1-2. Omauzeu yeṋe Ovahongonone va Jehova ovengi ngu ve muna?

OMUAPOSTELE Paulus wa tunduuza Timoteus okuungura oukukutu motjiungura tjokuzuvarisa. Nu wina omambo ngo ye kamburira mo Ovakriste avehe. (2 Tim. 4:5) Kunao, eṱe tu kongorera erakiza ra Paulus mokuungura oukukutu motjiungura tja Mukuru. Posi yokutja, povikando irira ouzeu. Ovakambure ovakwetu ovengi ve hepa ouvanḓe okukara norupa motjiungura tjokuzuvarisa. (2 Tim. 4:2) Otjotjihorera, ripura novakambure ovakwetu mba tura momahi oviungura vyetu mu vi ha yandjerwa. Owo ve zuvarisa nandarire kutja mave tjiwa kutja mape ya ave paterwa motjovakamburwa.

² Ovakarere va Jehova ve muna omauzeu omengi ngu mape ya aye ve teya ombango. Otjotjihorera, ovengi ve hepa okuungura ozoiri ozonde okutumba omaṱunḓu wawo. Owo ve zera okuungura ovingi motjiungura tjokuzuvarisa, posi yokutja komaandero wotjivike kave kara nomasa wokutjita nao. Varwe kave yenene okuungura ovingi motjiungura tjokuzuvarisa mena rokutja va vera, ovanene motjiwondo poo tjiva kave yenene okuyenda kwarwe. Nu tjiva ve rimuna kutja kava nanḓengu ku Jehova. Omukazendu omukambure wena Mary, * wa tja: “Indu tji mba u momuinyo mbi hepa okukondja nomasa kutja mbi rundurure oumune wandje, nu okutjita nao ku ndji ngundiparisira ko. Okuzambo ami mbi rimuna ondjo mena rokutja ku kambura oruveze nomasa wandje ngu mba sokuungurisa motjiungura tjokuzuvarisa.”

3. Morupa ndwi matu katara ku ye?

³ Kainatja kutja omauzeu yeṋe ngu matu munu, Jehova me tu pe omasa ngu matu hepa kutja tu kayende komurungu okumukarera otja pu matu yenene. Ngunda atu hi ya tara komuano Jehova mu ma yenene okutuvatera, ngatu tare komuano eye ma  vatera Paulus na Timoteus okuyenenisa otjiungura tjawo tjokuzuvarisa nandarire kehi yomauzeu.

4. Omauzeu yeṋe Paulus nga muna?

⁴ Paulus wa munine omauzeu omengi. Eye tjinene aa hepa ombatero ya Jehova, indu ovanavita na ye tji ve mu tona nokumupatera motjovakamburwa. Nu nandarire tjaave vanga okumuzepa. (2 Kor. 11:23-25) Paulus kaa ṱohoṋi okuhungira kutja, eye povikando aa sokukondja nomasa kutja ma kare noumune ouwa. (Rom. 7:18, 19, 24) Eye wina wa ri nomutjise kaaṋi mbwa ri tjimuna “okuiya monyama,” nu mbwaa vanga kutja Mukuru ma isepo.—2 Kor. 12:7, 8.

5. Ovikwaye Paulus mbyaa yenene okutjita nandarire kutja wa ri kehi yomauzeu?

⁵ Jehova wa yandja omasa ku Paulus kutja ma kayende komurungu notjiungura tje tjokuzuvarisa, nandarire kehi yomauzeu aehe nga muna. Tara ku imbi Paulus mbya yenenisa. Otjotjihorera, indu tja ri omukamburwa woponganda moRoma, eye wa zuvarisa ombuze ombwa noupyuke kovanane vozongamburiro na imba mba ri novihako vyokombanda mohoromende. (Oviung. 28:17; Fil. 4:21, 22) Eye wina wa zuvarisa kovatjevere vondjuwo yOuhona na imba avehe mbaave ya okumuvarura. (Oviung. 28:30, 31; Fil. 1:13) Nu moruveze otjingero ndwo, Mukuru wa ungurisa Paulus okutjanga otutuu tu twa vatera Ovakriste vatjiri veserewondo etenga, nu ngamba tu tu vatera Ovakriste. Nu otjihorera tja Paulus tja yanḓiparisa ombongo moRoma, tji tja tjita kutja ovakambure ve kare ‘noupandi okuzuvarisa Ombuze ya Ndjambi komeho nokuhinemuma.’ (Fil. 1:14) Nandarire kutja Paulus kaa yenene okutjita ovingi otja pu ma vanga, eye wa kondja pu ma yenene “okuryamisa Ombuze Ombwa komurungu.”—Fil. 1:12.

6. Otja 2 Ovakorinte 12:9, 10, ovikwaye mbya vatera Paulus okuyenenisa otjiungura tje tjokuzuvarisa?

⁶ Paulus wa muna kutja oviṋa avihe mbya yenenisa motjiungura tja Jehova ya ri mena rombatero ya Mukuru, nungwari kamase we omuini. Eye wa tja omasa wa Mukuru “maye yenenisiwa indu tji wa ngundipara.” (Lesa 2 Ovakorinte 12:9, 10.) Nandarire kehi yondatumisire, okupaterwa motjovakamburwa nomauzeu warwe, Jehova wa vatera Paulus nomasa wombepo ye ondjapuke kokutja ma yenenise otjiungura tjokuzuvarisa.

7. Omauzeu yeṋe Timoteus nga muna nga tja ye tjita kutja irire ouzeu ku ye okuyenenisa otjiungura tje?

 ⁷ Timoteus omurumendu omutanda ngwa ri epanga ra Paulus, wina aa hepa okuriyameka komasa wa Mukuru okuyenenisa otjiungura tje tjokuzuvarisa. Paulus wa ri omuhindwa nu Timoteus aa ryanga puna ye momauyenda nga. Paulus wina ee mu hindi okukavarura nokukayanḓiparisa ozombongo. (1 Kor. 4:17) Timoteus mape ya ee rimunu kutja ke nondjiviro ndja yenene. Kunao, Paulus opa zokumuraera kutja, “Ape ningi omundu ngu me ku nyengurire oumutanda woye.” (1 Tim. 4:12) Nu Timoteus oruveze ndwo wina wa ri nokuiya monyama, ‘tjinga a ri omuverandu.’ (1 Tim. 5:23) Posi yokutja, Timoteus aa tjiwa kutja ombepo ya Jehova ondjapuke mai mu pe omasa ngu ma hepa okuzuvarisa ombuze ombwa, nokukarera ovakambure ovakwao.—2 Tim. 1:7.

8. Omomiano viṋe Jehova me yanḓiparisa ovakarere ve ndino?

⁸ Ndino, Jehova u yandja “omasa nge kapita avihe” kovakarere ve kokutja ve kayende komurungu okumukarera nouṱakame. (2 Kor. 4:7) Ngatu tare koviṋa vine Jehova mbye ungurisa okutuyanḓiparisa nokutuvatera kutja tu panḓere pouṱakame ku ye. Oviṋa mbi ovyo ongumbiro, Ombeibela, ovakambure ovakwetu notjiungura tjetu tjokuzuvarisa.

9. Ongumbiro mai yenene okutuvatera vi?

⁹ Ongumbiro i tu yanḓiparisa. Membo rOvaefese 6:18, Paulus we tu tunduuza kutja tu kumbe ku Mukuru “aruhe.” Nu tji twa tjiti nao, Mukuru me tu yanḓiparisa. Jonnie ngwa tura moBolivia, wa muna omasa wongumbiro indu tja ri kehi yomarorero pekepeke. Omukazendu we novanene ve va verera tjimwe. Ya ri ouzeu ku Jonnie okuvepa ombatero aveyetatu ndjaave hepa. Ina wa ṱa, nu pa kambura oruveze orure omukazendu we na ihe okuveruka. Jonnie wa tja: “Otjiṋa tji tje ndji vatera indu tji mba ri kehi yombameno, ya ri okuraera Jehova oviṋa avihe mbi mavi ndji kendisa mongumbiro.” Jehova wa zuvira ozongumbiro za Jonnie nu e mu pe omasa ngaa hepa. Ronald omunene wombongo moBolivia, wa zuva kutja ina u nomutjise wokangera nu kombunda yomueze umwe eye wa ṱa. Otjikeṋa tji tje mu vatera okutjinda ouzeu mbwo? Eye wa tja: “Okukumba ku Jehova kwe ndji vatera kutja mbi mu raere avihe mbi ri momutima wandje. Ami mbi tjiwa kutja eye undji i nawa okukapita omundu ngamwa, nandarire okukapita ami omuini.” Povikando, irira ouzeu okutjinda omauzeu wetu nu katu tjiwa kutja ngatu kumbe vi. Posi yokutja, Jehova u tu ṋanga kutja tu kumbe ku ye nandarire kutja ouzeu kweṱe okumuraera ouripura noumune wetu.—Rom. 8:26, 27.

10. Otja kOvaheberi 4:12, ongwaye okulesa Ombeibela nokuripurira ko oukoto tje ri ounanḓengu tjinene?

¹⁰ Ombeibela i tu yanḓiparisa. Tjimuna Paulus tjaa ṱaṱere kOmatjangwa okumuyanḓiparisa nokumuhuhumiṋa, eṱe wina matu yenene okutjita nao. (Rom. 15:4) Otja tji matu lese Embo ra Mukuru, Jehova u yenena okuungurisa ombepo ye ondjapuke okutuvatera okumuna kutja Omatjangwa maye tu vatere vi mongaro mu tu ri. (Lesa Ovaheberi 4:12.) Ronald ngwa tamunwa rukuru, wa tja: “Ami mbi tjaterwa kutja mbi kondja okulesa orupa rwOmbeibela ongurova aihe. Mbi ripurira ko oukoto tjinene kovikaṋena vya Jehova nomuano me rikendera kovakarere ve. Okutjita nao ku ndji pomasa.”

11. Ombeibela ya yanḓiparisa vi omukazendu omukambure ngwa ri nombameno?

¹¹ Matu yenene okukara noumune ouwa ohunga nozongaro zetu indu tji matu ripurire ko oukoto kEmbo ra Mukuru. Tara komuano Ombeibela mu ya vatera omukazendu  omukambure omuhepundu. Omunene wombongo we mu pa ondunge yokutja ma yenene okumuna omapu ngu maye mu vatere okuza membo ra Job. Otja tjaa lese, eye wa hakahana okupangura Job kouripura we woposyo. Eye ee ripura omuini kutja, “Ongwaye Job tjee ripurire komauzeu we omuini.” Nungwari, eye kombunda wa kamuna kutja omeripura we ye ri tjimuna owa Job. Iho tje mu vatera okurundurura oumune we nu tje mu pa omasa kutja ma yenene okutjinda omuhihamwatima mbwa ri nawo mena rokuzepaisa omurumendu we.

12. Jehova u tu yanḓiparisa vi okupitira movakambure ovakwetu?

¹² Okukara pu novakambure ovakwetu ku tu yanḓiparisa. Omuano warwe Jehova me yanḓiparisa Ovakriste okupitira movakambure ovakwao. Paulus wa tjanga kutja eye aa zeri okuhakaena ku novakambure ovakwao kutja ve “vaterasane mongamburiro.” (Rom. 1:11, 12) Mary ngwa tamunwa rukuru, wa muna ouwa okuza kovakambure ovakwao. Eye wa tja: “Jehova wa ungurisa ovakambure ovakwetu, nandarire imba mbe hi na aave tjiwa ouzeu wandje. Owo aave hungire omambo omayanḓiparise poo okundjihindira okakarata, nu iho ootjiṋa tjee hepa. Wina onawa okurira omupaturuke pu novakazendu ovakambure mba tuurunga ouzeu otjingewo nokurihongera kondjiviro yawo. Nu ovanene vombongo aruhe ve tjita kutja mbi rimune otjokaṋepo okananḓengu mombongo.”

13. Omomuano uṋe mu matu yenene okutunduuzasana pozombongarero zombongo?

¹³ Ozombongarero zombongo oruveze oruwa okutunduuzasana. Ove tji wa i kozombongarero zombongo kondja okutunduuza varwe mokuveraera kutja we ve suvera, nu u nondangi ku avihe mbi ve tjita. Otjotjihorera, komurungu wombongarero yombongo omunene wombongo wena Peter, wa raera omukazendu omukambure ngwa kupwa i yomurumendu ngu he ri Omuhongonone kutja, “Tjiri otjiṋa otjitunduuze okukumuna mba. Ove u rongerisa ovanatje voye hamboumwe nawa nu aruhe ve kara nomaziriro.” Eye wa ri nondangi tjinene, nu nomahoze momeho wa tja: “Tjiri mba ri ame hepa okuzuva omambo ngo ndino.”

14. Okukara norupa motjiungura tjokuzuvarisa ku tu vatera vi?

¹⁴ Otjiungura tjokuzuvarisa tji tu yanḓiparisa. Okuhonga varwe ouatjiri wOmbeibela ku tu pa ondjoroka, nandarire kutja owo va yakura ombuze yetu poo indee. (Omiano 11:25) Omukazendu omukambure wena Stacy wa yenena okumuna omasa nge za motjiungura tjokuzuvarisa. Indu umwe weṱunḓu re tja kondwa kombongo, eye wa wire momuinyo nu ee ripura omuini kutja, ‘Otjikwaye tjee sokutjita okumuvatera?’ Stacy ee ripura tjinene ohunga notjiṋa ho. Otjikwaye tji tje mu vatera mongaro onḓeu ndjo? Otjiungura tjokuzuvarisa. Otja tjaa piti motjiungura tjokuzuvarisa, aa yandja ombango kovandu kaa zuvarisa nu mbaave hepa ombatero ye. Eye wa tja: “Moruveze ndwo, Jehova we ndji pa omuhongwa wOmbeibela ngwaa toorere komikambo koviṋa mbyee rihongo. Iho tje ndji yanḓiparisa tjinene. Okupita motjiungura tjokuzuvarisa ootjiṋa tji tje ndji vatera nomasa.”

15. Ove mo rihongere ko tjike komambo wa Mary?

¹⁵ Tjiva mape ya ve muna kutja kamaave yenene okuungura ovingi motjiungura tjokuzuvarisa mena rozongaro mu ve ri. Ndoovazu u rimuna nao, zemburuka kutja Jehova u nonyuṋe indu tji mo mu ungurire otja pu mo yenene. Tara kotjihorera tja Mary, ngwa tamunwa rukuru. Indu tja tjindira koruveze ovandu mu ve hungira eraka rarwe, eye ee rimunu kutja ke nombatero. Eye wa tja: “Oure woruveze orure, otjiṋa tjee tjiti ya ri okuyandja eziriro esupi, okulesa ezeva mOmbeibela poo okuyandja okambapira  motjiungura tjokuzuvarisa.” Nu iho aatji tjiti kutja me rimune okuhinonḓengu indu tji me risasaneke ku novahungire veraka ndwo. Posi yokutja, eye wa rundurura oumune we. Eye wa uta okumuna kutja Jehova ma yenene okumuungurisa nandarire kutja ke nokutjiwa eraka nawa. Eye wa tja: “Ouatjiri wOmbeibela kauzeu nu u yenena okurundurura ehupo rovandu.”

16. Ovikwaye mbi mavi yenene okuvatera imba mbe ha yenene okupita mozoyawo mena rozongaro kaaṋi?

¹⁶ Jehova u tjiwa kutja tu vanga okuzuvarisa nandarire kutja katu yenene okupita mozoyetu mena rozongaro kaaṋi. Eye u yenena okutuvatera kutja tu zuvarise ku imba mbu mave tu tjevere poo kozonganga nozonesa. Indu tji twa sasaneke imbi mbyaatu ungura morukapitaveze kuna imbi mbi matu yenene okuungura nai, eṱe mape ya atu u momuinyo. Posi yokutja indu tji twe ripurire komuano Jehova me tu vatera nai, eṱe matu yenene okukara nomasa ngu matu hepa kokutja tu tuurunge omarorero nondjoroka.

17. Otja kOmuzuvarise 11:6, ongwaye tji matu sokukayenda komurungu motjiungura tjokuzuvarisa, nandarire kutja mape munika tjimuna ozongondjero zetu omungandjo?

¹⁷ Eṱe katu nokutjiwa kutja ondwi iṋe youatjiri ndji twa kunu, ndji mape ya ai hara omize na i hapa. (Lesa Omuzuvarise 11:6.) Otjotjihorera, omukazendu omukambure wena Barbara wotjiwondo tjozombura 80, u zuvarisa aruhe okupitira mongoze nokutjanga otutuu. Morutuu rumwe eye wa twamo okambo kOruhungu 1 ku Marta 2014, ku ke nepu ndi “What God Has Done for You.” Mokuhinokutjiwa, eye wa hinda orutuu ndwo kovakupasane mba konderwe kombongo. Owo va lesa okambo ngo povikando ovingi. Omurumendu ee rimunu tjimuna Jehova ma hungire kuna ye. Ovakupasane mbwo va uta okuyenda kozombongarero zombongo nu kombunda yozombura zokombanda 27, owo va rira Ovahongonone rukwao. Barbara wa yanḓiparisiwa tjinene okumuna ouwa mbwa za morutuu rumwe ndwa tjanga.

18. Ovikeṋa mbi matu yenene okutjita kutja Mukuru me tu yanḓiparise?

¹⁸ Jehova u tu pa oviṋa ovingi mbi tu pa omasa tjimuna ongumbiro, Ombeibela, ovakambure ovakwetu notjiungura tjokuzuvarisa. Indu tji matu ungurisa oviṋa mbyo tu raisa kutja tu nongamburiro yokutja eye ma yenene okutuvatera. Kunao, eṱe aruhe ngatu riyameke ku Tate wetu womeyuru ngu nonyuṋe “okuyandja omasa ku imba mbe ṱakama mu Ye.”—2 Ekuruh. 16:9.