Ami mba kwatwa mombura ndji 1983. Tji mba kwatwa mba ri okanatje okaveruke, posi yokutja tji mba ri nozombura omurongo mba uta okukara nomihihamo morutu aruhe. Ozombura mbari kombunda yanao, eyuva rimwe mba penduka nu ke yenene okunyinganyinga. Ee kondjo okunyinganyingisa omarama wandje, posi yokutja kaa ye nyinganyinga. Okuza keyuva ndo hiya rora okukayenda rukwao. Ouvere wandje wa tjita kutja ehe kuru. Ngamba mbi norutu rokanatje okaṱiṱi.

Kombunda yomieze omiṱiṱi vyokuvera nokukara mondjuwo Ovahongonone va Jehova vevari veya poyetu. Aruhe tji peya ovandu ponganda ee ṱara, posi yokutja otjikando ho mbe ve yandjera kutja ve hungire kuna ami. Indu tji va hungira ohunga nOparadisa, ami mba zemburuka oviṋa mbi mba zuva tji mba ri nozombura ndano. Oruveze ndo omuhindwa wena Jethro, ngwa turire motjihuro hi Suriname, aa ryangere oresevete yetu otjikando tjimwe momueze nu ee rihongo Ombeibela puna tate. Jethro ee ndji tjindi nawa nu mbe mu suverere tjinene. Wina ovanene va tate aave ndji twaerere kozombongarero tjiva zOvahongonone va Jehova nḓa ze tjitirwa moresevate yetu. Kunao indu omukazendu wena Florence, umwe wovakazendu mbe ya okundjivarura we ndji pura kutja me vanga okurihonga ovingi nu ami mba itavera.

Florence wa kotoka pu nomurumendu we wena Justus, nu aveyevari va uta okurihonga Ombeibela kuna ami. Indu tji va muna kutja hi nokutjiwa okulesa owo ve ndji honga. Kombunda yoruveze, ami mba uta okulesa. Eyuva rimwe owo ve ndji raera kutja va ningirwa okukavatera moSuriname. Ouhumandu, kapa ri omundu okurihonga puna ami Ombeibela moOrealla. Posi yokutja Jehova ke ndji zembire.

Ousupi kombunda yanao, omukandjira wena Floyd wa hakaena kuna ami indu tja zuvarisa okuza kondjuwo nondjuwo mOrealla. Indu tja hungira kuna ami ohunga nokurihonga Ombeibela, mba meṱameṱa. Eye we ndji pura kutja, “Ongwaye tji mo meṱameṱa?” Mbe mu raera kutja mbe rihonga rukuru okambrosjure nga What Does God Require of Us? nu mbe rihonga ousupi embo ndi Knowledge That Leads to Everlasting Life. * Ami mbe mu raera kutja ongwaye tji mbe he rihongo rukwao. Floyd wa mana okurihonga puna ami embo ndi Knowledge That Leads to Everlasting Life, posi yokutja eye wina wa hindwa okukavatera  kwarwe. Ami hi mba ri nomuhonge wOmbeibela rukwao.

Mombura ndji 2004, Granville na Joshua, mba ri ovakandjira vapeke va hindwa koOrealla. Owo va hakaena kuna ami indu tjaave zuvarisa okuza kondjuwo nondjuwo. Indu tji ve ndji ningira okurihonga Ombeibela, mba meṱameṱa. Ami mbe ve ningira kutja ve ndji honge embo ndi Knowledge That Leads to Everlasting Life okuza komautiro. Ee vanga okutara kutja mave ndji hongo oviṋa vimwe tjimuna imba mbaave ndji hongo. Granville we ndji raera ohunga nozombongarero zombongo nḓa ze tjitwa moresevate yetu. Nandarire kutja hiya rora okupita mondjuwo oure wozombura ape omurongo, ami ee vanga okuyenda. Kunao, Granville weya poyetu e ndji twa mokatemba nu e ndji twara kEtuwo rwOmerikotameneno.

Otja oruveze tjaaru kayenda, Granville we ndji tunduuza okukara norupa mOskole yOviungura vyOkuzuvarisa. Eye wa tja: “Ove waremana posi yokutja mo yenene okuhungira. Eyuva rimwe mo yandja ehungi mombongo. Tjiri mo tjiti nao.” Omambo we ngo ye ndji tunduuza.

Ami mba uta okuzuvarisa puna Granville. Posi yokutja ozondjira ozengi kaza ri ozombwa kokatemba. Kunao mba ningira Granville okundjiundura mokakirivaha. Okuungurisa okakirivaha kwa vatera tjinene. Mombura ndji 2005 mu April, mba papitisiwa. Ousupi kombunda yanao, ovarumendu ovakambure ve ndji honga okuungura nomambo nozombako pEtuwo rwOmerikotameneno.

Mombura ndji 2007 tate wa ṱa moumba wokayaha. Eṱunḓu retu ra wire momuinyo tjinene. Granville aa kumbu puna eṱe nokutulesera omatjangwa omahuhumiṋe. Kombunda yozombura mbari Granville wina wa ṱa moumba wokayaha tji tjetu hihamisa tjinene.

Ombongo yetu ya sewa nokuhina omunene wombongo nu pa ri omuvatere umwe uriri. Onḓiro ya Granville tjiri ye ndji hihamisa tjinene, orondu wa ri epanga randje. Eye ee ndji vatere okutumbuka popezu na Jehova nokundjivatera novihepwa vyandje. Ombongarero yombongo ndja kongorera ko kombunda yonḓiro ye, ami mba ningirwa okulesa ozoparagrafa pOmakonḓononeno wokambo kOruhungu. Ngunda ame lese mba uta okurira. Ami mba ṱokuheruka.

Ami mba uta okukara nawa indu ovakambure okuza kozombongo zarwe tjaave ya okuyekutuvatera moOrealla. Nu wina, orutavi rwomberoo rwa hinda omukandjira wapeke wena Kojo. Mama nomuangu wandje va uta okurihonga Ombeibela nu ave papitisiwa, tji tje ndji pa ondjoroka. Mombura ndji 2015 mu Marta, mba zikwa otjomuvatere wombongo. Kombunda, mba yandja ehungi randje etenga. Eyuva ndo ami mba meṱameṱa nu mba rira tji mbe ripura ohunga nomambo Granville nga hungira kwami rukuru, indu tja tja: “Eyuva rimwe mo yandja ehungi mombongo. Tjiri mo tjiti nao.”

Okupitira mozoprograma zo-JW Broadcasting^® ami mbe rihonga ohunga novakambure ovakwetu mbe ri mongaro tjimuna oyandje. Nandarire kutja va remana owo ve yenene okuungura ovingi nu ve nondjoroka. Ami wina me yenene okuungura oviṋa tjiva. Ee vanga okuungurira Jehova nomasa otja pu me yenene, mena ranao mba uta oukandjira. Mu Septemba 2019 mba muna ombuze ndji mbe hina ee undjire ko. Momueze mbo mba zikwa otjomunene wombongo, mombongo mu mwa ri novazuvarise ape 40.

Mbi nondangi kovakambure mbe rihonga puna ami nokundjivatera okukarera Jehova. Kombanda yaavihe mbi nondangi kutja Jehova ke ndji zembire.