1. Omukambo uṋe omunanḓengu ovandu avehe mbu mave hepa okutoora?

 OVANDU ndino ve nomukambo omunanḓengu mbu mave sokutoora. Hapo owo mave yandja oruvara ku Jehova Mukuru otja ngu nousemba wokuvehonaparera po, poo mave yandja oruvara komunavita na ye Satan Omudiaboli? Kape noruveze rwopokati, omundu auhe ma sokuritoororera omunda. Omukambo auhe mbu mave toora, ombu mau raisa kutja mave kamuna omuinyo waaruhe poo indee. (Mat. 25:31-33, 46) “Mondatumisire ondirise” owo mave katuwa otjihako tjokutja owo mave yamwa poo mave yandekwa.—Omavan. 7:14; 14:9-11; Esek. 9:4, 6.

2. (a) Ovaheberi 10:35-39 mari tu tunduuza okutjita tjike? (b) Embo rOmavandururiro mari yenene okutuvatera vi?

² Lesa Ovaheberi 10:35-39. Indu tji wa toorora okuyandja oruvara kouhonapare wa Jehova, ove tjiri wa toora omukambo omusemba. Mena ranao, ove u nonḓero yokuvatera varwe okutoora omukambo omusemba mbwo. Ove mo yenene okuungurisa ondjivisiro ndji ri membo rOmavandururiro okuvevatera. Embo ndo, ri vandurura imbi mbi mavi katjitwa ku imba mbe pirukira Jehova. Nu wina ri raisa omuano Jehova mu ma sere ondaya ku imba mbe yandja oruyameto kouhonapare we. Eṱe matu sokukonḓonona ouatjiri ounanḓengu mbwo. Indu tji twa tjiti nao, maku tu vatere okukara nonḓero yokukayenda komurungu okukarera Jehova. Nu wina eṱe matu yenene okuungurisa imbi mbi twe rihongo okuvatera varwe okutoora omukambo wokukarera Jehova nokupanḓera po.

3. Matu katara ku ye morupa ndwi?

³ Morupa ndwi matu katara komapuriro nga: Maku tjitwa tjike ku imba mbe yandja oruvara kouhonapare wa Mukuru? Maku katjitwa tjike ku imba mbe yandja oruvara kotjipuka otjiserandu tji tja tamunwa membo rOmavandururiro?

4. Otjimbumba tjiṋe omuapostele Johanes tja muna atja kurama pu na Jesus meyuru?

⁴ Motjirimunikise omuapostele Johanes wa muna ovimbumba vivari mbi mavi yandja oruvara kouhonapare wa Jehova, nu mbya pewa ozondaya zokukahupa nga aruhe. Motjimbumba otjitenga mu novandu 144 000. (Omavan. 7:4) Owo va toororwa okuza kombanda yehi okukarira orupa rwohoromende poo Ouhona, pu na Jesus meyuru. Owo mave kahonaparera ehi pu na Jesus. (Omavan. 5:9, 10; 14:3, 4) Motjirimunikise, Johanes we ve muna ava kurama pu na Jesus meyuru kOndundu Sion.—Omavan. 14:1.

5. Maku tjitwa tjike moruyaveze rwopopezu kovatwirisiwa mba mbe nomuinyo kombanda yehi?

⁵ Okuza koruveze rwovaapostele tji va ri nomuinyo nga ku nai, ovandu ovengi va toororwa okurira orupa rwaimba 144 000. (Luk. 12:32; Rom. 8:17) Posi yokutja Johanes wa raerwa kutja otjihupe tjawo uriri, poo ovandu ovaṱiṱi motjivaro mbu mave kara nomuinyo kombanda yehi momayuva omasenina. Imba ‘mba sewa po’ mave pewa ‘otjiyambo’ poo ondjambi yawo osenina okuza ku Jehova ngunda ondatumisire ondirise ai hi ya uta. (Omavan. 7:2, 3; 12:17) Nu moruveze rwondatumisire ondirise, otjihupe ho matji twarewa keyuru okukawana na imba 144 000, mba ṱa rukuru ave ri ovaṱakame. Ingo owo mave kahonapara pu na Jesus mOuhona wa Mukuru.—Mat. 24:31; Omavan. 5:9, 10.

6-7. (a) Otjimbumba tjiṋe Johanes tja muna, nu matu rihongo tjike ohunga na tjo? (b) Ongwaye Omavandururiro ekondwa 7 tji ri sokurira enanḓengu kotjihupe tjovatwirisiwa, na ‘kotjimbumba otjinene tjovandu’?

⁶ Tja zu nokumuna otjimbumba tjovandu mbu mave i keyuru, Johanes wa muna “otjimbumba otjinene tjovandu.” Otjimbumba ho katjiri tjimuna hi tjovandu 144 000. Otjo ko nokusora okuvara. (Omavan. 7:9, 10) Matu rihongo tjike ohunga na tjo? Johanes wa raerwa nai: “Owo ovandu mba mba zira mondatumisire ondirise. Owo va koha ozombanda zawo ozonde nave ze pembayerisa nombinḓu yOndjona.” (Omavan. 7:14) Indu tji tja tuurunga ondatumisire ondirise, “otjimbumba otjinene tjovandu” ho, matji hupu kombanda yehi natji yorokere ozondaya ozengi.—Eps. 37:9-11, 27-29; Omiano 2:21, 22; Omavan. 7:16, 17.

⁷ Kainatja kutja twa toororwa okukahupa meyuru poo kombanda yehi, hapo tu rimuna okukara norupa momambo nga tjangwa mOmavandururiro ekondwa 7? Ii, matu sokukara noumune mbo. Tjiri ma rire oruveze rwondjoroka kovimbumba aviyevari vyovakarere va Mukuru. Eṱe matu kara nondjoroka kutja twa toorora okuyandja oruvara kouhonapare wa Jehova. Ovikeṋa vyarwe embo rOmavandururiro mbi ri tu raera ohunga nondatumisire ondirise?—Mat. 24:21.

8. Ondatumisire ondirise mai utu vi, nu ovandu ovengi mave toora omukambo uṋe?

⁸ Otja tji pa tamunwa morupa ndwa kapita, ozohoromende zovandu maze wire Babilon otjinene moruyaveze rwopopezu, otjo tji tji kuramena po ozongamburiro azehe zoposyo mouye auhe. (Omavan. 17:16, 17) Otjitjitwa ho matji raisa omautiro wondatumisire ondirise. Hapo ihi matji tjiti kutja ovandu ovengi ovape ve tye okurikotamena ku Jehova? Kako. Omavandururiro ekondwa 6 ri raisa kutja moruveze oruzeu ndwo, imba mbe ha karere Jehova mave paha ondjeverero mozohoromende na mozongetjefa zouye mbwi, mbi sasanekwa otja ozondundu. Mena rokutja ovandu mbo kave nokuyandja oruvara  kOuhona wa Mukuru, Jehova me ve vara otja ovemupirukire.—Luk. 11:23; Omavan. 6:15-17.

9. Ovandu mave munu vi kutja ovakarere va Mukuru va panguka ku imba mbe ha karere Mukuru, nu maku tjitwa tjike kovakarere va Mukuru?

⁹ Ovakarere va Jehova ovaṱakame tjiri mave panguka moruveze oruzeu ndwo. Owo ombu mave rire otjimbumba atjiyerike kombanda yehi tji matji karere Jehova Mukuru, nokupanḓa okuyandja oruvara ‘kotjipuka.’ (Omavan. 13:14-17) Ouṱakame wawo ku Jehova mau pindikisa imba mbu mave pirukire Jehova. Mena ranao, otjimbumba tjoviwaṋa pekepeke matji wire ovakarere va Mukuru mouye auhe. Otjitjitwa hi mOmbeibela tja kahururwa otja omawiro wa Gog wa Magog.—Esek. 38:14-16.

10. Otja kOmavandururiro 19:19-21, Jehova ma raisa ongaro iṋe indu ovanavita tji mave wire ovakarere ve?

¹⁰ Jehova ma raisa ongaro iṋe kovanavita mbo? Eye wa tja: “Ami me pindike tjinene.” (Esek. 38:18, 21-23) Omavandururiro ekondwa 19 ri kahurura imbi mbi mavi kongorere ko. Oro ri tja Jehova ma hindi Omuna we okuyama ovakarere ve nokuyandeka ovanavita na wo. Jesus, ‘novimbumba vyovita vyeyuru,’ mbi ri ovaengeli ovaṱakame pu na imba 144 000, mave karwisa ovanavita mbo. (Omavan. 17:14; 19:11-15) Ovita mbyo mavi yanda vi? Ovandu avehe novimbumba mbi pirukira Jehova mave yandekwa oparukaze.—Lesa Omavandururiro 19:19-21.

11. Otjitjitwa tjiṋe otjinanḓengu tji tja tamunwa membo rOmavandururiro?

¹¹ Ripura uriri kutja imba ovaṱakame mbe ri kombanda yehi mave fula vi tji va tuurunga, indu ovanavita na Mukuru tji mave yandekwa oparukaze. Tjiri indo maru rire oruveze rwondjoroka. Nandarire kutja maku kara ondjoroka onene meyuru indu Babilon otjinene tji tja yandekwa, pe notjiṋa tjarwe tji matji eta ondjoroka wina. (Omavan. 19:1-3) Iho otjitjitwa tjondjoroka tji tja tamunwa membo rOmavandururiro, notjo “orukupo rwOndjona.”—Omavan. 19:6-9.

12. Otja kOmavandururiro 21:1, 2, orukupo rwOndjona maru utu ruṋe?

¹² Orukupo ndwo maru tjitwa ruṋe? Ovandu avehe mba 144 000 mave twarewa keyuru ngunda ovita vya Armagedon avi hi ya uta. Nungwari indo karuveze rwomukandi wondjona. (Lesa Omavandururiro 21:1, 2.) Orukupo rwOndjona maru utu kombunda yovita vya Armagedon, indu ovanavita na Mukuru avehe tji va yandekwa oparukaze.—Eps. 45:3, 4, 13-17.

13. Hapo orukupo rwOndjona maru hee tjike ku imba mbe norupa mu rwo?

¹³ Hapo orukupo rwOndjona maru hee tjike ku imba mbe norupa mu rwo? Tjimuna omurumendu nomukazendu tji ve kutwa kumwe morukupo, orukupo rwOndjona maru waneke Ombara Jesus Kristus ku na imba 144 000, mbe ri “omukupwa.” Otjitjitwa otjinanḓengu ho matji ziki ohoromende ombe ndji mai honaparere po ehi oure wozombura 1 000.—Omavan. 20:6.

14-15. Omavandururiro ekondwa 21 ri sasaneka ovandu mba 144 000 ku na iye? (Tara kotjiperendero tjokombanda yokambo nga.)

¹⁴ Omavandururiro ekondwa 21 mari sasaneke ovandu 144 000 ku na otjihuro otjiwa tji tji isanewa “Jerusalem otjipe.” (Omavan. 21:2, 9) Otjihuro hi tji nomazikameno 12 womawe ku kwa tjangwa “omana wovaapostele vOndjona omurongo na vevari.” Ongwaye otjiṋa ho tji tja nana ombango ya Johanes? Mena rokutja eye wa muna ena re ara tjangwa ku rimwe romawe ngo. Indjo tjiri ondjingonekero onene.—Omavan. 21:10-14; Ef. 2:20.

 ¹⁵ Otjihuro hi kamaatji sasanekwa novihuro vyarwe. Otjo tji nomivanda vyongoldo ongohoke, nomivero 12 mbya ungurirwe poundjendje, nu otumbo nomazikameno vya harekwa nomawe omawa, nu tja sanekwa nawa. (Omavan. 21:15-21) Nungwari Johanes wa muna kutja pe notjiṋa tjimwe tji tji he ri po. Eye wa tja: “Ami hi na pu mba muna Ondjuwo ondjapuke motjihuro, orondu Ondjuwo ondjapuke yatjo oyo oMuhona Ndjambi, Omunamasaaehe, na indji Ondjona. Notjihuro katji nokuhepa eyuva nomueze okuyera mu tjo, orondu ongeṋangeṋeno yaNdjambi ondji tji yerisa, nOndjona ondji ri emunine ratjo.” (Omavan. 21:22, 23) Imba mbe ri orupa rwa Jerusalem otjipe mave kakara pu na Jehova. (Hebr. 7:27; Omavan. 22:3, 4) Ku nao, Jehova na Jesus ombe ri Ondjuwo ondjapuke motjihuro ho.

16. Ovandu mave kamuna ye mOzombura Eyovi zOuhonapare wa Jesus kehi yOuhona wa Mukuru?

¹⁶ Tjiri ma rire ondjoroka kovatwirisiwa okuripurira kotjihuro hi. Nungwari imba mbe nomaundjiro wokukahupa kombanda yehi wina mave sokukara nonḓero mu tjo. Mozombura Eyovi zOuhonapare wa Jesus kehi yOuhona wa Mukuru, Jerusalem otjipe matji eta ozondaya ozengi kombanda yehi. Johanes wa muna ozondaya nḓo amaze randata otja “onḓonḓu yomeva womuinyo.” Kominda aviyevari vyonḓonḓu ku na “omiti vyomuinyo” mbi hapa oviyao mbi etisa “omberukiro koviwaṋa.” (Omavan. 22:1, 2) Ovandu avehe mbu mave kahupa moruveze ndwo, mave kayorokera ouwa mbwo. Nu ovandu avehe mbu mave kakara nonḓuviro ku Jehova mave karira ohomonena. Kape nokukakara omitjise, omihihamo, noruhoze rukwao.—Omavan. 21:3-5.

17. Otja Omavandururiro 20:11-13 tji maye raisa, oouṋe mbu mave kamuna ouwa mOzombura Eyovi zOuhonapare wa Jesus?

¹⁷ Oouṋe mbu mave kamuna ouwa mbwo? Rutenga, otjimbumba otjinene tji tja tuurunga ovita vya Armagedon, novanatje vawo mbu mape ya ave kakwatwa mouye oupe. Omavandururiro ekondwa 20 wina ri kwizika kutja ovaṱi mave kapendurwa. (Lesa Omavandururiro 20:11-13.) Imba “ovawa” mba panḓera pouṱakame nga konḓiro, na imba ‘ovavi’ mbe hi na va muna oruveze ndwa yenene okurihonga ohunga na Jehova indu tji va ri kombanda yehi, mave kapendurwa wina. (Oviung. 24:15; Joh. 5:28, 29) Hapo ihi matji  hee kutja ovandu avehe mave kapendurwa kutja ve kahupe kombanda yehi mOzombura Eyovi zOuhonapare wa Jesus? Kako. Imba mba pirukira ouyara wokukarera Jehova komurungu wonḓiro yawo, kave nokukapendurwa komuinyo. Owo va ri noruveze, nu va raisa kutja kave nonḓero yokukahupa moparadisa kombanda yehi.—Mat. 25:46; 2 Tes. 1:9; Omavan. 17:8; 20:15.

18. Ongaro kombanda yehi mai kakara vi komaandero wozombura nḓa 1 000?

¹⁸ Avehe mbu mave kahupa kombanda yehi mave karira ohomonena komaandero wozombura nḓa 1 000. Ovandu avehe mave kakuturwa kouvi mbu va rumata ku Adam. (Rom. 5:12) Osengiro ndja etwa i Adam, mai isapewa oparukaze. Momuano mbwo, imba mbu mave kahupa kombanda yehi, mave ‘kotora omuinyo’ mena rokutja mave rire ovandu ohomonena komaandero wozombura nḓa 1 000.—Omavan. 20:5.

19. Ongwaye omarorero omasenina tji ye ri omanahepero?

¹⁹ Matu tjiwa kutja Jesus wa kara omuṱakame ku Mukuru nandarire kutja wa rorwa i Satan. Hapo ovandu avehe ohomonena mave kakara nonḓuviro ku Jehova indu Satan tji ma kapewa ouyara okuverora? Omundu auhe ma yenene okukazira omuini epuriro ndo, indu Satan tji ma kakuturwa okuza morutjiva komaandero wozombura nḓa 1 000. (Omavan. 20:7) Imba mbu mave panḓere pouṱakame momarorero omasenina ngo, mave kamuna omuinyo waaruhe nu korusenina mave kayorokera onguturiro yatjiri. (Rom. 8:21) Imba mbu mave pirukire Jehova mave kayandekwa nga aruhe pu na Satan nozondemone ze.—Omavan. 20:8-10.

20. Mo fula vi ohunga nomaprofetero omawa nge ri membo rOmavandururiro?

²⁰ Ove mo fula vi kombunda yokukonḓonona embo rOmavandururiro? Hapo mo tjaterwa okutjiwa kutja u norupa momaprofetero nga? Hapo katji nokukuhinga okuṋanga varwe okurikuta ku na eṱe momerikotameneno omakohoke wa Mukuru wetu? (Omavan. 22:17) Otja tji twa hungirire koviṋa mbi mavi katjitwa moruyaveze, eṱe matu tjaterwa nu matu vanga okuhungira omambo womuapostele Johanes, indu tja tja: “Amen! Indjo, Muhona Jesus!”—Omavan. 22:20.