1. Okuimbura ku tu vatera okutjita tjike?

OMUTJANGE womaimburiro omutjiukwa wa tja: “Omambo ye tjita kutja u ripure. Omusiki u ku ṱuna momuinyo. Posi yokutja indu tji mo imbura, omambo weimburiro ye ṱuna kouripura na komutima woye.” Omaimburiro wetu ye tanga nokuraisa orusuvero ku Tate wetu womeyuru, Jehova. Nu ihi tji tjita kutja tu tumbuke popezu na ye. Kunao, nangarire kutja twa imbura kourike wetu poo pu novakambure ovakwetu mombongo, oupupu okumuna kutja ongwaye okuimbura tji ku ri orupa orunanḓengu tjinene momerikotameneno wouatjiri.

2, 3. (a) Ovandu tjiva ve noumune uṋe ohunga nokuimbura nomasa pu nombongo? (b) Omapuriro yeṋe ngu matu katara ko?

² Nu hapo ove u muna ko vi okuimbura nomasa pu novakambure ovakweṋu mombongo? U ṱohoṋi? Mozombazu tjiva, ovarumendu ve ṱohoṋi okuimbura mokati kovandu. Ongaro ndji i yenena okuṱuna kombongo aihe, nu tjinenenene ovanene vombongo tji mave ṱohoṋi okuimbura, poo indu tji mave ungura oviṋa vyarwe ngunda ovandu mombongo amave imbura.—Eps. 30:12.

³ Indu tji tu vara okuimbura otjorupa orunanḓengu momerikotameneno wetu tjiri, kamaatu piti metuwo poo okuhina okukara po indu ombongo tji mai imbura. Kunao, auhe wetu ma sokuripura omuini kutja, ‘Hapo mbi noumune uṋe ohunga nokuimbura  pozombongarero zombongo? Indu tji mbi tira okuimbura komurungu wovandu varwe, me yenene okutjita vi? Nu me yenene vi okuimbura omaimburiro nomutima auhe?’

4, 5. Ovaisrael voruveze orukuru va tjita ondyero yaye ohunga nokuimbura pondjuwo ondjapuke ya Muhona?

⁴ Ovakarere va Jehova ovaṱakame voruveze orukuru, aave ungurisa omaimburiro okutanga Jehova. Indu Ovaisrael tjaave karere Jehova nouṱakame, okuimbura kwa ri orupa orunanḓengu momerikotameneno wawo. Otjotjihorera, indu Ombara David tjaa rongerisa oviungura pondjuwo ondjapuke, eye wa rongerisa Ovalevi 4 000 okutanga Jehova nomaimburiro. Mokati ka imba, ovandu 288 va ri ‘ovatjiwe voviungura vyawo, mba hongwa okunyanda ovihumba nawa.’—1 Ekuruh. 23:5; 25:7.

⁵ Omizumbi nomaimburiro, wina vya ri oviṋa ovinanḓengu momayapuriro wondjuwo ondjapuke. Ombeibela i tja: “Ovaimbure novanyande vovinangoma va tanga Muhona nozohiva, nozongoma zovitenda, novinangoma vyarwe nombosiro imwe, . . . ongeṋangeṋeno ya Muhona tjinga aye urisa Ondjuwo ondjapuke ya Muhona.” Ripura uriri kutja ovitjitwa otja imbi vya yanḓiparisa vi ongamburiro yOvaisrael!—2 Ekuruh. 5:13, 14; 7:6.

6. Kahurura kutja indu Nehemia tja ri omunane ohongora moJerusalem, eye wa rongerisa vi ovaimbure kotjitjitwa tjapeke.

⁶ Indu Nehemia tja rongerisa Ovaisrael kutja ve katungurure ozomira za Jerusalem, eye wina wa rongerisa Ovalevi kutja ve kaimbure novihumba noviharpe. Omaimburiro nomizumbi mbi va nyanda vya tjita kutja omayapuriro wozomira nḓa, ye rire otjitjitwa tjondjoroka. Otjikando hi pa ri “ovira vivari ovinene vyovaimbure.” Ovaimbure mba, aave kayenda okuza kominda ombirukira, okuzambo aave kahakaenena pomira ndji ri popezu nondjuwo ondjapuke. Ombosiro ndji va tjita aai yenene okuzuvakera okuza kokure tjinene. (Neh. 12:27, 28, 31, 38, 40, 43) Tjiri matu yenene okukara nongamburiro kutja Jehova wa ri nenyando, indu tjaa zuu ovakarere ve amave mu tanga nomaimburiro okuza komitima vyawo.

7. Jesus wa raisa vi kutja okuimbura ma rire orupa orunanḓengu momerikotameneno wOvakriste?

⁷ Indu ombongo yOvakriste tji ya zikwa, omaimburiro wina ya ri orupa orunanḓengu momerikotameneno wouatjiri. Ripura uriri ohunga na imbi mbya tjitwa mongurova onanḓengu tjinene momakuruhungi wovandu. Indu Jesus tja za nokukara nOmariro Omayapuke pu novahongewa ve, owo avehe va tanga Jehova nomaimburiro.—Lesa Mateus 26:30.

8. Ovakriste veserewondo etenga va raisa vi otjihorera otjiwa tjokutanga Mukuru nomaimburiro?

⁸ Ovakriste veserewondo etenga, va raisa otjihorera otjiwa tjokutanga Mukuru pamwe nomaimburiro. Nandarire kutja aave kerikotamenena ku Jehova mozondjuwo zawo nḓe ha ri ozombwa nozohimise tjimuna ondjuwo ondjapuke, ovakambure ovakwetu mbo aave imburire Jehova okuza komitima. Omuapostele Paulus wa hingwa i ombepo ondjapuke okutja nai kovakambure ovakwao: “Hongasaneye nokurongasana nounongo auhe. Imbureye omapsalme nomaimburiro nomatangero omayapuke; imburireye Ndjambi nondangero momitima vyeṋu.” (Kol. 3:16) Omaimburiro nge ri membo retu romaimburiro, tjiri ‘omaimburiro nomatangero omayapuke.’ Owo wina ovikurya vyombepo mbi tu pewa i “omukarere omuṱakame nomunazondunge.”—Mat. 24:45.

9. (a) Otjikeṋa tji tji tjaera kutja tjiva ave ha imbura nomutima auhe pozombongarero zombongo na pomaworonganeno omanene? (b) Omomuano uṋe mu matu sokutanga Jehova nomaimburiro, nu oouṋe mbu mave sokuraisa otjihorera otjiwa? (Tara kotjiperendero pomautiro worupa ndwi.)

⁹ Otjikeṋa tji tji tjita kutja o hakara nongamburiro  move omuini tji mo imbura? Ngahino omena rokutja katjiṋa tji mu tjita tjinene meṱunḓu poo mombazu yeṋu. Poo ngahino tji mo puratene kovaimbure ovawa moradio poo motiivii, nu orisasaneke kuna wo ku tjita kutja u ute okuṱohoṋi poo okurihahiza. Posi yokutja atuhe tu nomerizirira wokutanga Jehova nomaimburiro. Okutja, handa embo roye kombanda kaṱiṱi, yera otjiuru tjoye, nu imbura nomutima woye auhe! (Esra 3:11; lesa Epsalme 147:1.) Kundino, mOmatuwo omengi womerikotameneno, omambo womaimburiro ye raisiwa poskrina, nu ihi tji tjita kutja tu imbure nawa okuza komitima vyetu. Wina otjiṋa otjinanambango okutjiwa kutja okuimbura omaimburiro wOuhona, nai ya rira orupa rwOskole yOviungura vyOuhona kovanene vombongo. Ihi tji raisa kutja ovanene vombongo ve sokuraisa otjihorera otjiwa tjokukara norupa mokuimbura pozombongarero zombongo.

10. Matu sokuzemburuka tjike indu tji tu tira okuimbura nomasa?

¹⁰ Otjiṋa tjimwe tji tji tjita kutja ovengi ave ha imbura nomasa, emuma. Mape ya arire okutira kutja, eraka roye uriri ndi ma ri zuvaka, poo okutira kutja mo zunḓa. Posi yokutja ngatu tjiwe kutja tji matu hungire, “eṱe atuhe tu tataiza moviṋa ovingi.” (Jak. 3:2) Nu ihi katji tu tjaere okuhungira. Kunao, ongwaye tji matu sokuyandjera kutja okutira okuzunḓa, ku tu tjaere okutanga Jehova nomaimburiro?

11, 12. Matu sokutjita vi kutja tu rire ovaimbure ovawa?

¹¹ Mape ya tu tira okuimbura mena rokutja katu tjiwa kutja ngatu imbure vi. Posi yokutja, matu yenene okurira ovaimbure ovawa, tji twa tjiti oviṋa mbya hungirwa mba. *

¹² Ove mo yenene okurihonga okuimbura nomasa, neraka ndi ma ri zuvaka nawa, indu tji mo suvana nawa. Tjimuna orutjeno tji ru yandja omasa kombalpa, omasuvaneno wina ye yandja  omasa kombosiro yeraka roye tji mo hungire poo tji mo imbura. Ove mo sokuimbura neraka ndi u hungira na ro, poo nandarire kombanda yanao. * Ombeibela i raera ovakarere va Jehova kutja ngave “ravaere nondjoroka” indu tji mave imbura omatangero.—Eps. 33:1-3.

13. Kahurura kutja matu yenene vi okuimbura nokuhina okutira.

¹³ Tji mu nomerikotameneno weṋu weṱunḓu poo kove omuini, rora omiano mbi: Toorora eimburiro ndi wa suvera okuza membo retu romaimburiro. Lesa omambo weimburiro neraka romasa nokuhina okutira. Okuzambo, neraka otjingero, lesa omambo aehe nge ri momuhewo umwe uriri nokuhina okuhekana. Tji wa zu mbo, imbura omambo otjingewo, neraka otjingero. (Jes. 24:14) Eraka roye ma ri harere ko omasa, nu ihi otjiṋa otjiwa. O yandjere kutja eraka roye ri ku tirise, poo okukuṱisa ohoṋi!

14. (a) Okupaturura otjinyo tjoye nawa maku yenene vi okukuvatera kutja u imbure nawa? (Lesa okaongo nga, “ Me yenene vi okurira omuimbure omuwa?”) (b) Omapu yeṋe ohunga nokuimbura nawa nge ku vatere?

¹⁴ Eraka roye kamaa ri zuvaka nawa, indu tji u hina okupaturura otjinyo tjoye nawa. Okutja omuano warwe mbu mau ku vatere, okupaturura otjinyo tjoye tjinene, kombanda ya indu tji u paturura tji mo hungire. Tji mo munu kutja u neraka engundi poo ndi ṱina, mo sokutjita vi? Mo yenene okumuna ombatero ohunga nomauzeu otja ingo, membo ndi Benefit From Theocratic Ministry School Education, pomukuma 184, mokaongo ku ke nepu ndi, “Overcoming Specific Problems.”

15. (a) Omatjivisiro waye nga tjitwa pombongarero yombura ndji 2016? (b) Omapu yeṋe tjiva nga tjita kutja embo romaimburiro ri rundururwe?

¹⁵ Pa ri ondjoroka onene pombongarero yo-Watch Tower Bible and Tract Society of Pennsylvania, yombura ndji 2016. Orondu Mbuti Stephen Lett wOrutu Orunane wa tjivisa kutja embo  epe romaimburiro ndi ‘Imburireye’ Jehova nondjoroka, ma ri utu okuungurisiwa moruyaveze rwopopezu pozombongarero zombongo. Mbuti Lett wa kahurura kutja epu rimwe ndi va rundururira omaimburiro, ya ri mena rokutja aave vanga kutja ye hitasane nOmbeibela ndji o-New World Translation of the Holy Scriptures. Nu ihi aatji kamburire mo okuisamo omambo womaimburiro ngaaye ungurisa omambo nge ha munika rukwao mOmbeibela ndji o-New World Translation, ndja rundururwa mombura ndji 2013. Nu wina kwa weziwa omaimburiro omape ohunga notjiungura tjetu tjokuzuvarisa, nomaimburiro wokuraisa ondangi kotjisuta tjonguturiro. Mena rokutja okuimbura orupa orunanḓengu momerikotameneno wetu, Orutu Orunane aaru vanga okupitisa embo romaimburiro ronḓengu yokombanda. Okutja va pitisa embo rotjipapeko tji tja sana ku ihi otjOmbeibela ombe ndji o-New World Translation.

16, 17. Omarundurukiro waye nga tjitwa kembo romaimburiro indi epe?

¹⁶ Omaimburiro membo ndi ‘Imburireye’ Jehova nondjoroka, ya ṱunwa otja kepu, kutja ku rire oupupu okuriungurisa. Okutara kotjihorera, omaimburiro 12 omatenga ye hungira ohunga na Jehova, nu inga 8 ngu maye kongorere ko, ye hungira ohunga na Jesus notjisuta tje tjonguturiro. Pe nomurya otja komapu, mbu mau yenene okukuvatera tji mo hepa okutoorora eimburiro kehungi roye.

¹⁷ Otjomuano wokuvatera avehe okuimbura nomutima auhe, omaimburiro tjiva ya rundururwa kutja ombuze yawo i zuvakwe nawa. Omambo weimburiro tjiva ngu ye ha ungurisiwa rukwao wina ya isamewa. Nu wina okurundurura epu reimburiro ndi, “Tjevera omutima woye” ku indi, “Matu tjevere omitima vyetu,” otjiṋa otjiwa tjinene. Ongwaye tji matu tja nao? Pozombongarero zetu zombongo na pomaworonganeno omanene, pe kara ovandu ovengi ovape, na imba mba raisa ombango, nomitanda, novakazendu ovakambure. Nu ku wo okuraera varwe kutja ngave tjite vi, otja komambo weimburiro indi ekuru, kaṱiṱi kaaku pose nawa. Kunao epu nomambo weimburiro ndo ya rundururwa.

18. Ongwaye tji matu sokurihonga omaimburiro nge ri membo retu epe romaimburiro? (Tara komambo wokehi.)

¹⁸ Omaimburiro omengi nge ri membo ndi ‘Imburireye’ Jehova nondjoroka, ya tjangwa momuano wongumbiro. Nowo maye yenene okukuvatera okuraera Jehova ohunga na imbi mbi ri momuinyo woye. Omaimburiro warwe maye mu vatere ‘okupandiparisasana morusuvero na moviungura oviwa.’ (Hebr. 10:24) Okutja tjiri matu sokukara nonḓero yokurihonga omaimburiro, ombosiro yawo, nomambo womaimburiro. Tji we rirongerisa omaimburiro nawa ponganda, mo yenene okurihonga okuyeimbura nomutima auhe, na wina nonḓero yatjiri. *

19. Ovandu avehe mombongo mave yenene vi okurikotamena ku Jehova?

¹⁹ Tjiwa kutja okuimbura orupa orunanḓengu tjinene momerikotameneno wetu. Okwo omuano umwe omunanḓengu mu matu yenene okuraisa orusuvero nondangi yetu ku Jehova. (Lesa Jesaja 12:5.) Tji mo imbura neraka rondjoroka, mo tunduuza varwe okuimbura nomutima auhe. Ovandu avehe mombongo, kutja owomba ovaṱiṱi, ovanene, poo imba ovape mouatjiri, mave yenene okurikotamena ku Jehova momuano mbwi. Okutja o tira okuimbura nomutima auhe. Nungwari yandja ombakatwi komambo womutjange wepsalme ngwa tja: “Imburireye Muhona!” Imbureye nondjoroka!—Eps. 96:1.