1, 2. (a) Omukriste mape ya a ṱunwa vi komarundurikiro nge hi nokundjira ko mehupo re? (Tara kotjiperendero pomautiro worupa ndwi.) (b) Otja kEpsalme 131, ongaro iṋe ndji mai tu vatere okukara nohange momuinyo?

INDU Lloyd na Alexandra tji va raerwa kutja kave nokukarera poBetel rukwao, kotjirutenga owo va hihahwa omutima. Owo va karera poBetel oure wozombura zokombanda 25. Lloyd wa tja: “Ami ee munu kutja oBetel noviungura mbye ungura mbo o kee tjiukirwa. Motjiuru tjandje ee zu nawa ondando yomarundurukiro nga, posi yokutja ovivike nomieze mbya kongorera ko, povikando ee rimunu tjimuna mba imbirahiwa. Imbo omuano mbwe ri munu momuinyo uriri. Ominute imwe mba ri noumune ouwa; indjo o yarwe e rimunu navi.”

² Indu ehupo retu tji ra runduruka momuano mbu tu hi nokuundjira ko, omarundurikiro ngu matu sokutjita mape ya aye tjiti kutja tu hihamwe momuinyo. (Omiano 12:25) Wina mape ya arire ouzeu okuyakura omarundurukiro nga. Mozongaro otja inḓo, matu yenene vi okumuna ‘orusuvo, nokupora’ momuinyo? (Lesa Epsalme 131:1-3.) Ngatu tare kovakarere tjiva woruveze rwOmbeibela na tjiva voruveze rwetu, komuano mbu va yenena okukara  nohange momuinyo nandarire kehi yomarundurikiro mehupo rawo.

3. Ongaro iṋe Josef me ke ri muna?

³ Josef wa ri nozombura ape 17 indu omarumbi we tji ve mu randisa koukarere mena reruru. Josef wa ri omuatje omusuverwa ku ihe, ngunda ave hi ye mu randisa. (Gen. 37:2-4, 23-28) Ape ozombura 13, Josef wa hupa kehi youkarere nu a paterwa motjovakamburwa mo Engipte, kokure na ihe omusuverwa, Jakob. Otjikwaye tji tja vatera Josef kutja a ha kurunga momuinyo nokupindika?

4. (a) Josef aa yandja ombango ku ye, ngunda e ri mondeko? (b) Jehova wa zira vi ozongumbiro za Josef?

⁴ Ngunda e ri kehi yondatumisire mondeko, Josef mape ya aa yandja ombango kozondaya za Jehova. (Gen. 39:21; Eps. 105:17-19) Oturoto twomaprofetero Josef twa rota indu tja ri omutanda mape ya wina twe mu pa ongamburiro yokutja Jehova we mu suvera. (Gen. 37:5-11) Eye mape ya aa yandja omerikendero we ngo ku Jehova mongumbiro povikando pekepeke. (Eps. 145:18) Jehova we mu pa ongamburiro ya tjiri yokutja Eye ma kara “puna ye” momauzeu we ayehe, otjomuano wokuzira ongumbiro ye.​—Oviung. 7:9, 10. *

5. Ouwa waye ‘ohange ya Ndjambi’ mbu i tupa mokuyenenisa ozondando zetu motjira tje?

⁵ Nandarire kehi yomauzeu omanene, eṱe ndino wina matu yenene okumuna ‘ohange ya Ndjambi’ ndji mai ṱakamisa omeripura wetu. (Lesa Ovafilipi 4:6, 7.) Kunao, tji twe ri yarikaṋa ku Jehova indu tji tu nomauzeu momuinyo, ohange ya Mukuru mai tu pe omasa wokuyenenisa ozondando zetu motjira tja Jehova nu ka maa tu rihahiza. Ngatu tare kovihorera tjiva okusasaneka otjiṋa hi.

6, 7. Okukumba ongahukiro kutja matu vanga ye ku tu vatera vi okukara nohange momuinyo? Yandja otjihorera.

⁶ Indu Ryan na Juliette tji va raerwa kutja otjiungura tjawo otjoukandjira wapeke tjoruveze orusupi tje ya komaandero, owo kana va ri nohange. “Eṱe twa hakahana okuraera Jehova omuano otjiṋa hi mu tje tu ṱunu. Eṱe aa tu tjiwa nawa kutja matu sokukara nongamburiro ya tjiri mu Jehova. Ovengi mombongo mu twa ri va ri ovape, kunao twa kumba kutja Jehova me tu vatere kutja tu raise ongaro ombwa yongamburiro.” Ryan wa tja nao.

⁷ Jehova wa zira vi ongumbiro yawo ndjo? Ryan u zemburuka: “Tjimanga kombunda yokukumba, omeripura omavi nomerikendero ngu twa ri nawo ya zengera mbo. Ohange ya Ndjambi aa i ṱakamisa omitima vyetu nouripura wetu. Eṱe twa muna kutja matu yenene okuungurisiwa motjira tja Jehova indu tji matu raisa ongaro ombwa.”

8-10. (a) Ombepo ya Mukuru i tu vatera vi okutjinda omauzeu? (b) Omomiano viṋe Jehova me yandja ombango kozongondjero zetu zokuṱakamisa oupanga wetu kuna Ye?

⁸ Otjiṋa tjarwe wina tji tji tu pa ohange momuinyo, ombepo ya Mukuru ndji tu vatera okuyandja ombango komatjangwa ngu maye tu vatere okuyandja ombango koviṋa mbi tunga oupanga wetu kuna Jehova. (Lesa Johanes 14:26, 27.) Tara kotjihorera tjovakupasane mba, Philip na Mary, mba ungura poBetel ape ozombura 25. Mokati komieze vine, ave yevari va zepaisa oo mama wawo nomuhoko wawo umwe nu va uta okutjevera nokuvatera tate wa Mary, ngwa ri nomutjise wokuzemba [dementia].

⁹ Philip u zemburuka: “Ami ee nangarasi mbi ri nawa, nungwari ee hepa otjiṋa. Mba lesa Ovakolose 1:11 mOruhungu rwomakonḓononeno.  Ii mba ri nonḓarorure momauze nga, nungwari kari moviṋa avihe. Ee hepa ‘onḓarorure ndji nomuretima nohange.’ Etjangwa ndo re ndji zemburukisa kutja ohange, kai sokukarapo mena rongaro ndji ri po uriri, nungwari i sokurira mena rombepo ya Mukuru ndji i ungura mu ami aruhe.”

¹⁰ Mena rozongondjero za wo zokuyandja ombango koviṋa mbi ma vi tungu oupanga wawo kuna Jehova, Jehova wa sera Philip na Mary ondaya momiano omingi. Katjisupi kombunda yokupita moBetel, owo va muna ovahongwa ovawa mba ve vanga okurihonga Ombeibela otjivike atjihe nungwari ka tjikando tjimwe uriri. Mary nai u tja, “Ovahongwa mbo o mba ri ondjoroka yetu nu ya ri omuano Jehova me tu raere kutja oviṋa avihe mavi kara nawa.”

11, 12. (a) Omomuano uṋe Josef ma tjita otjiṋa Jehova ku me mu serere ondaya? (b) Josef wa muna ouwa waye mena ronḓarorure ye?

¹¹ Indu tji twa munu omarundurukiro, mape ya atu hakahana okuuta okurikenda ohunga noruyaveze. Nu Josef mape ya etje rikenda omuano mbo wina. Nungwari, wa tjita kutja ma mune ouwa mongaro ndja ri mo, kunao aa yandjere Jehova okumusera ondaya. Nandarire kutja wa ri mondeko, Josef aa ungura oukukutu oviungura ngamwa avihe mbya pewa i omutjevere omunene wondeko, tjimuna tjaa tjita indu tja ungura pu Potifar.​—Gen. 39:21-23.

¹² Eyuva rimwe, Josef wa zikwa kombanda yovapandekwa vevari mba ri novihako vyokombanda mondjuwo ya Farao. Ovarumendu mba va kamburire mu Josef mena rongaro ye ombwa, kunao aa ve mu raere omauzeu wa wo noturoto tu va roto ongurova komurungu wa nao. (Gen. 40:5-8) Josef kaa undjire ko, nungwari ehungi ra wo ndo ra tjita kutja oviṋa vi runduruke okurira oviwa ku ye. Nandarire kutja aa sokukara ozombura mbari mondeko, eye wa pitisiwa, nu eyuva tjingero ndo, eye wa zikwa otjomundu omutjavari ku Farao.​—Gen. 41:1, 14-16, 39-41.

13. Kutja tu ri mongaro ngamwa, matu yenene vi okuyandja otjiṋa ku Jehova okuserako ondaya?

¹³ Tjimuna Josef, eṱe wina mape ya atu kara mongaro ndji tu hi nokutjiwa kutja nga tu tjite vi. Nungwari, tji twa kara nomuretima na tu ungura oukukutu mokumuna ouwa mongaro ndji tu ri mo, matu yandja otjiṋa ku Jehova okusera ko ondaya. (Eps. 37:5) Otjingaperi, kutja povikando mape ya atu utu ‘okuivaiva,’ nungwari, tjimuna omuapostele Paulus tja twapo, eṱe “katu yaraara.” (2 Kor. 4:8) Omambo wa Paulus inga wina maye yenenisiwa kweṱe, tjinenenene tji twa yandja ombango kotjiungura tjokuzuvarisa.

14-16. Omomuano uṋe Filipus ma yandja ombango kotjiungura tjokuzuvarisa nandarire kehi yomarundurukiro mehupo re?

¹⁴ Omuzuvarise Filipus we tu pa otjihorera otjiwa tjokuyandja ombango kotjiungura tjokuzuvarisa nandarire kutja matu munu omarundurukiro nga sana pi. Mo Jerusalem, pa kara omapirukiro omengi nga tjita kutja Stefanus ma ka zepewe. * Kotjirutenga, Filipus aa yorokere otjiungura tje otjipe. (Oviung. 6:1-6) Posi yokutja indu ovakongorere va Kristus tji va rimbarere akuhe, Filipus ka yenene okuhaama uriri nokuhinokutjita otjiṋa. Eye wa ya ko Samaria okukazuvarisa, otjihuro tji tji hi na indu tja zuvarisirwe moruveze ndo.​—Mat. 10:5; Oviung. 8:1, 5.

¹⁵ Filipus wa ri nonḓero yokuyenda ngamwa akuhe ombepo ya Mukuru ku mai mu hingi, kunao Jehova we mu ungurisa okuuta otuveze twomazuvarisiro otupe. Ongaro ye yokuhinondoorora ya tjita kutja Ovasamaria ve mu yakure, owo mba vevarwa pondondo yokehi i Ovajuda. Mena ra nao, “ovimbumba vyovandu” aa vi puratene ku ye!​—Oviung 8:6-8.

¹⁶ Filipus wina wa hingwa i yombepo ya Mukuru okuyenda ko Asdod na ko Sesarea, ovihuro vivari mu mwa ri notjivarero otjingi tjOvahaiden. (Oviung. 8:39, 40) Kombunda yozombura ape 20 kombunda yokuzuvarisa mo Samaria, ongaro yehupo ra Filipus ya runduruka rukwao. Eye wa rira otjiuru tjonganda, nu wina aa yandja ombango kotjiungura tjokuzuvarisa. Nandarire kutja pa kara omarundurukiro mehupo re, Filipus aa yandja ombango kotjiungura tjokuzuvarisa, nu kunao, eye neṱunḓu re va serwa ondaya i Jehova.​—Oviung. 21:8, 9.

17, 18. Okuyandja ombango kokuzuvarisa ku tu vatera vi nandarire kehi yomarundurukiro?

¹⁷ Ovakarere ovengi mbe ri motjiungura tjokuzuvarisa oruveze aruhe mave itavere kokutja okuyandja ombango kotjiungura tjokuzuvarisa nandarire kehi yomarundurukiro kwe ve vatera tjinene. Indu Osborne na Polite, ovakupasane okuza ko South Africa, tji va pita moBetel, aa ve nangarasi mave munu oviungura mbi hi nokukambura oruveze aruhe nu mave munu oruveze okukara po tjimanga. “Ouhumandu,” Osborne wa tja, “kana twa muna oviungura tjimanga otja tja tu undjire ko.” Omukazendu we, Polite, wa tja: “Eṱe kaa tu munu oviungura oure womieze vitatu, nu ka twa ri novimariva mbi twa pwika. Tjiri ya ri ouzeu.”

 ¹⁸ Otjikwaye tji tje ve vatera kehi youmauzeu wawo ngo? Osborne u tja: “Okuzuvarisa pu nombongo kwe tu vatera tjinene kutja tu yandje ombango nokukara noumune ouwa. Eṱe twa tya okukara motjiungura tjokuzuvarisa pendje nokuhaama uriri nokurikenda, nu iho tje tu pa ondjoroka ya tjiri. Eṱe twa paha akuhe oviungura, nu okuzambo twe vi muna.”

19-21. (a) Otjikwaye tji matji tu vatere kutja tu kare nohange momuinyo? (b) Ouwa waye mbu matu munu okuza komarundurukiro ngu maye tjitwa mehupo retu?

¹⁹ Otja ovihorera mbyo pu vya raisa, tji twa yandja ombango koviṋa oviwa kehi yongaro mu tu ri na tu undju nongamburiro ku Jehova, eṱe matu kara nohange momuinyo. (Lesa Mika 7:7.) Eṱe wina matu ka muna kutja twa muna mouwa tjinene momarundurukiro nga kara po mehupo retu. Polite u tja nai ohunga noviṋa mbya tjitwa ku wo: “Okupewa otjiungura tjarwe motjira tja Jehova kwe ndji raisira kutja okuṱakama mu Jehova tjiri ku heya tjike nandarire indu tji mape munika tjimuna kape nomuhunga. Oupanga wandje kuna Jehova wa harera ko omasa.”

²⁰ Mary, ngwa tamunwa rukuru, ngamba omukandjira nu u tjevera ihe ngwa kurupa. Eye wa tja: “Ami mbe ri honga kutja tji mbi nozongendo momuinyo, me hepa okukurama, ekumbu, nu okuzambo esuvana. Okuisa oviṋa meke ra Jehova otjiṋa otjinanḓengu tji mbe rihonga, nu tjiri otjiṋa tji matji ka hepwa moruyaveze.”

²¹ Lloyd na Alexandra, mba tamunwa rukuru, ve yakura kutja omarundurukiro yawo ngo tjiri ya rora ongamburiro yawo momiano omingi mbi ve hina aa ve undjire ko. Posi yokutja nai ve tja: “Omarorero ye raisa kutja tjiri ongamburiro yetu oyatjiri nu mai yenene okutuyanḓiparisa nokutupa omasa momayuva omazeu ngo. Eṱe nai twa rira ovandu mbe nongamburiro yomasa.”

22. Indu tji twa kondjo okumuna ouwa mongaro yetu, matu kara nongamburiro yaye?

²² Indu tji wa munu omarundurukiro ngu hi nokuundjira ko, kainatja kutja omarundurukiro womerizirira moviṋa kaaṋi mbyo vatere motjira tja Jehova poo, omauzeu nge etwa i ouveruke, poo omerizirira omape weṱunḓu, zemburuka kutja Jehova u rikendera ove nu me ku vatere moruveze orusemba. (Hebr. 4:16; 1 Petr. 5:6, 7) Moruveze rwa nai, kondja okumuna ouwa mongaro mu uri. Indjo popezu na Tate woye womeyuru mongumbiro, nu yandjera kutja me ku hongorerepo. Momuano mbwi, ove wina mo kara nohange momuinyo nandarire kehi yomarundurukiro.