1. Omomuano uṋe 2 Ovakorinte 3:1-3 mu ri tu vatera okuraisa ondangi kondjingonekero ndji tu nayo yokurihonga Ombeibela ku nomundu nokumuna tji ma papitisiwa? (Tara kotjiperendero tjokombanda yokambo nga.)

HAPO u kara noumune uṋe tji mo munu omuhongwa wOmbeibela mombongo yoye tji ma papitisiwa? Tjiri otjiṋa ho tji yorokisa omutima woye. (Mat. 28:19) Nu indu tji we rihonga ku nomundu ngo, ove tjiri u kara nondjoroka okumumuna tji ma papitisiwa. (1 Tes. 2:19, 20) Ovahongwa ovape mba ve ri tjimuna “otutuu otutjiukise” tu tu raisa kutja ovemuhonge novakambure avehe mombongo va ungura nawa otjovazuvarise.—Lesa 2 Ovakorinte 3:1-3.

2. (a) Epuriro riṋe enanḓengu ndi matu sokuripurira ko, nu omena raye? (b) Omakonḓononeno wOmbeibela otjikeṋa? (Lesa omambo wokehi.)

² Otjiṋa otjiwa okutjiwa kutja moure wozombura ine nḓaa kapita, ovahongwa vOmbeibela * ape 10 000 000 va papitisiwa. Nu mombura aihe ovahongwa vOmbeibela ape 280 000 va papitiswa okurira Ovahongonone va Jehova novahongewa va Jesus Kristus ovape. Hapo matu vatere vi ovahongwa varwe ovengi okupapitisiwa? Jehova ngamba u yandja oruveze kovandu okurira Ovahongonone ve. Kunao tu kondja pu matu yenene okuvevatera kutja ve vaze pondondo yokupapitisiwa tjimanga, mena rokutja tu noruveze orusupi uriri.—1 Kor. 7:29; 1 Petr. 4:7.

3. Matu katara kuye morupa ndwi ohunga nokutjita omakonḓononeno wOmbeibela?

 ³ Mena rokutja okukaisapo ovandu ovahongewa otjiṋa otjinanḓengu nai, Orutu Orunane rwa ningira otutavi twozomberoo okutara kutja matu yenene vi okuvatera ovahongwa ovengi okuvaza pondondo yokupapitisiwa. Morupa ndwi na ndi mari kongorere ko, matu katara kutja omomiano viṋe mu matu rihongere kovakandjira, ovahindwa novatarere mbe varura ozombongo. * (Omiano 11:14; 15:22) Owo va kahurura omiano omundu ngu ma hongo Ombeibela nomuhongwa mu mave yenene okutjita kutja omakonḓononeno wawo ye kare nondoṋeno. Morupa ndwi, matu katara koviṋa vitano omuhongwa auhe mbi ma hepa okutjita kutja ma tjite omarundurukiro ngu maye heperwa po kutja ma papitisiwe.

4. Matu sokutjiwa ye ohunga nomakonḓononeno wOmbeibela nge tjitwa pomuvero wondjuwo yomunionganda?

⁴ Otjingi tjovakambure ovakwetu ve konḓonona Ombeibela ku novandu pomuvero wondjuwo yomunionganda. Nandarire kutja imbwi omuano omuwa wokunana ombango yovandu kOmbeibela, potuingi omahungi ngo kaye kambura orure nu nandarire kaye tjitwa otjivike atjihe. Kutja ve kayende komurungu notjihungiriro tjawo, ovakambure tjiva ve pura ovandu mba raisa onḓero onomora yawo yongoze nu okuzambo ave ve tonene poo okuvehindira otjiṋa okuza mOmbeibela. Owo mape ya ave hakaene omuano mbo oure womieze omingi. Hapo omuhongwa ma yenene okuriyandja ku Mukuru nokupapitisiwa indu tji mave ungurisa oruveze oruṱiṱi uriri kokurihonga Ombeibela? Kako.

5. Jesus wa hungira ohunga nai ye mu Lukas 14:27-33 mbi matu yenene okuungurisa okuvatera ovahongwa vetu vOmbeibela?

⁵ Otjikando tjimwe, Jesus wa yandja otjihorera okukahurura kutja omundu ma sokutjita vi tji ma vanga okurira omuhongewa we. Eye wa hungira ohunga nomundu ngu ma vanga okutunga otjiretundu nombara ndji mai vanga okuyenda movita. Jesus wa tja omutunge ngo ma sokuhaama rutenga a ‘sasaneke kutja omatungiro maye ningire tjike’ kutja ma mane okutunga otjiretundu, nu ombara rutenga mai ‘sokuripura’ nokutara kutja ovarwe vayo wovita mave yenenisa ondando yawo poo indee. (Lesa Lukas 14:27-33.) Momuano otjingewo, Jesus aa tjiwa kutja omundu ngu ma vanga okurira omuhongewa we ma sokukonḓonona nawa kutja okurira omuhongewa we ku kamburira mo ye. Mena ranao, matu sokutunduuza ovahongwa vetu vOmbeibela okurihonga otjivike atjihe. Matu yenene vi okutjita nao?

6. Ovikwaye mbi matu yenene okutjita kutja ovahongwa vetu ve kure mongamburiro?

 ⁶ Tjita kutja omahongero wopomuvero ye rire omare kaṱiṱi. Ove mo yenene okuhungirira kOmatjangwa yevari pendje nokuhungirira ku rimwe uriri otjikando atjihe tji mwa hakaene. Indu omunionganda tja utu okuiririra okuhungira orure kaṱiṱi, mu ningira kutja mu haame nu mu kayende komurungu nehungi reṋu. Eziriro romunionganda ma ri raisa kutja u nonḓero yokurihonga poo indee. Okumuvatera kutja me rihonge hakahana, ove mo yenene okumuningira kutja mu rihonge ovikando vivari motjivike. Posi yokutja pe hepa ovingi pendje nokurihonga rumwe poo tuvari motjivike.

7. Omuhonge wOmbeibela ma yenene vi okurirongerisa nawa komakonḓononeno wOmbeibela aruhe?

⁷ Otja omuhonge wOmbeibela, ove mo sokurirongerisa nawa komakonḓononeno aehe wOmbeibela. Ove mo yenene okuuta nokulesa oviṋa mbi mamu ke rihonga nokutara omatjangwa. Rizuvisa nawa omapu aehe omananḓengu. Ripura ohunga nepu rokombanda rehongwa ndwo, omambo wokombanda, omapuriro, omatjangwa nga tjangwa “lesa,” oviperendero nouvidio mbu mau vatere okukahurura epu ndwo. Nu okuzambo ripura kutja mo kahururire vi omuhongwa woye wOmbeibela ondjivisiro ndjo momuano omupupu nomuzuvakwa, kokutja ma yenene okuizuva nawa nokuyiungurisa mehupo re.—Neh. 8:8; Omiano 15:28.

8. Omambo womuapostele Paulus nge ri mOvakolose 1:9, 10 maye tu hongo ye ohunga nokukumbira ovahongwa vetu vOmbeibela?

⁸ Otja tji mo rirongerisa, kumba ku Jehova ohunga nomuhongwa woye novihepwa vye. Ningira Jehova okukuvatera kutja u mu honge okuza mOmbeibela momuano omuwa mbu mau ṱunu komutima we. (Lesa Ovakolose 1:9, 10.) Kondja okuripura ohunga nepu ezeu omuhongwa ndi mape ya aha zuu nawa poo ndi mape ya aha yakura. Zemburuka kutja ondando yoye oyokuvatera omuhongwa woye okuvaza pondondo yokupapitisiwa.

9. Omuhonge wOmbeibela ma yenene vi okuvatera omuhongwa we okurirongerisa komakonḓononeno we wOmbeibela? Kahurura.

⁹ Tu nongamburiro kutja, okurihonga aruhe pu nomuhongwa maku tjiti kutja ma raise ondangi ku imbi avihe Jehova na Jesus mbi va tjita nu ma vange okurihonga ovingi. (Mat. 5:3, 6) Kutja omuhongwa ma mune ouwa momerihongero we, eye ma hepa okuyandja ombango nomasa ku imbi mbi me rihongo. Nu kutja u mu vatere okutjita nao, mu kahururira ounanḓengu  wokurirongerisa komahongero aehe ngu mamu kara nayo, mokulesa orupa nokutara kutja ma ṱakamisa vi imbi mbi ma lese mehupo re. Omomuano uṋe mu mo mu vatere okutjita nao? Mu raisira omuano wokurirongerisa komakonḓononeno wOmbeibela ama mu ungura pamwe. * Kahurura kutja omomuano uṋe mu ma munu omaziriro komapuriro, nokutwako oviraisiro komambo omaṱiṱi omananḓengu ngu maye mu vatere okuzemburuka eziriro. Nu okuzambo mu ningira kutja ma zire momambo we omuini. Indu tja tjiti nao, ove mo yenene okumuna kutja omuhongwa woye ehongwa ndwo we ri zuu nawa poo indee. Pe notjiṋa tjarwe wina tji mo yenene okutunduuza omuhongwa woye okutjita.

10. Ongwaye tje ri ounahepero okulesa Ombeibela eyuva arihe, nu omuhongwa wOmbeibela ma hepa okutjita ye kutja omalesero we wOmbeibela ye mu vatere?

¹⁰ Onawa omuhongwa wOmbeibela okuungura oviṋa tjiva ku ye omuini eyuva arihe mbi mavi mu yetere ouwa, nandarire kutja u rihonga Ombeibela otjivike atjihe. Eye ma hepa okuhungira kuna Jehova. Omomuano uṋe? Mokupuratena nokukumba ku ye. Eye ma yenene okupuratena ku Mukuru mokulesa Ombeibela eyuva arihe. (Jos. 1:8; Eps. 1:1-3) Mu raisira kutja ma yenene vi okuungurisa “Ongongorasaneno yomalesero wOmbeibela” ndji ma yenene okunana ko-jw.org. * Kutja u vatere omuhongwa woye wOmbeibela ma mune ouwa momalesero we wOmbeibela, mu tunduuza kutja me ripurire ko oukoto ku imbi Ombeibela mbi i honga ohunga na Jehova nokutja ma ṱakamisa vi imbi mbi me rihongo mehupo re.—Oviung. 17:11; Jak. 1:25.

11. Omomuano uṋe omuhongwa mu ma yenene okurihonga okukumba nawa, nu ongwaye tje ri otjiṋa otjinanḓengu ku ye okukumba ku Jehova aruhe?

¹¹ Tunduuza omuhongwa woye okukumba eyuva arihe ku Jehova. Kumba okuza komutima indu tji ma mu utu nokumana omakonḓononeno weṋu wOmbeibela, nu tamuna omuhongwa woye mozongumbiro nḓo. Indu tji ma puratene kozongumbiro zoye, eye me rihongo okukumba okuza komutima nokutja ma sokukumba ku Jehova Mukuru okupitira mena ra Jesus Kristus. (Mat. 6:9; Joh. 15:16) Ripura nomuano okulesa Ombeibela eyuva arihe (okupuratena ku Jehova) nokukumba (okuhungira kuna Jehova) mu maku vatere omuhongwa woye okutumbuka popezu na  Mukuru. (Jak. 4:8) Indu tja tjiti nao eyuva arihe, maku mu vatere kutja me riyandje ku Mukuru nokupapitisiwa. Posi yokutja otjikwaye tjarwe tji matji yenene okumuvatera?

12. Omuhonge wOmbeibela ma yenene vi okuvatera omuhongwa we okukara noupanga ouwa kuna Jehova?

¹² Oviṋa omuhongwa mbi me rihongo kavi sokuṱuna komuano mbwe ripura uriri nungwari wina vi sokuṱuna komutima we. Omena raye? Mena rokutja matu vanga omuhongwa wetu okurihonga ohunga na Jehova. Posi yokutja mbi me rihongo mavi sokuṱuna komutima we kokutja ma vange okuviṱakamisa. Jesus aa hongo ovandu oviṋa ovingi nu ovandu aave vanga okurihongera ku ye. Posi yokutja owo wina aave mu kongorere mena rokutja oviṋa mbyaa hongo aavi ve ṱunu komitima. (Luk. 24:15, 27, 32) Omuhongwa woye ma sokumuna Jehova otjOmundu eye ngu ma yenene okutumbuka popezu naye, nokumuna kutja Jehova ma yenene okurira Ihe, Mukuru we nu wina Epanga re. (Eps. 25:4, 5) Indu tji mamu rihongo, raera omuhongwa woye ohunga novikaṋena oviwa vya Mukuru. (Eks. 34:5, 6; 1 Petr. 5:6, 7) Kainatja kutja mamu hungirire kepu riṋe, yandja ombango kovikaṋena vya Jehova otjOmundu. Vatera omuhongwa woye okumuna ovikaṋena oviwa vya Jehova tjimuna orusuvero, ouwa notjari. “Etwako enanḓengu netenga” Jesus nda hungira, ‘okusuvera Muhona Ndjambi woye.’ (Mat. 22:37, 38) Kondja okuvatera omuhongwa woye okusuvera Jehova.

13. Omomuano uṋe mu mo yenene okuvatera omuhongwa woye okurihonga ohunga novikaṋena vya Jehova oviwa? Yandja otjihorera.

¹³ Tji mo hungire ku nomuhongwa woye mu raera kutja ongwaye tji wa suvera Jehova. Otjiṋa ho mape ya atji vatere omuhongwa okumuna kutja ma hepa okukara noupanga ouwa kuna Mukuru. (Eps. 73:28) Otjotjihorera, hapo pe notjiṋa tji tji ku ṱuna mokambo ku u rihonga pu nomuhongwa woye poo etjangwa ndi mari hungire otjiṋa ohunga na Jehova, tjimuna orusuvero, ounongo we, ousemba poo omasa we? Tjita kutja omuhongwa ma tjiwe kutja ingo oomapu tjiva nge tjita kutja u suvere Tate wetu womeyuru. Pe notjiṋa tjarwe omuhongwa auhe tji ma hepa okutjita kutja ma papitisiwe.

14. Ovaheberi 10:24, 25 mari tu raere tjike ohunga nozombongarero zombongo mbi mavi vatere omuhongwa wOmbeibela okukura mongamburiro?

¹⁴ Atuhe tu vanga kutja ovahongwa vetu ve papitisiwe. Omuano umwe omunanḓengu mu matu yenene okuvevatera omokuvetunduuza okuyenda kozombongarero zombongo. Ovandu mba honga ovandu Ombeibela oure woruveze orure ve tja, indu omuhongwa wOmbeibela  tja hakahanenepo okuyenda kozombongarero zombongo eye u hakahana okutjita omarundurukiro tjimanga. (Eps. 111:1) Ovahonge tjiva vOmbeibela ve raera ovahongwa vawo kutja tji va i kozombongarero zombongo mave ke rihonga ovingi kombanda ya imbi mbi ve rihonga pomakonḓononeno wawo. Lesa Ovaheberi 10:24, 25 pu nomuhongwa woye, nu mu kahururira kutja ounanḓengu waye wokuyenda kozombongarero zombongo. Mu raisira okavidio nga, PEtuwo rOmerikotameneno pe tjitwa tjike? * Vatera omuhongwa woye okutjita kutja okukara pozombongarero zombongo otjivike atjihe ku rire orupa orunanḓengu rwehupo re.

15. Ovikwaye mbi matu yenene okutjita kutja tu tunduuze omuhongwa okukara pozombongarero zombongo aruhe?

¹⁵ Hapo ove mo yenene okutjitavi ndovazu omuhongwa woye ka i kozombongarero zombongo aruhe poo keya rora okuyenda ku zo? Nonḓero, mu raera ohunga notjiṋa tji we rihongere pombongarero yombongo oupe nai. Indu omuhongwa tji ma munu omuano ozombongarero zombongo mu ze ku ṱuna eye mape ya a vanga okuya. Mupa okambo kOruhungu poo okambapira kEhupo retu rOukriste notjiungura tjetu tjokuzuvarisa ku ma ke ungurisiwa otjivike ho. Mu raisira kutja mamu ka hungirira ku ye kombongarero ndji mai yende, nu u mu pure kutja orupa ruṋe ndu maru mu nana ombango. Oviṋa omuhongwa woye mbi ma kazuva nokumuna pombongarero yombongo ye ondenga mavi panguka tjinene ku imbi mbya zuva mozokereka zarwe. (1 Kor. 14:24, 25) Eye ma kahakaena kuna varwe wovihorera oviwa mbi me rihongere ko nu mbu mave mu vatere kutja ma vaze pondondo yokupapitisiwa.

16. Ovikwaye mbi matu sokutjita kutja tu vatere omuhongwa wOmbeibela okupapitisiwa, nu morupa ndu maru kongorere ko matu ke rihonga tjike?

¹⁶ Omomuano uṋe mu matu yenene okuhonga ovandu Ombeibela kutja ve vaze pondondo yokupapitisiwa? Eṱe matu yenene okuvatera omuhongwa auhe okumuna ounanḓengu wokurihonga Ombeibela indu tji matu ve tunduuza okurihonga otjivike atjihe nokurirongerisa komurungu woruveze. Eṱe wina matu vanga okumutunduuza okukumba ku Jehova eyuva arihe nokukara noupanga kuna Ye. Nu matu vanga okumutunduuza okukara pozombongarero zombongo. (Lesa okaongo nga, “ Oviṋa ovahongwa mbi mave sokutjita kutja ve papitisiwe.”) Orupa ndu maru kongorere ko maru ka hungirira koviṋa vitano vyarwe ovahonge vOmbeibela mbi mave yenene okutjita okuvatera ovahongwa okupapitisiwa.