1. Matu tjiwa vi kutja tu hupa “momayuva omasenina”?

HAPO ove wa kwatwa kombunda yombura ndji 1914? Tji peri nao, ove wa hupa oure womuinyo woye “momayuva omasenina” wouye mbwi. (2 Tim. 3:1) Atuhe twa zuva ohunga novitjitwa Jesus mbya hunganeka kutja mavi tjitwa moruveze ndwi. Imbi mavi kamburire mo ovita, ondjara, omanyinganyingiro wehi, omitjise, ourunde mbu mau takavarere ko nu ovakarere va Jehova mave tatumisiwa. (Mat. 24:3, 7-9, 12; Luk. 21:10-12) Eṱe wina tu muna ongaro ovandu ndji ve raisa otja komahunganekero womuapostele Paulus. (Lesa okaongo nga “ Ongaro ovandu ndji ve raisa nai.”) Otjovakarere va Jehova, tu nongamburiro kutja tu hupa “momayuva omasenina.”​−Mik. 4:1

2. Matu sokutjiwa omaziriro komapuriro yeṋe?

² Mena rokutja pa kapita oruveze oruingi okuza kombura ndji 1914, ihi tji heya kutja nai tu hupa kuṱa komaandero ‘womayuva omasenina.’ Otja omaandero wouye tjinga aye ri popezu, matu sokutjiwa omaziriro komapuriro omananḓengu nga: Hapo ovitjitwa viṋe mbi mavi tjitwa komaandero ‘womayuva omasenina’? Nu Jehova u vanga kutja tu tjite tjike otja tji matu undju ovitjitwa mbyo?

3. Otja komaprofetero nge ri 1 Ovatesalonika 5:1-3, oviwaṋa mavi tjivisa ombuze iṋe?

³ Lesa 1 Ovatesalonika 5:1-3. Paulus wa hungira ohunga ‘neyuva ra Muhona.’ Otja ketjangwa ndo, eyuva ndo ri heya oruveze okuza komautiro womanyoneno wa “Babilon  otjinene,” tji tji ri ouhonapare wozongamburiro zoposyo, nu mari yanda na Armagedon. (Omavan. 16:14, 16; 17:5) Ngunda “eyuva” ndo ari hiye ya, oviwaṋa mavi tjivisa kutja ku “nOhange norusuvo!” Ovahonapare vouye povikando tjiva ve ungurisa omambo otja ingo tji mave hungire ohunga nokutunduuza omaunguriro wa pamwe pokati koviwaṋa. * Posi yokutja omatjivisiro nge ri mOmbeibela wokutja ku “nohange norusuvo” ya panguka. Omena ra tjike? Ihi tji tja tjitwa, ovandu ovengi mave munu kutja ovahonapare vouye va toṋa okutjita kutja ouye u rire oruveze rorusuvo poo rondjeverero tjiri. Posi yokutja, “ozombamisiro ozonene tjinene” maze utu.​—Mat. 24:21.

4. (a) Ovikwaye vyarwe mbi tu hi nokutjiwa ohunga nomatjivisiro wokutja ku “nohange norusuvo”? (b) Ovikwaye mbi tu tjiwa ohunga nomatjivisiro ngo?

⁴ Eṱe tu tjiwa oviṋa tjiva ohunga nomatjivisiro wokutja ku “nohange norusuvo.” Posi yokutja pe noviṋa tjiva mbi tu hi nokutjiwa. Eṱe katu tjiwa kutja ovikwaye mbi mavi tjiti kutja ovahonapare ve tjite omatjivisiro ngo poo kutja omomuano uṋe mu maye tjitwa. Nu katu nokutjiwa kutja omatjivisiro ngo maye tjitwa povikando ovingi poo maye tjitwa otjikando tjimwe uriri. Kainatja kutja pa tjitwa tjike, eṱe tu tjiwa kutja ouhonapare wovandu kamau yenene okuyeta ohange mouye. Nungwari ingo omatjivisiro ngu tu undjira ko. Omatjivisiro ngo otjiraisiro tjokutja “eyuva ra Muhona” ra tumbuka!

5. 1 Ovatesalonika 5:4-6 ri tu vatera vi okurirongerera “eyuva ra Muhona”?

⁵ Lesa 1 Ovatesalonika 5:4-6. Eronga ra Paulus ri tu raera kutja ovikwaye mbi matu sokutjita okurirongera ‘keyuva ra Muhona.’ Eṱe katu ‘sokurara otja ovandu varwe.’ Nungwari matu ‘sokukara katumba.’ Otjotjihorera, matu sokukengeza kutja atu ha toora omunda nokukara norupa moviṋa vyohoromende. Indu tji twa kara norupa moviṋa mbi, mape ya atu rire orupa ‘rouye.’ (Joh. 15:19) Eṱe tu tjiwa kutja Ouhona wa Mukuru auyerike ombu mau yeta ohange mouye.

6. Matu vanga okuvatera varwe okutjita tjike, nu ongwaye?

⁶ Pendje nokukengeza uriri, eṱe wina matu vanga okuvatera varwe okurihonga ohunga noviṋa Ombeibela mbi ya kwizika kutja mavi katjitwa. Matu sokuraera ovandu nai mena rokutja ondatumisire ondirise tji ya utu, ma rire ouzeu kovandu okuuta okurikotamena ku Jehova. Mena ranao otjiungura tjetu tjokuzuvarisa otjinanḓengu tjinene! *

7. Jehova u vanga kutja tu tjite vi nai?

⁷ Moruveze orusupi ndwa sewa ko, Jehova u vanga kutja tu  kare norupa motjiungura tjokuzuvarisa ngunda “eyuva” re ari hiye ya. Matu sokukondja kutja ‘aruhe tu ungurire Muhona nokuhaurwa.’ (1 Kor. 15:58) Jesus wa hunganeka kutja ovikwaye mbi matu sokutjita. Indu tja hungira ohunga noviṋa avihe oviwa mbi mavi tjitwa momayuva omasenina. Eye wa tja: “Nungwari inga omaandero ngunda aye hiye ya, indji Ombuze mai sokuzuvarisiwa koviwaṋa avihe.” (Mar. 13:4, 8, 10; Mat. 24:14) Ripura uriri notjiṋa hi. Otjikando atjihe tji mo piti motjiungura tjokuzuvarisa, ove u kara norupa mokuyenenisa omaprofetero wOmbeibela ngo!

8. Omomuano uṋe otjiungura tjokuzuvarisa tjOuhona mu tji kayenda komurungu okukara nondoṋeno?

⁸ Omomuano uṋe otjiungura tjokuzuvarisa mu tja muna ondoṋeno? Ombura aihe, ovandu ovengi ve zuva ombuze ombwa yOuhona. Otjotjihorera, ripura nomuano otjivarero tjovazuvarisa vOuhona mu tji kurira ko mouye auhe momayuva omasenina nga. Mombura ndji 1914, pari novazuvarise 5,155 momahi 43. Ndino, pe novazuvarisre ape omangete 8.5 momahi 240! Nandarire nao, otjiungura tjetu ngunda ka tji ya yanda. Eṱe matu sokukayenda komurungu okuraera ovandu kutja Ouhona wa Mukuru auyerike ombu mau yenene okuisapo omauzeu aehe wovandu.​—Eps. 145:11-13.

9. Ongwaye tji twa sokukayenda komurungu okuzuvarisa ombuze yOuhona?

⁹ Otjiungura tjetu tjokuzuvarisa tjOuhona matji kayenda komurungu nga indu Jehova tja tja nga tji yande. Hapo pa sewa oruveze ndu ṱa pi kovandu okutjiwa Jehova Mukuru na Jesus Kristus? (Joh. 17:3) Katu nokutjiwa. Posi yokutja matu tjiwa kutja ngunda ondatumisire ondirise ai hiya uta, auhe ngu “nomutima omuwa” ma kara noruveze rokuyakura ombuze ombwa nokukarera Jehova. (Oviung. 13:48, NW) Matu vatere vi ovandu mbo komurungu woruveze?

10. Jehova u tupa ye okutuvatera okuhonga ovandu ouatjiri?

¹⁰ Jehova u tupa avihe mbi matu hepa okuhonga ovandu ouatjiri, okupitira motjira tje. Otjotjihorera, otjivike atjihe tu muna omerirongerisiro pombongarero yombongo yomakati kotjivike. Ombongarero yombongo ndji i tu vatera okutjiwa kutja ovikwaye mbi matu sokuhungira otjikando otjitenga tji twa hakaene ku nomundu na indu tji matu ke mu varura rukwao. Nu i tu honga omuano omuwa wokuhonga ovahongewa vetu vOmbeibela. Otjira tja Jehova wina tji tupa oviṋa mbi matu yenene okuungurisa mOviungurisiwa vyetu vyOkuhonga. Oviungurisiwa mbi vi tu vatera . . .

•   okuuta ehungi,

• okunana ombango,

• okutunduuza ovandu okuvanga okurihonga ovingi ohunga nOmbeibela,

• okuhonga ovahongewa vetu ouatjiri wOmbeibela,

• nokuṋanga imba mbe nonḓero kEtuwo retu rOmerikotameneno nokuvehinda korungovi rwetu.

Otjingapari kutja, okukara noviungurisiwa mbi uriri kaku ya yenena. Eṱe matu sokuviungurisa. * Otjotjihorera, tji wa zu nokuhungira ku nomundu ngwa raisa onḓero u mwesa nokambapira poo okambo, kutja ma lese nga tji mo ke mu varura rukwao. Omerizirira wetu oveni okukara norupa motjiungura tjokuzuvarisa tjOuhona omueze auhe.

11. Ongwaye tji pa utwa omakonḓononeno wOmbeibela womorungovi?

¹¹ Omakonḓononeno wOmbeibela womorungovi nga Online Bible Study Lessons nge ri ko jw.org^®, omuano warwe Jehova me vatera ovandu okurihonga ouatjiri. (Twende korupa rOtjiingrisa ndwi BIBLE TEACHINGS > ONLINE LESSONS.) Ongwaye tji pa utwa omakonḓononeno wOmbeibela nga? Omueze auhe, ovandu ovengi mouye ve paha okukonḓonona Ombeibela korungovi. Omahongero nge ri korungovi rwetu ye yenena okuvatera ovandu okurihonga ouatjiri ohunga nEmbo ra Mukuru. Ovandu tjiva mbu tu hungira ko ohunga nOmbeibela mape ya ave keyakeya okuyakura omahongero ngu tu yandja. Tji va raisa ongaro ndjo, ve raisira orupa ndwo korungovi rwetu poo ve hindira olink meraka ndi ve zuva. *

12. Ovikwaye omundu mbi ma yenene okurihonga okuza komakonḓononeno wOmbeibela womorungovi?

¹² Omakonḓononeno wOmbeibela womorungovi ye hungirira komapu nga: “Ombeibela nomutjange wayo,” “Ovandu vOmbeibela,” “nOmbuze yomaundjiro mOmbeibela.” Momapu ngo omundu ma yenene okurihonga:

• Omuano Ombeibela mu mai yenene okumuvatera

• Kutja Jehova, Jesus, novaengeli oouṋe

• Kutja ongwaye Mukuru tja mema ovandu

• Kutja ongwaye tji ku nomauzeu nourunde

Omapu ngo wina ye hungira kutja Jehova ma . . 

• kaisapo omauzeu nonḓiro,

• kapendura ovaṱi komuinyo,

• nokupingenisa ouhonapare wovandu ku nOuhona wa Mukuru.

13. Hapo omakonḓononeno wOmbeibela womorungovi ye pingena omahongero wOmbeibela nge tjitwa? Kahurura.

¹³ Omakonḓononeno wOmbeibela womorungovi ka ye pingene omahongero wOmbeibela nge tjitwa. Jesus we tupa ondjingonekero yokukaisapo ovandu ovahongewa. Tu nomaundjiro kutja ovandu mbe nonḓero mave lese omapu nge ri korungovi ndo, ave tjaterwa i imbi mbi mave rihongo, nu ave vanga okurihonga ovingi. Kunao, owo mape ya ave yakura okurihonga Ombeibela. Komaandero wepu arihe, omulese u ṋangwa okuningira omundu ngu me rihongo Ombeibela kuna ye. Eyuva arihe, otjira tji muna omaningiriro ape 230 wovandu mbe vanga okurihonga Ombeibela mouye auhe okupitira morungovi! Okumuna omundu ngu me ku hongo Ombeibela otjiṋa otjinanḓengu!

14. Otja komarakiza wa Jesus nga tjangwa mu Mateus 28:19, 20, tu kondja okuungura ye, nu omena raye?

¹⁴ Lesa Mateus 28:19, 20. Otja tji matu hongo ovandu Ombeibela, matu sokukondja pu matu yenene ‘okuisa po ovandu ovahongewa  . . . , nokuvehonga okuṱakamisa oviṋa avihe’ Jesus mbya rakiza. Eṱe matu sokuvatera ovandu okuzuva ounanḓengu wokutoorora okukarera Jehova nokuriwisa kehi  yOuhona we. Ihi tji heya kutja matu sokukondja okutunduuza ovandu okutjita kutja ouatjiri u ṱune komitima vyawo mokuṱakamisa imbi mbi mave rihongo, okuriyandja ku Jehova nokupapitisiwa. Tji va tjiti nao otji mave tuurunga eyuva ra Jehova.​—1 Petr. 3:21.

15. Katu noruveze kuye, nu omena raye?

¹⁵ Otja tji pa raisiwa rukuru, pasewa oruveze oruṱiṱi uriri ngunda ouye au hiya yanda. Mena repu ndo, eṱe katu noruveze okurihonga Ombeibela ku novandu mbe ha tjiti omarundurukiro mehupo okuraisa kutja ve vanga okukarera Jehova. (1 Kor. 9:26) Otjiungura tjetu otjinanḓengu! Pe novandu ovengi mbu mave sokuzuva ombuze yOuhona nai ngunda eri rukuru.

16. Otja kOmavandururiro 18:2, 4, 5, 8, atuhe matu sokutjita vi? (Wina lesa omambo wokehi.)

¹⁶ Lesa Omavandururiro 18:2, 4, 5, 8. Omazeva nga ye raisa otjiṋa tjarwe Jehova tje vanga kutja ovakarere ve ve tjite. Ovakriste vatjiri avehe mave sokukara kokure noviṋa mbi mavi tjama nozongamburiro zoposyo mozongaro azehe. Omuhongwa wOmbeibela mape ya wari norupa mozongamburiro zoposyo, ngunda e hiye rihonga ouatjiri. Eye mape ya aa i kokera ndjo nokukara norupa movitjitwa vyayo. Poo mape ya a yandja ovimariva kokereka ndjo. Kutja Omuhongwa wOmbeibela ma yandjerwe okurira omuzuvarise ngu ha papitisiwa, eye ka sokukara norupa rukwao moviṋa avihe mbi mavi tjama nongamburiro yoposyo. Eye ma sokutjanga orutuu romapitiro kokereka ye ndjo poo kotjira kaaṋi tjaari ko tji tji norupa na Babilon Otjinene, kutja eye karupa rukwao. *

17. Oviungura viṋe Omukriste mbye ha sokuungura nu omena raye?

¹⁷ Omukriste watjiri ma sokukengeza kutja oviungura vye avi ha kara norupa nozongamburiro zoposyo. (2 Kor. 6:14-17) Otjotjihorera, eye kamaa ungura pokereka. Nu wina, Omukriste ngu ungura pongetjefa kaaṋi kamaa vanga okuungura oviungura mbi mavi handjaura omerikotameneno woposyo. Nu tje nongetjefa ye omuini eye kamaa yakura oviungura mbi norupa na Babilon Otjinene. Ongwaye tji tu noumune mbo? Mena rokutja katu vanga okukara norupa moviungura nouvi movira vyozongamburiro nḓe he ri  ozongohoke komurungu wa Mukuru.​—Jes. 52:11. *

18. Omurumendu umwe omukambure wa panḓera vi pomirari vyOmbeibela ohunga noviungura?

¹⁸ Ozombura nḓa kapita, omunene wombongo ngwa ri nongetjefa ye omuini wa ningirwa i yomurumendu okukaungura otjiungura tjokuhonga omiti pokereka ndja ri motjihuro eye maa kara. Omurumendu ngwi aa tjiwa kutja omukambure ngwi aruhe aa tja ke nokuungura pozokereka. Posi yokutja otjikando hi, omurumendu ngwi aa hepa omundu tjiri ngu me ke mu ungurira otjiungura ho. Nandarire nao, omurumendu omukambure wa panḓera pomirari vyOmbeibela nu wa panḓa okukaungura otjiungura ho. Otjivike tji tja kongorera ko, ongoramambo ya raisa otjiperendero tjomurumendu warwe ngu honga omiti ama twako otjikoroise kokereka. Andakuzu omurumendu omukambure wa yakura otjiungura ho, otjiperendero tje atja tji kara mongoramambo ndjo. Ripura uriri ohunga nomuano otjiṋa ho matja tji zunḓa ena re! Nokuhihamisa Jehova.

19-20. (a) Twe rihongo tjike morupa ndwi? (b) Ovikwaye vyarwe mbi matu sokurihonga?

¹⁹ Ombeibela i tja omaprofetero warwe omananḓengu ngu maye yenenisiwa moruveze rwatjimanga, omatjivisiro wokutja ku “nohange norusuvo” okuza kovahonapare vouye. Mena ra imbi Jehova mbye tu honga, eṱe tu tjiwa kutja oviwaṋa kamaavi yeta ohange yatjiri nu ndji mai karerere. Matu sokutjita vi ngunda otjitjitwa ho atji hiya yenenisiwa nu ngunda omanyoneno wa tjimanga a ye hiya uta? Jehova u vanga kutja tu kayenda komurungu okuzuvarisa ombuze yOuhona nokukondja okutjita kutja ovandu ovengi ve rire ovahongewa. Eṱe wina matu sokukara kokure nozongamburiro azehe zoposyo. Ihi matji hee kutja matu sokuisa okurira okaṋepo poo okuhinokuungura oviungura mbi norupa na Babilon Otjinene.

²⁰ Pe novitjitwa vyarwe mbi mavi kongorereko “momayuva omasenina.” Nu wina pe noviṋa vyarwe Jehova mbye undjira ko kweṱe okutjita. Oviṋa mbi ovikwaye, nu matu yenene vi okurirongerisa koviṋa avihe mbi mavi tjitwa moruyaveze ropopezu? Matu ke rihonga morupa ndu maru kongorereko.