ORUPA RWOMAKONḒONONENO 45
Omuano Jehova me tu vatera okuyenenisa otjiungura tjetu tjokuzuvarisa
“Owo mave tjiwa kutja mu na omuprofete mokati kawo.” —ESEK. 2:5.
EIMBURIRO 67 ‘Zuvarisa Ombuze’
OMAPU KU MATU KATARA a
1. Ovikwaye mbi matu sokuundjira ko, nu matu sokukara nongamburiro yaye?
MATU yenene okuundjira ko kutja ovandu tjiva mave tu pirukire indu tji matu zuvarisa. Omapirukiro ngo mape ya aye ririre ko omengi moruyaveze. (Dan. 11:44; 2 Tim. 3:12; Omavan. 16:21) Posi yokutja, matu yenene okukara nongamburiro kutja Jehova me tu pe ombatero ndji matu hepa. Omena raye? Mena rokutja Jehova aruhe aa vatere ovakarere ve okuyenenisa oviungura vyawo, nandarire kutja vya ri ovizeu. Otjotjihorera, ngatu tare koviṋa tjiva mbya tjitwa komuprofete Esekiel ngwaa zuvarisa kOvajuda mba ri mouhuura moBabilon.
2. Jehova wa tja vi ohunga novandu Esekiel kaa sokuzuvarisa, nu matu katara ku ye morupa ndwi? (Esekiel 2:3-6)
2 Esekiel aa sokuzuvarisa kovandu mbe ri vi? Jehova wa tja owo ‘ovirangaranga,’ ‘kave mu yozike,’ nu “ovapirukire.” Owo va ri ovandu ovahihamise tjimuna omakwiya, novanaumba tjimuna ozondje. Jehova opa zokuraera Esekiel povikando ovingi kutja “o tira.” (Lesa Esekiel 2:3-6.) Esekiel wa yenena okuyenenisa otjiungura tje tjokuzuvarisa mena rokutja (1) wa hindwa i Jehova, (2) ombepo ya Mukuru ye mu pa omasa ngaa hepa, nu (3) Embo ra Mukuru re kurisa ongamburiro ye. Omomuano uṋe oviṋa vitatu mbi mu vya vatera Esekiel? Nu vi tu vatera vi ndino?
ESEKIEL WA HINDWA I JEHOVA
3. Hapo mape ya Esekiel wa yanḓiparisiwa i yomambo yeṋe, nu omomuano uṋe Jehova me mu pa ongamburiro kutja me mu vatere?
3 Jehova wa raera Esekiel na tja: “Ami me ku hindi.” (Esek. 2:3, 4) Omambo ngo mape ya, ya yandja omasa ku Esekiel. Omena raye? Mena rokutja, Esekiel ngahino wa zemburuka kutja Jehova wa raera Moses na Jesaja omambo tjingewo, indu tje ve toorora okurira ovaprofete ve. (Eks. 3:10; Jes. 6:8) Esekiel wina aa tjiwa omuano Jehova ma vatera ovaprofete vevari mbo okutuurunga omauzeu. Omuprofete Esekiel wa ri nepu ewa rokukara nongamburiro kutja Jehova me mu vatere, indu tje mu raera povikando vivari kutja, “Ami me ku hindi.” Wina, povikando ovingi Esekiel wa tjanga omambo ngu maye tja: “Muhona wa hungira ku ami.” (Esek. 3:16) Neye povikando ovingi wa tjanga omambo nga: “Muhona wa hungira ku ami.” (Esek. 6:1) Tjiri Esekiel wa ri nongamburiro kutja wa hindwa i Jehova. Ihe ya Esekiel wa ri omupristeri. Eye mape ya aa hongo Esekiel kutja Jehova aruhe aa raere ovaprofete ve kutja me ve vatere. Otjotjihorera, Jehova wa raera Isak, Jakob, na Jeremia omambo ngu maye tja: “Ami mbi ri puna ove.”—Gen. 26:24; 28:15; Jer. 1:8.
4. Omambo yeṋe nga yanḓiparisa Esekiel?
4 Hapo Ovaisrael ovengi va raisa ongaro iṋe komazuvarisiro wa Esekiel? Jehova wa tja: “Nungwari kape na umwe wOvaisrael ngu ma vanga okuzuva kove; owo kave vanga okupuratena nangarire ku Ami.” (Esek. 3:7) Ovandu va nakaura Jehova indu tji va nakaura Esekiel. Omambo ngo ya yandja ongamburiro ku Esekiel kutja wa ungura otjiungura tje nawa otjomuprofete, nandarire kutja ovandu ve mu nakaura. Jehova wina wa yanḓiparisa Esekiel kutja indu ombuze ye yombanguriro tji ya yenenisiwa, ovandu “mave tjiwa kutja mu na omuprofete mokati kawo.” (Esek. 2:5; 33:33) Otjiperi kutja omambo omayanḓiparise ngo ya yandja omasa Esekiel ngaa hepa, okuyenenisa otjiungura tje tjokuzuvarisa.
EṰE TU HINDWA I JEHOVA NDINO
Tjimuna Esekiel, eṱe mape ya atu nyekererwa nokupirukirwa, posi yokutja matu tjiwa kutja Jehova u ri pu na eṱe (Oparagrafa 5-6)
5. Otja ku Jesaja 44:8, ovikwaye mbi tu pa ouvanḓe?
5 Eṱe wina tu kara nouvanḓe, mena rokutja tu tjiwa kutja Jehova ongwe tu hinda okuzuvarisa. Eye we tu ingoneka indu tje tu isana kutja oweṱe “ovahongonone” ve. (Jes. 43:10) Tjiri, indjo ondjingonekero yapeke. Tjimuna Jehova tja raera Esekiel kutja “o tira,” Jehova wina u tu raera kutja “amu tira.” Ongwaye tji tu ha sokutira ovetupirukire? Mena rokutja, eṱe twa hindwa i Jehova neye u tu vatera tjimuna tja vatera Esekiel.—Lesa Jesaja 44:8.
6. (a) Jehova u tu pa vi ongamburiro kutja me tu vatere? (b) Ovikwaye mbi tu yanḓiparisa?
6 Jehova wa kwizika kutja me tu vatere. Otjotjihorera, ngunda Jehova e hi ya tja: “Oweṋe ovahongonone vandje,” eye wa tja: “Tji mo kondo omeva omakoto, Ami me kara puna ove; omaumba woye kamaaye ku tanana. Tji mo tuurungire momuriro, ko nokupya ko; oviwonga ovizeu mbi mavi ya kavi nokukuhihamisa ko omutima.” (Jes. 43:2) Indu tji matu zuvarisa, eṱe povikando tjiva tu rihaka kovipwite ovingi mbi matu yenene okusasaneka nomupupo, nomauzeu omengi ngu matu yenene okusasaneka nomuriro. Posi yokutja, Jehova me tu vatere kutja tu kayende komurungu notjiungura tjokuzuvarisa. (Jes. 41:13) Ovandu ovengi ndino ve nakaura ombuze yOmbeibela, tjimuna momayuva wa Esekiel. Posi ya, ihi katji nokuheya kutja katu zuvarisire nawa otjOvahongonone va Mukuru. Eṱe tu yanḓipara, mena rokutja tu tjiwa kutja Jehova u nondjoroka indu tji matu kayenda komurungu okuzuvarisa ombuze ye nouṱakame. Omuapostele Paulus wa tja: “Ndjambi ma yandja ku auhe ondjambi ye otja koviungura vye mbya ungura.” (1 Kor. 3:8; 4:1, 2) Omukazendu omukambure ngwa ungura otjomukandjira oruveze orure wa tja: “Mbi kara nondjoroka okutjiwa kutja Jehova u sera ondaya kozongondjero zetu.”
OMBEPO YA MUKURU YA YANDJA OMASA ESEKIEL NGAA HEPA
Esekiel ma munu otjirimunikise tji matji raisa etemba ra Jehova romeyuru, nu matji mu yanḓiparisa kutja Jehova me mu vatere okuyenenisa otjiungura tje tjokuzuvarisa (Oparagrafa 7)
7. Esekiel mape ya wa fula vi, indu tje ripura ohunga notjirimunikise tja muna? (Tara kotjiperendero tjokombanda yokambo nga.)
7 Esekiel wa muna omuano ombepo ya Mukuru mu i ri onamasa. Imbi Esekiel mbya muna motjirimunikise, vye mu vatera okumuna kutja ombepo ondjapuke i vatera ovaengeli ovanamasa nokunyinganyingisa oviryo vyetemba reyuru. (Esek. 1:20, 21) Esekiel wa tjita vi tja za nokumuna otjirimunikise ho? Eye wa tjanga imbi mbya tjitwa. Eye wa tja: “Tji mba muna otjirimunikise hi, otji mba wa onḓurumika.” Esekiel wa himisirwe i otjirimunikise hi nga tja wira pehi. (Esek. 2:1) Indu Esekiel tje keripura notjirimunikise ho, otjo mape ya tja yanḓiparisa ongamburiro ye, kutja nombatero yombepo ya Mukuru, eye ma yenene okuyenenisa otjiungura tje.
8-9. (a) Kwa tjitwa tjike ku Esekiel indu Jehova tje mu raera kutja nga ‘sekame’? (b) Jehova komurungu wa yanḓiparisa vi Esekiel kotjiungura tje otjizeu tjokuzuvarisa?
8 Jehova wa rakiza Esekiel na tja: “Muatje womundu, sekama! Me vanga okuhungira kuna ove.” Indu Jehova tja raera Esekiel kutja nga sekame, Esekiel wa muna omasa ngaa hepa. Esekiel wa tja: “Ombepo yaNdjambi ye ndji pa omasa nai ndji kuramisa kozombaze.” (Esek. 2:1, 2) Esekiel aa vaterwa i ‘yomasa waMuhona’ motjiungura tje tjokuzuvarisa na kombunda yanao. (Esek. 3:22; 8:1; 33:22; 37:1; 40:1) Ombepo ya Mukuru ya yanḓiparisa Esekiel okuungura otjiungura tja pewa, tjokuzuvarisa kovandu “ovirangaranga noveritongamise” momaturiro we. (Esek. 3:7) Jehova wa tja nai ku Esekiel: “Nambano, tara, Ami me ku tjiti kutja u rire otjirangaranga nomukukutu otja owo tjinga ave ri. Ami me ku tjiti omuzikame otja oruuwa, omukukutu otja ondiamanta. O tira ovapirukire mbo.” (Esek. 3:8, 9) Ya ri tjimuna Jehova aa raere Esekiel kutja, ‘O urumisiwa i yourangaranga wovandu. Ami me ku vatere.’
9 Okuzambo, Mukuru wa vatera Esekiel nombepo ondjapuke motjiungura tje tjokuzuvarisa. Esekiel wa tja: “Muhona we ya ku ami nomasa omanene.” Kwa kambura otjivike komuprofete okurihonga nokuzuva nawa ombuze ndjaa sokuzuvarisa, kokutja ma yenene okuizuvarisa kovapuratene ve momuano mu mai zuvakwa nawa. (Esek. 3:14, 15) Okuzambo Jehova we mu raera kutja nga yende kotjana, nu ngunda a ri ngo “omasa wOmbepo yaNdjambi ya hita mu [ye].” (Esek. 3:23, 24) Esekiel wa ri e rirongere okuuta otjiungura tje tjokuzuvarisa.
OMBEPO YA MUKURU I TU PA OMASA NGU MATU HEPA NDINO
Ovikeṋa mbya vatera Esekiel, nu mbi tu vatera ndino wina okuyenenisa otjiungura tjetu tjokuzuvarisa? (Oparagrafa 10)
10. Ombatero yaye ndji tu hepa kutja tu yenenise otjiungura tjetu tjokuzuvarisa, nu omena raye?
10 Ombatero yaye ndji tu hepa kutja tu yenenise otjiungura tjetu tjokuzuvarisa? Kokutja tu zire epuriro ndo ngatu ripurire ku imbi mbya tjitwa ku Esekiel. Eye ngunda e hi ya uta otjiungura tje tjokuzuvarisa, ombepo ya Mukuru ye mu pa omasa ngaa hepa. Tjimuna Esekiel, eṱe ndino wina tu yenena okuungura otjiungura tjetu tjokuzuvarisa, mena rokutja ombepo ya Mukuru i tu vatera. Ongwaye tji matu tja nao? Mena rokutja Satan u kondja nomasa okutjaera otjiungura tjetu tjokuzuvarisa. (Omavan. 12:17) Ovengi ve muna kutja Satan u nomasa tjinene, nu eṱe kamaatu yenene okumurwisa. Posi yokutja, okupitira motjiungura tjokuzuvarisa eṱe tu mu taara. (Omavan. 12:9-11) Omomuano uṋe? Indu tji matu zuvarisa, eṱe tu raisa kutja katu tira Satan. Otjikando atjihe tji matu zuvarisa, tu taara Satan. Nu hapo matu rihongo tjike indu tji matu munu kutja tu yenena okuungura otjiungura tjetu tjokuzuvarisa, nandarire kutja ovanavita ve tu pirukira? Matu rihongo kutja Jehova u tu pa omasa okupitira mombepo ye ondjapuke, nokutja eye u nonyuṋe mu eṱe.—Mat. 5:10-12; 1 Petr. 4:14.
11. Ombepo ya Mukuru mai tu vatere vi, nu matu sokutjita vi kutja tu i mune?
11 Ovikeṋa vyarwe mbi matu rihongo indu tji matu ripura ohunga nomuano Jehova ma yandja omasa Esekiel ngaa hepa okuzuvarisa ombuze? Ombepo ya Mukuru i yenena okutupa omasa ngu matu hepa kutja tu tuurunge ouzeu ngamwa auhe mbu matu munu motjiungura tjokuzuvarisa. (2 Kor. 4:7-9) Nu hapo matu sokutjita vi kutja tu mune ombepo ya Mukuru? Eṱe matu sokukumbira ombepo ndjo nokuhaisa ko, nu matu sokukara nongamburiro kutja Jehova ma zuvire ozongumbiro zetu. Jesus wa tja nai kovahongewa ve: “Kareye pokuningira, . . . kareye pokupaha, . . . kareye pokukongora.” Indu tji mave tjiti nao, Jehova me “ve pe Ombepo ondjapuke.”—Luk. 11:9, NWT, 13; Oviung. 1:14; 2:4.
EMBO RA MUKURU RA YANḒIPARISA ONGAMBURIRO YA ESEKIEL
12. Otja ku Esekiel 2:9–3:3, embo emangwa ra zire pi, nu mu ro mwa tjangerwe tjike?
12 Ombepo ya Mukuru ya yandja ouvanḓe ku Esekiel mbwaa hepa kutja ma zuvarise ombuze, posi yokutja Embo ra Mukuru wina ra yanḓiparisa ongamburiro ya Esekiel. Motjirimunikise, Esekiel wa munine eke nda handere embo emangwa. (Lesa Esekiel 2:9–3:3.) Nu hapo embo emangwa ndi ra zire pi? Nu mu ro mwa tjangerwe tjike? Oro hapo ra yanḓiparisa vi ongamburiro ya Esekiel? Ngatu katare. Embo emangwa ra zire kotjihavero tja Mukuru tjouhona. Jehova mape ya wa ungurisa umwe wovaengeli vane Esekiel mba muna motjirimunikise otjitenga okuyandja embo emangwa ku Esekiel. (Esek. 1:8; 10:7, 20) Embo emangwa ra ri nombuze ya Mukuru yombanguriro Esekiel ndjaa sokutjivisa kovahuurwa mba pirukira Jehova. (Esek. 2:7) Ombuze ndjo ya tjangerwe kominda aviyevari vyembo emangwa ndo.
13. Jehova wa raera Esekiel kutja nga tjite vi kembo emangwa, nongwaye tjaa ri tjata omuzeze tjimuna ouitji wozonywitji?
13 Jehova wa raera omuprofete we okurya embo emangwa kutja me ‘kutise na ro ezumo re.’ Esekiel wa raisa onḓuviro na ri embo emangwa arihe. Okutjita nao aaku hee tjike? Esekiel aa hepa okuzuva nawa ombuze ndji ma katjivisa. Eye aa sokukara nongamburiro mombuze ndji kutja i mu tunduuze okuzuvarisa. Okuzambo, pa tjitwa otjiṋa otjihimise. Esekiel wa muna kutja embo emangwa “iyari tjata omuzeze tjimuna ouitji wozonywitji.” (Esek. 3:3) Omena raye? Mena rokutja ku Esekiel ondjingonekero yokukuramena po Jehova ya ri otjiṋa otjiwa tjimuna omuzeze wouitji wozonywitji. (Eps. 19:8-11) Eye wa ri nondangi kutja Jehova we mu yakura okumukarera otjomuprofete we.
14. Ovikwaye mbya vatera Esekiel okuyakura otjiungura tje?
14 Jehova wa hungira komurungu na tja ku Esekiel: “Puratena nawa nu u zemburuke omambo aehe ngu me ku raere.” (Esek. 3:10) Nomambo ngo Jehova wa raera Esekiel okukondja okuzemburuka imbi mbya tjangwa membo emangwa nokuripurira ko oukoto. Indu Esekiel tja tjita nao, ongamburiro ye ye kurira ko. Oyo wina ya tjita kutja ma kare nombuze onamasa okukatjivisa kovandu. (Esek. 3:11) Indu Esekiel tja zuva nawa, nu tja kara nongamburiro mombuze ya Mukuru, eye wa uta okuzuvarisa nu wa kayenda komurungu nga tja mana otjiungura tje.—Sasaneka Epsalme 19:14.
OMAMBO WA MUKURU YE KURISA ONGAMBURIRO YETU NDINO
15. Matu hepa ‘okuzemburuka’ tjike kutja tu kare nonḓaro orure?
15 Kutja tu kare nonḓaro orure motjiungura tjetu tjokuzuvarisa, eṱe wina matu hepa okuyandjera omambo wa Mukuru okukurisa ongamburiro yetu. Matu hepa ‘okuzemburuka’ omambo ayehe Jehova nge tu raera. Ndino Jehova u hungira ku na eṱe okupitira mEmbo re, Ombeibela. Omomuano uṋe mu matu yenene okutjita kutja Embo ra Mukuru ri ṱune kouripura wetu, koumune wetu na kozondando zetu?
16. Matu sokutjita vi nEmbo ra Mukuru, nu matu yenene okutjita vi kutja tu ri zuve nawa?
16 Indu tji matu ri ovikurya na indu tji mavi hiti morutu, otutu twetu tu harera ko omasa. Momuano tjingewo, indu tji matu konḓonona Embo ra Mukuru nokuripurira ko oukoto, ongamburiro yetu i harera ko omasa. Ihi otjiṋa Jehova tje vanga kutja tu tjiwe. Jehova u vanga kutja tu ‘kutise ezumo’ retu nEmbo re. Pu mape hee kutja u vanga kutja tu zuve Embo re nawa. Eṱe matu yenene okutjita nao indu tji matu kumbu, tji matu lese Embo re, na tji matu ripurire ko oukoto. Rutenga, eṱe tu kumba okurongerisa omitima vyetu kutja tu yakure omeripura wa Mukuru. Okuzambo, tu lesa orupa mOmbeibela. Tji twa zu mbo, tu hekana kaṱiṱi kutja tu ripurire ko oukoto ku imbi mbi twa lese. Indu tji twa tjiti nao, maku kongorere tjike? Otja pu matu ripurire ko oukoto ku imbi mbi matu lese, opu matu zuu nawa Embo ra Mukuru nu maku kurisa ongamburiro yetu.
17. Ongwaye tji tu sokuripurira ko oukoto ku imbi mbi matu lese mOmbeibela?
17 Omena raye tji matu sokulesa Ombeibela nokuripurira ko oukoto? Okutjita nao maku tu pe omasa ngu matu hepa okuzuvarisa ombuze yOuhona nai, nokuzuvarisa ombuze yombanguriro ndji mape ya atu tjivisa moruyaveze rwopopezu. Wina, indu tji matu ripurire ko oukoto kovikaṋena vya Jehova oviwa, oupanga wetu ku na ye mau kurire ko. Nu matu kara notjiṋa otjitjate notjiwa tjiri. Otjo ohange momuinyo nokukowa mu imbi mbi tu na vyo.—Eps. 119:103.
OMASA WOKUPANḒERA PO
18. Ovandu momaturiro wetu mave sokuyakura tjike, nu omena raye?
18 Eṱe kaweṱe ovaprofete tjimuna Esekiel. Posi yokutja eṱe twe rimanena okukayenda komurungu okuzuvarisa ombuze ya Jehova ndja tjanga mEmbo re, ngandu otjiungura tjokuzuvarisa tji tja yenenisiwa otja kombango ye. Indu oruveze rwombanguriro tji rwe ya, ovandu momaturiro wetu kamaave tja kave rakizirwe, poo Mukuru ka yandjere ombango ku wo. (Esek. 3:19; 18:23) Nungwari mave sokuyakura kutja ombuze ndjaa tu zuvarisa ya za ku Mukuru.
19. Omasa wokuyenenisa otjiungura tjetu tjokuzuvarisa matu isa pi?
19 Omasa wokuyenenisa otjiungura tjetu tjokuzuvarisa matu isa pi? Matu isa moviṋa vitatu mbya yandja omasa ku Esekiel. Eṱe tu kayenda komurungu okuzuvarisa mena rokutja tu tjiwa kutja twa hindwa i Jehova, tu pewa omasa i yombepo ye ondjapuke, nu Embo re ri kurisa ongamburiro yetu. Jehova u tu pa omasa okuyenenisa otjiungura tjetu tjokuzuvarisa nokupanḓera po “nga komaandero.”—Mat. 24:13.
EIMBURIRO 65 Kureye mongamburiro!
a Morupa ndwi, matu katara koviṋa vitatu mbya vatera omuprofete Esekiel okuyenenisa otjiungura tje tjokuzuvarisa. Otja tji matu katara komuano Jehova ma vatera omuprofete we, matu kara nongamburiro kutja Jehova me tu vatere okuyenenisa otjiungura tjetu tjokuzuvarisa.