1-2. Omozongaro zeṋe mu mape ya atu tjindwa navi? Kahurura.

 JESUS wa yandja omasasanekero ohunga nomukazendu omuhepundu ngwa ningire omupangure kutja me mu ṱire otjari, mena rokutja omundu ee mu tjindi navi. Ovahongewa va Jesus aave zuu nawa omuano omukazendu ngo maa fula, orondu moruveze ndwo ovandu ovengi aave tjindwa navi. (Luk. 18:​1-5) Ndino, eṱe wina matu yenene okuzuva omuano omukazendu ngo maa fula, orondu povikando tjiva eṱe wina twa rora okutjindwa navi.

² Ovandu ovengi mouye ndino ve nombangu, kave raisa ouwa, nu ve nomunenetima. Mena ranao, eṱe tu tjiwa kutja mape ya atu tjindwa navi. (Omuzuv. 5:8) Posi ya, indu omukambure omukwetu tje tu tjindi navi, otjiṋa ho mape ya atji tu wisa momuinyo tjinene. Otjingaperi kutja ovakambure ovakwetu kave pirukire ouatjiri, posi ya povikando tjiva owo ve tu tjinda navi mena rokutja twa kwatwa mouvi. Matu yenene okurihongera komuano Jesus mee ritjinda indu tja tjindwa navi i yovandu ovarunde mbaave mu pirukire. Indu tji matu yenene okuraisa omuretima kovapirukire mbe tu tjinda navi, wina opu matu sokuraisa omuretima kovakambure ovakwetu. Jehova u fula vi indu tji matu tjindwa navi i yovakambure ovakwetu poo i yovandu varwe? Hapo eye u rikendera kweṱe?

3. Matu tjiwa vi kutja Jehova u rikendera komuano ovandu mu ve tjinda ovakarere ve?

³ Jehova u vanga kutja tu tjindwe nawa, neye u muna indu varwe tji mave tu tjindi navi orondu eye “wa suvera ousemba.”  (Eps. 37:28) Jesus we tu kwizikira kutja moruveze ndu ri rwo, Jehova ma eta ousemba “tjimanga.” (Luk. 18:​7, 8) Moruveze rwatjimanga Jehova ma isa po omauzeu wetu ayehe, nu kamaa yandjere kutja tu tjindwe navi rukwao.—Eps. 72:​1, 2.

4. Ombatero iṋe Jehova ndje tu pa ndino?

⁴ Eṱe matu sokuundja oruveze indu Jehova tji ma kaisa po omauzeu wetu ayehe. Posi ya, eye nai u tu vatera indu varwe tji mave tu tjindi navi. (2 Petr. 3:13) Otjotjihorera, Jehova u tu honga omuano mbu matu sokuritjinda indu tji twa tjindwa navi kutja atu he rietere omauzeu warwe omengi. Omuano umwe eye me tjita nao, okupitira motjihorera tjOmuna we tji matji raisa kutja eye aa tjiti vi indu tja tjindwa navi. Jehova wina u tu pa omaronga okupitira mOmbeibela ngu matu yenene okuungurisa indu tji twa tjindwa navi.

YANDJA OMBANGO KOMERITJINDIRO WOYE TJI WA TJINDWA NAVI

5. Ongwaye tji matu hepa okukengeza kutja matu toora omukambo uṋe indu tji twa tjindwa navi?

⁵ Eṱe mape ya atu hihamwa tjinene nu atu u momuinyo indu tji twa tjindwa navi. (Omuzuv. 7:7) Ovakarere ovaṱakame tjimuna Job na Habakuk, va wire momuinyo wina. (Job 6:​2, 3; Hab. 1:​1-3) Okufula nao kanavi, posi ya matu sokuyandja ombango komukambo mbu matu toora kutja atu ha tjiti otjiṋa otjivi.

6. Hapo otjihorera tja Absalom matji tu hongo ye? (Wina tara kotjiperendero.)

⁶ Indu omundu tje tu tjindi navi poo tja tjindi omundu ngu twa suvera navi, mape ya atu vanga okukara nongore. Okutjita nao, mape ya aku ku etere omauzeu omengi. Ngatu tare kotjihorera tja Absalom, omuatje omuzandu wOmbara David. Eye wa pindikire tjinene indu omuṱena kwe Tamar tja tjerewa i Amnon, ngu va zire ihe imwe. Otja komatwako wa Mukuru nga yandjere ku Moses, Amnon aa sokuṱa koviṋa mbya tjitire. (Lev. 20:17) Katjari otjiṋa otjivi kutja Absalom wa pindika, posi ya eye wa zunḓa indu tja zepa Amnon.—2 Sam. 13:​20-23, 28, 29.

7. Omutjange wEpsalme rutenga tja muna ovandu amave tjindwa navi, kwe mu ṱuna vi?

⁷ Imba mbe tu tjinda navi tji ve ha munine omberero ndje ve pwire, mape ya atu utu okuripura kutja kahepero okutjita ouwa. Omutjange wEpsalme umwe wa muna ovandu ovawa amave tjindwa navi i yovarunde, posi ya ovarunde aave munika tjimuna ve  nehupo ewa. Eye wa tja: “Ovarunde va sana ngo, owo aruhe . . . ve wongera ko outumbe.” (Eps. 73:12) Otjiṋa hi tje mu wisa tjinene momuinyo nu wa muna kutja okukarera Jehova omungandjo. Eye wa: “Ami otji mba kondja okuripura nokutjiwa oviṋa mbi, nungwari ovyo vya ri ovizeu tjinene ku ami.” (Eps. 73:​14, 16) Eye wina wa tja: “Nungwari ami mba hara okupandjarisa omeriyamekero wandje ku Muhona, nongamburiro yandje ya ri pokuzenga.” (Eps. 73:2) Otjiṋa hi wina tja tjitwa komurumendu omukambure wena Alberto. a

8. Hapo omurumendu omukambure wa ṱunwa vi indu tja tjindwa navi?

⁸ Alberto wa kumininwa kutja wa vaka ovimariva vyombongo. Ihi tja tjita kutja ma isakewe otjomunene wombongo, nu ovengi mba zuva otjiṋa hi mombongo kaave raisa ondengero ku ye rukwao. Eye wa tja: “Ami mba pindikire tjinene nu mba wire momuinyo.” Mena rokutja wa pindikire tjinene, otjiṋa hi tja ṱuna koupanga we na Jehova, nu eye wa yarukire ombunda mongamburiro oure wozombura ndano. Ehungi ndi, mari tu hongo oviṋa mbi mape ya avi tjitwa indu tji tu ha tjaerere omazenge wetu tji twa tjindwa navi.

 HORERA KU JESUS INDU TJI WA TJINDWA NAVI

9. Omomuano uṋe Jesus ma tjindwa navi? (Wina tara kotjiperendero.)

⁹ Jesus we tu pa otjihorera otjiwa tjokutja matu sokuraisa ongaro iṋe indu tji matu tjindwa navi. Eye aa tjindwa navi i yovandu ovengi, nu nandarire imba oveṱunḓu re aave tja wa vera oviyoze. Ovanane vozongamburiro aave tja omasa we wa isa kozondemone, nu ovasorondate vOvaroma ve mu tatumisa, ave mu yamburura, nave mu zepa. (Mar. 3:​21, 22; 14:55; 15:​16-20, 35-37) Kehi yomauzeu ayehe nga, Jesus katjitire ouvi. Matu rihongo tjike okuza kotjihorera tje?

10. Hapo Jesus wa tjita vi indu tjaa tjindwa navi? (1 Petrus 2:​21-23)

¹⁰ Lesa 1 Petrus 2:​21-23. b Jesus we tu pa otjihorera otjiwa tji matji raisa omuano mbu matu sokuritjinda indu varwe tji ve tu tjindi navi. Eye aa tjiwa oruveze rwokuhungira norwokumwina. (Mat. 26:​62-64) Povikando tjiva, eye aa mwina indu varwe tji mave hungire ovizeze ohunga na ye. (Mat. 11:19) Indu tja hungire, eye kaa hungire omambo omavi ku imba mbaave mu tatumisa, poo okutanda okuvehihamisa. Jesus aa kondjo okutjaera omambo ngu ma hungire, orondu aa ‘undju ku Ndjambi, eye ngu ri omupangure omusemba.’ Jesus aa tjiwa kutja Jehova aa munu indu tjaa tjindwa navi. Eye aa tjiwa kutja Jehova ma ṱunu ouhasemba mbwi moruveze ndu ri rwo.

11. Omomiano viṋe tjiva mu matu yenene okutjevera omambo ngu matu hungire? (Wina tara koviperendero.)

¹¹ Indu omundu tje tu tjindi navi, matu sokuhorera ku Jesus mokutjevera omambo ngu matu hungire. Povikando tjiva katu hepa  okuhungira otjiṋa, orondu oviṋa mbya tjitwa poo mbya hungirwa kavinanḓengu. Poo tu toorora okuhinokuhungira otjiṋa mena rokutja tji twa hungire mape ya atu rietere omauzeu omengi. (Omuzuv. 3:7; Jak. 1:​19, 20) Povikando tjiva, tu hepa okuhungira kutja tu vatere omundu ngwa tjindwa navi poo indu tji matu rwire ongamburiro yetu. (Oviung. 6:​1, 2) Indu tji twa hungire, matu sokukondja okuhungira momuano omupore nu wondengero.—1 Petr. 3:15. c

12. Matu yenene vi okukara nongamburiro mu ‘ingwi ngu pangura osemba’?

¹² Eṱe wina matu yenene okuhorera ku Jesus mokukara nongamburiro mu “ingwi omupangure omusemba.” Indu varwe tji mave tu pangura posyo poo tji mave tu tjindi navi, tu kara nongamburiro kutja Jehova ma tjiwa ouatjiri auhe. Okutjiwa kutja Jehova ma kaṱuna oviṋa avihe, ku tu vatera kutja tu raise onḓarorure indu tji matu tjindwa navi. Tji matu riyameke ku Jehova nokuundja ku ye okuṱuna omauzeu ayehe, ku tu vatera kutja atu ha pindike poo okutonda varwe. Okupindikira varwe mape ya aku tjiti kutja tu tjite otjiṋa otjivi, tu pandjare ondjoroka yetu, nu wina ku ṱuna koupanga wetu ku na Jehova.—Eps. 37:8.

13. Ovikwaye mbi mavi tu vatere okukara nonḓarorure indu tji matu tjindwa navi?

¹³ Otjingaperi kutja, kaaruhe tji matu yenene okuhorera kotjihorera tja Jesus. Orondu povikando, mape ya atu tjiti poo atu hungire otjiṋa tji matji tjiti kutja tu kare nomuhihamwatima. (Jak. 3:2) Nu povikando tjiva tji matu tjindwa navi i varwe ku tjita kutja tu kare nomuhihamo oure womuinyo wetu mouye mbwi. Tji u ri mongaro ndjo, tjiwa kutja Jehova u muna ongaro mu u ri. Nu Jesus u tjiwa omuano mbu mo fula mena rokutja eye wina wa tjindwa navi. (Hebr. 4:​15, 16) Jehova we tu pa otjihorera tja Jesus, nu eye wina we tu pa omaronga okupitira mOmbeibela ngu maye yenene okutuvatera indu tji twa tjindwa navi. Ngatu katare komazeva yevari okuza membo rOvaroma ngu maye yenene okutuvatera.

“YANDJEYE ORUVEZE KOMAZENGE WANDJAMBI”

14. Hapo ‘okuyandjera oruveze komazenge waNdjambi’ ku heya tjike? (Ovaroma 12:19)

¹⁴ Lesa Ovaroma 12:19. Omuapostele Paulus wa raera Ovakriste kutja ngave ‘yandje oruveze komazenge waNdjambi.’ Eṱe tu yandja oruveze komazenge wa Jehova mokumuyandjera okuṱuna oviṋa moruveze na momuano we omusemba. Omurumendu omukambure wena John ngwa tjindwa navi, wa tja: “Ami ee hepa okutjaera omazenge wandje kutja e ha tjiti otjiṋa otjivi, posi ya katjari otjiṋa otjipupu. Ovaroma 12:19 re ndji vatera kutja mbi undje ku Jehova.”

15. Ongwaye tje ri otjiṋa otjiwa okuundja ku Jehova okuṱuna omauzeu?

¹⁵ Eṱe tu muna ouwa indu tji matu undju ku Jehova okuṱuna omauzeu. Tji twa tjiti nao, ku tu vatera kutja atu ha kara nombameno poo okuwa momuinyo mena rokukondja okuzengurura omauzeu wetu oveni. Jehova wa kwizika kutja me tu vatere. Eye u tja ngatu undje ku ye nu wa kwizika okuṱuna omauzeu wetu ayehe. Indu tji twa raisa ongamburiro momakwizikiro wa Jehova wokutja ma pangura imba mbe tu tjinda navi, eṱe katu nokuhepa okupindika, mena rokutja matu tjiwa kutja eye ma tjiti imbi mbi ri ovisemba. Otjiṋa hi otji tja vatera John ngwa tamunwa rukuru. Eye wa tja: “Indu tji mba undju ku  Jehova okuzengurura ouzeu wandje, eye ma ṱunu oviṋa momuano omusemba okukapita ami.”

“OVE NGA RIRE NGU WA URU OUVI AMO TJITI OUWA”

16-17. Omomuano uṋe ongumbiro mu mai yenene okutuvatera kutja ‘tu ure ouvi amatu tjiti ouwa’? (Ovaroma 12:21)

¹⁶ Lesa Ovaroma 12:21. Paulus wina wa raera Ovakriste kutja ngave ure “ouvi amave tjiti ouwa.” Momazuvarisiro wOkondundu, Jesus wa tja: “Suvereye ovanavita na eṋe nu mu kumbire imba mbe mu tatumisa.” (Mat. 5:44) Ihi otjiṋa Jesus tja tjita. Ngahino twe ripura ohunga nouzeu Jesus mbwa tuurunga indu tja paperwa komuti i yovasorondate vOvaroma. Jesus wa tjindwa navi tjinene nu wa tuurunga omihihamo omizeu. Eṱe kamaatu yenene okufula omihihamo mbya ri na vyo.

¹⁷ Jesus wa raisa orusuvero nouṱakame ku Jehova nandarire kutja wa tuurunga omauzeu ngo. Moruveze rwokusenga ovasorondate mbwo, eye we ve kumbira a tja: “Tate, ve isira, orondu tji ve hi nakutjiwa ihi tji mave tjiti.” (Luk. 23:34) Indu tji matu kumbire imba mbe tu tjinda navi tji tu vatera kutja atu ha kara nomazenge, tu pore momuinyo, nu wina tu kare noumune ouwa ohunga na wo.

18. Hapo ongumbiro ya vatera vi Alberto na John?

¹⁸ Ongumbiro ya vatera ovarumendu ovakambure vevari mba tamunwa rukuru morupa ndwi okutuurunga omauzeu mena rokutjindwa navi. Alberto wa tja: “Ami ee kumbire ovarumendu ovakambure mbe ndji tjinda navi. Mba ningira Jehova povikando ovingi okundjivatera kutja e ha kara nomazenge rukwao mena roviṋa mbya tjitwa kwami.” Nai Alberto u karera Jehova rukwao nouṱakame. John wa tja: “Povikando ovingi, ee kumbire omurumendu omukambure ngwe ndji hihamisa. Nu mba ningira Jehova okundjivatera kutja mbi mu isire. Jehova we ndji vatera kutja e ha kara nomazenge ku na ye, nu mba isa okumupangura. Nu ozongumbiro nḓa wina ze ndji vatera kutja mbi kare nohange momuinyo.”

19. Ovikeṋa mbi matu sokutjita ngunda omaandero aye hi ye ya? (1 Petrus 3:​8, 9)

¹⁹ Ngunda atu ri mouye ourunde mbwi, eṱe mape ya atu tjindwa navi. Posi ya, momauzeu ayehe ngu matu tuurunga mo, ngatu kayende komurungu okuningira ombatero ku Jehova mongumbiro. Wina ngatu kayende komurungu okuhorera ku Jesus tji matu tjindwa navi, nokuṱakamisa omirari vyOmbeibela mehupo retu. Indu tji twa tjiti nao, matu yenene okukara nongamburiro yokutja Jehova me tu sere ondaya.—Lesa 1 Petrus 3:​8, 9.