1-2. (a) Ovahonapare vouye mave tjivisa ye moruveze ropopezu? (b) Omapuriro yeṋe ngu maye hepa omaziriro?

NGATU tje ovahonapare vouye va tjiti omatjivisiro nga hunganekwa rukuru wokutja ku “nohonge norusuvo.” Owo mape ya ave rihivi kutja ouye uri mohange nondjeverero. Ovahonapare vouye mave vanga kutja tu ripure kutja owo mave yenene okuzengurura omauzeu aehe wovandu. Posi yokutja owo kamaave yenene okutjaera imbi mbi mavi kongorereko! Omena raye? Otja komaprofetero wOmbeibela, “omanyoneno maye ve werereke . . . nu kape nomundu ngu me ye taurire.”​—1 Tes. 5:3.

² Pe nomapuriro omananḓengu ngu maye hepa omaziriro. Hapo mape tjitwa tjike ‘mozombamisiro ozonene tjinene’? Jehova ma vanga kutja tu tjite vi moruveze ndo? Nu matu rirongerisa vi nai kutja tu rire ovaṱakame mozombamisiro ozonene tjinene?​—Mat. 24:21.

3. Otja kOmavandururiro 17:5, 15-18, Mukuru ma nyono vi “Babilon Otjinene”?

³ Lesa Omavandururiro 17:5, 15-18. “Babilon Otjinene” matji nyonwa! Otja tji pa tamunwa rukuru, ovahonapare vouye kamaave yenene okutjaera imbi mbi mavi tjitwa moruveze ndo. Omena raye? Mena rokutja ‘Ndjambi ma ṱunu omitima vyavyo kutja ve tjite avihe otja kombango ye.’ Ombango ye oya ye? Oyokunyona  ozongamburiro azehe zoposyo, nu wina ozongamburiro zOukriste. * Mukuru ma twamo ombango ye momitima ‘vyozonya omurongo’ vya ihi ‘otjipuka otjiserandu.’ Ozonya omurongo ze kuramena po ozohoromende azehe zouye nḓe yandja oruvara “kotjipuka otjiserandu,” tji tji kuramena po​−Omihoko Omikutasane. (Omavan. 17:3, 11-13; 18:8) Ozohoromende nḓo tji za utu okurwisa ozongamburiro zoposyo, iho matji rire otjiraisiro tjokutja ondatumisire ondirise ya utu. Otjitjitwa ho matji tjitwa tjimanga nu matji rire otjitirise, nu wina matji ṱunu kovandu avehe mouye.

4. (a) Ovahonapare vouye mave yandja omapu yeṋe wokutja ongwaye tji mave nyono ozongamburiro zoposyo? (b) Ouṋepo mbwa ri wozongamburiro nḓo mape ya au tjiti tjike?

⁴ Eṱe katu nokutjiwa kutja ovahonapare vouye mave yandja omapu yeṋe wokutja ongwaye tji mave nyono Babilon Otjinene. Owo mape ya ave tja ozongamburiro kaze eta ohange nu aruhe ze kondja okurihitisa moviṋa vyohoromende. Poo mape ya ave tja ozongamburiro ze riyetera omautumbe nomauini omengi. (Omavan. 18:3, 7) Ihi katji nokuheya kutja ouṋepo auhe wozongamburiro nḓo mau nyonwa indu otjiṋa ho tji tja tjitwa. Nungwari, pe munika tjimuna ovahonapare vouye mave isapo ozongamburiro zoposyo. Indu ozongamburiro tji za nyonwa, ouṋepo mbwa ri wozongamburiro nḓo mau utu okumuna kutja ovanane vozongamburiro kave tjitire imbi mbi va kwizika. Kunao ovandu mbo mape ya ave ha vanga okukara norupa mozongamburiro nḓo rukwao.

5. Jehova wa kwizika tjike ohunga nozombamisiro ozonene tjinene, nu ongwaye?

⁵ Ombeibela kai raisa kutja omanyoneno wa Babilon Otjinene maye toora orure ndu ṱa pi, posi yokutja matu tjiwa kutja maye kambura oruveze orusupi. (Omavan. 18:10, 21) Jehova wa kwizika kutja ma ‘tembura omayuva’ wozombamisiro kutja “ovatoororwa ve” ve hupe nokutja ongamburiro youatjiri i kayende komurungu. (Mar. 13:19, 20) Posi yokutja Jehova ma vanga kutja tu tjite vi indu ozombamisiro ozonene tjinene tji za utu nga kovita vya Armagedon?

6. Ongwaye okuhinokukara norupa nozongamburiro zoposyo tji ku hiya yenena?

⁶ Otja tji twe rihongo morupa ndwa kapita, Jehova u vanga kutja ovakarere ve ave ha kara norupa nozongamburiro zoposyo. Posi yokutja, okuhinokukara norupa nozongamburiro zoposyo ka ku ya yenena. Eṱe wina matu sokurimanena okuṱakamisa​—omerikotameneno wa Jehova wouatjiri. Ngatu tare komiano vivari mu matu yenene okutjita nao.

7. (a) Omomuano uṋe mu matu yenene okukara nongurameno komirari vya Jehova vyomeritjindiro? (b) Ovaheberi 10:24, 25 ri ṋuṋisa vi ounanḓengu wokuyenda kozombongarero zombongo, tjinene nai?

⁷ Rutenga, matu sokukara nongurameno komirari vya Jehova vyomeritjindiro. Eṱe kamaatu vanga okuyakura ozongaro ozombi zomeritjindiro zouye. Otjotjihorera, katu yakura ongaro yoruvakiro ngamwa aihe, tjimuna ovarumendu vevari poo ovakazendu vevari okukupasana nozongaro zarwe zokutundukasana. (Mat. 19:4, 5; Rom. 1:26, 27) Otjitjavari, matu sokukayenda komurungu okurikotamena ku Jehova pu nOvakriste ovakwetu. Eṱe tu tjita nao apehe pu matu yenene, nandarire pEtuwo retu rOmerikotameneno, poo mozondjuwo zetu indu tje ri ohepero. Nandarire kutja pa tjitwa tjike, eṱe kamaatu isa okuyenda kozombongarero zombongo. Otjiperi kutja, matu hepa okuya pamwe tjinene nai otja ‘tji matu munu kutja Eyuva ra Muhona ri ri pokuya.’​—Lesa Ovaheberi 10:24, 25.

8. Ombuze yetu mape ya ai runduruka vi moruyaveze?

⁸ Momayuva wozombamisiro ozonene tjinene, ombuze ndji tu zuvarisa mape ya ai runduruka. Moruveze rwa nai, tu zuvarisa ombuze ombwa yOuhona nu tu kondja okuisapo ovandu ovahongewa. Posi yokutja, oruveze ndo mape ya atu zuvarisa ombuze ndji mai vete tjimuna ozombawe ozonene zombura. (Omavan. 16:21) Eṱe mape ya atu zuvarisa kutja ouye wa Satan moruveze ropopezu mau yandekwa oparukaze. Oruveze ndo tji rwe ya, matu tjiwa kutja ombuze iṋe ndji matu sokuzuvarisa nokutja matu i yandja momuano uṋe. Hapo matu ungurisa omiano mbi twa ungurisa oure wozombura ozengi motjiungura tjokuzuvarisa? Poo matu ungurisa omiano vyarwe? Katu nokutjiwa. Kainatja kutja matu zuvarisa momuano uṋe, eṱe matu kara nondjingonekero yokuzuvarisa ombuze ya Jehova yombanguriro!​—Esek. 2:3-5.

9. Ongaro iṋe ovahonapare vouye ndji mave raisa kombuze yetu, posi yokutja tu nongamburiro ya ye?

⁹ Ombuze yetu mape ya ai tjiti kutja ovahonapare vouye ve kondje okututjaera kutja atu ha zuvarisa oparukaze. Tjimuna tji tu ṱaṱera ku Jehova okutuvatera motjiungura tjetu tjokuzuvarisa nai, wina matu hepa okuṱaṱera ku ye moruveze ndo. Tu nongamburiro kutja Mukuru wetu me tupe omasa okuyenenisa ombango ye.​—Mika 3:8.

10. Otja tji pa hunganekwa mu Lukas 21:25-28, omomuano uṋe ovandu ovengi mu mave ṱunwa i yoviṋa mbi mavi tjitwa mozombamisiro ozonene tjinene?

¹⁰ Lesa Lukas 21:25-28. Momayuva wozombamisiro ozonene tjinene ovandu mave urumisiwa i yoviṋa avihe mbyaave nangarasi mavi karerere, tji vi he ri po rukwao. Owo mave kara ‘mozombamisiro,’ nokurikenda kutja mape ya ave zepewa. (Sef. 1:14, 15) Moruveze ndo, ehupo mape ya ari rire ezeu tjinene nandarire kovakarere va Jehova. Mena rokutja kaweṱe ovouye mbwi, mape ya atu munu omauzeu. Eṱe mape ya atu ha kara novihepwa tjiva.

11. (a) Ongwaye Ovahongonone va Jehova tji mave nana ombango yovandu? (b) Ongwaye tji tu ha sokutira ozombamisiro ozonene tjinene?

 ¹¹ Ovandu vozongamburiro nḓa nyonwa mape ya ave pindikisiwa i yokutja Ovahongonone va Jehova mave kayenda komurungu nongamburiro yawo. Mena romazenge wawo mave tjivisa varwe kotungovi. Ovahonapare nomunane wawo Satan, mave tu pindikire mena rokutja ongamburiro yetu aiyerike ondji mai kayenda komurungu. Owo kave nokuyenenisa ondando yawo yokuisapo ozongamburiro azehe kombanda yehi. Kunao ovandu mave yandja ombango kweṱe. Oruveze ndo, ovahonapare mave rire Gog wa Magog. * Owo mave rikutu kumwe nu ave rwisa ovakarere va Jehova. (Esek. 38:2, 14-16) Eṱe mape ya atu utu okurikenda kutja mape tjitwa tjike mozombamisiro ozonene tjinene, mena rokutja katu nondjivisiro aihe. Posi yokutja tu nongamburiro kutja, katu nokuhepa okutira ozombamisiro ozonene tjinene. Jehova me tupe omarakiza ngu maye yama omiinyo vyetu. (Eps. 34:19) Eṱe matu yenene ‘okukara kamuseka nokuyera oviuru vyetu’ mena rokutja matu tjiwa kutja ‘onguturiro yetu tjinga aya tumbuka.’ *

12. Omomuano uṋe “omukarere omuṱakame nomunazondunge” me tu rongerisa koviṋa mbi mavi tjitwa moruyaveze?

¹² “Omukarere omuṱakame nomunazondunge” u tu rongerisa kutja tu rire ovaṱakame momayuva wozombamisiro ozonene tjinene. (Mat. 24:45) Ihi tji tjitwa momiano omingi pekepeke. Otjotjihorera ngatu tare komapu womaworonganeno omanene wozombura nḓa 2016-2018. Okupitira mozoprograma nḓo, twa tunduuzwa okukara novikaṋena mbi matu hepa otja eyuva ra Jehova tji riri popezu. Ngatu tare kovikaṋena tjiva mbyo.

13. Omomuano uṋe mu matu pamisa ouṱakame wetu ku Jehova, nu ongwaye tji matu sokutjita nao nai?

¹³ Ouṱakame: Epu romaworonganeno omanene wombura ndji 2016 ra ri “Remain Loyal to Jehovah!” Oprograma ndjo ye tu honga kutja tji tu noupanga wopopezu kuna Jehova matu rire ovaṱakame ku ye. Eṱe twa zemburukisiwa kutja matu yenene okutumbuka popezu na Jehova okupitira mongumbiro nomakonḓononeno omakoto wEmbo re. Okutjita nao ku tupa omasa okutuurunga omauzeu nandarire inga omanene tjinene. Otja ouye wa Satan tji mau ya komaandero, eṱe matu sokuundjira ko okumuna omauzeu omengi ngu maye roro ouṱakame wetu ku Mukuru na kOuhona we. Ovandu mape ya ave kayenda komurungu okutunyekerera. (2 Petr. 3:3, 4) Epu rimwe ovandu ndi mave tjitire nao, omena rokutja eṱe katu yandja oruvara kouye wa Satan. Eṱe matu sokupamisa ouṱakame wetu nai kutja tu rire ovaṱakame mozombamisiro ozonene tjinene.

14. (a) Omarundurikiro yeṋe ngu maye tjitwa kovarumendu ovakambure mbe hongorera po ovakarere va Jehova kombanda yehi? (b) Ongwaye tji matu hepa okurira ovaṱakame oruveze ndo?

¹⁴ Mozombamisiro ozonene tjinene, mape tjitwa omarundurukiro kovarumendu mbe hongorera po ovakarere va Jehova kombanda yehi. Oruveze ndo, ovatwirisiwa avehe mbe ri kombanda yehi mave i keyuru okukakara norupa movita vya Armagedon. (Mat. 24:31; Omavan. 2:26, 27) Ihi matji hee kutja Orutu Orunane karu nokukara  porukwao kombanda yehi. Nungwari, otjimbumba otjinene tjovandu matji kayenda komurungu okurongerisiwa. Mape kara ovarumendu ovakambure mbe nomerizirira wokuhongorera po. Matu hepa okuraisa ouṱakame wetu mokuyandja oruvara kovarumendu ovakambure mbo nokukongorera omuhunga mbu mave pewa i Mukuru. Tji matu vanga okuhupa matu sokukongorera omuhunga wovarumendu ovakambure mbo!

15. Matu yenene vi okupamisa onḓarorure yetu, nu ongwaye tjeri ohepero okutjita nao nai?

¹⁵ Onḓarorure: Epu romaworonganeno omanene wombura ndji 2017 ra ri “Don’t Give Up!” Oprograma ndji ye tu vatera kutja tu tuurunge omarorero. Twe rihonga kutja onḓarorure kai zu moviṋa tji mavi kayenda nawa mehupo. Matu yenene okupamisa onḓarorure yetu mokuṱaṱera ku Jehova. (Rom. 12:12) Atu zembi imbi Jesus mbya kwizika, indu tja tja: “Ingwi ngu ma panḓere po nga komaandero, ma yamwa.” (Mat. 24:13) Omakwizikiro we ngo ye heya kutja matu sokurira ovaṱakame nandarire kutja matu munu omauzeu. Tji twa tuurunga omauzeu nai, matu yenene okukara nomasa okutuurunga ozombamisiro ozonene tjinene.

16. Ovikwaye mbi raisa kutja tu nouvanḓe, nu matu yenene vi okupamisa ouvanḓe wetu nai?

¹⁶ Ouvanḓe: Epu romaworonganeno omanene wombura ndji 2018 ra ri “Be Courageous!” Oprograma ndji yetu zemburukisa kutja ondjiviro ndji tu nayo kai raisa kutja oweṱe ovandu ozombanḓe. Tjimuna onḓarorure, ouvanḓe watjiri u za mokuriyameka ku Jehova. Matu yenene vi okuṱaṱera ku Jehova? Matu sokulesa Embo re eyuva arihe nokuripurira ko oukoto komuano Jehova maa yama ovakarere ve morukapitaveze. (Eps. 68:20; 2 Petr. 2:9) Indu ovahonapare vouye tji mave tu rwisa moruveze rozombamisiro ozonene tjinene, matu hepa okurira ozombanḓe nokukara nongamburiro yomasa mu Jehova. (Eps. 112:7, 8; Hebr. 13:6) Tji twe riyameke ku Jehova nai, matu kara nouvanḓe mbu matu hepa indu Gog tji metu rwisa. *

17. Ongwaye tji tu ha sokutira Armagedon? (Tara kotjiperendero tjokombanda yokambo nga.)

¹⁷ Otja tji pa raisiwa morupa ndwa kapita, otjingi tjetu twa hupa  momayuva omasenina. Nungwari wina tu nomaundjiro wokutuurunga ozombamisiro ozonene tjinene. Ovita vya Armagedon ombi mavi yeta omaandero wouye mbwi. Posi yokutja, katu sokutira otjiṋa. Omena raye? Mena rokutja iho otjirwa tja Jehova, kunao eṱe katu nokuhepa okurwa. (Omiano 1:33; Esek. 38:18-20; Sak. 14:3). Jehova ma rakiza Jesus Kristus okuhongorera po otjimbumba tja Mukuru tjovita. Jesus, ovaengeli omatau omengi novatwirisiwa mave rwisa Satan, ozondemone ze, novimbumba vyawo vyovitwa.​—Dan. 12:1; Omavan. 6:2; 17:14.

18. (a) Jehova wa kwizika tjike? (b) Ongwaye Omavandururiro 7:9, 13-17 tji maye ku vatere okukara nongamburiro moruyaveze?

¹⁸ Jehova wa kwizika omambo nga: “Kape notjirwise tji matji yenene okukuhihamisa.” (Jes. 54:17) “Otjimbumba otjinene” tjovakarere va Jehova matji tuurunga ‘ondatumisire ondirise’ nomuinyo! Okuzambo mave kayenda komurungu okurikotamena ku ye. (Lesa Omavandururiro 7:9, 13-17.) Tjiri Ombeibela i tupa omapu omengi nge tjita kutja tu kare nongamburiro yokutja moruyaveze matu kayamwa! Eṱe matu tjiwa kutja “Muhona u yama imba mbe ṱakama mu Ye.” (Eps. 31:23) Avehe mbe tanga Jehova nokumusuvera mave kara nondjoroka okumuna eye tji ma yapura ena re eyapuke.​—Esek. 38:23.

19. Ovikwaye oviwa mbi matu kamuna moruyaveze rwopopezu?

¹⁹ Ripura nomuano etjangwa ra 2 Timoteus 3:2-5 mu mape ya ari tuwapewa indu tji mari hungire ohunga novandu mbu mave kara mouye oupe nokuhinomapopero wa Satan. (Lesa okaongo nga “ Omuano ovandu mu mave kakara.”) Mbuti George Gangas, * ngwaa karere otjokaṋepo kOrutu Orunane, wa tja: “Tjiri imbo mau rire ouye ouwa indu ovandu avehe tji mave rikotamene ku Jehova! Moruveze rwa tjimanga ove mokara nondjingonekero yokuhupa mouye oupe. Ove mo hupu orure tjimuna Jehova.” Tjiri indo oruyaveze oruwa tjinene!