Paul: Eṱe tjiri twa ri nondjoroka tjinene. Mombura ndji 1985, mu Novemba, twa ri monḓera okuyenda koLiberia, koutokero wa Africa ku matu kakarera otjovahindwa. Onḓera yetu ya kakurama moSenegal. Anne wa tja: “Kwa sewa oiri imwe uriri tjandje twa vaza moLiberia.” Okuzambo twa zuva omatjivisiro nga: “Imba mbu mave i koLiberia ngave heruke monḓera. Ovandu tjiva mave kondjo okurwisa ohoromende, ku nao katu nokuyenena okuyenda ngo.” Eṱe twa kakara pondjuwo yovahindwa moSenegal oure womayuva omurongo, nu aatu zuu mozombuze kutja ovandu ovengi mave zepewa i yohoromende moLiberia. Nu ohoromende kai nokuyandjera ovandu okupita pozoyawo ngurova. Tji va tjiti nao, mave zepewa.

Anne: Eṱe kaweṱe ovandu mbu twa suvera okuryanga kotuveze twarwe. Okuza kouṱiṱi wandje ami ee tjiukwa otjomuatje otjimumandu. Nu nandarire ngamba mbi tira okukonda ondjira. Posi ya eṱe twa ri nonḓero yokuyenda koLiberia, nandarire kutja kwa ri noumba.

Paul: Ami na Anne twe kurira motjirongo tjimwe koutokero wa England. Ovanene vandje na ina ya Anne aave tu tunduuza tjinene okukarera otjovakandjira, nu twa uta okukarera otjovakandjira tji twa za nokumana oskole. Owo va ri nohange kutja twa ri nonḓero okukarera Jehova oruveze aruhe. Tji mba ri nozombura 19, mba ṋangwa okukarera poBetel, nu mo-1982 ami na Anne tji twa za nokukupasana, eye wina we ya koBetel.

Anne: Eṱe twa suverere okukarera poBetel, posi ya twa ri nonḓero yokukavatera koṋa ku ku nouhepe wovazuvarise. PoBetel aatu ungura pu novakambure ovakwetu mbaave karere otjovahindwa, nu ovihorera vyawo mbyo vye tu tunduuza kutja tu vange okukarera otjovahindwa wina. Oure wozombura ndatu, ongurova aihe aatu kumbu ku Jehova ohunga nonḓero yetu yokuvanga okukarera otjovahindwa. Nu twa ri nondjoroka tjinene indu tji twa ṋangwa koskole ya Gilead oitja-79, mo-1985. Nu twa hindwa koutokero wa Africa, koLiberia.

Paul: Eṱe twa ronda monḓera ondenga ndjaai i koLiberia. Ovandu aave tira nu kaave yandjerwa okupita pozoyawo ozoiri tjiva zongurova. Indu ovandu tji va zuu orurokoho rwohauto aave tupuka nokuura, tjaatji raisa kutja owo tjiri va ri nomburuma tjinene. Kutja atu ha uruma, eṱe aatu lese otupa tjiva twOmapsalme  ongurova aihe. Nandarire kutja mwa ri ouzeu mehi, eṱe twa suverere otjiungura tjetu. Ami ee vatere poBetel pu na Mbuti John Charuk, a nu Anne aa piti motjiungura tjokuzuvarisa eyuva arihe. Mbe rihonga oviṋa ovingi okuza ku ye, orondu oure wozombura ozengi eye wa kara moLiberia, nu aa tjiwa omauzeu nozongaro zovakambure ovakwetu nawa.

Anne: Otjikwaye tji tja tjita kutja tu suvere otjiungura tjetu otjipe hi tjimanga? Omena rovakambure ovakwetu. Owo ve tu raisira orusuvero tjinene, nu va ri ovaṱakame ku Jehova. Twa hakahana okutjita oupanga wopopezu ku na wo, nu va rira eṱunḓu retu epe. Owo aave tu yanḓiparisa nomambo omawa. Otjiungura tjokuzuvarisa tja ri otjiwa tjinene. Ovandu kaatu zuvarisa ko aave pindike indu tji tu ha karere pu na wo oruveze orure. Nu aatu yenene okuzuvarisa komundu momivanda vyotjihuro. Indu ovandu tji mave hungire, aatu yenene okukamburira ehungi rawo nu owo kaave pindike. Eṱe twa ri novahongwa vOmbeibela ovengi nu ya ri ouzeu kweṱe okuyenda ku wo avehe. Tjiri twa ri nomaturiro omawa maatu zuvarisa mo.

Paul: Oure wozombura ine mwa ri ohange moLiberia. Posi ya mo-1989, oviṋa avihe vya runduruka nu ovita vya uta. Tji ya ri 2 ku Juli, 1990, ovapirure vohoromende va kambura oruveze ndwa ri ongondoroka noBetel. Oure womieze vitatu, eṱe kaatu yenene okuhakaena ku nomaṱunḓu wetu mba ri pendje nehi poo ku nomberoo ohongora. Kwa ri ovitjitwa vyoutwe, onyungunyungu, ovikurya oviṱiṱi, nu ovakazendu ovengi aave tjerewa. Ongaro ombi ndji ya kambura oure wozombura 14 mehi arihe.

Anne: Ouṋepo womihoko tjiva aavi ru nokuzepasana. Momivanda vyotjihuro mwa ri ovarwe vovita. Owo va ri noviumbe ovingi, aave rihwikike momuano omuhimise nu aave hiti mozondjuwo zovandu nokutoora atjihe tji mave vanga. Ovandu aave zepewa nokuhinombinḓu komutima. Oturova twovandu aatu tendekwa kumwe nokutwarewa potuveze pekepeke, nu tjiva aatu twarewa popezu noBetel. Ovakambure ovakwetu tjiva ovaṱakame va zepewa, mu mamu kamburire mo ovahindwa vevari.

Ovakambure ovakwetu aave twa mo omiinyo vyawo moumba mokuhoreka ovakambure ovakwao mba ri womuhoko mbwa u pahewa okuzepewa. Ovahindwa na imba mbaave karere poBetel aave horeke ovakambure ovakwao mbaave pahewa okuzepewa. PoBetel, ovakambure ovakwetu tjiva mba taurisa omiinyo vyawo aave rara momatuwo wokehi, nu varwe aave rara pu na eṱe momatuwo wokombanda. Eṱe aatu haṋasana etuwo retu pu na varwe hambombari.

Paul: Eyuva arihe, ovarwe vovita aave kondjisa okuhita poBetel okutara kutja twa horeke ovandu poo indee. Twa ri novatjevere vane. Vevari aave  tarere motuiho, nu vevari aave i komuvero okukahungira ku novarwe vovita. Ovatjevere vevari mba i komuvero tji va twa po omake wawo komurungu, ya ri otjiraisiro tjokutja oviṋa avihe vi ri nawa. Posi ya tji va twa ko omake wawo kongotwe ya ri otjiraisiro kutja pe noumba, nu imba mba ri potuiho aave hakahana okukahoreka ovakambure ovakwetu.

Anne: Eyuva rimwe, ovakambure ovakwetu kaave yenene okutjaera otjimbumba tjovarwe vovita okuhita moBetel. Ovarwe vovita ve ndji kongorera nu va ri nozondjembo. Ami mbe ripatera mokaruwo pu nomukazendu omukambure mu mwa ri otjilae, nu moukoto yotjilae mwa ri okaruveze okaṱiṱi kokurihoreka, omukazendu omukambure ngwi me riṋeṋekera mo. Owo va kongora omuvero wokaruwo nomasa. Paul we riheka ku wo kutja ave ha hiti, nu wa tja: “Omukazendu wandje ma ungurisa okaruwo.” Tji mba pata poṋa omukazendu omukambure pe rihorekere, opo pa rokoha. Nu okuzambo mba twa po oviṋa poruveze pu vya sokukara, nu okutjita nao kwa kambura oruveze. Otjiṋa hi tja tjita kutja ovarwe vovita ve temwe kutja me ungura ye. Ku nao, mba urumine tjinene nu ee zezera orutu aruhe. Ami mbe ripura kutja hapo me tjiti vi? Indu tji mba paturura ngunda mbi ri mongaro ndji, owo mave munu kutja mbi notjiṋa tji mba horeke. Ami mba kumba momutima nu e ningire ombatero ku Jehova. Okuzambo, mba paturura omuvero nu e ve korisa noupore. Umwe wawo we ndji undurira meṋe, a hiti mokaruwo, ai ongarate kotjilae nu a utu okupyanga oviṋa avihe motjilae. Eye kaa kambura kutja kamunine otjiṋa. Eye notjimbumba tje va hita momatuwo warwe okukapaha ovandu, nu wina va hita momitutu okutara kutja mu novandu. Nu owo kave munine otjiṋa.

Paul: Potuingi, eṱe katwa ri novikurya okurya omuhukomunene, posi ya omerikotameneno womuhuka woBetel ya ri tjimuna ovikurya vyetu vyomuhukomunene. Eṱe atuhe aatu tjiwa kutja okulesa nokukonḓonona Ombeibela maku tu pe omasa okutuurunga eyuva ndo.

Eṱe aatu tjiwa kutja indu tji twa i okukapaha ovikurya nomeva, imba mbaatu horeke atja ve zepewa. Potuingi, Jehova ee tu pe oviṋa mbi matu hepa moruveze ndu ri ro nu momuano omuhimise. Jehova ee tu tjevere nu we tu vatera kutja tu porimane.

Otja oviṋa mehi tjaavi ririre ko ovivi, ouatjiri wOmbeibela we tu pa omaundjiro. Ovakambure ovakwetu potuingi aave sokutaurisa omiinyo vyawo, posi ya ongamburiro yawo ya ri nomasa, nu aai ve vatere kutja ve wise omitima pehi nandarire kehi yomauzeu ayehe nga. Ovengi aave tja omauzeu ngu va muna nga aaye ve rongerisa kondatumisire ondirise. Ovanene vombongo novarumendu ovakambure omitanda va toora omerizirira wokuvatera ovakambure ovakwao. Ovakambure ovakwetu mba taurira kotuveze twarwe aave vaterasana, nu aave kayenda komurungu okuzuvarisa motuveze two. Nu wina aave hitire ozombongarero zombongo mokuti. Motuveze otuzeu two, okuyenda kozombongarero zombongo nokupita motjiungura tjokuzuvarisa aaku vatere ovakambure ovakwetu okukara nomaundjiro, nu wina aaku ve yanḓiparisa tjinene. Indu tji matu yandja ovikurya nozombanda kovakambure ovakwetu, potuingi owo aave ningire ozondjaṱu zokuzuvarisa moruveze rwozombanda, nu iho tje tu ṱuna tjinene. Ovandu ovengi mba tuurunga omauzeu  omengi mena rovita, va ri nonḓero yokupuratena kombuze ombwa. Ovandu aave yenene okumuna kutja Ovahongonone va Jehova va pangukire. Owo va ri norusuvero rwatjiri, nu va ri nondjoroka nandarire kehi yomauzeu omengi ngo. (Mat. 5:​14-16) Mena rokutja ovakambure ovakwetu va ri ovapyuke, ihi tja tjita kutja ovarwe vovita tjiva mbe ha ri nombinḓu komutima ve rire Ovahongonone va Jehova.

Paul: Povikando vitatu, eṱe twa pita moLiberia oure woruveze orusupi uriri. Nu ovikando vyarwe vivari twa ya oure wombura imwe. Omukazendu umwe omuhindwa wa kahurura omuano maatu fula, nu wa tja: “MoGilead, twe rihonga kutja matu sokusuvera ovakambure ovakwetu nomutima wetu auhe, nu otji twa tjita. Indu tjaatu sokuisa ovakambure ovakwetu mongaro otja indjo, tje tu hihamisa tjinene.” Nandarire kutja twa tjindirire kehi rarwe, eṱe aatu yenene okuvatera ovakambure ovakwetu moLiberia, nu ihi tja tjita kutja tu kare nondjoroka.

Anne: Mu Mei, 1996, twa ri tu vane mohauto yoBetel nu twa ri nozombapira ozonanḓengu ohunga noviungura vyotjira tja Jehova. Eṱe aatu vanga okuyenda koruveze ndwa ri nondjeverero pendje notjihuro nu ndwa ri ozokilometa 16. Ngunda atu ri mondjira, omaturiro mu twa ri ya wirwa i yovarwe vovita. Ovarwe vovita mba va yumba ozohanga meyuru, ave kuramisa ohauto yetu nu ave tu herura tu vetatu, nu ave hingi ohauto yetu ngunda Paul e ri mohauto. Eṱe twa urumine tjinene. Tjimanga, twa muna Paul ama wondjo nu ama ziza ombinḓu motjiuru. Eṱe aatu munu kutja wa yahwa, posi ya twa hakahana okuripura kutja andakuzu wa yahwa katja kayenda. Nungwari wa tonwa i yomurwe wovita umwe ne mu undurire pehi okuza mohauto. Otjiṋa otjiwa, ka hihamenwe tjinene.

Pa ri orori ndjaai kapita mbo, mu mwe urire ovandu mbaave tira ovarwe vovita tjinene. Eṱe twa ronda morori ndji, posi ya kamwa ri noruveze moukoto, ku nao twe rihanda korori okuza pendje. Eṱe twa hara okuwa morori, orondu omuhinge aa tupukisa. Twe mu raera kutja nga wise omaze pehi posi ya eye aa tira. Tji twa vaza motjihuro, twa urumine tjinene nu omaṱupa wetu aaye zezera.

Paul: Eṱe aatu tarasana nu twa ri nondova nozombanda nḓa tauka, nu kaatu kambura kutja pe ya vi tu hupe. Popezu na eṱe pa ri onḓera ndjaai munika tjimuna mai nyanyauka, orondu ya yaherwe povikando ovingi. Meyuva ependukirwa oyo aai sokututwara koSierre Leon. Ku nao eṱe twa rara meṋe yonḓera ndjo, nu tji twa vaza moSierra Leon twa ri nohange kutja tu nomuinyo, posi ya aatu rikende ohunga novakambure ovakwetu moLiberia.

Anne: Eṱe twa vaza nawa moFreetown poBetel, nu ovakambure ovakwetu ve tu ṱakamisa nawa. Posi ya, nokuhinokuundjira ko mba uta okuripura tjinene ohunga noviṋa ovivi mbya tjitwa moLiberia. Eyuva arihe ami ee tira kutja mape tjitwa otjiṋa otjivi nu hee yenene okuripura nawa, nokumuna nawa oviṋa ongondoroka na ami. Potuingi ongurova ee yanḓimuka ame zezera nokuuruma kutja mape tjitwa otjiṋa otjivi. Nu hee yenene okusuvana nawa. Paul ee ndji pukata nu atu kumbu pamwe. Aatu imbura omaimburiro wOuhona nga tji mba wisa omutima pehi. Ami ee munu kutja me vere oviyoze nu hi nokuyenena okukarera otjomuhindwa rukwao.

Ami himee roro okuzemba oviṋa mbya tjitwa kombunda yanao. Motjivike ho eṱe twa muna oumbo uvari. Kemwe ka ri okambo nga Penduka! 8 ku Juni, 1996. Nu ka ri norupa ndwa ri nepu ndi “Coping with Panic Attacks.” Tji mba za nokulesa okambo nga mba tjiwa kutja ongwaye tji mba ri mongaro ndjo. Okambo oketjavari ka ri okambo kOruhungu 15 ku Mei, 1996 ku ka ri norupa ndwa ri nepu ndi “Where do they get their strength?” Okambo kOruhungu ngo ka ri notjiperendero tjombombo ndja ri novivava mbya hihamenwe. Oko ka kahurura kutja tjimuna ombombo tji i yenena okurya nokutuka nandarire kutja ya hihamwa ovivava, eṱe wina nombatero ya Jehova matu yenene okukayenda komurungu okuvatera varwe nandarire kutja tu nomihihamo mominyo. Okupitira moumbo mbwi, Jehova we ndji pa oviṋa mbye hepa moruveze ndu ri ro. (Mat. 24:45) Ami mba paha omapu warwe tjimuna nga, nu e twa pamwe membo rimwe. Owo tjiri ye ndji vatera nu hi ya ri nomeripura ngo tjinene.

Paul: Eṱe aruhe aatu tjaterwa okuyaruka koLiberia. Eṱe twa karera otjovahindwa oure wozombura ape 20 komaandero wo-2004. Ovita moLiberia vya yanda, nu pa ri ondando yokutungurura orutavi rwomberoo. Nu  tjimanga eṱe twa ningirwa okukaungura otjiungura tjarwe otjipe.

Ihi tja ri otjiṋa otjizeu tjinene kweṱe. Eṱe twa ri noupanga wopopezu ku novakambure ovakwetu moLiberia. Owo va ri tjimuna eṱunḓu retu, nu kaatu vanga okuvesa. Posi ya eṱe twa muna omuano Jehova me tu vatera indu tji twa isa omaṱunḓu wetu oveni nu atu i koGilead. Ku nao, twa yakura otjiungura otjipe hi. Eṱe twa hindwa koGhana, ehi ropopezu na Liberia.

Anne: Eṱe twa rira tjinene tji twa isa oLiberia. Eṱe kaatu undjire ko indu Mbuti Frank, omukambure omunene motjiwondo tje tu raera kutja: “Eṋe tjiri mamu sokutuzemba.” Eye wa kahurura komurungu na tja: “Matu tjiwa kutja kamaamu roro okutuzemba, posi ya yandjeye ombango kotjiungura tjeṋu otjipe. Otjo tja zu ku Jehova, ku nao yandjeye ombango kovakambure ovakwetu.” Omambo womurumendu omukambure ngo ye tu vatera kutja tu tjite omapanga omape motjiungura tjetu otjipe.

Paul: Eṱe twa hakahana okusuvera ovakambure ovakwetu moGhana. Tjiri mwa ri Ovahongonone va Jehova ovengi moGhana. Eṱe twe rihonga ovingi okuza kouṱakame nongamburiro yomasa yomapanga wetu omape. Tji twa za nokukarera moGhana oure wozombura 13, twa pewa otjiungura tjarwe otjipe. Eṱe twa ningirwa okukakarera korutavi rwomberoo moKenya, koutjiro wa Africa. Nandarire kutja aatu hihamenwa i yovakambure ovakwetu moGhana na Liberia, eṱe twa hakahana okutjita omapanga omape ku novakambure ovakwetu moKenya. Nu wina twa ri novingi mbyaatu sokuungura moKenya.

Anne: Oure wozombura ozengi ami mba tuurunga omauzeu nga tjita kutja mbi ute okutira tjinene. Tji u kara motuveze otunaumba mape ya atu tjiti kutja u vere poo u hare omburuma. Eṱe katu sokuundjira ko kutja Jehova me tu vatere moviṋa tjimuna mbi. Nandarire nai tji mba zuu ombosiro yondjembo mbi kara nomburuma, nu hi fula omake wandje. Ami mbe rihonga okuṱaṱera koviungurisiwa avihe Jehova mbye tu pa kutja vi tu pe omasa, tjimuna ombatero okupitira movakambure ovakwetu. Mba muna kutja Jehova u tu vatera kutja tu kare motjiungura tjetu indu tji matu kayenda komurungu okukonḓonona Ombeibela, okukumba, okuyenda kozombongarero zombongo, nokupita motjiungura tjokuzuvarisa.

Paul: Tjiva ve pura kutja, “Hapo ove wa suvera otjiungura tjoye?” Omahi ye yenena okurira omawa, posi ya wina aye rire omanaumba. Posi ya, otjikeṋa tji twa suvera tjinene? Eṱunḓu retu rovakambure ovakwetu ovasuverwa. Nandarire kutja twa za mozombazu nḓa haṋika notuveze pekepeke, atuhe twa wana mena rokutja tu karera Jehova. Eṱe aatu munu kutja twa hindwa kutja tu ke ve yanḓiparise, posi ya owo ombe ke tu yanḓiparisa.

Ovakambure ovakwetu va handjauka mouye auhe, pu mape hee kutja tu neṱunḓu koṋa akuhe ku twa i. Indu tji twa kayenda komurungu okuriyameka ku Jehova, eye me tu pe omasa okukara nonḓarorure mongaro aihe ndji tu ri mo.—Fil. 4:13.