1, 2. (a) Otjiungura tjiṋe tji tja ri otjinanḓengu ku Jesus, nu omena raye? (b) Eṱe matu sokutjita vi kokutja tu rire “ovaungure vapamwe va Ndjambi”?

JESUS KRISTUS wa ri omuhonge womiti nu omuzuvarise. (Mar. 6:3; Rom. 15:8) Eye aa ungura nawa moviungura vye aviyevari mbyo. Otjomuhonge womiti, eye we rihonga omuano omuwa wokuungurisa oviungurisiwa, kokutja ma honge oviṋa oviwa okuza pomiti mbyo. Otjomuhonge wombuze ombwa, eye wa ungurisa ondjiviro ye yOmatjangwa okuvatera ovandu okuzuva ouatjiri wEmbo ra Mukuru. (Mat. 7:28; Luk. 24:32, 45) Tja ri nozombura 30, Jesus wa isa otjiungura tje tjokuhonga omiti mena rokutja aa tjiwa kutja otjiungura tjokuzuvarisa tja ri otjiṋa otjinanḓengu tjinene kuye. Eye wa tja otjiungura tjokuzuvarisa ombuze ombwa yOuhona ya ri epu rimwe Mukuru nde mu hindira. (Mat. 20:28; Luk. 3:23; 4:43) Jesus wa tjita kutja okuzuvarisa ku rire otjiṋa otjinanḓengu mehupo re, nu wa vanga kutja varwe ve kare norupa motjiungura ho wina.​—Mat. 9:35-38.

² Eṱe ka weṱe ovahonge womiti, nungwari oweṱe ovazuvarise vombuze ombwa. Otjiungura ho otjinanḓengu tjinene mena rokutja Mukuru u norupa; kunao opu tu zokuisanewa “ovaungure vapamwe va Ndjambi.” (1 Kor. 3:9; 2 Kor. 6:4) Tu tjiwa nawa kutja ‘ondimwa yomatwako wa [Jehova] owombwi ouatjiri.’ (Eps. 119:159, 160) Kunao tu kondja okuhonga “nawa indi embo rouatjiri ra Ndjambi” motjiungura tjokuzuvarisa. (Lesa 2 Timoteus 2:15.) Mena ra nao, tu kaenda komurungu okukurisa ondjiviro yetu mokuungurisa  Ombeibela, tji tji ri otjiungurisiwa tji tu ungurisa okuhonga varwe ouatjiri ohunga na Jehova, Jesus, nOuhona. Kokutja tu mune ondoṋeno motjiungura tjokuzuvarisa, otjira tja Jehova tje tupa oviungurisiwa mbi tu hepa okuvitjiwa nawa. Ovyo vi ri mOviungurisiwa vyetu vyOkuhonga.

3. Matu sokuyandja ombango ku ye momayuva omasenina nga, nu Oviungura 13:48 ri tu vatera okutjita tjike?

³ Ove mape ya mo ripura kutja ongwaye orupa ndwi tji ru isanewa kutja Oviungurisiwa vyetu vyOkuhonga nungwari ka vyOkuzuvarisa. “Okuzuvarisa” ku heya okuzuvarisa ombuze; nungwari “okuhonga” ku heya okuhonga ombuze kutja i ṱune komutima nomeripura womundu, kokutja eye ma toorereko omikambo ku imbi mbi me rihongo. Moruveze romaandero mu tu ri nai, ondando yetu yokuzuvarisa i sokurira yokukara nomundu ngu matu hongo Ombeibela nokuhonga ovandu ouatjiri wOmbeibela. Ingo maku hee okupaha nonḓero ya tjiri imba mbe nonḓero yokutjiwa owatjiri ‘kokutja ve mune omuinyo waaruhe,’ nokuvevatera kutja ve rire ovakambure.​—Lesa Oviungura 13:44-48.

4. Matu tjiwa vi kutja oouṋe mba “toororerwa omuinyo waaruhe,” nu matu ve paha vi?

⁴ Matu tjiwa vi kutja imba “mba toororerwa omuinyo waaruhe” ooveṋe? Meserewondo etenga, omuano auyerike wokutjiwa ovandu mba ya ri mokuvezuvarisira. Kunao, matu sokutjita otja Jesus pa hungira: “Tji mwe ya motjihuro poo motjirongo tjorive hiteye mu tjo, mu pahe omundu ngu ma vanga okumusekirisa.” (Mat. 10:11) Eṱe ka tu undjire ko kokutja ovandu mbe hi nouatjiri, overitongamise, poo imba mbe hi nonḓero mouatjiri ve puratene kombuze ombwa. Eṱe tu paha ovandu mbe nouatjiri, overisusuparisa, nu mbe nonḓero yokutjiwa ouatjiri. Matu yenene okusasaneka omapahero wovandu nga ku noviungura vyokuhonga omiti Jesus mbyaa ungura, eye mape ya aa paha omiti omiwa kokutja ma ungure na vyo omivero, oviyoke, poo oviṋa vyarwe. Indu tja munu omuti omuwa, eye aa ka paha otjikesa tje tjoviungurisiwa, na ungurisa ondjiviro ndje na yo okuungura potjiṋa. Eṱe wina matu sokutjita nao otja tji matu kondjo okupaha ovandu mbe nomitima omiwa.​—Mat. 28:19, 20.

5. Matu sokutjiwa tjike ohunga noviungurisiwa vyetu mOviungurisiwa vyOkuhonga? Kahurura. (Tara koviperendero pomautiro worupa ndwi.)

⁵ Motjikesa atjihe tjoviungurisiwa, otjiungurisiwa atjihe tji notjiungura tji tja ungurirwa nu ku tji ungurisiwa. Tara koviungurisiwa vyokukonda nokuhonga omiti Jesus mbi mape ya aa ungurisa motjikesa tje. * Eye aa hepa ovirekene; ovikonde, novitopore vyozondovi, novikonde vyomiti momuhapo mbu ma vanga; na tji ma tji ṱekisa pamwe, na tji matji pamisa omiti kumwe. Momuano tjingewo, otjiungurisiwa atjihe mOviungurisiwa vyetu vyOkuhonga tji notjiungura tja tjo. Kunao matu sokutara kutja tu noviungurisiwa viṋe vyokuhonga nokutja matu sokuviungurisa momuano uṋe omusemba.

6, 7. (a) Okakarata komahakaeneno ove u ke ungurisa vi? (b) Ondando youkarata womaṋangero kombongo o yaye?

⁶ Oukarata womahakaeneno. Imbi oviungurisiwa oviṱiṱi posiya ovinanḓengu mbi tu ritjiukisa na vyo kovandu nokuvetwara korungovi rwetu, owo mu mave rihongo ovingi ohunga na eṱe na wina mu mave yenene okuningira omerihongero wOmbeibela. Nai pe novandu vokombanda 400 000 mba ningira okuhongwa Ombeibela ko jw.org, nu ovandu vokombanda yesere ve ningira okuhongwa Ombeibela eyuva arihe! Ma rire nawa tji wa kara noukarata womahakaeneno mbwi kokutja u yenene okutjiukisa indu tji wa munu oruveze rokutjita nao ngunda u ri movitjitwa vyoye vya kauriri.

⁷ Oumbapira womaṋangero. Oumbapira womaṋangero wozombongarero zombongo mbwi  tjiri ounanḓengu. Owo u tja: “Ove mo ṋangwa okurihonga Ombeibela ku nOvahongonone va Jehova.” Nu okuzambo ke raisa omiano vivari mu mo yenene okutjita nao “pozombongarero zetu zombongo” “poo okurihonga puna umwe wetu.” Kunao, oviungurisiwa mbi kavi tu tjiukisa uriri nungwari wina vi ṋanga ovandu varwe mbe “ritjiwa kutja owo ovasyona mombepo” okurihonga Ombeibela kuna eṱe. (Mat. 5:3) Ovandu avehe mave yenene okuya kozombongarero zetu zombongo kutja va yakura okurihonga Ombeibela poo indee. Indu tji ve ya kozombongarero zetu, owo mave munu nokuzuva oviṋa mbya zikamena kOmbeibela tjimuna tja tja ve muna indu tji matu ve hongo Ombeibela kourike wa wo.

8. Ounanḓengu pu pe ṱa pi kovandu okuya kombongarero yetu nandarire imwe ya zo? Yandja otjihorera.

⁸ Okutja o nawa okuṋanga ovandu okuya kozombongarero zetu zombongo nandarire rumwe motjivike. Omena ra ye? Owo mave ya okurimunina oveni omahongero wouatjiri nga panguka ku inga owa Babilon Otjinene. (Jes. 65:13) Ovakupasane vevari mo America, Ray na Linda, va muna otjiṋa hi ozombura tjiva nḓa kapita. Owo va tya kutja mave utu okuyenda kokereka. Owo va ri nongamburiro mu Mukuru nu va ri nonḓero moviṋa oviyapuke, kunao owo va uta okuyenda kozokeraka pekepeke motjihuro tja wo. Pa ri nozokereka ozengi nu za pangukire momahongero. Nu owo va kuramisire oviṋa vivari mbi mave vanga okumuna mokereka ndji ve rikwambako otjouṋepo. Otjitenga, owo mave sokurihonga otjiṋa moiri yokereka, nu otjitjavari, ouṋepo wokereka mau sokumunika otjovandu mbe karera Mukuru. Kombunda yozombura tjiva, owo va ryangera ozokereka azehe mokahuro ngo, nungwari kave notjiṋa tji va muna. Owo kave rihongere otjiṋa, nu ouṋepo wozokereka ka u munika otjovandu mbe kongorera Mukuru. Kombunda yokereka indji osenina ku va ya, Linda wa yaruka koviungura vye nu Ray wa ya konganda. Mondjira okuyaruka, omurumendu wa hinga okukapitira pEtuwo rOuhona nu e ripura mu ye omuini a tja, ‘Ongwaye tji mbi hi nokuhita nu e tara kutja owo ovandu mbe ri vi?’ Otjingaperi, kutja indwo rwa ri oruveze rwa peke! Ovandu avehe pEtuwo rOuhona ve mu yakura nawa nu ve rihwikikire momuano omusemba. Ray wa haama komurungu nu wa ri nondjoroka noviṋa mbye rihongo! Ya ri tjimuna omuapostele Paulus tja hungira ohunga nomundu ngwe ya pozombongarero zombongo otjikando otjitenga, nu eye wa tja: “Tjiri, Ndjambi u ri mba mokati keṋu!” (1 Kor. 14:23-25) Ray Osondaha aihe a kara pozombongarero zombongo; nu okuzambo a utu okuya kozombongarero zomokati kotjivike. Linda wina wa uta okuyenda ku zo, nu nandarire kutja va ri notjiwondo tjozombura ape 70, owo va yakura omahongero wOmbeibela nu ave papitisiwa.

9, 10. (a) Ongwaye tje ri oupupu okuungurisa oumbapira? (b) Kahurura kutja moutu vi ehungi nokambapira nga Ouhona wa Mukuru otjikeṋa?

⁹ Oumbapira. Eṱe tu noumbapira hambondatu nu oupupu okuungurisa indu tji movanga okuuta ehungi ku nomundu. Owo wa uta okupitisiwa mombura ndji 2013, omangete ape yetano youmbapira mbwi ye pirindwa! Otjiṋa otjiwa ohunga nokuungurisa oumbapira mbwi, otjo hi tjokutja indu tji we ri hongo okuungurisa kemwe, ove u yenena okuungurisa imbwi owarwe mena rokutja owo u ungurisiwa tjimwe. Hapo nu moungurisa vi oumbapira mbwi okuuta ehungi ku nomundu?

¹⁰ Nga tu tje moungurisa okambapira nga Ouhona wa Mukuru otjikeṋa? Raisira omundu epuriro ndi ri kombanda yokambapira ngunda a mo mu pura kutja: “Hapo ove wa rora okuripura kutja Ouhona wa Mukuru otjikeṋa? Ove otjo tja . . . ?” Nu okuzambo u pure kutja eziriro riṋe ndu ma munu kutja ondi ri ro pomaziriro yetatu ngo. Nokuhina okutja wa sora poo wa zunḓa, paturura moukoto pu mape tja “ Ombeibela mai tja”, nu okuzambo u mu raisire etjangwa, ra Daniel 2:44 na Jesaja 9:6. Tje ri ohepero kaende komurungu nehungi. Korusenina, mu raisira epuriro ndi ri kongotwe ndi ma ri tja “Ripurira ku imbi”: “Ehupo mari kakara vi kehi yOuhona waMukuru?” Iho matji ku vatere kutja u kotoke rukwao. Indu tji mwa hakaene rukwao, mu twara kehongwa 7 rembo ndi Ombuze ombwa okuza ku Mukuru!, ndi ri rimwe romambo wokuuta omerihongero wOmbeibela.

11. Oumbo wetu wa tjangerwa ye, nu matu hepa okutjiwa ye?

¹¹ Oumbo. Oruhunu no-Awake! oumbo mbu handjaurwa nokutorokwa motjivaro tjokombandambanda mouye auhe! Mena rokutja oumbo mbwi u handjaurwa mouye auhe, epu rokombanda roumbo mbwi ri tjangwa kutja ri ṱune komitima vyovandu avehe koṋa akuhe. Ngatu ungurise oumbo mbwi okunana onḓero yovandu ohunga noviṋa mbi vi ve ṱuna ndinondi. Kokutja tu yandje oumbo mbwi komundu omusemba, matu hepa okutjiwa kutja katjangerwa ovandu veṋe.

12. (a) O-Awake! ya tjangerwa oouṋe, nu ondando ya yo oyaye? (b) Wa muna ondoṋeno yaye moumbo mbwi?

¹² O-Awake! katjangerwa ovandu mbe hi nokutjiwa poo mbe nondjiviro onḓiṱi uriri yOmbeibela. Mape ya ave ha tjiwa omahongero yOukriste, mape ya ave rire ovandu mbe ha kambura mozongamburiro momuano umwe poo omukwao, poo mape ya ave ha tjiwa kutja Ombeibela mai yenene okuungurisiwa mehupo rawa. Ondando onenenene yo-Awake! okuzuvisa omulese kutja Mukuru tjiri okeri. (Rom. 1:20; Hebr. 11:6) Oko wina ke kurisa ongamburiro yomulese kutja Ombeibela “tjiri, embo ra Ndjambi.” (1 Tes. 2:13) Oumbo utatu mbwi mbwa piti mombura ndji 2018 u nomapu nga: “The Way of Happiness,” “12 Secrets of Successful Families,” na indi “Help for Those Who Grieve.”

13. (a) Oruhungu rotjiwaṋa rwa tjangerwa oouṋe? (b) Wa muna ondoṋeno yaye moumbo mbwi?

¹³ Oruhungu, rotjiwaṋa, ru yandja ombango koviṋa oviyapuke ku imba mba tenga Mukuru nEmbo re. Nandarire kutja ve tjiwa Ombeibela, owo kave zuu omahongero wayo nawa. (Rom. 10:2; 1 Tim. 2:3, 4) Oumbo utatu mbwi mbwa piti mombura ndji 2018 u nomaziriro komapuriro nga: “Hapo Ombeibela embo ndi matu yenene okuungurisa ndino?,” “Ouye mbwi wa hungama pi?,” na indi “Hapo Mukuru u nakonatja na ove?”

14. (a) Ondando youvidio mbu ri mOviungurisiwa vyetu vyOkuhonga o iṋe? (b) Wa muna ondoṋeno yaye mouvidio mbwi?

¹⁴ Ouvidio. Momayuva wa Jesus, ovahonge vomiti aa ve ungurisa oviungurisiwa vyokomake uriri. Ku ndino, ovahonge vomiti ve ungurisa ozomahina, tjimuna ozomahina nḓe konda ozonguṋe, ovisahava, ozomboora, ozomboha, na vyarwe ovingi. Okuweza komambo nge pirindwa, eṱe nai tu nouvidio ouwa tjinene, nu ouvidio une mbwi u ri moviungurisiwa vyetu vyokuhonga: Ongwaye tji mo sokurihonga Ombeibela?, Omahongero wetu wOmbeibela ye tjitwa vi?, PEtuwo rOmerikotameneno pe tjitwa tjike?, na inga Ovahongonone va Jehova​—Ovangendu? Ouvidio mbu nozominute mbari poo kehi ya nao ouwa okuungurisa kotjikando otjitenga. Imbo oure mo yenene okuungurisa tji wa kavarura otjikando otjitjavari poo mo yenene okuraisa ku imba mbe noruveze. Oviungurisiwa oviwa mbyo vi ku nonḓero movandu okurihonga Ombeibela nokukara pozombongarero zetu zombongo.

15. Raisa kutja okutarera ouvidio momaraka wovandu oveni ku ve ṱuna vi.

¹⁵ Otjihorera tjimwe, otjomukazendu umwe omukambure ngwa hakaena ku nomukazendu ngwa zire ko Micronesia nu ngwa hungire Otjiyapese, omukambure ngwi we mu raisira okavidio nga Ongwaye tji mo sokurihonga Ombeibela? meraka re. Okavidio tji make utu okunyanda,  omukazendu ngo wa tja: “Oṋa ndo eraka randje tjiri. Hi nokukambura! Me munu mombosiro yeraka kutja omundu ngo wa za kehi randje. Eye ma hungire eraka randje!” Kombunda yokavidio, omukazendu wa tja ma ka lesa nokukatarera oviṋa avihe meraka re ko jw.org. (Sasaneka nOviungura 2:8, 11.) Otjihorera tjarwe. Omukazendu omukambure mo America wa hindira omuatje womuṱena kwe ngwa ri kouye wopendje o-link ndji yenda kokavidio ngo meraka re. Omuatje ngo wa tarera okavidio ngo nu okuzambo e mu tjangere kutja: “Orupa ndu maru tja ouye u honaparerwa i umwe omunaurunde rwe ndji ṱunu tjinene. Mba tjiti omaningiriro wokurihonga Ombeibela.” Eye u kara mehi oviungura vyetu mu vya tjaerwa!

16. Yandja ondando yokambrosjure nga: (a) Puratena ku Mukuru kutja u hupe nga aruhe. (b) Ombuze ombwa okuza ku Mukuru! (c) Oowaṋi mbe tjita ombango ya Jehova ndino?

¹⁶ Ozombrosjure. Mo hongo vi ouatjiri komundu ngu hi nokutjiwa okulesa poo mbe hi nokambo meraka rawo? Tu notjiungurisiwa otjiwa tji matji yenene okuvatera, okambrosjure nga Puratena ku Mukuru kutja u hupe nga aruhe. * Otjiungurisiwa otjiwa okuuta omerihongero wOmbeibela okambrosjure nga Ombuze ombwa okuza ku Mukuru! Mo yenene okuraisira omundu omahongwa 14 nge ri kongotwe yokambo nga nu eye omuini a toorora kutja ooriṋe ndi ma ri mu nana ombango. Okuzambo a mu utu okukonḓonona Ombeibela okuutira pe hongwa ndo. Wa rora okuungurisa omuano mbo komundu ngwa kavarura rukwao? Oowaṋi mbe tjita ombango yaJehova ndino? okambrosjure oketjatatu moviungurisiwa vyokuhonga. Oko ka tjangerwa okuhonga omuhongwa ohunga notjira tja Jehova. Okutjiwa kutja mo ke ungurisa vi, lesa Ehupo retu rOukriste notjiungura tjetu tjokuzuvarisa ka Marta 2017.

17. (a) Ondando yembo arihe o ya ye? (b) Avehe mbu va zu nokupapitisiwa ve undjirwa okutjita tjike, nu omena ra ye?

¹⁷ Omambo. Tji mwa zu nokurihongera moumbrosjure, mamu yenene okurundurukira kembo ndi Ombeibela mai yenene okutuhonga tjike? Embo ndi ri kurisa ondjiviro yomundu momahongero wOmbeibela. Tji mwa zu nokumana embo ndi nu omuhongwa tji me kurisa oupanga we ku na Jehova, kaende komurungu nomahongero membo ndi Matu riṱizire vi morusuvero rwa Mukuru? Embo ndi mari hongo omuhongwa okuṱakamisa omirari vyOmbeibela mehupo re reyuva arihe. Zemburuka kutja, nandarire kombunda yombapitisimo, ovandu avehe ovape mave hepa okurihonga nga tji va mana omambo nga pouvari wawo. Ihi matji ve vatere okuhara omize omikoto nongamburiro yomasa mouatjiri.​—Lesa Ovakolose 2:6, 7.

18. (a) 1 Timoteus 4:16 ri tu tuunduza kutja tu tjite vi otjozomiṱiri zouatjiri, nu matu munu ouwa waye? (b) Ondando yetu ya sokurira o ya ye otja tji matu ungurisa oviungurisiwa vyetu vyokuhonga?

¹⁸ OtjOvahongonone va Jehova, eṱe twa pewa “ombuze ombwa” youatjiri nouwa, ndji mai twara ovandu komuinyo waaruhe. (Kol. 1:5; lesa 1 Timoteus 4:16.) Nungwari nai, twa pewa Oviungurisiwa vyOkuhonga mu mu noviṋa avihe mbi tu hepa. (Tara okaongo nga “ Oviungurisiwa vyetu vyOkuhonga.”) Arikana nga tu ungurise oviungurisiwa mbi nawa otja pu matu sora. Omuzuvarise auhe ma yenene okutara kutja otjiungurisiwa tjiṋe tji ma vanga okuuta na tjo ehungi ku nomundu ngwa raisa onḓero nokutja oruṋe. Nungwari ondando yetu ka yokuhavarisa omambo uriri; nu wina ka ku yandja omambo kovandu mbe hi nokuraisa onḓero mombuze yetu. Ondando yetu oyokuisapo ovandu mbe nouatjiri, overisusuparise, nu mbe nondjara noviṋa oviyapuke okurira ovahongewa, okutja ovandu tjiri mbe vanga okumuna ‘omuinyo waaruhe.’​—Oviung. 13:48; Mat. 28:19, 20.