1. Ovikeṋa mbi twe rihonga pombongarero ndji tjitwa rumwe mombura yombura ndji 2023?

 POMBONGARERO ndji tjitwa rumwe mombura yombura ndji 2023, a twa muna omakahururiro omananyuṋe ohunga nongamburiro yetu nu twa zuva omatjivisiro ohunga notjiungura tjetu tjokuzuvarisa. Otjotjihorera, eṱe twe rihonga kutja ovandu tjiva mave kakara nouyara wokurikuta ku novakarere va Jehova nandarire kombunda yomanyoneno wa Babilon otjinene. Eṱe wina twa zuva kutja, okuza mu Novemba 2023, ovazuvarise vombuze yOuhona kave nokuhepa okutjivisa oviungura vyawo avihe mbi ve ungura motjiungura tjokuzuvarisa. Hapo omarundurukiro ngo maye tjiti kutja otjiungura tjetu tjokuzuvarisa atji ha rire otjinanḓengu? Kako, katjiperi.

2. Omena raye otjiungura tjetu tjokuzuvarisa tji tji ririra ko otjinanḓengu otja oruveze tji maru kayenda? (Markus 13:10)

² Otja oruveze tji maru kayenda, otjiungura tjokuzuvarisa tji ririra ko otjinanḓengu tjinene. Omena raye? Mena rokutja oruveze rwomaandero ru ri popezu. Tara ku imbi Jesus mbya hunganeka ohunga notjiungura tjokuzuvarisa momayuva omasenina. (Lesa Markus 13:10.) Otja kembo ra Mateus, Jesus wa tja ombuze ombwa mai zuvarisiwa kovandu avehe kombanda yehi ngunda ‘omaandero’ aye hi ye ya. (Mat. 24:14) Omambo ngo ye hungirira komaandero wouye ourunde wa Satan. Jehova wa twa po “eyuva ndo na indji oiri” kovitjitwa mbi mavi tjitwa moruyaveze rwopopezu. (Mat. 24:36; 25:13; Oviung. 1:7) Eyuva arihe ri tu eta popezu neyuva ndo. (Rom. 13:11) Mena ranao, eṱe matu sokukayenda komurungu okuzuvarisa nga omaandero tji ye ya.

3. Otjikeṋa tji tji tu hinga okuzuvarisa?

 ³ Pe nepuriro enanḓengu eṱe atuhe ndi matu sokuripurira ko ohunga notjiungura tjokuzuvarisa: Omena raye tji tu zuvarisa ombuze ombwa? Omena rorusuvero. Indu tji matu zuvarisa tu raisa orusuvero rwetu kombuze ombwa, kovandu, nu kombanda yaavihe tu raisa orusuvero rwetu ku Jehova na kena re. Ngatu tare kepu arihe kourike waro.

EṰE TU ZUVARISA MENA ROKUTJA TWA SUVERA OMBUZE OMBWA

4. Hapo tu tjita vi indu tji twa zuu ombuze ombwa?

⁴ Ripura nomuano mbu wa ri nondjoroka indu otjiṋa otjiwa tji tja tjitwa mehupo roye. Ngatu tje ove wa muna oviungura mbyoo hepa, poo meṱunḓu reṋu mwa kwatwa okanatje. Tjiri ove wa ri nonyuṋe tjinene nga tji wa raera eṱunḓu roye nomapanga ohunga notjiṋa ho. Ove mape ya wa tjita otjiṋa tjingetjo indu tji wa zuva ombuze ombwa yOuhona wa Mukuru.

5. Hapo wa ri noumune uṋe indu tji wa uta okurihonga ouatjiri okuza mEmbo ra Mukuru? (Wina tara koviperendero.)

⁵ Ripura nondjoroka ndji wa ri na yo indu tji we rihonga ouatjiri okuza mEmbo ra Mukuru otjikando otjitenga. Ove we rihonga kutja Iho womeyuru we ku suvera, u vanga kutja u rire orupa rwaimba mbe rikotamena ku ye. Nu we ku kwizikira kutja ma yandisa omihihamo nomauzeu, we ku pa omaundjiro wokukamuna ovasuverwa voye tji mave pendurwa komuinyo mouye oupe, na vyarwe ovingi. (Mar. 10:​29, 30; Joh. 5:​28, 29; Rom. 8:​38, 39; Omavan. 21:​3, 4) Oviṋa mbi we rihonga mbyo, vye ku pa ondjoroka tjinene. (Luk. 24:32) Ove wa suverere imbi mbi we rihonga, nu oo vanga okuraera varwe.—Sasaneka Jeremia 20:9.

6. Ovikeṋa mbi mo rihongere kotjihorera tja Ernest na Rose?

⁶ Tara kotjihorera. Omurumendu omukambure wena Ernest b wa ri nozombura ape omurongo indu ihe tja ṱa. Ernest wa tja: “Ami mba temenwe kutja: ‘Hapo eye wa ya keyuru? Poo opuwo wa iririre?’ Ami ee ṱeruru  novanatje varwe mbaave kara pu nooihe.” Potuingi Ernest aai kozombongo, a kawora ozongoro peyendo ra ihe, na kumbu kutja: “Arikana Mukuru, me vanga okutjiwa kutja tate u ri pi.” Ozombura ape 17 kombunda yonḓiro ya ihe, Ernest wa ningirwa okukonḓonona Ombeibela, neye wa yakura. Eye wa ri nondjoroka okurihonga kutja ovaṱi kave tjiwa otjiṋa, owo ve ri tjimuna va rara ozomboṱu ozonḓeu, nokutja Ombeibela ya kwizika kutja moruyaveze mave kapendurwa. (Omuzuv. 9:​5, 10; Oviung. 24:15) Korusenina, eye wa kamuna omaziriro komapuriro ngaaye mu kendisa oure wozombura ozengi. Ernest wa ri nondjoroka tjinene ohunga nouatjiri wOmbeibela mbwe rihonga. Omukazendu we Rose, we rikuta ku na ye momakonḓononeno wOmbeibela neye wina wa suverere imbi mbye rihonga. Mombura ndji 1978, owo va papitisiwa. Owo va kara nonḓero onene yokuzuvarisa ombuze ombwa komaṱunḓu, komapanga na kovandu varwe mbaave puratene ku wo. Mena ranao, Ernest na Rose va vatera ovandu vokombanda 70 okutjiwa Jehova nokupapitisiwa.

7. Orusuvero rwetu kouatjiri wOmbeibela ru tu hinga okutjita tjike? (Lukas 6:45)

⁷ Indu tji twa suvere imbi mbi twe rihongo okuza mOmbeibela, tu kara nonḓero yokuraera varwe ohunga na vyo. (Lesa Lukas 6:45.) Eṱe tu kara noumune tjimuna wovahongewa va Jesus veserewondo etenga mba tja: “Eṱe kamaatu sora okuhinakuhungira imbi mbi twa muna na imbi mbi twa zuva oveni.” (Oviung. 4:20) Mena rokutja twa suvera ouatjiri tjinene, eṱe tu vanga okuraera ovandu ovengi otja pu matu yenene.

EṰE TU ZUVARISA MENA ROKUTJA TWA SUVERA OVANDU

8. Omena raye tji tu vanga okuraera varwe ohunga nombuze ombwa? (Tara kokawongo nga “ Suvereye ovandu nu mu kaise po ovandu ovahongewa.”) (Wina tara kotjiperendero.)

⁸ Eṱe twa suvera ovandu tjimuna Jehova nOmuna we. (Omiano 8:31; Joh. 3:16) Eṱe tu ṱotjari tjinene novandu mbe ‘hi nomaundjiro’ “nokuhinaNdjambi.” (Ef. 2:12) Mena rokutja owo ve nomauzeu omengi, owo mape ya ave rimunu tjimuna ve ri motjitoto otjikoto, nungwari eṱe tu nongoze ndji mai yenene okuvenana, oyo ndji ri ombuze ombwa yOuhona wa Mukuru. Otjari norusuvero rwetu ku wo, vi tu hinga kutja tu tjite ozongondjero zokuveraera ombuze ombwa. Indu tji va zuu ohunga nombuze ombwa ndji, i yenena okuvepa omaundjiro, i ve vatera kutja ve kare nondjoroka nandarire nai, nu i yenena okutjita kutja ve kayorokere “omuinyo watjiri” mbu ri omuinyo waaruhe mouye oupe wa Mukuru.—1 Tim. 6:19.

9. Erakiza riṋe ndi tu yandja ohunga noruyaveze, nu omena raye? (Esekiel 33:​7, 8)

 ⁹ Orusuvero rwetu kovandu wina ru tu hinga kutja tu ve rakize ohunga nomaandero wouye ourunde mbwi. (Lesa Esekiel 33:​7, 8.) Eṱe tu ṱondjenda novandu varwe na wina ouṋepo womaṱunḓu wetu mbe he ri Ovahongonone va Jehova. Ovandu ovengi ve hupa nokuhinokutjiwa ohunga ‘nozombamisiro ozonene tjinene nḓe hi na indu za karere po okuza kombutiro youye nga ku ndinondi. Nu kamaape kakara otjiṋa tji tja sana ngo rukwao.’ (Mat. 24:21) Eṱe matu vanga kutja ve tjiwe imbi mbi mavi katjitwa moruveze rwombanguriro. Rutenga, ozongamburiro zoposyo maze nyonwa, nu okuzambo maku ya ovita vya Armagedon mbi mavi kanyona ouye auhe ourunde mbwi. (Omavan. 16:​14, 16; 17:​16, 17; 19:​11, 19, 20) Eṱe tu kumba kutja ovengi ve puratene ku imbi mbi matu ve raere nokutja ve tye okukarera Jehova pu na eṱe nai. Posi ya tjike ku imba mbe hi nokupuratena kweṱe nai, mu mamu kamburirwa mo ouṋepo womaṱunḓu wetu?

10. Omena raye tje ri ounanḓengu okukayenda komurungu okurakiza ovandu ohunga na imbi mbi mavi katjitwa moruyaveze rwopopezu?

¹⁰ Otja tji pa kahururwa morupa ndwa kapita, mape ya arire ombango ya Jehova okuyama ovandu mba rundurura omitima vyawo indu tji va utu okukambura mu ye, moruveze rwomanyoneno wa Babilon otjinene. Mena ranao, otje ri ounanḓengu tjinene okukayenda komurungu okuverakiza. Tjiwa kutja: Imbi mbi matu ve raere nai, mape ya ave kazemburuka kombunda. (Sasaneka Esekiel 33:33.) Owo mape ya ave zemburuka erakiza ndu va zuva mu eṱe nu ari ve hingi kutja ve rikute ku na eṱe mokukarera Jehova, ngunda oruveze aru hi ya kapita. Tjimuna omutjevere wondeko moFilipi ngwa rundurura omutima we kombunda ‘yomanyinganyingiro wehi omazeu,’ mape ya tjiva ave yakura nave rundurura omitima vyawo kombunda yomanyoneno wa Babilon otjinene mouye auhe.—Oviung. 16:​25-34.

EṰE TU ZUVARISA MENA ROKUTJA TWA SUVERA JEHOVA NENA RE

11. Omomuano uṋe mu matu yenene okuyandja ondjozikiro, ondengero nomasa ku Jehova? (Omavandururiro 4:11) (Wina tara koviperendero.)

¹¹ Epu enanḓengu tjinene ndi tu zuvarisira ombuze ombwa omena rokutja twa suvera Jehova Mukuru nena re eyapuke. Eṱe tu vara otjiungura tjetu tjokuzuvarisa otjomuano wokutanga Mukuru ngu twa suvera. (Lesa Omavandururiro 4:11.) Eṱe tu yakura nomitima vyetu avihe kutja, Jehova, Mukuru, wa pwa ondjozikiro nondengero nomasa okuza kovakarere ve ovaṱakame. Eṱe tu mu pa ondjozikiro nondengero tji matu zuvarisa ouatjiri wokutja eye “wa uta oviṋa avihe,” nokutja eṱe tu nomuinyo mena rokutja  ongwe tu pa omuinyo. Eṱe tu yandja omasa wetu ku Jehova indu tji matu ungurisa oruveze rwetu, nouini wetu okuzuvarisa otja pu matu yenene. (Mat. 6:33; Luk. 13:24; Kol. 3:23) Tjiri eṱe twa suvera okuhungira ohunga na Mukuru ngu twa suvera. Eṱe tu vanga okuraera varwe ohunga nena re nokutja ri heya tjike. Omena raye?

12. Omomuano uṋe mu tu yenena okuyapura ena ra Jehova motjiungura tjetu tjokuzuvarisa?

¹² Orusuvero rwetu ku Jehova ru tu hinga kutja tu yapure ena re. (Mat. 6:9) Ihi matji hee kutja eṱe tu vanga okuraera varwe kutja oviṋa ovivi Satan mbya hungira ohunga na Jehova kauatjiri. (Gen. 3:​1-5; Job 2:4; Joh. 8:44) Indu tji matu zuvarisa, eṱe tu kara nonḓero yokuraera varwe mbu mave puratene kutja Jehova ouṋe nokutja eye omundu ngu ri vi. Eṱe tu vanga kutja omundu auhe ma tjiwe otjikaṋena tje otjinene hi orusuvero, nokutja omuano we wokuhonapara omusemba, nu Ouhona we mau ye ku isa po omauzeu, nokueta ohange nondjoroka kovandu avehe moruyaveze rwopopezu. (Eps. 37:​10, 11, 29; 1 Joh. 4:8) Indu tji matu raere ovandu oviṋa mbi ohunga na Jehova, tu yapura ena re. Eṱe wina tu kara nondjoroka mena rokutja tu ungura imbi mbi matu sokutjita Otjovahongonone va Jehova. Ongwaye tji matu tja nao?

13. Omena raye tje ri ondjozikiro kweṱe okuisanewa Ovahongonone va Jehova? (Jesaja 43:​10-12)

¹³ Jehova we tu toorora kutja tu rire ‘ovahongonone’ ve. (Lesa Jesaja 43:​10-12.) Ozombura tjiva nḓa kapita, orutuu okuza kOrutu Orunane rwa tja: “Okuisanewa otja umwe wOvahongonone va Jehova, ondjozikiro onene ndji tu yorokera.” c Ongwaye tji pe ri nao? Tara komasasanekero nga. Ngatu tje mo hakerwa mo kutja wa tjiti otjiṋa otjivi, nu ove mo hepa okuraera varwe kutja otjiṋa tji mo hakerwa mo  ho ovizeze, nokutja oove omundu omuwa nu komoo yenene okutjita nao. Ouṋe ngu mo yenene okutoorora kutja me ku hungirire po? Tjiri mo toorora omundu ngu mo tjiwa, ngu mo kambura mo, nu ngu nena ewa kokutja varwe ve kambura mu ye. Mokututoorora kutja tu rire Ovahongonone ve, Jehova wa raisa kutja eye me tu tjiwa nawa nu u nongamburiro kutja eṱe matu mu hongonona kutja eye ongu ri Mukuru watjiri erike. Eṱe tu nondjingonekero yokurira Ovahongonone ve, mokuungurisa oruveze rwetu okutjiukisa ena re, nokuraisa kutja oviṋa avihe ovivi mbya hungirwa ohunga na ye kauatjiri. Mokutjita nao, eṱe tu hupa otja kena ndi tu tjinda ndi, Ovahongonone va Jehova.—Eps. 83:18; Rom. 10:​13-15.

EṰE MATU KAYENDA KOMURUNGU OKUZUVARISA NGA KOMAANDERO

14. Ovikeṋa ovinanyuṋe mbi mape ya avi tjitwa moruyaveze rwopopezu?

¹⁴ Eṱe tu nonyuṋe okumuna imbi mbi mavi tjitwa moruyaveze rwopopezu. Nombatero ya Jehova, eṱe tu nomaundjiro okumuna ovandu ovengi mbu mave yakura ouatjiri ngunda ondatumisire ondirise ai hi ye ya. Eṱe wina tu nonyuṋe kutja moruveze rwondatumisire ondirise, ndu ri oruveze oruzeu tjinene, ovandu ovengi mave isa ouye wa Satan nave rikutu ku na eṱe mokutanga Jehova.—Oviung. 13:48.

15-16. Matu kayenda komurungu okutjita tjike, nu nga ruṋe?

¹⁵ Eṱe ngunda tu noviungura okuungura. Eṱe tu nondjingonekero yokuzuvarisa ombuze ombwa yOuhona wa Mukuru mouye auhe, ndji hi na indu mai kazuvarisiwa rukwao. Nu wina, eṱe matu sokukayenda komurungu okurakiza ovandu ohunga na imbi mbi mavi tjitwa moruyaveze rwopopezu. Ovandu mave hepa okutjiwa kutja ouye ourunde mbwi u ri pokuyanda. Nu indu oruveze rwombanguriro tji rwe ya, owo mave katjiwa kutja ombuze ndjaatu zuvarisa ya za ku Jehova Mukuru.—Esek. 38:23.

¹⁶ Nambano eṱe matu sokurimanena okutjita ye? Orusuvero rwetu maru sokutuhinga okusuvera ombuze ombwa, okusuvera ovandu nu kombanda yaavihe okusuvera Jehova Mukuru nena re. Nu wina maru sokutuhinga okukayenda komurungu okuzuvarisa nonḓero, nohakahana, noupyuke nga Jehova tja tja: “Nambano opuwo!”