1-2. Ongwaye tji matu sokukara nonḓero membo rOmavandururiro?

 HAPO ove wa rora okutara membo roviperendero romundu warwe? Otja tji mo tara koviperendero, ove mo munu ovandu ovengi mbu u hi nokutjiwa. Nu otjiperendero tjimwe atji ku nana ombango. Omena raye? Mena rokutja ove u ri motjiperendero ho. Otja tji mo tara ku tjo, ove mo kondjo okuzemburuka kutja otjiperendero hi tja perenderwa pi nu ya ri ruṋe. Ove wina mo kondjo okuzemburuka omundu auhe ngu ri motjiperendero ho. Otjiperendero ho kove otjinanḓengu.

² Embo rOmavandururiro ri ri otja otjiperendero ho. Omena raye? Mena romapu yevari nga. Etenga, embo ndi ra tjangerwa eṱe. Mezeva etenga, oro ri tja nai: “Membo ndi mwa tjangwa ovitjitwa Jesus Kristus mbya vandurura. Ndjambi we Mu pa omavandururiro nga kutja a raise kovakarere ve imbi mbi mavi sokutjitwa tjimanga.” (Omavan. 1:1) Ku nao, embo ndi kari tjangererwe ovandu avehe, nungwari ra tjangerwa eṱe ovakarere va Mukuru mbu twe riyandja ku Ye. Otjovakarere va Mukuru, eṱe katu sokutemwa indu tji twa munu kutja tu norupa momayenenisiro womaprofetero nge ri membo enanambango ndo. Ku nao, indu tji matu lese embo rOmavandururiro eṱe tu lesa ohunga noviṋa mbi ṱuna ku eṱe. Momambo warwe, eṱe tu rimuna oveni “motjiperendero ho.”

3-4. Otja kembo rOmavandururiro, omaprofetero waro ya yenenisiwa ruṋe, nu iho matji sokuṱuna vi ku auhe wetu?

³ Epu oritjavari eṱe ndi matu sokukarera nonḓero momaprofetero wOmavandururiro, omena roruveze omaprofetero nga tji maye yenenisiwa. Omuapostele Johanes wa raisa oruveze indu  omaprofetero ngo tji maye yenenisiwa indu tja tja: “MEyuva raMuhona Ombepo ya honapara mu ami.” (Omavan. 1:10) Indu Johanes tja tjanga omambo nga mombura ape 96 O.Z., tjandje ‘Eyuva raMuhona’ ri ri kokure. (Mat. 25:14, 19; Luk. 19:12) Nungwari otja komaprofetero wOmbeibela, eyuva ndo ra uta mombura ndji 1914, indu Jesus tja zikwa otjombara meyuru. Okuza kombura ndjo, omaprofetero wembo rOmavandururiro nge notjiṋa novakarere va Mukuru otji ya uta okuyenenisiwa. Otjiperi kutja eṱe nai tu hupa “MEyuva raMuhona.”

⁴ Mena rokutja eṱe tu hupa moruveze rwapeke ndwi, eṱe matu hepa okuyandja ombango yapeke komarakiza worusuvero nga tjangwa mOmavandururiro 1:3, ngu maye tja: “Omuṋingandu ingwi ngu ma lese embo ndi, novaṋingandu imba mbu mave yakura omambo womaprofetero nga, nu mbu mave ṱakamisa imbi mbya tjangwa membo ndi! Orondu oruveze ru ri popezu oviṋa avihe mbi mu mavi tjitwa.” Otjiperi kutja eṱe matu hepa ‘okulesa nokuyakura omambo womaprofetero nga nokuyeṱakamisa.’ Omambo yeṋe tjiva ngu matu hepa okuṱakamisa?

5. Omomuano uṋe embo rOmavandururiro mu ri raisa ounanḓengu wokukara noupanga ouwa ku na Jehova?

⁵ Okuza kekondwa etenga rembo rOmavandururiro, matu rihongo kutja Jesus u tjiwa oviṋa avihe mbi kayenda mozombongo zovakarere ve. (Omavan. 1:12-16, 20; 2:1) Jesus wa raisa otjiṋa ho mozombuze nḓa hinda kozombongo hambombari nḓa ri moAsia. Mozombuze nḓo, Jesus wa yandja omuhunga wokutja Ovakriste veserewondo etenga ve vaterwe kutja omerikotameneno wawo ye yakurwe i Jehova. Nu imbi mbya hungirwa mozombuze nḓo, vi kamburira mo ovakarere va Mukuru ndino. Eṱe matu rihongere ko ye? Matu rihongo kutja Omuhongorere po wetu Kristus Jesus, u tjiwa kutja tu noupanga ouwa ku na Jehova poo indee. Eye u tu hongorera, u tu tjevera, nu u muna oviṋa avihe. Eye u tjiwa mbi matu hepa okutjita kokutja tu kayende komurungu okutjata ku Jehova. Hapo eye wa yandja omuhunga uṋe mbu matu hepa okukongorera ndino?

6. (a) Otja komambo wa Jesus nge ri mOmavandururiro 2:3, 4, ombongo yOvaefese ya ri nomauzeu yeṋe? (b) Eṱe matu rihongere ko tjike kotjiṋa hi?

⁶ Lesa Omavandururiro 2:3, 4. Eṱe katu sokupandjara orusuvero ndu twa ri na ro ku na Jehova rutenga. Ombuze ya Jesus ku imba mba ri mombongo ya Efesus aai raisa kutja owo aave raisa onḓaro orure, nokutja aave karere Jehova nandarire kutja aave munu omauzeu omengi. Nandarire kutja pa ri nao, owo va pandjara orusuvero ndu va ri na ro rutenga. Owo aave hepa okutunga orusuvero ndwo rukwao, mena rokutja tji ve ha tjitire nao, Jehova kamaa yakura omerikotameneno wawo. Ku eṱe ndino wina, okupanḓera po uriri kaku ya yenena. Posi ya matu sokukara nepu esemba ndi mari tu hingi okuraisa onḓaro orure. Mukuru kayandja ombango uriri ku imbi mbi matu tjiti, posi ya wina u tara kokutja ongwaye tji matu vi tjiti. Epu ndi matu tjitire otjiṋa enanḓengu ku ye. Orondu eye u vanga kutja tu mu karere mena rokutja tu nondangi ku ye, nu twe mu suvera tjinene.—Omiano 16:2; Mar. 12:29, 30.

7. (a) Otja kOmavandururiro 3:1-3, Ombongo ya Sardes ya ri nouzeu uṋe? (b) Eṱe matu hepa okutjita vi?

⁷ Lesa Omavandururiro 3:1-3. Eṱe matu sokukayenda komurungu okukara katumba. Ombongo ya Sardes ya ri nouzeu warwe. Nandarire kutja owo aave ungura ovingi okukarera Jehova morukapitaveze, owo va yaruka ombunda. Ku nao, Jesus we ve raera kutja ngave ‘kare katumba.’ Eṱe matu rihongere ko tjike kerakiza ndi? Otjiperi kutja  Jehova kamaa zembi oviungura vyetu. (Hebr. 6:10) Posi yokutja, eṱe kamaatu sokumuna kutja, mena rokutja twa ungurira Jehova tjinene morukapitaveze, eṱe nai katu nokuhepa okumuungurira. Nandarire kutja pe noviṋa ovingi mbi mavi yenene okututjaera, eṱe matu hepa okukondja ‘okuungurira Muhona nokuhaurwa,’ natu kara katumba nga komaandero.—1 Kor. 15:58; Mat. 24:13; Mar. 13:33.

8. Otja kOmavandururiro 3:15-17, eṱe matu rihongere ko ye komambo Jesus nga hungira kovakambure vombongo ya Laodisea?

⁸ Lesa Omavandururiro 3:15-17. Eṱe matu sokurira ovapyuke natu karere Jehova nomutima wetu auhe. Ombuze ya Jesus kombongo ya Laodisea ya raisa kutja owo va ri nouzeu mbwa panguka kozombongo inḓa ozarwe. Owo va ri “pokati koutarazu noupyu” momerikotameneno wawo. Mena rongaro yawo ndjo, Jesus we ve raera kutja owo va “ningisa ondjenda.” Owo aave hepa okurira ovapyuke tjinene momerikotameneno wawo ku Jehova. (Omavan. 3:19) Eṱe matu rihongere ko ye? Indu tji twa pandjara onḓero yokukarera Jehova, eṱe matu sokuripurira koviṋa avihe Jehova notjira tje mbi ve tu tjitira. (Omavan. 3:18) Eṱe katu sokuungura nomasa okukara noviṋa ovingi mehupo retu, momuano mbu mau tjiti kutja omerikotameneno wetu ku Jehova aye ha rire otjiṋa otjinanḓengu mehupo retu.

9. Otja tji pa raisiwa mombuze ya Jesus kOvakriste moPergamum na Tiatira, oumba waye mbu matu sokunakaura?

⁹ Eṱe matu sokunakaura omahongero wovapirukire. Jesus wa vyura tjiva moPergamum mbaave kunu ohaṋi mokati kovakambure ovakwao. (Omavan. 2:14-16) Eye wa tanga imba mba ri moTiatira, mena rokutja owo va nakaura “omaundikwa omakoto waSatan.” Nu we ve tunduuza kutja ve ‘ṱakamise nawa’ omahongero wouatjiri. (Omavan. 2:24-26) Ovakriste ovingundi mongamburiro mbe riyandjera okupukisiwa i yomahongero woposyo, aave hepa okuritanaura. Tjike ohunga na eṱe ndino? Eṱe matu sokunakaura omahongero ngamwa nge pirukira ouripura wa Jehova. Ovapirukire “kombanda ve munika aayo ovakambure,” nungwari ve nakaura “inga omasa wongamburiro.” (2 Tim. 3:5) Oupupu okumuna nokunakaura omahongero woposyo, indu tji tu ri ovakonḓonone ovawa vEmbo ra Mukuru.—2 Tim. 3:14-17; Judas 3, 4.

10. Ovikwaye vyarwe mbi matu rihongere koviṋa Jesus mbya hungira kozombongo za Pergamum na Tiatira?

¹⁰ Eṱe katu sokukara norupa nu katu sokuyakura  ozongaro ngamwa ozohakohoke. Ovakriste moPergamum na Tiatira va ri nouzeu warwe. Jesus wa vyura tjiva mozombongo nḓo mena rokuhinokunakaura ouhakohoke. (Omavan. 2:14, 20) Eṱe matu rihongere ko ye? Katu sokuundjira ko kutja Jehova ma yakura omeritjindiro wetu omavi, nandarire kutja twe mu karera ozombura ozengi, poo nandarire kutja nai tu nomerizirira omengi mombongo. (1 Sam. 15:22; 1 Petr. 2:16) Eye u undjira ko kutja tu riṱizire pomirari vye omisemba, nandarire kutja omeritjindiro waimba mbe ri mouye ye yenda amaye ririre ko omavi.—Ef. 6:11-13.

11. Ovikeṋa mbi twe rihongo morupa ndwi? (Wina tara kokawongo nga “ Oviṋa eṱe mbi matu rihongo ndino.”)

¹¹ Otjikeṋa tji twe rihongo morupa ndwi? Eṱe matu sokukondja kutja omerikotameneno wetu ye yakurwe i Jehova. Indu tji tu tjita otjiṋa tji matji tjiti kutja omerikotameneno wetu aye ha yakurwa i Jehova, eṱe matu hepa okutoorera ko omikambo vyatjimanga okurundurura ongaro yetu. (Omavan. 2:5, 16; 3:3, 16) Nungwari Jesus wa tamuna otjiṋa tjarwe mombuze ye ndja hinda kozombongo. Otjikeṋa?

12. Matu yenene okurihongera ko ye kozombuze Jesus nḓa hinda kOvakriste moSmirna na Filadelfia? (Omavandururiro 2:10)

¹² Nambano ngatu katare kozombuze Jesus nḓa hinda kozombongo moSmirna na Filadelfia. Eye wa raera Ovakriste kutja ave ha tira ondatumisire, mena rokutja Jehova me ve pe ondjambi indu tji va panḓere pouṱakame. (Lesa Omavandururiro 2:10; 3:10) Matu rihongere ko ye ndino? Eṱe matu sokuundjira ko ondatumisire, nu matu sokukara nonḓero yokupanḓera po. (Mat. 24:9, 13; 2 Kor. 12:10) Ongwaye omazemburukisiro ngo tji ye ri omananḓengu?

13-14. Ovakarere va Mukuru va ṱunwa vi i yovitjitwa mbya tamunwa mOmavandururiro ekondwa 12?

¹³ Embo rOmavandururiro ri tu raera kutja ovakarere va Mukuru mave tatumisiwa “mEyuva raMuhona,” ndu ri oruveze mu tu hupa nai. Omavandururiro ekondwa 12 ri tamuna ovita mbya tjitwa meyuru ousupi kombunda yaindu Jesus tja rira ombara yOuhona wa Mukuru. Mikael, ngu ri Jesus Kristus kombunda yokuyaruka keyuru, novaengeli ve, va rwisa Satan nozondemone ze. (Omavan. 12:7, 8) Ku nao, ovanavita na Mukuru mbo va taarwa, nave yumbwa kombanda yehi. Nowo ve eta omauzeu omengi kovandu avehe. (Omavan. 12:9, 12) Nungwari otjiṋa hi tji ṱuna vi kovakarere va Mukuru?

¹⁴ Omavandururiro ye tu raera ohunga nongaro Satan ndja raisa. Satan ka yandjererwe okukara meyuru rukwao. Ku nao, eye u rwisa ovakarere va Mukuru ovatwirisiwa mba sewa kombanda yehi. Owo ombe ri ovakuramene po vOuhona wa Mukuru, “mbe ṱakamisa omatwako waNdjambi nu mbe panḓera  pomahongononeno waJesus.” (Omavan. 12:17; 2 Kor. 5:20; Ef. 6:19, 20) Omaprofetero nga ya yenenisiwa vi?

15. Oouṋe mbaave kuramene po ‘ovahongonone vevari’ mba tamunwa mOmavandururiro ekondwa 11, nu kwa tjitwa tjike ku wo?

¹⁵ Satan wa tjita kutja ovanavita na Mukuru ve rwise ovatwirisiwa mbaave hongorere po otjiungura tjokuzuvarisa Ouhona wa Mukuru. Ovarumendu mbo aave kuramene po ‘ovahongonone vevari’ mba zepewa. * (Omavan. 11:3, 7-11) Mombura ndji 1918, ovarumendu hambondatu mbaave hongorere po otjira tja Jehova, va kumininwa, ave munika ondjo nu ave pewa omberero yokukara motjovakamburwa oure woruveze orure. Ovandu ovengi aave munu kutja oviungura vyovatwirisiwa mbo, vya yanda.

16. Otjikeṋa otjihimise tji tja tjitwa mombura ndji 1919, posi yokutja okuza koruveze ndwo, Satan wa kayenda komurungu okutjita ye?

¹⁶ Omaprofetero nge ri mOmavandururiro ekondwa 11, wina ya tamuna kutja ‘ovahongonone vevari’ mave kotorwa komuinyo kombunda yoruveze orusupi. Omaprofetero ngo ya yenenisiwa momuano omuhimise kombunda yombura ape imwe, ovarumendu ovakambure mbo tji va za nokutuwa motjovakamburwa. Mu Marta mombura ndji 1919 ovarumendu ovatwirisiwa mbo, va pitisiwa motjovakamburwa nu kombunda otjiposa tjawo tja nakaurwa. Ovarumendu ovakambure mbo va uta tjimanga okuhongorera po otjiungura tjokuzuvarisa nokuhonga rukwao. Posi yokutja iho katji tjaerere Satan okurwisa ovakarere va Mukuru. Okuza koruveze ndwo, Satan wa etisa “omupupo” wondatumisire kovakarere va Mukuru avehe. (Omavan. 12:15) Tjiri auhe wetu ma “hepa onḓaro orure nongamburiro.”—Omavan. 13:10.

17. Ombatero iṋe ovakarere va Mukuru ndji ve muna ngunda ave hi nokuundjira ko, nandarire kutja owo ve pirukirwa i Satan?

¹⁷ Omavandururiro ekondwa 12 wina ri raisa kutja ovakarere va Mukuru mave munu ombatero momiano mu ve hi nokuundjira ko. Embo rOmavandururiro ri kahurura kutja “ehi” mari ṋiṋa “omupupo” wondatumisire. (Omavan. 12:16) Iho tjiri otji tja tjitwa. Povikando tjiva, otupa twouye wa Satan tjimuna ovyombanguriro tjiva, vya yenena okuvatera ovakarere va Mukuru. Povikando ovingi ovakarere va Jehova  va taara oviposa motjombanguriro, mbye ve yandjera okukara nouyara wokukarera Jehova. Ouyara mbwi owo ve u ungurisa momuano uṋe? Owo ve ungurisa oruveze rwawo nawa motjiungura Jehova tje ve pa. (1 Kor. 16:9) Otjiungura ho tji kamburira mo ye?

18. Otjiungura tjiṋe otjinanḓengu tji tu sokuungura momayuva omasenina nga?

¹⁸ Jesus wa hunganeka kutja ovakarere ve mave zuvarisa “Ombuze Ombwa yOuhona” mouparanga wouye auhe ngunda omaandero aye hi ye ya. (Mat. 24:14) Indu owo tji mave zuvarisa, owo ve muna ombatero okuza komuengeli poo kotjimbumba tjovaengeli mba hungirwa mOmavandururiro, kutja owo ve “nombuze ombwa yaaruhe okuzuvarisa kovature avehe vokombanda yehi, kovanavisenginina avehe na komihoko avihe na komaraka aehe na koviwaṋa avihe.”—Omavan. 14:6.

19. Ombuze iṋe yarwe ndji mai sokuzuvarisiwa i imba mba suvera Jehova?

¹⁹ Ombuze ombwa yOuhona wa Mukuru, kambuze aiyerike ovakarere va Mukuru ndji va sokuzuvarisa. Owo wina mave sokuyandja oruvara koviungura vyovaengeli mba tamunwa mOmavandururiro ekondwa 8 nga 10. Ovaengeli mba ve tjivisa oviwonga mbi mavi wire imba mbe nakaura Ouhona wa Mukuru. Ku nao, Ovahongonone va Jehova ve zuvarisa ombuze ndji sasanekwa ‘nozombawe zombura nomuriro,’ ndji tjiukisa ozombanguriro nḓu maze ya kotupa pekepeke twouye wa Satan. (Omavan. 8:7, 13) Ovandu ve hepa okutjiwa kutja omaandero wouye mbwi ye ri popezu kutja ve yenene okurundurura omiinyo vyawo, nu ve yenene okutuurunga eyuva romazenge wa Jehova. (Sef. 2:2, 3) Posi yokutja ovengi kave vanga okuyakura ombuze ndji. Ku nao, eṱe tu hepa ouvanḓe okuzuvarisa ombuze ndji. Moruveze rwozombamisiro ozonene, ombuze yombanguriro ndji matu zuvarisa mai pindikisa ovandu tjinene.—Omavan. 16:21.

20. Eṱe matu kahungirira ku ye motupa tuvari tu matu kongorere ko?

²⁰ Eṱe tjiri tu hepa okukara nonḓuviro ‘komambo womaprofetero nga,’ mena rokutja eṱe tu norupa momayenenisiro waimbi mbya tjangwa membo rOmavandururiro. (Omavan. 1:3) Posi yokutja, hapo matu yenene vi okutuurunga ondatumisire nouṱakame, nokukayenda komurungu okuzuvarisa ombuze ndji nouvanḓe? Eṱe matu yanḓiparisiwa i yoviṋa vivari mbi. Otjitenga, oviṋa embo rOmavandururiro mbi ri raisa ohunga novanavita na Mukuru. Otjitjavari, ozondaya nḓu matu kamuna moruyaveze indu tji twa raisa ouṱakame. Eṱe matu kahungirira komapu ngo motupa tuvari tu matu kongorere ko.