Hapo ove ootjiwa?
Hapo ovandu moruveze rwOmbeibela aave ungurisa otuu okutunga ouyaha womomeva?
Otuu
OVANDU ovengi ve tjiwa kutja ozombura ozengi nḓa kapita ovandu moEngipte aave tjanga kozombapira nḓa ungurwa pomiti mbi isanewa kutja otuu. Ovagrike nOvaroma aave ungurisa otuu * okutjanga ko. Posi yokutja ovandu ovengi kave tjiwa kutja otuu wina aatu ungurisiwa okuungura ouyaha womomeva.
Ouyaha uvari womomeva mbwa ungurwa potuu mbwa vazewa momayendo wOvaengipte
Oure wozombura zokombanda 2 500 nḓa kapita, omuprofete Jesaja wa tjanga kutja ovandu mba turire “hembandina yozonḓonḓu za Etiopie” va hinda ‘ovakuramenepo vawo ve rauke nonḓonḓu Nil mouyaha mbwa ungurwa potuu.’ Kombunda, omuprofete Jeremia wa hunganeka kutja otjihuro Babilon matji wirwa i oMedie na Persie, nu owo mave nyosa “ouyaha mbwa ungurwa potuu” wOvababilona kutja ave ha taura.—Jes. 18:1, 2; Jer. 51: 32, NW.
Mena rokutja Ombeibela Embo nda tjangwa nombatero ya Mukuru, katjikumise kovahongwa vOmbeibela okumuna kutja ovakonḓonone va yenena okumuna oviraisiro vyokutja otuu aatu ungurisiwa okutunga ouyaha womomeva moruveze rwOmbeibela. (2 Tim. 3:16) Ovikwaye mbi va yenena okumuna? Ovakonḓonone va yenena okumuna oviraisiro ovikahu vyokutja Ovaengipte aave ungura ouyaha womomeva mbwa ungurwa potuu.
HAPO OUYAHA WOTUU AAU UNGURWA VI?
Momayendo wOvaengipte mwa perenderwe oviṋa mbyaavi raisa omuano ovandu maave wongo otuu kutja ve ungure po ouyaha womomeva. Ovarumendu aave kondo oviunda vyotuu nu ave vi kutu kumwe. Oviunda vyomuti mbwi vi nozohuki ndatu. Kunao indu oviunda mbi tji vya kutwa kumwe nomasa, ovyo vi kukuta nu i rira ouzeu okuvihaṋa. Embo ndi hungira ohunga nekuruhungi rOvaengipte, ri tja ouyaha mbwa ungurwa potuu aau yenene okukara noure wozometa 17, nu iho aatji tjiti kutja omundu ma ungurise oviti ovihinge 10 poo 12 komunda auhe.
Oviperendero vyOvaengipte mbi mavi raisa omuano wokuungura okayaha komomeva potuu
ONGWAYE OVATUNGE VOUYAHA WOMOMEVA TJAAVE UNGURISA OTUU?
Omiti omingi vyotuu aavi yenene okuvazewa monḓonḓu ndji Nil. Nu wina okuungura ouyaha womomeva potuu ya ri oupupu. Nandarire indu ovandu tji va uta okuungurisa omiti vyarwe okutunga na vyo ouyaha womomeva ounene, ovapate vomahundju novayeve aave kayenda komurungu okuungurisa otuu okuungura po ouyaha womomeva.
Oure woruveze orure ovandu aave ungurisa ouyaha womomeva mbwa ungurwa potuu. Omutjange womambo Omugrike wena Plutarch, ngwa hupire moruveze rwovaapostele, wa tja ovandu tjiva aave ungurisa ouyaha womomeva mbwa ungurirwe potuu oruveze ndwo.
^ par. 3 Otuu tu hapa potuveze omeva mu ye kurama poo momarindi. Omuti mbwi u yenena okukara noure wozometa ndano, nu otjiunda kehi tji yenena okukara noupapi wozosentimeta 15.
