OVAKAMBURE ovengi mba ya komahi warwe okukaungura va kotoka komahi wawo. Mena rorusuvero rwawo ku Jehova na varwe, owo va tjindira kotuveze ku ku nouhepe wovazuvarise ovengi. (Mat. 22:37-39) Ozongondjero zeṋe nḓu va tjita nu va muna ozondaya zaye? Ngatu tare kehi ndi oCameroon ndi ri ri koutokero wa Africa.

Mombura ndji 1998, omurumendu omukambure Onésime wa tjindira kehi rarwe. Eye wa kakara ngo oure wozombura 14. Eyuva rimwe, pombongarero yombongo, eye wa zuva otjihorera ohunga notjiungura tjokuzuvarisa. Omuyandje wehungi wa tja: “Indu tji pe nomapanga yevari ngu maye pata omahundju potuveze pekepeke nu umwe ma pata omahundju omengi pomukwao. Hapo ingwi ngu ri poruveze pu pe hi nomahundju omengi ke nokuyenda komukwao ku maku patwa omahundju omengi?”

Otjihorera tjo tja tjita kutja Onésime me ripure okuyaruka kehi re oCameroon okukavatera ovazuvarise ngo. Posi yokutja ee rikende. Hapo eye mape ya a yenene okuiririra okukara moCameroon rukwao kombunda yokupita mehi oure wozombura ozengi? Onésime wa karyangera oCameroon oure womieze hamboumwe okutara kutja ma yenene. Nu mombura ndji 2012, eye wa tjindira ngo.

Onésime wa tja: “Ami ee sokuiririra omuinyo weyuru omupyu nomuano ovandu mu ve hupa. MEtuwo rOmerikotameneno, ya ri ouzeu okuhaama kovihavero ovikukutu rukwao.” Nu ama meṱameṱa, eye wina wa tja: “Posi yokutja, otja tjee yandja ombango koprograma ya tjita kutja ehe ripurire kovihavero mbya ri mOmatuwo wOmerikotameneno mu mba ri.”

Mombura ndji 2013, Onésime wa kupa Géraldine, ngwa kotoka koCameroon kombunda yokukara moFrance oure wozombura muvyu. Ozondaya zeṋe ovakupasane mba nḓu va muna mena rokutwapo ombango ya Mukuru poruveze orutenga mehupo rawo? Onésime wa tja: “Eṱe twa ya kOskole yOvasuvarise vOuhona nu aatu vatere poBetel. Oupe nai, mombura imwe uriri ovahongwa vOmbeibela 20 mombongo yetu va papitisiwa. Ami tjiri mbi nongamburiro kutja mbi ri moruveze ndu ri rwo ‘rwokupata omahundju.’” (Mar. 1:17, 18) Géraldine wa tja: “Ami mba serwa ozondaya ozengi kombanda ya inḓa nḓee undjire ko.”

Judith wa tjindira kehi ndi oUnited States, posi yokutja aa vanga okuungura ovingi motjiungura tjokuzuvarisa. Eye wa tja: “Indu tjee sokuyaruka kombunda yokuryangera eṱunḓu randje moCameroon, ee riri mena rokutja ee sokuisa ovahongwa vandje vOmbeibela.” Posi yokutja, Judith aa keyakeya okuyaruka koCameroon. Eye wa  ri noviungura mbyaavi sutu nawa nu mbyaavi mu yandjere okusuta omapangero ihe ngaa hepa moCameroon. Posi yokutja, Judith wa kambura mu Jehova nu wa tjindira koCameroon. Eye u tja u hihamenwa i yoviṋa tjiva mbya ri navyo moUnited States. Eye wa kumba ku Jehova kutja me mu vatere okuiririra, nu wa vaterwa i omayanḓiparisiro nga muna okuza komutarere worukondwa nomukazendu we.

Judith nai u tja: “Moure wozombura ndatu mba vatera ovandu vane okupapitisiwa.” Eye wa uta okukarera otjomukandjira wapeke. Ndino, eye u karera pu nomurumendu we Sam-Castel, motjiungura tjokukavarura ozombongo. Nu hapo tjike na ihe ya Judith? Eye neṱunḓu re va yenena okumuna ohospitala mehi rarwe ndjaai yenene okupanga ihe otjari. Nu omatauriro ya kayenda nawa.

Omurumendu omukambure wena Victor wa tjindira koCanada. Kombunda yokulesa orupa mokambo kOruhungu ohunga nomahongero wokombanda, eye wa isa omahongero na utu okurihonga oviungura vyokomake. Eye wa tja: “Ihi tja tjita kutja mbi mune oviungura tjimanga nu mbi rire omukandjira, otjiṋa tjee vanga okutjita oure woruveze orure.” Kombunda, Victor wa kupa Caroline nu aveyevari va karyangera oCameroon. Ngunda ave ri ngo, owo va karyangera orutavi rwomberoo. Nu ovakambure tjiva ve ve tunduuza okukarera moCameroon. Victor wa tja: “Eṱe aatu yenene okuyakura omaṋangero ngo mena rokutja katwari noviṋa ovingi mehupo.” Nandarire kutja Caroline wa ri omuverandu, owo va tya okutjindira ngo.

Victor na Caroline va uta okukarera otjovakandjira voruveze aruhe okuvatera ovandu mbe nonḓero yokurihonga Ombeibela. Oure woruveze orusupi, owo aave yenene okuhupa kovimariva mbi va pwika. Posi yokutja, kombunda owo va yaruka koCanada okukaungura oure womieze omiṱiṱi, tji tje ve yandjera kutja ve yaruke rukwao koCameroon okukayenda komurungu notjiungura tjokuzuvarisa. Hapo ozondaya zeṋe nḓu va muna? Owo va ya kOskole yOvazuvarise vOuhona, va karera otjovakandjira vapeke nu nai ve vatera nomatungiro. Victor wa tja: “Okuisa ehupo retu ewa, kwa tjita kutja tu mune omuano Jehova mbwe tu vatera mehupo retu.”

Mombura ndji 2002, Alain, ngwa ri omuhongwa pomahongero wokombanda moGermany wa lesa okambapira nga, Youths—What Will You Do With Your Life? Oviṋa mbya lesa vye mu hinga kutja ma kare nozondando ozombe. Mombura ndji 2006, eye wa ya kOskole yOmbeibela yovarumendu ovakombe nu wa hindwa koCameroon, ehi kakwaterwa.

MoCameroon, Alain wa muna oviungura vyopokati koruveze. Kombunda, eye wa muna oviungua mbyaa vi sutu nawa. Posi yokutja, ee rikende kutja kamaa munu oruveze oruingi rwokuzuvarisa nokuhonga tjimuna tjaa tjiti. Kunao, indu tja ningirwa okurira omukandjira wapeke, eye wa yakura omaṋangero ngo nokuhina okuripura pevari. Omuhona we, we riyandjera okumusuta ovimariva vyokombanda, posi yokutja Alain ka yakurire. Nu wa rira omukandjira wapeke. Kombunda, eye wa kupa Stéphanie, ngwa kara oure wozombura ozengi moFrance. Hapo omauzeu yeṋe Stéphanie nga muna tja za nokutjindira koCameroon?

Stéphanie wa tja: “Ami mba rira omuverandu, posi yokutja mba muna omapangero nombatero ndjee hepa.” Ovakupasane mba va muna ozondaya mena ronḓarorure yawo. Alain wa tja: “Indu tji  twa ya kokaresevate kena ndi Katé, ku ku hina aa ku zuvarisiwa aruhe okukazuvarisa ngo, eṱe twa hakaena novandu mbaave vanga okurihonga Ombeibela. Nu kombunda twa yenena okurihonga kuna wo okupitira mongoze. Ovahongwa vevari vOmbeibela va papitisiwa nu pa utwa okambumba kovazuvarise mokaresevate ngo.” Stéphanie wina wa tja: “Tjiri, otjiṋa tjondjoroka okuvatera ovandu okuvaza pondondo yokuriyandja oveni ku Jehova. Mokukarera mwi, twa yenena okumuna ondjoroka ndji za mokuvatera ovandu okuvaza pondondo yokupapitisiwa.” Ndino, Alain na Stéphanie ve ri motjiungura tjokuvarura ozombongo.

Gisèle wa papitisiwa ngunda e ri moskole yomapangero moItaly. Otjihorera tjovakupasane ovakandjira mbaave mu hongo Ombeibela, tje mu vatera kutja ma vange okuungura ovingi motjiungura tjokuzuvarisa. Kunao, Gisèle wa uta okukarera otjomukandjira woruveze aruhe ngunda e ri pomahongero wokombanda.

Gisèle aa vanga okuyaruka koCameroon kokutja ma kaungure ovingi motjiungura tjokuzuvarisa. Posi yokutja, ee rikende. Eye wa tja: “Ami ee sokunakaura outure wandje moItaly nokuisa omapanga novazamumwe vandje.” Nandarire nao, mu Mei 2016, Gisèle wa tjindira koCameroon. Oruveze oruṱiṱi kombunda yanao, eye wa kupwa i Léonce, nu orutavi rwomberoo moCameroon rwe ve ningira kutja ve tjindire koAyos, okahuro ku ka ri nouhepe wovazuvarise vombuze ombwa.

Hapo ehupo ra ri vi moAyos? Gisèle wa tja: “Povikando oure wovivike, kapari norutjeno nu kaatu yenene okutjatja ozongoze zetu, nu potuingi ozo kazari kombepo. Ami mbe rihonga okuzika komuriro, okukateka omeva nokakirivaha nu ee ungurisa okarambe ngurova indu tji ku hi novandu ovengi.” Hapo ovakupasane mba va tjinda vi omarundurukiro ngo? Gisèle wa tja: “Ombepo ya Jehova, oruvara okuza komurumendu wandje, omayanḓiparisiro nombatero yotjimariva povikando okuza komaṱunḓu wetu nomapanga, vye tu vatera tjinene.”

Hapo Gisèle u nondjoroka kutja wa yaruka konganda? Eye wa tja: “Ii nomasa! Nandarire kutja rutenga pa ri noupotapota nokuwa momuinyo, eṱe twa tuurunga avihe mbyo. Mena ranao atuyevari twa yenena okumuna kutja twa tjita imbi mbyaavi heperwa po okutjitwa. Tu nongamburiro mu Jehova nu oupanga wetu kuna ye we kurira ko.” Léonce na Gisèle va ya kOskole yOvazuvarise vOuhona, nu nai ve vatera otjovakandjira vapeke voruveze orusupi.

Tjimuna ovapate vomahundju nouvanḓe tji ve tuurunga omauzeu pekepeke kokutja ve pate omahundju omengi. Wina imba mbe yaruka komahi ku va kwaterwa ve tjita omarundurukiro okuvatera imba mbe puratena kombuze yOuhona. Jehova kamaa zembi ovazuvarise mba, mba raisa orusuvero kena re. (Neh. 5:19; Hebr. 6:10) Indu tji wa tura mehi rarwe nu ozuu kutja ehi ku wa za ku nouhepe wovazuvarise, hapo kamaa pe ya oyaruka? Tji wa tjiti nao, Jehova me ku sere ondaya.—Omiano 10:22.