1, 2. (a) Jesus wa ri noumune uṋe ohunga nOmatwako wa Mukuru? (b) Ovafarisei nozonongo zomatwako aave ṱakamisa vi Omatwako momuano omuvi?

JESUS tjiri wa suverere Omatwako wa Moses. Nu ihi katjikumise! Orondu owo ya za kOmundu omunahepero tjinene momuinyo we— Ihe, Jehova. Orusuvero rwe komatwako wa Mukuru ru munika mEpsalme 40:8 ndi tja: “Tjiri, ami mbi suvera okutjita ombango yoye, Ndjambi wandje; omahongero woye mbi ye ṱakamisa momutima wandje.” Jesus wa raisa moviungura na momambo we kutja, Omatwako wa Mukuru omasemba nu ye vatera, nokutja maye yenenisiwa.—Mat. 5:17-19.

² Jesus mape ya wa hihamwa omutima tjaa munu ozonongo zomatwako nOvafarisei amave ṱakamisa Omatwako wa Ihe momuano omuvi! Owo aave yandja ombango tjinene kokuṱakamisa oviṋa nandarire mbi heri ovinanḓengu tjinene. Orondu Jesus wa tja: “Eṋe mu yandja ku Ndjambi ihi otjitjamurongo tjominte noaneis nokoljander.” Nu hapo ouzeu wa ri pi? Eye wa weza na tja: “Nungwari kamu ṱakamisa imbi oviṋa ovinanḓengu vyOmatwako otja ousemba notjari nongamburiro.” (Mat. 23:23) Jesus kaa ri tjimuna Ovafarisei, nungwari aa tjiwa omirari ku kwa zikamena Omatwako, nokutja etwako arihe aa ri raisa tjike ohunga na Jehova.

3. Matu kahungirira ku ye morupa ndwi?

 ³ OtjOvakriste eṱe katu ri kehi yOmatwako wa Moses. (Rom. 7:6) Nu hapo ongwaye Jehova tja yandjera kutja ye tjangwe mEmbo re, Ombeibela? Eye u vanga kutja tu yandje ombango tjinene ‘koviṋa ovinanḓengu,’ poo komirari ku kwa zikamena Omatwako. Okutara kotjihorera, omirari viṋe mbi mape ya atu munu mondyero ohunga novihuro vyomaundiro? Morupa ndwa kapita, twe rihongere omapu omananḓengu ohunga noviṋa omutaure mbyaa sokutjita. Nungwari ovihuro vyomaundiro mavi tu hongo ovingi ohunga na Jehova, nokutja matu yenene vi okuhorera kovikaṋena vye. Kunao orupa ndwi maru ziri omapuriro 3 nga: Ovihuro vyomaundiro vi raisa vi otjari tja Jehova? Ovyo vi tu honga tjike ohunga nomuano Jehova mbwe vara omuinyo? Ovyo vi raisa vi ousemba wa Jehova? Kondja okutara kutja omomiano viṋe mu mo yenene okuhorera ku Iho womeyuru.—Lesa Ovaefese 5:1.

4, 5. (a) Omomuano uṋe, nu omena ratjike ovihuro vyomaundiro tji vya ri ovipupu okutaurira ko? (b) Ovyo mavi tu hongo tjike ohunga na Jehova?

⁴ Jehova wa tjita kutja ovihuro 6 mbi vi rire ovipupu kovandu okutaurira ko. Eye wa raera Ovaisrael kutja ve toorore ovihuro 3 kominda avihe vyOnḓonḓu Jordan. Omena ratjike? Kutja i rire oupupu kovataure okuvaza tjimanga kotjihuro tjomaundiro. (Num. 35:11-14) Ozondjira zokuyenda kovihuro mbi, aaze ṱunwa nawa nu za ri mongaro ozemba. (Deut. 19:3) Otja kombazu yOvajuda pa ri oviraisiro meṋe yondjira, okuvatera ovataure kutja ve yenene okuvaza kovihuro mbi. Mena rokutja pa ri ovihuro vyomaundiro mbi, Omuisrael auhe ngwa zeperere omundu kaa hepa okuyenda kehi rarwe, ku mape ya a kakara momarorero wokurikotamena kovisenginina.

⁵ Ripura ohunga notjiṋa hi: Jehova ongwa rakiza kutja omundu ngwa zepa omundu owina ma sokuṱa. Posi yokutja wa twapo kutja omundu tja zeperere omundu warwe, ma yenene okuṱirwa otjari nokumuna ondjamo! Omundu umwe wa tja: “Oviṋa avihe vya ririsiwa ovipupu. Imbwi oomuano Mukuru mbwaa raisa otjari.” Jehova kamupangure omuvi ngu vanga okuvera ovakarere ve. Nungwari “Eye we ura nounyaṋutima.”—Ef. 2:4.

6. Ongaro Ovafarisei ndjaave raisa ya pangukire vi kotjari Mukuru tja raisa?

⁶ Ovafarisei kaave raisa ondjenda kovandu varwe. Okutara kotjihorera, otja kombazu yOvajuda, omundu tja katuka kombanda yovikando 3 kaave vanga okuisira. Jesus wa ṋunisa ongaro Ovajuda ndjaave raisa mokuserekarera otjisasanekero tjOmufarisei ngwa kumba a tja: “Ndjambi, me tja okunene uri okuhepa kOve kutja hi ri otja omutundu wovandu, okutja omarunga novahasemba novakatuke votukupo, nokutja wina hi ri otja omusutise wotjisuta tjouhona ngwi.” Omusutise wotjisuta tjouhona ngwi aa kumbu ku Mukuru kutja  me mu ṱire otjari. Ongwaye Ovafarisei tji ve hina aave ṱire ovandu varwe ondjenda? Ombeibela i hungira ohunga na wo otja, mba “nyengura ovakwao.”—Luk. 18:9-14.

7, 8. (a) Indu omundu warwe tje ku tjiti navi, mo yenene vi okuhorera ku Jehova? (b) Ongwaye tji tu sokurira overisusuparise kokutja tu yenene okuisira varwe?

⁷ Horera ku Jehova, o horere kOvafarisei. Raisa otjari. (Lesa Ovakolose 3:13.) Omuano umwe mu mo yenene okutjita nao, omokutjita kutja i rire oupupu ku varwe okuningira ondjesiro kove. (Luk. 17:3, 4) Repura omuini kutja, ‘Hapo mbi hakahana okuisira varwe tji ve ndji tjiti otjiṋa otjivi, nandarire kutja opovikando ovingi? Mbi kara nonḓero yokutjita ohange ku nomundu ngwe ndji pindikisa poo ngwe ndji hihamisa?’

⁸ Matu sokurira ovandu overisusuparise kutja tu yenene okuisira varwe. Ovafarisei aave munu kutja owo ovasemba povandu varwe, okutja kaave vanga okuisira varwe. Nungwari otjOvakriste, eṱe matu ‘sokuvara ovakwetu otja ovanene pu eṱe,’ nu mbu mave hepa ondjesiro yetu. (Fil. 2:3) Matu yenene okuripura oveni kutja, ‘Hapo mbi horera ku Jehova nu mbi raisa omerisusuparisiro?’ Indu tji tu ri overisusuparise, ma rire oupupu ku varwe okuningira ondjesiro kweṱe, nu wina ma rire oupupu kweṱe okuveisira. Kondja okuraisira varwe otjari hakahana, nu o hakahana okupindika.—Omuzuv. 7:8, 9.

9. Jehova wa raisira vi Ovaisrael kutja omuinyo otjiṋa otjiyapuke ku ye?

⁹ Ondando onanḓengu yovihuro vyomaundiro, ya ri okutjevera Ovaisrael kutja ave ha tura ondjo yokuzepa omuhinandjo. (Deut. 19:10) Jehova wa suvera omuinyo, nu wa tonda “omake nge zepa ovandu ovehinandjo.” (Omiano 6:16, 17) Mena rokutja eye oMukuru omusemba nomuyapuke, eye aa yandja ombango nandarire komundu ngwa zeperere omukwao. Okutja omundu ngwa zeperere omukwao, aa ṱirwa otjari. Nu nandarire kutja pa ri nao, eye rutenga aa sokueta otjiposa tje komurungu wovanane votjihuro, nowo tji va munu kutja eye tjiri katjitire owina, eye aa sokukara motjihuro tjomaundiro nga omupristeri omunene tja ṱu. Nu ihi povikando tjiva aatji hee kutja omundu ngo ma kara motjihuro ho oure womuinyo we. Ondyero ndji aai raisire Ovaisrael kutja omuinyo womundu otjiṋa otjiyapuke. Otjomuano wokuyandja ondengero kOmuyandje wOmuinyo, owo aave sokuisa ovitjitwa ngamwa avihe mbyaa vi yenene okutwa omiinyo vya varwe moumba.

10. Jesus wa raisa vi kutja ozonongo zomatwako nOvafarisei kava ri nakonatja nomiinyo vyovandu?

¹⁰ Ozonongo zomatwako nOvafarisei kaave raisa ondengero komuinyo. Ongwaye tji matu tja nao? Jesus wa tja ku wo: “Eṋe mwa twara otjipaturure tjomuvero wondjuwo yondjiviro; eṋe oveni kamu nakuhita mu yo, nu mamu tjaere imba mbu mave vanga okuhita!” (Luk. 11:52) Owo aave sokukahururira ovandu omaheero wEmbo ra Mukuru, nokuvevatera okukayenda mondjira ndji twara komuinyo waaruhe. Moruveze rwanao, owo aave isako ovandu ku Jesus “oMuhona omuini womuinyo,” nokuvetwara kondjira yosengiro, ndji i yenena okutwara komanyoneno waaruhe. (Oviung. 3:15) Ozonongo zomatwako nOvafarisei va ri ovandu  overitongamise nu vominenetima, nu kava ri nakonatja nomiinyo vyovandu. Owo tjiri va ri ovandu ovanautwe nu mbe hari norusuvero!

11. (a) Omuapostele Paulus wa raisa vi kutja wa ri noumune tjimuna owa Mukuru ohunga nomuinyo? (b) Otjikeṋa tji matji tu vatere okuraisa ongaro tjimuna Paulus ndja ri na yo motjiungura tjokuzuvarisa?

¹¹ Matu yenene vi okunakaura ozongaro nḓaaze raisiwa i ozonongo zomatwako nOvafarisei, nokuhorera ku Jehova? Matu sokuraisa ondengero kotjiyandjewa tjomuinyo. Omuapostele Paulus wa tjita nao mokuzuvarisa ombuze. Kunao wa yenena okutja, “Umwe weṋu tja pandjara, ami hi nakukara ko nomerizirira.” (Lesa Oviungura 20:26, 27.) Posi yokutja Paulus kaa zuvarisa mena rokutja kaa vanga okutura ondjo, poo mena rokutja Jehova we mu raera kutja nga zuvarise. Eye wa suverere ovandu. Nu omiinyo vyawo vya ri oviṋa ovihuze ku ye. (1 Kor. 9:19-23) Eṱe wina matu sokukara noumune otjingewo ohunga nomuinyo. Jehova u “vanga kutja avehe ve ritanaure komauvi wawo.” (2 Petr. 3:9) Ove wina u nonḓero ndjo? Tji matu vanga okuhorera ku Jehova, matu sokusuvera ovandu. Nu tji twa kara notjari, ma rire oupupu ku eṱe okuzuvarisa nonḓero, nu matu kara nondjoroka ngunda amatu zuvarisa.

12. Ongwaye ondjeverero tje ri otjiṋa otjinanḓengu kovakarere va Mukuru?

¹² Tji matu vanga okukara noumune tjimuna owa Jehova ohunga nomuinyo, matu sokukara noumune ouwa ohunga nondjeverero. Tji matu hingi ovihauto vyetu poo tji matu ungura, na tji matu tungu, nokuṱuna, nokuyenda kotuveze twomerikotameneno, matu sokukara nondjeverero aruhe. Ondjeverero nouveruke wovandu ombi mavi sokurira oviṋa ovinanḓengu tjinene ku eṱe poruveze poo povimariva. Mukuru wetu omunausemba aruhe u tjita imbi mbi ri ovisemba. Eṱe matu sokuhorera ku ye. Ovanene vombongo tjinenenene mave sokukondja okuyandja ombango kondjeverero yawo oveni, na kondjeverero ya imba mbu mave ungura pamwe. (Omiano 22:3) Indu omunene wombongo tji me ku zemburukisa ohunga nomiano vyokuraisa ondjeverero, yakura omaronga we ngo. (Gal. 6:1) Vara omuinyo otja Jehova tje u vara, “kutja o ha tura ondjo yokuzepa omundu omuhinandjo.”

13, 14. Ovanane vOvaisrael aave sokutjita vi kutja ve yenene okuraisa ousemba otja Jehova?

¹³ Jehova wa rakiza ovanane vOvaisrael kutja ngave kongorere omirari vye ohunga nousemba. Rutenga, owo aave sokukonḓonona kutja ouatjiri poo indee. Okuzambo, okutara kutja omuzepe ma sokuraisirwa otjari, owo aave sokutara nawa kondando ndja zepere omundu, nongaro ndji ma raisa, novitjitwa vye ovikuru. Kutja ovanane votjihuro ve yenene okuraisa ousemba otja Mukuru, owo aave hepa okukonḓonona kutja omuzepe wa “humisa omukwao,” poo indee. (Lesa Numeri 35:20-24.) Nu tji pa ri ozohatoi, aape hepa ovahongonone ape 2 ku tja omundu ngwa zepa omundu ma yenene okuverwa.—Num. 35:30.

¹⁴ Tji va zu nokutjiwa nawa kutja pa kayenda ye, ovanene votjihuro aave sokuyandja ombango komundu omuini, nungwari kakotjiṋa tja tjiti uriri. Owo aave hepa ounongo kutja ve yenene okuzuva nawa poo okutjiwa kutja otjikeṋa tji tje mu hingi okutjita nao. Nu kombanda yaavihe, otjiṋa tjaave hepa, ombepo ya Jehova ondjapuke ndji mai ve vatere okuraisa ounongo, otjari nousemba.—Eks. 34:6, 7.

15. Sasaneka oumune Jesus mbwa ri na wo ohunga novarunde kuna imbwi wOvafarisei.

¹⁵ Ovafarisei aave yandja ombango kouvi omundu mbwa tjiti uriri, nu kaave tara kongaro yomutima womundu. Ovafarisei tji va muna Jesus poya Mateus, owo va pura kovahongewa ve nave tja: “Okutjavi omuhonge weṋu tji ma ri puna ovandu mba sana ngwi?” Jesus we ve zira na tja: “Mbe hepa omuverukise kawo mba mbe ri nawa, nungwari owo mba mba vera. Twendeye mu kerihonge Omatjangwa ngu maye tja: ‘Ami me vanga ounyaṋutima, nungwari hi vanga ozombunguhiro zovinamuinyo.’ Ami hi ere okuisana ovasemba, nungwari mbe era okuisana ovanauvi.” (Mat. 9:9-13) Hapo Jesus aa kondjisa okukarera kovanauvi?  Kako. Otjiṋa otjinanḓengu tjinene mombuze ndjaa zuvarisa ya ri okuningira ovandu kutja ve ritanaure komauvi wawo. (Mat. 4:17) Neye wa muna kutja pa ri tjiva mokati ‘kovandu’ mbo, mbaave vanga okuritanaura komauvi wawo. Owo kave ire koya Mateus kutja ve karye uriri. Nungwari omena rokutja “ovengi tjinene iyave kongorere Jesus.” (Mar. 2:15) Ouhumandu, Ovafarisei ovengi kaave yenene okumuna Jesus mbyaa munu movandu otja imbo. Owo kava ri otja Mukuru omunatjari ngwaa ve tja okuverikotamena, nungwari aave vara ovakwao otjovarunde mbe hina omuano wokuvaterwa.

16. Okomiti ombangure mai sokukondja okukonḓonona tjike?

¹⁶ Ovanene vombongo ndino mave sokuhorera ku Jehova, ngwa “suvera ousemba.” (Eps. 37:28) Rutenga tji va zuu ombuze ngamwa aihe, ngave ‘i konḓonone nokuipura nawa,’ okutara kutja tjiri pa tjitwa ouvi poo indee. Nu tji pe ri nao, owo mave sokuṱakamisa omirari vyOmbeibela mbi mavi ve vatere okutya kutja mave sokutjita vi. (Deut. 13:12-14) Tji ve ri mOkomiti ombangure, owo mave sokuungurisa ongengezero, tji mave tara kutja omundu ngwa tjiti ourunde ounene tjiri u nomuhihamwatima noviṋa mbya tjiti poo indee. Kaku rire oupupu okutjiwa kutja omundu tjiri u nomuhihamwatima poo indee. Okwo ku kamburira mo oumune we ohunga nouvi mbwa tjiti, nongaro yomutima we. (Omavan. 3:3) Omundu ngwa katuka ma sokuraisa kutja u nomuhihamwatima tji ma vanga okuraisirwa otjari. *

17, 18. Ovanene vombongo mave yenene vi okutjiwa kutja omundu tjiri u nomuhihamwatima poo indee? (Tara kotjiperendero pomautiro worupa ndwi.)

¹⁷ Ovanene vombongo kave yenene okumuna mbi ri momutima womundu tjimuna Jehova na Jesus. Kunao, tji u ri omunene wombongo, mo yenene vi okutjiwa kutja omundu tjiri u nomuhihamwatima? Rutenga kumba ku Jehova kutja me ku pe ounongo. (1 Ozomb. 3:9) Okuzambo konḓonona Embo ra Mukuru nomambo nge za komukarere omuṱakame nomunazondunge, okutara kutja omundu ngwi ma raisa “oruhoze otja komuhingo wovandu” poo ma raisa “oruhoze ndwa ungurwa i Ndjambi.” U nomuhihamwatima tjiri? (2 Kor. 7:10, 11) Tara komuano Omatjangwa mu ye hungira ohunga na imba mbu va raisa omuhihamwatima watjiri, na imba mbe ha raisire. Okuzambo u konḓonone kutja va raisa ongaro iṋe, aave ripura na tjike, nu aave ritjindi vi?

¹⁸ Otjiṋa otjitjatatu tji mo sokutjita, okuripurira komundu omuini, nu kakoviṋa mbya tjiti uriri. Yandja ombango kokutja ongwaye tje nongaro ndjo? Ongwaye tja toora omukambo otja imbo? Eye u nomauzeu noungundipare waye? Ombeibela ya hunganeka ohunga na Jesus, otjiuru tjombongo yOvakriste, indu tji ya tja: “Eye ke nakupangura otja kombunikiro yomundu, notja komambo ngu ma zuu uriri nao. Nungwari Eye ma pangura ovasyona nokuhinandoorora, nu ma karere kovanandjenda mousemba wawo.” (Jes. 11:3, 4) Vanene vombongo, eṋe oweṋe ovarise vokehi ya Jesus, neye me mu vatere kutja mu pangure nawa tjimuna eye tje pangura. (Mat. 18:18-20) Ove u vara vi ovanene vombongo mbe kondja okutjita nao? Tjiri matu tja okuhepa tjinene kozongondjero nḓu ve tjita kutja ve raise otjari nousemba mozombongo zetu!

19. Otjikeṋa tji we rihongo ohunga novihuro vyomaundiro tji mo vanga okuṱakamisa?

¹⁹ Omatwako wa Moses ya raisa “omboronganisiro yondjiviro nouatjiri” ohunga na Jehova nomirari vye ovisemba. (Rom. 2:20) Okutara kotjihorera, ovihuro vyomaundiro mavi hongo ovanene vombongo kutja mave sokukondja vi kutja “ousemba u tjitwe,” nu mavi tu hongo atuhe omuano ‘wokuraisasana orusuvero nounyaṋutima.’ (Sak. 7:9) Katu ri kehi yOmatwako rukwao. Posi yokutja Jehova karunduruka, nu ovikaṋena tjimuna ousemba notjari ngamba ovinanḓengu tjinene ku ye. Tjiri ondjingonekero onene okukarera Mukuru ngwe tu ungura kosaneno ye, wovikaṋena mbi matu yenene okuhorera ko, nu ngu matu yenene okuunda mo!