1-2. Omutjange umwe wa tja vi, nu matu kahungirira ku ye morupa ndwi?

OVENGI ndino ve tja ve kambura mu Jesus, posi yokutja kave kambura moviṋa mbyaa hongo. (2 Tim. 4:3, 4) Omutjange umwe wa tja: “Andakuzu pe nomurumendu mokati ketu ngu ma hungire nokutjita oviṋa tjimuna Jesus . . . , hapo ovandu ndino atjave mu nakaura tjimuna tji va nakaura Jesus ozombura omayovi yevari nḓa kapita? . . . Ii, atjave mu nakaura.”

² Indu Jesus tja ri kombanda yehi ovandu ovengi ve mu zuva ama hongo nokutjita ovihimise, posi yokutja kave karere nongamburiro mu ye. Omena raye? Morupa ndwa kapita, twa tara komapu yane nga tjita kutja ovandu ve pirukire Jesus mena roviṋa mbyaa hungire nokutjita. Ngatu tare komapu yarwe yane. Eṱe wina matu katara kutja ongwaye ovandu ndino tji ve pirukira ovakongorere va Jesus, nokutja omomuano uṋe mu matu yenene okutjita kutja a pe ha kara otjiṋa tji matji tjiti kutja tu ise okukarera Jehova.

3. Otjikwaye Jesus tja tjita, tji tja hinga ovandu tjiva okumupirukira?

³ Indu tja ri kombanda yehi, Jesus aa kara pu novandu avehe. Eye aa ri pu novatumbe novanauvara, posi yokutja wina aa kara tjinene pu novasyona na imba mbaave ṋiṋikiziwa. Nu wina eye wa ri notjari na imba mbaave varwa kutja ‘ovanauvi.’ Ovandu tjiva overitongamise va pirukira Jesus mena roviṋa mbyaa tjiti. Owo va pura ovahongewa va Jesus kutja, “Okutjavi tji mamu ri nokunwa puna ovasutise votjisuta tjouhona novanauvi?” Jesus wa zira a tja: “Mbe hepa onganga kawo mba mbe ri nawa, nungwari owo mba mba vera. Ami hi ere okuisana ovasemba kondanaukiro, nungwari mbe era okuisana imba ovanauvi.”—Luk. 5:29-32.

4. Otja komaprofetero wa Jesaja, otjikwaye Ovajuda tjaave sokuundjira ko ku Messias?

 ⁴ Hapo Omatjangwa ye tja vi? Ngunda Messias e hi ye ya omuprofete Jesaja wa hunganeka kutja ouye mau mu tondo. Eye wa tja: “Avehe ve mu nyengura nave humburuka na ye . . . Kape na ngwa tara ku ye, eṱe twe mu hahiza otja ngu ha ri otjiṋa.” (Jes. 53:3) Omaprofetero ye tja Messias aa sokunakaurwa i “avehe,” kunao Ovajuda moruveze rwa Jesus aave sokuundjira ko kutja ovandu mave mu pirukire.

5. Ovengi ndino ve vara vi ovakongorere va Jesus?

⁵ Hapo ovandu ve raisa ongaro otjingeyo ndino? Ii. Ovanane ovengi vozongamburiro ve kara nohange okuyakura ovandu ovatjiukwa mozombongo zawo, ovatumbe na imba mbe varwa otjozonongo mouye. Owo ve yakura ovandu otja imbo okurira ouṋepo wokereka yawo, nandarire kutja ve tjita oviṋa Mukuru mbya tonda. Ovanane vozongamburiro mbo, ve nyengwa ovakarere va Jehova mena rokutja ovandu ovengi mouye ve ve vara otjovandu vonḓengu yokehi nandarire kutja owo ve ritjinda oukohoke. Kunao Paulus wa tja, Mukuru wa toorora imba mbe “ha varwa” kouye. (1 Kor. 1:26-29) Posi yokutja ku Jehova ovakarere ve avehe ovaṱakame ovananḓengu ku ye.

6. Jesus wa tja tjike mu Mateus 11:25, 26, nu matu yenene vi okuhorera ku ye?

⁶ Ovikwaye mbi mavi tu vatere kutja atu ha u mongamburiro? (Lesa Mateus 11:25, 26.) O yandjere oumune ovandu mouye mbu ve nawo ohunga novakarere va Mukuru okukuṱuna. Tjiwa kutja Jehova u ungurisa ovandu overisusuparise okutjita ombango ye. (Eps. 138:6) Nu ripura ohunga noviṋa avihe Jehova mbya yenenisa mokuungurisa imba mbe ha varwa otjozonongo poo ovanazondunge mouye mbwi.

7. Ongwaye Jesus tja tja Ovafarisei ovanatjavivi, nowo va raisa ongaro iṋe?

⁷ Jesus wa raisa otjavivi tjovanane vozongamburiro nouvanḓe, mena rokutja owo kaave hongo ovandu okurikotamena ku Jehova momuano omusemba. Otjotjihorera, eye wa raisa kutja Ovafarisei va ri notjavivi mena rokutja aave rikendere komuano wawo wokukoha omake, pendje nokurikendera komuano omusemba wokutjevera ovanene vawo. (Mat. 15:1-11) Ovahongewa va Jesus mape ya va temisirwe i yomambo Jesus nga hungira. Kunao owo ve mu pura kutja, “Ove hapo nai mo tjiwa kutja Ovafarisei va pindikisiwa i omambo woye are?” Jesus wa zira a tja: “Otjihape atjihe Tate meyuru tje ha kunine matji zukurwa. Amu rikende nOvafarisei! Owo ovanane ovapoṱu vovapoṱu; nomupoṱu tji ma nana omukwao korupangu, indino aveyevari mave wire motjitoto.” (Mat. 15:12-14) Nandarire kutja ovanane vozongamburiro va pindikire mena roviṋa Jesus mbya hungira, Jesus wa kayenda komurungu okuhungira ouatjiri.

8. Jesus wa raisa vi kutja Mukuru kayakura ozongamburiro azehe?

⁸ Jesus wina wa raisa kutja omahongero tjiva wozongamburiro ya ri posyo. Eye kena pa tja, Mukuru u yakura ozongamburiro azehe. Nungwari, eye wa hungira kutja ovandu ovengi mave toora ondjira ombaranga ndji twara kombandjarero, nokutja ovandu ovaṱiṱi uriri ombu mave toora ondjira omango ndji twara komuinyo. (Mat. 7:13, 14) Eye wa raisa oukahu kutja ovandu tjiva mave tja ve karera Mukuru, posi yokutja mouatjiri kave mu karere. Eye we ve rakiza kutja, “Ṱakamiseye ovaprofete ovanavineya; owo ve mu yendera mozombanda zozonḓu, nungwari tjandje owo, tjiri, ozombungu ozonyondorore. Eṋe mamu ve zemburukire kovitjitwa vyawo.”—Mat. 7:15-20.

9. Omahongero yeṋe tjiva Jesus nga raisa kutja ye ri posyo?

⁹ Hapo Omatjangwa ye tja vi? Omaprofetero wOmbeibela ya hunganeka kutja Messias ma kara nondengero kondjuwo ondjapuke ya Muhona. (Eps. 69:9; Joh. 2:14-17) Ondengero ndjo ya tjita kutja Jesus ma pirukire omahongero novitjitwa vyoposyo vyozongamburiro.  Otjotjihorera, Ovafarisei aave kambura kutja omuinyo u hupa komurungu, posi yokutja Jesus wa sasaneka omundu ngwa koka ku nomundu ngwa rara ozomboṱu. (Joh. 11:11) Ovasaduke kaave kambure kutja ku nombendukiro, posi yokutja Jesus wa pendura epanga re Lasarus. (Joh. 11:43, 44; Oviung. 23:8) Ovafarisei aave kambura kutja pe nomasa omahamunika nge tya oviṋa mbi mavi tjitwa komundu poo Mukuru ongu tya oviṋa avihe mbi tjitwa komundu. Posi yokutja, Jesus wa honga kutja omundu auhe u nouyara wokutoorora kutja ma karere Mukuru poo indee.—Mat. 11:28.

10. Ongwaye ovandu ovengi tji ve tu pirukira mena romahongero wetu?

¹⁰ Hapo ovandu ve raisa ongaro otjingeyo ndino? Ii. Ovengi ve tu pirukira mena rokutja omahongero wetu nga zikamena kOmbeibela ye raisa kutja omahongero tjiva wozongamburiro ye ri posyo. Ovanane vozongamburiro ve honga ovakongorere vawo kutja Mukuru u nyosa ovandu mbe tjita oviṋa ovivi motjovasengwa. Owo ve ungurisa omahongero woposyo ngo kutja ve kare nouvara kombanda yovandu. Imba mbe karera Jehova Mukuru worusuvero ve vatera ovandu okutjiwa kutja omahongero ngo ye ri posyo. Ovanane vozongamburiro wina ve honga kutja omuinyo womundu u kayenda komurungu okuhupa. Eṱe tu raisa kutja omahongero ngo kaye zikamene kOmbeibela mena rokutja andakuzu oyo ouatjiri, ovaṱi katjave hepa ombendukiro. Nu nandarire kutja ozongamburiro ozengi ze honga kutja oviṋa avihe mbi tu tjita vya tyewa rukuru i Mukuru poo i yomasa omahamunika, eṱe tu honga kutja omundu auhe u nouyara wokutoorora kutja ma karere Mukuru poo indee. Ovanane vozongamburiro ve ritjinda vi indu tji twa raisa kutja omahongero wawo ye ri posyo? Owo potuingi ve pindika.

11. Otja komambo wa Jesus nge ri mu Johanes 8:45-47, Mukuru u undjira ko tjike kovakarere ve?

¹¹ Ovikwaye mbi mavi tu vatere kutja atu ha u mongamburiro? Indu tji twa suvera ouatjiri, eṱe matu sokukambura nokukara nonḓuviro ku imbi Mukuru mbi metu raere. (Lesa Johanes 8:45-47.) Eṱe katu sokupirukira ouatjiri tjimuna Satan Omudiaboli. Nu kamaatu tjiti otjiṋa tji matji pirukire ongamburiro yetu. (Joh. 8:44) Mukuru u undjira ko kutja ovakarere ve ve  ‘tonde ouvi’ nu ve ‘kakatere kouwa’ tjimuna Jesus tja tjita.—Rom. 12:9; Hebr. 1:9.

12. Omena ratjike omuano Jesus ma ṱa tji wa tjita kutja Ovajuda ovengi ve mu pirukire?

¹² Epu riṋe rarwe nda tjita kutja Ovajuda tjiva ve pirukire Jesus? Paulus wa tja: “Eṱe tu zuvarisa Kristus ngwa paperwa komuti, tji tja ri ombutarisire kOvajuda.” (1 Kor. 1:23, NW) Ongwaye Ovajuda ovengi tji va pirukira Jesus mena romuano ma ṱa? Owo kave kamburire kutja Jesus ongu ri Messias, nungwari ve mu vara otjomukatuke woveta nomunauvi mena romuano Jesus ma zepewa.—Deut. 21:22, 23.

13. Otjikeṋa imba mba nakaura Jesus tji ve ha munine?

¹³ Ovajuda na imba mba nakaura Jesus kaave kambura kutja Jesus ke nondjo, nu wa kumininwa otjiṋa tje ha tjitire nokutja wa tjindwa navi. Imba mba pangura Jesus pombanguriro ye, kave mu pangurire osemba. Ovapangure votjira tjOvajuda va worongana tjimanga okupangura Jesus nowo kave mu pangurire otja koveta. (Luk. 22:54; Joh. 18:24) Indu ovapangure tji va zuva omarondora woposyo nomahongonona wovizeze ohunga na Jesus, owo oveni wina va paha “omuhingo woposyo wokurondora na wo Jesus kutja a rire pu ve Mu zepere.” Indu tji ve ha toṋene, omupristeri otjiuru wa kondja kutja Jesus ma hungire omambo woposyo arire pu ve mu mwine ondjo. Nu iho katja ri otjiṋa otjiyakurwa, nungwari tja ri pendje noveta. (Mat. 26:59; Mar. 14:55-64) Kombunda yombendukiro ya Jesus, ovapangure ovahasemba mbo va suta ovarwe vovita va Roma mbaave tjevere eyendo ra Jesus, mokuvepa “ovimariva ovingi tjinene” kokutja ve kore ovizeze ohunga nokutja ongwaye eyendo tji ra ri tjo.—Mat. 28:11-15.

14. Omatjangwa ya hunganeka tjike ohunga nonḓiro ya Messias?

¹⁴ Hapo Omatjangwa ye tja vi? Nandarire kutja Ovajuda ovengi moruveze rwa Jesus kaave undjire ko Messias okuṱa, tara ku imbi Ombeibela mbi ya hunganeka. Oyo ya tja: “Eye we riyandjera omuinyo we, nu wa varwa puna ovarunde. Eye wa hihamisirwa ovarunde, nu wa kumba kutja ve isirwe.” (Jes. 53:12) Kunao, Ovajuda kaave sokuputarisiwa i yomuano Jesus ma zepewa otjomunauvi.

15. Ovikeṋa Ovahongonone va Jehova mbi ve kumininwa nu mbi tjita kutja ovandu tjiva ve tu pirukire?

 ¹⁵ Hapo ovandu ve raisa ongaro otjingeyo ndino? Ii. Jesus wa kumininwa na varwa otjomunandjo, nu ndino ovandu ve tjita oviṋa tjimuna mbyo kOvahongonone va Jehova. Tara kovihorera mbi. Okuza kombura ndji 1930 nga 1940 moUnited States mwa kara oviposa ovingi motjombanguriro, mena rouyara wetu wokurikotamena ku Jehova. Ovapangure tjiva aave raisa oukahu kutja va tonda ovakarere va Jehova. Motjihuro hi Quebec tja Canada, okereka ndji Okatolika aai ungura kumwe nohoromende okutjaera oviungura vyetu. Ovazuvarise ovengi va paterwa monḓorongo mena rokuzuvarisa ohunga nOuhona wa Mukuru. Ohoromende yoNazi moGermany, ya zepa ovarumendu ovakambure omitanda ovengi. Ndino, ovakambure ovakwetu ovengi moRussia ve munikwa ondjo nu ve paterwa motjovakamburwa mena rokuhungira ohunga nOmbeibela ku novandu. Nu ohoromende i vara ovitjitwa vyongamburiro yetu “otjoviṋa ovizeu okuyakura.” Nandarire Ombeibela ndji o-New World Translation of the Holy Scriptures mOtjirussian kai yakurwa nu i varwa otjembo “rongamburiro ndji ha yakurwa” mena rokutja mu nena ndi Jehova.

16. Otja ku 1 Johanes 4:1, ongwaye tji tu ha sokupukisiwa i omahungi wovizeze ohunga novakarere va Jehova?

¹⁶ Ovikwaye mbi mavi tu vatere kutja atu ha u mongamburiro? Kondja okutjiwa ouatjiri. MOmazuvarisiro wOkondundu, Jesus wa rakiza ovemukongorere kutja ovandu tjiva mave mu ‘hungire ovizeze ngamwa avihe pu pe he ri po.’ (Mat. 5:11) Nu ovizeze avihe mbi vi za ku Satan. Eye u popa ovapirukire okuhandjaura ovizeze avihe mbyo ohunga na imba mba suvera ouatjiri. (Omavan. 12:9, 10) Eṱe katu sokukambura movizeze mbi handjaurwa i yovetupirukire. Atu yandjere ovizeze otja imbyo okututjaera okukarera Jehova poo okungundiparisa ongamburiro yetu.—Lesa 1 Johanes 4:1.

17. Omomuano uṋe ovitjitwa vyokomurungu wonḓiro ya Jesus, mu vya putarisa ovandu tjiva?

¹⁷ Ousupi komurungu wonḓiro ya Jesus, omuapostele umwe wa imba 12 we mu horora movineya. Omuapostele warwe we mu pataṋa povikando vitatu, nu ovaapostele avehe ve mwesa erike ongurova yokomurungu wonḓiro ye. (Mat. 26:14-16, 47, 56, 75) Nungwari, Jesus aa tjiwa mbi mavi tjitwa ku ye. Eye nandarire wa hunganeka oviṋa mbyo rukuru. (Joh. 6:64; 13:21, 26, 38; 16:32) Indu oviṋa mbyo tji vya tjitwa, tjiva mape ya aave munu kutja kamaave vanga okurira ovahongewa va Jesus. Owo mape ya aave ripura kutja, ‘Tjinangara ovaapostele va Jesus ve ritjinda momuano mbo, hi mee vanga okurira umwe wawo.’

18. Omaprofetero yeṋe nga yenenisiwa komurungu wonḓiro ya Jesus?

¹⁸ Hapo Omatjangwa ye tja vi? Ozombura ozengi ngunda Jesus e hi ye ya kombanda yehi, Jehova wa hunganeka mEmbo re kutja Messias ma hororwa kovisilveri 30. (Sak. 11:12, 13) Nu eye ma hororwa i yepanga re ropopezu. (Eps. 41:9) Omuprofete Sakarja wina wa tja: “Rwise omurise ngu Ndji ungurira! Mu zepa, nozonḓu maze pizuka.” (Sak. 13:7) Omayenenisiro womaprofetero ngo ohunga na Jesus, aaye sokutjita kutja ongamburiro ya imba vomitima omiwa i kurire ko, pendje nokuveputarisa.

19. Ovandu vomitima omiwa ve tjiwa tjike?

¹⁹ Hapo ovandu ve raisa ongaro otjingeyo ndino? Ii. Ndino Ovahongonone va Jehova tjiva va isa okurikotamena ku Jehova, nu ve kondja okupukisa varwe wina. Owo ve handjaura ovizeze ohunga nOvahongonone va Jehova, okupitira motjaitonga, oradio, otivii notungovi. Posi yokutja imba wovimitma omiwa kave pukisiwa i yoviṋa mbyo. Nungwari, owo ve tjiwa kutja Ombeibela ya hunganeka kutja oviṋa otja imbyo mavi tjitwa.—Mat. 24:24; 2 Petr. 2:18-22.   

20. Ovikwaye mbi matu yenene okutjita kutja atu ha pukisiwa i imba mba isa okurikotamena ku Jehova? (2 Timoteus 4:4, 5)

 ²⁰ Ovikwaye mbi mavi tu vatere kutja atu ha u mongamburiro? Eṱe matu hepa okutjita kutja ongamburiro yetu i kare nomasa mokukonḓonona Ombeibela aruhe, okukumba nokuhaisa ko nokukayenda komurungu okuungura otjiungura Jehova tje tu pa. (Lesa 2 Timoteus 4:4, 5.) Indu tji tu nongamburiro, eṱe kamaatu rikende indu tji twa zuu ozombuze ozombi ohunga nOvahongonone va Jehova. (Jes. 28:16) Orusuvero rwetu ku Jehova, kEmbo re na kovakambure ovakwetu maru tu vatere kutja atu ha pukisiwa i imba mba isa okurikotamena ku Jehova.

21. Tu nongamburiro mu ye nandarire kutja ovandu ovengi ndino ve pirukira ombuze yetu?

²¹ Indu Jesus tja ri kombanda yehi, ovengi va pirukira Jesus mena rokuputarisiwa i yoviṋa mbyaa hungire nokutjita. Nungwari, ovengi wina ve mu yakura. Umwe wawo wa ri okaṋepo kOtjira tjOvajuda na wina ‘otjimbumba otjingi tjovapristeri.’ (Oviung. 6:7; Mat. 27:57-60; Mar. 15:43) Momuano otjingewo, ovengi ndino ve kongorera Jesus. Omena raye? Mena rokutja owo ve tjiwa nu va suvera ouatjiri mbu ri mOmatjangwa. Embo ra Mukuru ri tja: “Imba mba suvera omatwako woye, ve muna omawameno omamanise; owo kamaave putara ko.”—Eps. 119:165.