (Jes. 53:9, 12) Nu hapo ongwaye Ovajuda tji va ri noumune woposyo ohunga na Messias? Ovengi moruveze rwa Jesus kaave yandja ombango komaprofetero ngamwa nge hi na aaye ve kwizikire kutja omauzeu ngaave  munu oruveze ndwo maye isapewa.—Joh. 6:26, 27.

19. Oumune uṋe woposyo mbwa tjita kutja ovengi ndino ave ha puratene kombuze yetu?

¹⁹ Hapo ovandu ve raisa ongaro otjingeyo ndino? Ii. Ovengi ndino kave puratene kombuze yetu mena rokutja katu kara norupa movitjitwa vyopolotika. Owo ve muna kutja matu sokutoorora. Posi yokutja, indu tji twa toorora omundu okutuhonaparera po eṱe matu nakaura Jehova otjomuhonapare wetu. (1 Sam. 8:4-7) Ovandu mape ya ave ripura kutja matu sokutunga ozoskole nozonamiti, na wina okuvatera otjiwaṋa noviṋa vyarwe. Owo ve pirukira ombuze yetu mena rokutja tu yandja ombango tjinene kotjiungura tjokuzuvarisa, pendje nokukondja okuzengurura omauzeu ovandu ngu ve muna nai.

20. Otjikwaye tji matji sokurira otjinanḓengu tjinene kweṱe, otja ku imbi Jesus mbya hungira mu Mateus 7:21-23?

²⁰ Ovikwaye mbi mavi tu vatere kutja atu ha u mongamburiro? (Lesa Mateus 7:21-23.) Eṱe matu sokuyandja ombango tjinene kotjiungura Jesus tje tu rakiza okutjita. (Mat. 28:19, 20) Katu sokupandjara ombango mena rokukondja okuzengurura omauzeu mouye. Eṱe twa suvera ovandu nu tu rikendera komauzeu wawo. Posi yokutja, tu tjiwa kutja omuano omusemba mbu matu yenene okuvevatera okuvehonga ohunga nOuhona wa Mukuru nokuvevatera kutja ve kare noupanga ouwa kuna Jehova.

21. Eṱe matu sokurimanena okutjita tjike?

²¹ Morupa ndwi, eṱe twa tara komapu yane nga tjita kutja ovengi ve pirukire Jesus meserewondo etenga, na mbi mape ya avi tjiti kutja tjiva ndino ve pirukire ovakongorere va Jesus. Posi yokutja, hapo imbyo ooviṋa aviyerike mbi mape ya avi ngundiparisa ongamburiro yetu? Kako. Morupa ndu maru kongorere ko, matu katara koviṋa vyarwe vine mbi mape ya avi ngundiparisa ongamburiro yetu. Ngatu rimanene okuhina okuyandjera otjiṋa okutjita kutja tu ise okukongorera Jesus, nu ngatu kayende komurungu okukurisa ongamburiro yetu.