1. Hapo Jehova u ṋanga ovakarere ve kutja ve tjite vi? (Wina tara kotjiperendero.)

 INDU tji matu vanga omahuhumiṋino nomuhunga matu sokupaha pi? Eṱe matu tjiwa eziriro kepuriro ndo. Eṱe matu yenene okutumbuka ku Jehova okupitira mongumbiro. Jehova u tu ṋanga kutja tu tjite nao. Ombeibela i tu raera kutja ngatu “kumbe nokuhaisa ko,” ku nao eṱe tu tjiwa kutja eye u vanga kutja tu kumbe aruhe. (1 Tes. 5:17) Eṱe matu yenene okukumba ku ye noupaturuke nokumuningira omuhunga mozongaro azehe mehupo retu. (Omiano 3:5, 6) Mena rokutja Jehova Omukuru wouharupu, eye u tu raera kutja matu yenene okukumba ku ye povikando ovingi otja pu matu vanga.

2. Matu katara ku ye morupa ndwi?

² Eṱe tu nondangi ku Jehova mena rokutja eye u tu yandjera kutja tu kumbe ku ye. Posi ya mena rokutja tu noviṋa ovingi okuungura, mape ya ai rire ouzeu kweṱe okumuna oruveze okukumba. Eṱe mape ya atu hepa okupwisa ounanḓengu wozongumbiro zetu. Tu nondangi kutja tu yenena okumuna omatunduuziro nomuhunga okuza mOmatjangwa. Morupa ndwi, matu katara kutja matu rihongo ye okuza ku Jesus ohunga nomuano mu matu yenene okutwa po oruveze okukumba. Nu wina matu kahungirira komuano mu matu yenene okupwisa ozongumbiro zetu mokutara komapu yetano omananḓengu.

3. Hapo ovikeṋa Jesus mbye rihonga ohunga nongumbiro?

³ Jesus aa tjiwa nawa kutja ozongumbiro zetu ozonanḓengu tjinene ku Jehova. Ngunda ehi ye ya kombanda yehi, eye aa munu Ihe ama ziri ozongumbiro zovarumendu novakazendu ovaṱakame. Otjotjihorera, Jesus wa ri meṋe ya Ihe indu Jehova tja zira ozongumbiro za Hana, David na Elia novakarere ve varwe ovengi ovaṱakame. (1 Sam. 1:10, 11, 20; 1 Ozomb. 19:4-6; Eps. 32:5) Mena ranao Jesus wa honga ovahongewa ve okukumba aruhe nongamburiro.—Mat. 7:7-11.

4. Matu rihongo ye okuza kozongumbiro za Jesus?

⁴ Okupitira mozongumbiro ze omuini ku Jehova, Jesus wa twa po otjihorera kovahongewa ve okukongorera. Motjiungura tje tjokuzuvarisa, Jesus aa kumbu aruhe. Eye aa hepa okutwapo oruveze okukumba mena rokutja wa ri noviungura ovingi, nu aa kara pu novandu ovengi. (Mar. 6:31, 45, 46) Eye aa penduka rukuru omuhuka omunene kokutja ma kare noruveze okukumba erike. (Mar. 1:35) Otjikando tjimwe, Jesus wa kumba ongurova aihe ngunda e hi ya toora omukambo omunanḓengu. (Luk. 6:12, 13) Jesus aa kumbu tjinene ongurova peye ma ṱe otja tja yandja ombango okuyenenisa otjiungura otjizeu kombanda yehi.—Mat. 26:39, 42, 44.

5. Matu horere vi ku Jesus indu tji matu kumbu?

⁵ Otjihorera tja Jesus tji tu honga kutja nandarire kutja tu noviungura ovingi pu pe ṱeki pi, tu sokutwa po oruveze okukumba. Tjimuna Jesus, eṱe matu sokutwapo oruveze rwokukumba. Matu yenene okupenduka rukuru omuhuka omunene poo okutwapo oruveze ongurova okukumba. Tji twa tjiti nao, matu raisa ondangi ku Jehova kotjiyandjewa tjapeke hi. Omukazendu omukambure wena Lynne u zemburuka otjikando otjitenga indu tje rihonga ohunga nounanḓengu wongumbiro. Eye wa tja: “Indu tji mba tjiwa kutja me yenene okuhungira ku na Jehova oruveze aruhe, kwe ndji vatera okumuna kutja Jehova Epanga randje ropopezu nokutja me yenene okupwisa ozongumbiro zandje.” Otjiperi kutja eṱe atuhe tu noumune mbwo. Nambano ngatu katare komapu yetano omanḓengu ngu matu yenene okutamuna mozongumbiro zetu.

6. Otja kOmavandururiro 4:10, 11, ovikwaye Jehova mbya pwa okumuna?

⁶ Tanga Jehova. Motjirimunikise, omuapostele Johanes wa muna ovanene 24 meyuru amave rikotamene ku Jehova. Owo va tanga Mukuru na ve tja eye wa pwa okumuna “ondjozikiro nondengero nomasa.” (Lesa Omavandururiro 4:10, 11.) Ovaengeli ovaṱakame ve nomapu omengi okutanga Jehova. Owo ve ri meyuru pu na ye nu ve mu tjiwa nawa. Owo ve muna ovikaṋena vye moviṋa eye mbye tjita. Indu tji mave munu omuano Jehova me tjita oviṋa, iho tji ve hinga kutja ve mu tange.—Job 38:4-7.

7. Omena raye tji matu sokutanga Jehova?

⁷ Eṱe wina matu sokutanga Jehova mozongumbiro zetu. Matu yenene okutjita nao, mokumuraera kutja ovikwaye mbi twa suvera ohunga na ye nokutja ongwaye tji tu mu pa ondengero. Otja tji mo lese nokukonḓonona Ombeibela, kondja okutara kovikaṋena vya Jehova mbi ku tjatera tjinene. (Job 37:23; Rom. 11:33) Okuzambo raera Jehova kutja u noumune uṋe ohunga novikaṋena mbyo. Eṱe wina matu yenene okutanga Jehova, mena rokutja eye u tu vatera nu u vatera ovakambure ovakwetu. Eye aruhe u rikendera kweṱe nokututjevera.—1 Sam. 1:27; 2:1, 2.

8. Omapu yeṋe tjiva ngu matu tjere ndangi ku Jehova? (1 Ovatesalonika 5:18)

⁸ Kara nondangi ku Jehova. Eṱe tu nomapu omengi wokutja ndangi ku Jehova mongumbiro. (Lesa 1 Ovatesalonika 5:18.) Eṱe matu yenene okutja ndangi ku ye koviṋa avihe oviwa mbi tu na vyo, mena rokutja otjiyandjewa atjihe otjiwa tji za ku ye. (Jak. 1:17) Otjotjihorera, matu yenene okutja ndangi ku Jehova kehi ewa nda mema noviṋa oviwa mbi ri mu ro. Eṱe wina matu yenene okuraisa ondangi kehupo retu, keṱunḓu retu, komapanga wetu, nomaundjiro wetu. Nu matu vanga okuraisa ondangi ku Jehova mokutuyandjera okuyorokera oupanga ouwa ku na ye.

9. Ongwaye tji matu hepa okukurisa ondangi yetu mu Jehova?

⁹ Eṱe matu hepa okutjita ongondjero yapeke okuripura ohunga nomapu ku matu tjere ndangi ku Jehova. Ovandu ovengi ndino kave nondangi. Ovandu potuingi ve ripurira koviṋa mbi mave ve vanga pendje nokuraisa ondangi yawo koviṋa mbi ve na vyo. Indu tji twa horere kongaro ndjo, ozongumbiro zetu maze kara noviṋa mbi matu vanga uriri. Okutjita kutja iho atji ha tjitwa, matu hepa okukayenda komurungu okukurisa nokuraisa ondangi koviṋa avihe Jehova mbye tu tjitira.—Luk. 6:45.

10. Omomuano uṋe okuraisa ondangi mu kwa vatera omukazendu omukambure okutjinda ouzeu? (Wina tara kotjiperendero.)

¹⁰ Ongaro yokuraisa ondangi mai yenene okutuvatera okutuurunga omauzeu. Tara kotjihorera tjomukazendu omukambure wena  Kyung-sook, tji tji ri mokambo kOruhungu 15 ku Januari, 2015. Eye wa munikwa omutjise wokangera komapunga. Eye wa tja: “Ouzeu wouvere mbwi we ndji wisa momuinyo tjinene. Ami mba muna kutja mba pandjara oviṋa avihe nu ee tira tjinene.” Otjikeṋa tji tje mu vatera okutjinda ouvere mbwo? Eye wa tja, ongurova aihe ngunda e hi ya rara, ai ketuwo rokombanda mondjuwo ye na kumbu ohunga noviṋa vitano mbya ri nondangi na vyo meyuva ndo. Iho tja tjita kutja a ha kara nomerikendero nu tje mu hinga kutja ma raise orusuvero rwe ku Jehova. Eye wa muna omuano Jehova me vatera ovakarere ve ovaṱakame indu tji mave munu omauzeu, nu eye wa muna kutja pe noviṋa ovingi oviwa mehupo retu kombanda yomauzeu. Tjimuna Kyung-sook, eṱe tu nomapu omengi ngu matu raisa ondangi ku Jehova nandarire indu tji tu ri momauzeu. Okuraisa ondangi yetu ku ye mongumbiro, maku tu vatere okutuurunga nokukara nondjoroka.

11. Ongwaye ovahongewa va Jesus tjaave hepa ouvanḓe indu Jesus tja yaruka keyuru?

¹¹ Ningira Jehova me ku pe ouvanḓe motjiungura tjokuzuvarisa. Ngunda e hi ya yaruka keyuru, Jesus wa zemburukisa ovahongewa ve ohunga notjiungura tjokutja ve mu hongonone “moJerusalem na mehi arihe raJudea noraSamaria nga komaandero wehi.” (Oviung. 1:8; Luk. 24:46-48) Kombunda yanao, ovanane vOvajuda va kambura ovaapostele Petrus na Johanes nu ave ve eta komurungu wOtjira tjOvajuda. Owo va rakiza ovarumendu ovaṱakame mba okuisa okuzuvarisa nu nandarire ve ve ṋiṋikiza. (Oviung. 4:18, 21) Hapo Petrus na Johanes va raisa ongaro iṋe?

12. Otja kOviungura 4:29, 31, hapo ovahongewa va tjita tjike?

¹² Petrus na Johanes va zira ovanane vozongamburiro zOvajuda mbaave ve ṋiṋikiza ave tja: “Ripureye nawa kutja osemba komurungu waNdjambi okwo ngwi okuzuva ku eṋe poo okwo ngwi okuzuva ku Ndjambi? Tareye, eṱe kamaatu sora okuhinakuhungira imbi mbi twa muna na imbi mbi twa zuva oveni.” (Oviung. 4:19, 20) Indu Petrus na Johanes tji va isiwa, ovahongewa va kumba ku Jehova ohunga nokutjita ombango ye. Owo va kumba ave tja: “Nu u yandje ku eṱe, ovakarere voye, okuhungira omambo woye nouvanḓe auhe.” Jehova wa zira ongumbiro yawo ndjo.—Lesa Oviungura 4:29, 31.

13. Matu rihongere ko ye kotjihorera tja Jin-hyuk?

¹³ Eṱe matu yenene okuhorera kovahongewa mokukayenda komurungu okuzuvarisa nandarire indu ohoromende tji ye tu tjaere. Ngatu tare kotjihorera tjomurumendu omukambure wena Jin-hyuk, ngwa paterwa monḓorongo mena rokutja kaa toorora omunda. Monḓorongo, eye wa perwe otjiungura tjokutjevera ovakwao mba ṱizirwe koutuwo wapeke ku wo oveni. Posi ya kaa yandjerwa okuhungira ku na wo ohunga nOmbeibela, nungwari eye aa yandjerwa okuhungira ku na wo ohunga noviṋa mbi mave hepa. Eye wa kumba kutja ma kare nouvanḓe nu ma zuvarise nongengezero okaruveze akehe ka munu. (Oviung. 5:29) Eye wa tja: “Jehova wa zuvira ozongumbiro zandje mokundjipa ouvanḓe nounongo okutjita omakonḓononeno wOmbeibela wozominute ndano pu novahongwa ovengi pomuvero wawo womara. Okuzambo ongurova ee tjanga otutuu okukayandja ku varwe eyuva ndi mari kongorere ko.” Eṱe wina matu yenene okukara nongamburiro kutja Jehova me tu vatere okuyenenisa otjiungura tjetu tjokuzuvarisa. Tjimuna Jin-hyuk, eṱe matu yenene okukumbira okukara nouvanḓe nounongo.

14. Ovikwaye mbi mavi yenene okutuvatera indu tji tu nomauzeu? (Eps. 37:3, 5)

 ¹⁴ Ningira Jehova okukuvatera okutuurunga omauzeu. Otjingi tjetu tu kondja nomauzeu mena romitjise poo ouzeu momuinyo, tjimuna okuzepaisa omusuverwa woye, ouzeu meṱunḓu, ondatumisire poo omauzeu warwe. Nu omitjise mbi handjauka mouye novita vi tjita kutja i rire ouzeu okutjinda ongaro ndjo. Raera Jehova ongaro mu u ri otja tjo tjo raera epanga roye ropopezu. Kara nongamburiro kutja Jehova “me ku vatere.”—Lesa Epsalme 37:3, 5.

15. Hapo ongumbiro i tu vatera vi ‘okukara nomuretima’ indu tji tu ri momauzeu? Yandja otjihorera.

¹⁵ Okupanḓera pongumbiro maku tu vatere ‘okukara nomuretima’ indu tji tu ri momauzeu. (Rom. 12:12) Jehova u tjiwa ongaro yovakarere ve ndji ve tuurunga “nu u zuva ondjuriro yawo.” (Eps. 145:18, 19) Omukazendu omukambure omukandjira wena Kristie wozombura 29 wa muna kutja imbo ouatjiri. Eye wa uta okuvera. Ku nao, wa ri nombameno tjinene. Eye kombunda wa katjiwa kutja mama we wa ri nomutjise omuzeu mbu mape ya au mu zepa. Kristie wa tja: “Ami ee kumbu tjinene ku Jehova okundjipa omasa ngu me hepa eyuva arihe. Nu ee kondjo okuyenda kozombongarero zombongo nokutjita omakonḓononeno wandje omuini wOmbeibela.” Wina wa tja: “Ongumbiro ye ndji vatera okutuurunga moruveze rwouzeu. Ami ee tjiwa kutja Jehova aruhe u ri mbo okundjivatera, nu okuripura nao aaku ndji vatere kutja mbi porimane. Nandarire kutja omauzeu wandje ka ye yandere tjimanga, Jehova wa zuvira ozongumbiro zandje mokundjipa ohange momuinyo nokutja mbi porimane.” Eṱe atu zembi kutja ‘Muhona u tjiwa kutja imba mbe nondira ku Ye me ve yama vi momarorero wawo.’—2 Petr. 2:9

16. Ongwaye tji tu hepa ombatero ya Jehova okurwisa omarorero?

¹⁶ Ningira ombatero ya Jehova okurwisa omarorero. Mena rokutja kaweṱe ohomonena,  eṱe aruhe tu hepa okurwisa omarorero wokutjita imbi mbi ri ovivi. Satan u tjita otjiṋa ngamwa atjihe kutja i rire ouzeu kweṱe okurwisa omarorero ngo. Omuano umwe me tjita nao, omokukondja okuzunḓa ouripura wetu mokutarera omanyando nge he ri omawa. Omanyando otja ingo maye tjiti kutja tu kare nomeripura omavi. Omeripura omavi maye tjiti kutja eṱe tu rire ovahakohoke momurungu wa Jehova nu ye tjita kutja tu tjite ouvi ounene.—Mar. 7:21-23; Jak. 1:14, 15.

17. Indu tji twa zu nokukumba okuningira ombatero, eṱe matu hepa okutjita vi? (Wina tara kotjiperendero.)

¹⁷ Eṱe matu hepa ombatero ya Jehova indu tji matu vanga okutuurunga omarorero wokutjita imbi mbi ri ovivi. Jesus wa tamuna otjiṋa ho mongumbiro ndji tjiukwa tjinene indu tja tja: “Nu o tu hitisa momarorero, nungwari kutura eṱe kouvi.” (Mat. 6:13) Jehova u vanga okutuvatera, posi ya eṱe matu sokuningira ombatero okuza ku ye. Indu tji twa zu nokuningira ombatero okuza mongumbiro, eṱe wina matu sokuyepa oviṋa mbi mavi tu twa mo momarorero. Eṱe matu sokukondja nomasa okuyepa okulesa nokupuratena koumune woposyo mbu tjiukwa mouye wa Satan. (Eps. 97:10) Eṱe matu yenene okuurisa omeripura wetu noviṋa oviwa mokulesa nokukonḓonona Ombeibela. Okuyenda kozombongarero zombongo nokukara norupa motjiungura tjokuzuvarisa ku tjevera omeripura wetu. Jehova we tu kwizikira kutja, ke nokututarera ama tu rorwa okukapita omasa wetu.—1 Kor. 10:12, 13.

18. Auhe wetu ma hepa okutjita vi indu tji pe ya kongumbiro?

¹⁸ Auhe wetu ma hepa okukumba tjinene kutja ma rire omuṱakame ku Jehova momayuva omazeu omasenina inga. Twa po oruveze eyuva arihe okukumba. Jehova u vanga kutja tu ‘Mu raere omaumba wetu aehe’ mongumbiro. (Eps. 62:8) Raisa ondangi nokutanga Jehova ku imbi avihe mbye tjita. Ningira kutja me ku vatere okukara nouvanḓe motjiungura tjokuzuvarisa. Riheka ku ye kutja me ku vatere okutuurunga omauzeu nokurwisa omarorero ngu mo munu. O yandjere otjiṋa poo omundu okukutjaera okukumba ku Jehova eyuva arihe. Hapo Jehova u zira ozongumbiro zetu momuano uṋe? Matu kazira epuriro enanḓengu ndo morupa ndu maru kongorere ko.