1. Ovikwaye Jehova mbi ma yenene okutjita kutja ma yenenise ombango ye?

JEHOVA ma yenene okurira otjiṋa ngamwa atjihe okuyenenisa ombango ye. Otjotjihorera, Jehova wa yenena okurira Omuhonge, Omuhuhumiṋe, Omuzuvarise, na vyarwe ovingi. (Jes. 48:17; 2 Kor. 7:6; Gal. 3:8) Nandarire kutja ma yenene okurira oviṋa ovingi, eye povikando ovingi u ungurisa ovandu okuyenenisa ombango ye. (Mat. 24:14; 28:19, 20; 2 Kor. 1:3, 4) Jehova wina ma yenene okutupa ondjiviro nomasa ngu matu hepa kutja tu yenenise ombango ye. Avihe mbi vi kamburira mo omaheero wena re, nu ovakonḓonone ovengi ve noumune mbo.

2. (a) Ongwaye povikando tjiva tji tu keyakeya kutja matu ungurisiwa i Jehova? (b) Morupa ndwi matu katara ku tjike?

² Atuhe tu vanga okuungurisiwa i Jehova, posi yokutja tjiva mape ya ave kara nomakeyakeyero wokutja mave ungurisiwa i Jehova. Omena ra tjike? Mena rokutja owo ve muna kutja kave yenene okuungura oviungura ovingi mena rozombura, ozongaro kaaṋi mu ve ri poo omasa wawo. Nu varwe mape ya ve nohange noviungura mbi ve ungura nu ve muna kutja kave nokuhepa okuungurira Jehova oviungura ovingi kombanda yanao. Morupa ndwi, matu katara komuano Jehova mu ma yenene okuvatera auhe wetu okuyenenisa ombango ye. Nu okuzambo, matu ka konḓonona omahungi wOmbeibela ohunga nomuano Jehova ma vatera ovakarere ve​—ovarumendu novakazendu,—​mokuvepa omasa nombango okuyenenisa ondyero ye. Korusenina matu katara komuano eṱe mu matu yenene okuyandjera Jehova okutuungurisa.

3. Otja kOvafilipi 2:13, Jehova u tupa vi ombango okuyenenisa onḓero yetu?

³ Lesa Ovafilipi 2:13. * Jehova ma yenene okutupa ombango yokuyenenisa ondyero ye. Omomuano uṋe? Otjotjihorera, ove mape ya wa zuu kutja omundu mombongo ma hepa ombatero poo pe notjiṋa tji matji hepwa okuungurwa mombongo. Poo ovanene vombongo va lese orutuu okuza korutavi romberoo ndu maru tja pe nouhepe kwarwe. Eṱe mape ya atu ripura oveni kutja, ‘Hapo me yenene vi okuvatera?’ Poo mape ya twa ningirwa okukaungura otjiungura otjizeu, nu katu nokutjiwa kutja matu yenene okutjiungura nawa. Poo tji twa zu nokulesa Embo ra Mukuru, mape ya atu ripura kutja, ‘Hapo me yenene vi okuungurisa ondjivisiro ndji okuvatera varwe?’ Jehova ke tu ṋiṋikiza okutjita otjiṋa ngamwa atjihe. Posi yokutja eye tja munu kutja tu nonḓero yokuvanga okutjita otjiṋa, eye ma yenene okutuvatera okuungura otjiṋa ho.

4. Jehova ma yenene vi okutupa omasa okuyenenisa ondyero ye?

⁴ Jehova wina ma yenene okutupa omasa okuyenenisa ondyero ye. (Jes. 40:29) Omomuano uṋe? Eye ma yenene okutupa ombepo ondjapuke okutuvatera. (Eks. 35:30-35) Okupitira motjira tje, Jehova ma yenene okutuhonga okuungura oviungura kaaṋi. Indu tji u hi nokutjiwa kutja otjiungura ho tji ungurwa vi, ningira ombatero. Nu wina kara noupaturuke okuningira Tate wetu womeyuru okukupa ‘omasa nga kapita avihe.’ (2 Kor. 4:7; Luk. 11:13) MOmbeibela mu novihorera ovingi vyomuano Jehova ma vatera ovarumendu novakazendu mokuvepa ombango nomasorero okuyenenisa ondyero ye. Otja tji matu katara kovihorera tjiva mbyo, kondja okuripura nomiano Jehova mu ma yenene okukuungurisa momuano otjingewo.

5. Matu rihongo tjike komuano Jehova ma ungurisa Moses okukutura ovakarere ve?

⁵ Jehova wa vatera Moses okukutura Ovaisrael. Eye we mu ungurisa ruṋe? Hapo ya ri indu Moses tja rongerisirwe nawa ‘mounongo auhe wOvaengipte’? (Oviung. 7:22-25) Kako, Jehova wa ungurisa Moses kombunda yokumuvatera kutja ma rire omundu omurisusuparise nomupore. (Oviung. 7:30, 34-36) Jehova we mu pa ouvanḓe wokukurama komurungu yomuhonapare omunamasa tjinene moEngipte. (Eks. 9:13-19) Matu rihongo tjike komuano Jehova ma ungurisa Moses? Jehova u ungurisa imba mbe raisa ovikaṋena oviwa nu mbe ṱaṱera ku ye okuvepa omasa.​—Fil. 4:13.

6. Matu rihongo tjike komuano Jehova ma ungurisa Barsilai okuvatera Ombara David?

⁶ Ozombura ozengi kombunda yanao, Jehova wa ungurisa Barsilai okuvatera Ombara David. David novandu ve tjaave tupuka okuzapo pu Absalom omuatje omuzandu wa David, owo va ‘ṱire ondjara nonyota nu va urirwe.’ Barsilai, ngwa kurupire oruveze ndo, eye novakwao va twamo omiinyo vyawo moumba okuvatera David novandu ve. Barsilai kaa munu kutja Jehova ke nokuyenena okumuungurisa mena rokutja wa kurupire. Nungwari, eye wa yandja imbi mbyaari navyo okuvatera ovakarere va Mukuru. (2 Sam. 17:27-29) Matu rihongere ko tjike? Kainatja kutja tu nozombura ngapi, Jehova ma yenene okutuungurisa okuvatera ovakambure ovakwetu mbu mave hepa ombatero momahi warwe poo imba wopopezu na eṱe. (Omiano 3:27, 28; 19:17) Nandarire kutja katu nokuyenena okuvevatera oveni, eṱe matu yenene okuyandja ovimariva vyouharupu koviungura  mbi tjitwa mouye auhe kutja pe kare ovimariva okuvatera ovakambure ovakwetu mba wirwa i youmba moiri na moruveze ndu mave hepa ombatero.​—2 Kor. 8:14, 15; 9:11.

7. Jehova wa ungurisa Simeon momuano uṋe, nu ongwaye otjiṋa ho tji tji ri otjiyanḓiparise?

⁷ Jehova wa kwizikira Simeon, omurumendu omuṱakame ngwa kara moJerusalem nu ngwa kurupire, kutja ke nokuṱa ngunda e hiya muna Messias. Tjiri omakwizikiro ngo ya yanḓiparisa Simeon tjinene, mena rokutja eye wa undja Messias ozombura ozengi. Jehova we mu sera ondaya kongamburiro nonḓarorure ye. Eyuva rimwe, eye “wa twarewa i Ombepo” kondjuwo ondjapuke ya Muhona. Imbo wa kamuna okanatje Jesus, nu Jehova wa ungurisa Simeon okuyandja omaprofetero ohunga nokanatje nga ku make rire Kristus. (Luk. 2:25-35) Nandarire Simeon mape ya kutja ka hupire orure okumuna oviungura vya Jesus vyokuzuvarisa kombanda yehi, eye wa ri nondangi kutja Jehova we mu ungurisa momuano mbo. Nu eye ma kamuna oviṋa ovingi oviwa moruyaveze! Mouye oupe, omurumendu omuṱakame ngo ma kamuna omuano omananeno wa Jesus mu maye yeta ondaya komaṱunḓu aehe nge ri kombanda yehi. (Gen. 22:18) Eṱe wina tu nondangi komuano auhe Jehova me tu ungurisa.

8. Jehova ma yenene vi okutuungurisa tjimuna tja ungurisa Barnabas?

⁸ Meserewondo etenga O.Z., omurumendu wena Josef we ri yandjera okuungurisiwa i Jehova. (Oviung. 4:36, 37) Ovaapostele aave mu isana Barnabas ndi ri heya kutja “Omuyanḓiparise,” mape ya mena rokutja Josef wa suverere okuhuhumiṋa varwe. Otjotjihorera, indu Saulus tjaa rira omukambure, ovakambure ovengi aave tira okuya kuye mena rokutja wa tatumisa ovahongewa va Jesus. Posi yokutja, Barnabas wa huhumiṋa nokuvatera Saulus, nu Saulus tjiri wa ri nondangi kotjari tje ho. (Oviung. 9:21, 26-28) Kombunda, ovanene vombongo moJerusalem va muna kutja ovakambure mbaave kara kokure moAntiokie tja Sirie aave hepa omayanḓiparisiro. Owo va hinda Barnabas! Tjiri owo va toorora nawa. Ombeibela i tja Barnabas we “ve zeuparisa kutja ve panḓere pu Muhona nomitima vyawo avihe.” (Oviung. 11:22-24) Momuano otjingewo ndino, Jehova ma yenene okutuvatera ‘okuyanḓiparisa’ ovakambure ovakwetu. Otjotjihorera, Jehova mape ya e tu ungurisa okuhuhumiṋa imba mba zepaisa ovasuverwa vawo. Poo e tu hingi okukaryangera poo okutonena omundu ngwa vera poo ngu nombameno ongoze, okuveraera omambo omawa. Hapo mo yandjere Jehova okukuungurisa tjimuna tja ungurisa Barnabas?​—1 Tes. 5:14.

9. Matu rihongo tjike komuano Jehova ma vatera omurumendu omukambure wena Vasily okurira omurise omuwa?

⁹ Jehova wa vatera omurumendu omukambure wena Vasily okurira omurise omuwa. Indu Vasily tja zikwa otjomunene wombongo nozombura 26, eye aa tira kutja kamaa yenene okuvatera ovakambure mombongo, tjinenenene imba mba ri nomauzeu. Posi yokutja, eye wa muna ombatero okuza kovanene vombongo mbaari nondjiviro onyingi nu wina okuza kOskole yOviungura vyOuhona. Vasily wa ungura oukukutu okurira omunene wombongo omuwa. Otjotjihorera, eye wa tjanga oviṋa oviṱiṱi mbya vanga okuungurira ko. Otja tjaa ungurire koviṋa mbi, kwatjita kutja aha tira rukwao. Eye nai u tja: “Oviṋa mbyaavi ndji tirisa rukuru, nai vi ndji pa ondjoroka tjinene. Indu Jehova tje ndji vatere okumuna ezeva ndiriro okuhuhumiṋa omukambure mombongo, ku ndji pa ondjoroka tjiri.” Varumendu ovakambure, eṋe tji mwa horere ku Vasily nokuriyandjera okuungurisiwa i  Jehova, eye ma yenene okumupa omasa okuungura ovingi mombongo.

10. Abigajil wa tjita vi, nu matu rihongo tjike kotjihorera tje?

¹⁰ David novarumendu ve ovaṱakame aave ramberwa i yOmbara Saulus, nu aave hepa ombatero. Ovarumendu va David va ningira omurumendu Omuisrael omutumbe wena Nabal, okuvepa ovikurya. Owo aave munu kutja mave yenene okumuningira mena rokutja aave ṱakamisa orupanda rwa Nabal mokuti onguza. Posi yokutja Nabal ee ripurire kuye omuini, nu wa panḓa okuvepa otjiṋa. David wa pindikire tjinene nu wa tanda okuzepa Nabal novarumendu avehe vonganda ye. (1 Sam. 25:3-13, 22) Nungwari, Abigajil omukazendu wa Nabal, wari omunazondunge nu wari omuwa. Eye wa wa onḓurumika komurungu wa David ne mu ningire kutja aha tura ondjo mokuzepa Nabal novarumendu ve, okutjita nao kwa raisa ouvanḓe ouingi. Eye we mu raera momuano omuwa kutja nga kare nongamburiro kutja Jehova me mu vatere. Omambo womerisusuparisiro Abigajil nga hungira, nongaro ombwa ndja raisa vya ṱuna komutima wa David. Eye wa muna kutja Abigajil wa hindwa i Jehova. (1 Sam. 25:23-28, 32-34) Abigajil wa ri novikaṋena mbya tjita kutja ma ungurisiwe i Jehova. Momuano otjingewo, ovakazendu Ovakriste mbe nongengezero nozondunge mave yenene okuungurisiwa i Jehova okutunduuza omaṱunḓu wawo na varwe mombongo.​—Omiano 24:3; Titus 2:3-5.

11. Ovasuko va Salum va tjita vi, nu oouṋe ndino mbe horera ku wo?

¹¹ Ozombura ozengi kombunda yanao, ovasuko va Salum va ri mokati ka imba Jehova mba ungurisa okutungurura otumbo twa Jerusalem. (Neh. 2:20; 3:12) Nandarire kutja ihe wawo wari omunane, ovasuko va Salum ve riyandjera okuungura otjiungura otjizeu nu otjinaumba ho. (Neh. 4:15-18) Owo tjiri va pangukire kovarumendu ovatjiukwa va Tekoa, owo mba “panḓa” okuungura oviungura! (Neh. 3:5) Ripura nondjoroka ovasuko va Salum ndji va ri nayo indu otjiungura tjokutungurura otumbo twa Jerusalem tji tja manuka momayuva 52 uriri! (Neh. 6:15) Ndino, ovakazendu ovakambure ve nondjoroka okuungurira Mukuru, mokuvatera​—okutunga nokuṱuna omatuwo ngu maye ungurisiwa komerikotameneno wa Jehova. Eṱe tu hepa ovakazendu ovakambure ovaṱakame otja imba, mbe nondjiviro nonḓero yokuungura, kutja otjiungura hi tji kare nondoṋeno.

12. Jehova ma yenene vi okutuungurisa tjimuna tja ungurisa Tabita?

¹² Jehova wa tunduuza Tabita okukayenda komurungu okutjita “oviungura oviwa nokuvatera” ovahepundu. (Oviung. 9:36) Ovandu ovengi va ṱoruhoze indu tja ṱa, mena rokutja eye wa ri omundu ondjandje nu wotjari. Posi yokutja owo va ri nondjoroka tjinene indu omuapostele Petrus tje mu pendura. (Oviung. 9:39-41) Matu rihongere tjike ku Tabita? Nandarire kutja oweṱe omitanda poo twa kurupa, ovarumendu poo ovakazendu, atuhe matu yenene okuvatera ovakambure ovakwetu.​—Hebr. 13:16.

13. Jehova wa vatera vi omukazendu omukambure wohoṋi wena Ruth, nu eye wa tja vi?

¹³ Omukazendu omukambure wohoṋi wena Ruth aa vanga okurira omuhindwa. Indu tjaari omutanda, eye aa yandja oumbapira kovandu okuza kondjuwo nga kondjuwo mohakahana. Eye wa tja: “Ami ee tjaterwa okuungura otjiungura hi.” Posi yokutja, okuhungira ku novandu nokuveraera ohunga nOuhona wa Mukuru ya ri otjiṋa otjizeu tjinene ku ye. Nandarire kutja wa ri nohoṋi, Ruth wa rira omukandjira woruveze aruhe nozombura 18. Mombura ndji 1946, eye wa ya kOskole ya Gilead nu kombunda wa ka hindwa ko Hawaii na  Japan. Jehova we mu ungurisa momuano omuhimise okuzuvarisa ombuze ombwa momahi ngo. Kombunda yokuzuvarisa oure wozombura ape 80, Ruth wa tja: “Jehova aruhe ee ndji pomasa. Eye we ndji vatera kutja eha kara nohoṋi rukwao. Mbi nongamburiro kutja Jehova ma yenene okuungurisa omundu ngamwa auhe ngu nongamburiro mu ye.”

14. Otja kOvakolose 1:29, ovikwaye mbi matu sokutjita tji matu vanga okuungurisiwa i Jehova?

¹⁴ Oure wozombura ozengi, Jehova wa ungurisa ovakarere ve momiano omingi pekepeke. Hapo eye me ku ungurisa momuano uṋe? Matji zu komuano ove mu mo riyandjere okuungurisiwa. (Lesa Ovakolose 1:29.) Tji we riyandjere okuungurisiwa i Jehova, eye ma yenene okukuvatera okurira omuzuvarise omupyuke, omuhonge omuwa, omuhuhumiṋe omuwa, omuungure omuwa, epanga ewa poo atjihe eye tji ma vanga kutja ombango ye i yenenisiwe.

15. Otja ku 1 Timoteus 4:12, 15, ovakambure omitanda ovazandu mave sokuriheka ku Jehova okuvevatera okutjita tjike?

¹⁵ Hapo tjike novakambure omitanda mbu mave kuru okurira ovarumendu? Tjiri pe nouhepe wovarumendu mbe nomasa okurira ovavatere mombongo. Mozombongo ozengi, otjivarero tjovavatere vombongo tji ri kehi ya itji tjovanene vombongo. Hapo mitanda mape ya amu riyandjere okuvatera nomerizirira tjiva mombongo? Povikando tjiva ovakambure omitanda ovazandu ve tja: “Ami mbi nohange okurira omuzuvarise uriri.” Tji u noumune otja imbo, riheka ku Jehova okukuvatera kutja u kare nonḓero yokuvanga okurira omuvatere wombongo nokukupa omasa okutjita atjihe tji mo yenene kutja u mu karere. (Omuzuv. 12:1) Tjiri matu hepa ombatero yeṋu!​—Lesa 1 Timoteus 4:12, 15.

16. Matu sokuningira tjike ku Jehova, nu omena ra ye?

¹⁶ Jehova me ku vatere okurira atjihe eye tji ma vanga kutja ombango ye i yenenisiwe. Kunao mu ningira kutja me kupe ombango okuungura otjiungura tje, nokukupa omasa ngu mo hepa. Nandarire kutja oove omutanda poo oove omukurundu, ungurisa oruveze, omasa nomauini woye okuhivirika Jehova nai. (Omuzuv. 9:10) Indu tji wa pewa omerizirira wokuungura ovingi motjira tja Jehova, o hakahana okunakaura omerizirira ngo mena rokumuna kutja ko nokuyenena okuungura otjiungura kaaṋi ho. Tjiri ondjingonekero yapeke eṱe atuhe ndji tu nayo yokuungura atjihe tji matu yenene okuyandja ohiviro ndja pwira Tate wetu worusuvero!