OMURUMENDU omukambure wena Allen, wa tja: “Tjiri ee tira okutjindira kombongo ndji. * Ami hee tjiwa kutja mape ya e yenene okuhara omapanga, poo okurira epanga ravarwe.” Allen u kondja okuiririra ombongo ombe ndji ri ozokilometa zokombanda 1 400 kokure nokoyawo.

Tjinangara ove wa tjindira oupe kombongo yarwe, mape ya wina u nemuma. Otjikwaye tji matji yenene okukuvatera kutja u yenene okuiririra? Mo yenene okutjita vi tje ri ouzeu kove okuiririra ombongo ombe? Nu tji u hina okutjindira kombongo yarwe, mo yenene vi okutjita kutja imba mba tjindire oupe kombongo yeṋu ve hakahane okuiririra?

Ripura ohunga notjihorera hi: Okutjindisa omiti okutwara koruveze rwarwe, ku ṱuna komahapero wavyo. Otja tji mavi homonwa mehi, otjingi tjomize vyavyo vi kondwa, okutjita kutja ku rire oupupu okuvitjindisa. Nu tji vya kakunwa kwarwe, ovyo mavi sokuuta okuhapa omize vyarwe tjimanga. Momuhingo otjingewo, okutjindira kombongo yarwe mape ya kwa tjita kutja u hare ombameno. Mombongo mu wa ri, ove wa harere “omize” mena rokutja wa ri nomapanga omawa, nu wina wa ri noprograma yokukarera Jehova ndji wa iririra. Nai mo sokuuta okuhara omize omipe kokutja u ute okukura nawa mombongo ombe. Ovikwaye mbi mavi ku vatere okutjita nao? Tji wa ṱakamisa omirari vyOmbeibela, mavi ku vatere okutjita nao. Ngatu tare ku tjiva.

Omundu ngu lesa Embo ra Mukuru aruhe “u ri otja omuti mbwa hapa meṋe yomipupo vyomeva, nu mbu twa ko ovihape moruveze rwawo orusemba nu womaso nge ha kukuta. Omundu ngwi u ṋingapara mu avihe mbye tjita.”—Eps. 1:1-3.

Tjimuna omuti aruhe tji u hepa omeva kutja u yenene okuhapa nawa, Omukriste wina u hepa okulesa Embo ra Mukuru aruhe kutja ma yenene okukara noupanga ouwa kuna Jehova. Kunao, kayende komurungu okulesa Ombeibela yoye eyuva arihe, nokukara pozombongarero zombongo aruhe. Tjiteye omerikotameneno weṋu weṱunḓu aruhe, nomakonḓononeno woye omuini wOmbeibela. Oviṋa avihe mbyoo hepa okutjita kutja u yanḓiparise oupanga woye kuna Jehova indu tji wa ri kombongo indji onguru, nga rire mbi wa kayenda komurungu okutjita mombongo ombe wina.

“Kovisa ovakweṋu, nu mo kovisiwa.”—Omiano 11:25.

Mo hara omasa nu mo iririre tjimanga, indu aruhe tji mo kara norupa okuura motjiungura tjokuzuvarisa. Omunene wombongo umwe, wena Kevin wa tja: “Otjiṋa tji tje tu vatera tjinene nomukazendu wandje, okuungura otjovakandjira ovavatere tjimanga tji twa vaza mombongo ombe. Twa hakahana okutjiwa ovakambure ovakwetu, ovakandjira, na wina omaturiro maatu zuvarisa.” Roger ngwa tjindira komaturiro nga ri ozokilometa zokombanda 1 600 kokure noruveze paa kara, wa tja: “Omuano omusemba mu mo yenene okuiririra ombongo ombe, eendu tji mo kara norupa motjiungura tjokuzuvarisa oruveze aruhe. Wina raera ovanene wombongo kutja mo yenene okuvatera apehe pu mo hepwa. Ngahino okukohorora Etuwo rOmerikotameneno, nokukuramena po omundu ngwa ha vazere kombongarero yombongo. Poo okutwaerera varwe mbe hina ovihauto kombongarero yombongo. Indu ovakambure ovakweṋu tji mave munu omundu ngu nombepo yomeriyandjerero, owo mave hakahana okukuyakura otjepanga rawo.”

“Omitima vyeṋu wina ngavi kare kamwaha!”—2 Kor. 6:13.

Raisa orusuvero kovakambure ovakweṋu avehe. Melissa neṱunḓu re tji va tjindira kombongo ombe, owo aave yandja ombango kokutjita omapanga omape. Eye wa tja: “Eṱe aatu serekarere ku novakambure  ovakwetu komurungu na kombunda yombongarero yombongo. Nu ihi aatji tu pe oruveze rwokuvetjiwa nawa.” Wina kwa vatera eṱunḓu ndi okuhakahana okutjiwa omana wovakambure ovakwao. Owo wina va raisa orusuvero kovakambure ovakwao mokuvesekirisa, nu ihi tja tjita kutja ve kare noupanga oupame. Eye komurungu wa tja: “Eṱe twa pasana ozonomora zongoze kokutja tu yenene okukara pamwe povitjitwa vyombongo noviṋa vyarwe.”

Indu tje ri ouzeu kove okuhungira ku novandu mbu u hina okutjiwa nawa, mo yenene okuuta momiano omiṱiṱi. Otjotjihorera, mo yenene okumeṱameṱa—nandarire kutja pomautiro ouzeu. Okumeṱameṱa ku tjita kutja varwe ve tumbuke kove. Nu “omeho nge nondjiririsa ye yorokisa omutima.” (Omiano 15:30) Rachel ngwa tjindira kokure tjinene nokoṋa ke kurira wa tja: “Ami owami omundu wohoṋi. Povikando tjiva mbi hepa okuriṋiṋikiza kutja mbi hungire ku novakambure ovakwetu mombongo ombe. Mbi kondja okutara mEtuwo rOmerikotameneno kutja ouṋe ngwa haama ku ye omuini, ngu hina okuhungira ku novandu varwe. Omundu ngo mape ya u nohoṋi tjimuna ami.” Ongwaye tji u hina okutwapo ondando yokutja mo hungire kuna omundu omupe komurungu poo kombunda yombongarero yombongo?

Otjiṋa tjarwe, movivike ovitenga mape ya otjaterwa okuhakaena ku novandu ovape. Posi yokutja otja oruveze tji maru kayenda mape ya ave ha rire “ovape” rukwao. Tji pa kara nao, mo sokukondja okukayenda komurungu okutjita omapanga omape.

Omiti tjiva vi kambura orure okuhapa omize tji vya zu nokutjindisiwa poruveze. Momuano otjingewo, kavandu avehe mbe hakahana okuiririra ombongo ombe. Indu tji wa kara orure mombongo ku wa tjindira nu ouzeu kove okuiririra, omirari vyOmbeibela mbi, mavi yenene okukuvatera:

“Atu ṱotjirweyo mokutjita ouwa, orondu tji tu ha urirwe, matu kondo omakondero moruveze orusemba.”—Gal. 6:9.

Ripa oruveze oruingi okuiririra. Okutara kotjihorera, ovahindwa ovengi mba za kOskole ya Gilead ve kara ozombura ozengi momahi wozonganda ku va hindwa, amaave karyanga komahi wawo ku va za. Okutjita nao ku ve vatera kutja ve pamise oupanga wawo ku novakambure ovakwao mehi ku va hindwa, nu ve yenena okuiririra ozombazu zarwe.

Alejandro ngwa tjinda povikando ovingi, u tjiwa kutja okuiririra ombongo yarwe katjiṋa tji wa sokuhakahana okutjita. Eye wa tja: “Tji twa za nokutjinda otjikando otjisenina, omukazendu wandje wa tja: ‘Omapanga wandje aehe mbe yesa kombongo ku twa ri!’” Alejandro we mu zemburukisa kutja eye wa tjere nao otjikando otjisenina, tji va tjinda ozombura 2 nḓa kapita. Posi yokutja mozombura 2 nḓo, eye wa raisa onḓero mu varwe nu wa tjita oupanga ku novandu mbaave ha tjiwasana.

“O pura kutja okutjavi omayuva woruveze orukuru tji ya ri omasemba pu inga owanambano! Orondu okupura nao kaunongo.”—Omuzuv. 7:10.

Kondja okuhina okusasaneka ombongo ku wa ri, kuna indji ombe mu u ri nai. Okutara kotjihorera, ovakambure mombongo ombe mape ya ave rire ovandu mbe ha tira okuyandja oumune wawo, poo mbe nohoṋi. Kondja okutara kovikaṋena vyawo oviwa, otja tjotjo vanga kutja owo wina ve tjite kove. Ovakambure tjiva mba tjindira oupe kombongo yarwe, va hingwa okuripura oveni kutja, “Hapo mba suvera, ‘ovanangamburiro ovakwetu’ avehe tjiri”?—1 Petr. 2:17.

“Ningireye nu mamu pewa.”—Luk. 11:9.

Kayende komurungu okukumba ku Mukuru kutja me ku vatere. Omunene wombongo wena David, wa  tja: “O riyandjere okutjinda ouzeu mbwi erike. Oviṋa ovingi tu yenena okutjita nombatero ya Jehova uriri. Kumba ohunga na vyo!” Rachel ngwa tamunwa rukuru mehungi ndi, wina wa itavera. Neye wa tja: “Ami nomurumendu wandje tji twa utu okurimuna kutja twa humburuka kokure nombongo, aatu kumbu ku Jehova kutja, ‘Arikana tu vatera tu tjiwe otjiṋa tji tu tjita ku varwe, tji tji tjita kutja ku rire ouzeu ku wo okutumbuka popezu na eṱe.’ Okuzambo aatu kondjo okukara pu novakambure ovakwetu.”

Vanene, indu ovanatje veṋu tji ve nouzeu okuiririra, twapeye oruveze rwokukumba puna wo ohunga notjiṋa hi. Ve vatereye okutjita omapanga omape, mokukondja okupaha omiano vyokutja ve kare pu novandu ovatunge.

Ovikwaye mbi mo yenene okutjita kutja u vatere imba mba tjindira oupe kombongo yeṋu? Kondja okurira epanga ratjiri okuza pomautiro. Otjiṋa tji matji ku vatere, okukondja okuripura kutja otjo vanga okutjindwa vi tji wa i kombongo ombe, okuzambo tjita nao kovakweṋu wina. (Mat. 7:12) Mo yenene okuṋanga imba ovape okukara nomerikotameneno weṱunḓu puna ove, poo okuyekutarera pamwe oprograma yo-JW Broadcasting? Mo yenene okuveṋanga kutja mu pite pamwe motjiungura tjokuzuvarisa? Indu tji we ve ṋanga keriro eṱiṱi uriri, mave zemburuka omasekirisiro woye ngo. Omomiano viṋe vyarwe mu mo yenene okuvatera ovandu ovape mombongo yeṋu?

Carlos wa tja: “Indu tji twa vaza mombongo ombe, omukazendu omukambure we tupa orutuu rozostora nḓaaze randisa oviṋa vyozopereisa ozombwa. Ihi tjiri tje tu vatera tjinene.” Imba mbe za komahi warwe ku ku nomuinyo weyuru mbwa panguka koweṋu, mape ya ave kara nondangi tji va tjiwa kutja mave sokurihwikika vi tji ku noupyu, tji ku nombepera, poo tji maku roko. Wina mo yenene okuvevatera kutja ve mune ondoṋeno motjiungura tjokuzuvarisa, mokuveserekarera ekuruhungi rovandu momaturiro ngo. Poo okuvekahururira ohunga nozongamburiro zozokereka nḓe ri momaturiro weṋu.

Allen ngwa tamunwa pomautiro, wa kara oure wombura imwe mombongo ombe. Neye wa tja: “Ami rutenga ee hepa okuriṋiṋikiza kutja mbi tjiwe ovakambure ovakwetu nawa. Posi yokutja nai ve ri tjimuna eṱunḓu ku ami, nu ihi tji ndji pa ondjoroka.” Allen wa muna kutja kena pa pandjara omapanga, indu tja tjindira kombongo ombe. Moruveze rwanao, eye wa muna omapanga omape, nu mbu mape ya ave rire omapanga we nga aruhe.