1. Matu tjiwa vi kutja otjiungura tjokukaisapo ovandu ovahongewa tji yama omiinyo vyovandu?

OTJIUNGURA tjokukaisapo ovandu ovahongewa otjiungura tji tji yama omiinyo vyovandu. Matu tjiwa vi? Indu Jesus tja yandja etwako ndi ri mu Mateus 28:19, 20, eye wa tja: “Otji mwa sokuyenda . . . mu kaise po ovandu ovahongewa . . . . amamu ve papitisa.” Hapo omena raye tji twasokupapitisiwa? Indu tji matu vanga okukamuna omuinyo waaruhe eṱe matu sokupapitisiwa. Omundu ngu ma vanga okupapitisiwa ma sokukara nongamburiro yokutja Jesus wa yandja omuinyo we otjombunguhiro kweṱe, kokutja tu kamune omuinyo waaruhe. Nu mena ranao omuapostele Petrus wa hungira kOvakriste ovakwao kutja, ‘Ombapitisimo nambano ondji mai mu yama . . . motjimbe tjokutja Jesus Kristus wa penduka movakoke.’ (1 Petr. 3:21) Kunao omuhongwa tja papitisiwa eye u kara nomaundjiro wokukahupa nga aruhe.

2. Otja ku 2 Timoteus 4:1, 2 matu sokurira ovahonge vOmbeibela mbe ri vi?

² Kutja tu kaise po ovandu ovahongewa, eṱe matu sokurira ovahonge ovawa vOmbeibela. (Lesa 2 Timoteus 4:1, 2.) Omena raye? Mena rokutja Jesus we tu rakiza kutja, ‘Otji mwa sokuyenda . . . mu kaise po ovandu ovahongewa vandje amamu ve . . .  hongo.’ Omuapostele Paulus wa tja: “Panḓera pokutjita oviṋa mbi, orondu tji wa tjiti nai, indino mo riyama omuini na imba mbu mave puratene kove.” Mena repu ndo, Paulus wina wa tja: ‘Tjevera omahongero woye.’ (1 Tim. 4:16) Kutja tu kaise po ovandu ovahongewa matu sokurira ovahonge ovawa vOmbeibela.

3. Morupa ndwi matu katara kuye mbi mavi tu vatere okuvatera ovahongwa vetu okuvaza pondondo yokupapitisiwa?

 ³ Eṱe tu honga Ombeibela kovandu omangete omengi mouye. Orupa ndwa zupo, rwa hungire kutja omomiano viṋe mu matu vatere ovengi okupapitisiwa. Nu morupa ndwi matu katara koviṋa vyarwe vitano omuhonge auhe wOmbeibela mbi ma sokutjita, kutja ma vatere omuhongwa we okuvaza pondondo yokupapitisiwa.

4. Ongwaye omuhonge wOmbeibela tje ha sere okuhungira oviṋa ovingi indu tji ma hongo Ombeibela? (Wina lesa omambo wokehi.)

⁴ Eṱe twa suvera imbi mbi tu honga okuza mEmbo ra Mukuru. Kunao mape ya atji tjiti kutja tu vange okuhungira ovingi ohunga nOmbeibela. Nungwari, kainatja kutja mokayendisa Omakonḓononeno wOkambo kOruhungu, poo Omakonḓononeno wOmbeibela wOmbongo poo omakonḓononeno wOmbeibela ponganda, omukayendise ka sokuhungira oviṋa ovingi. Omuhonge auhe wOmbeibela u vanga okuungurisa Ombeibela nawa indu tji ma hongo. Kunao u sokukengeza kutja aha hungire oviṋa ovingi nu aha kondjo okukahurura oviṋa avihe mbi ma tjiwa ohunga netjangwa poo orupa ndo. * (Joh. 16:12) Sasaneka ondjiviro ndji wa ri nayo indu tji wa papitisiwa kuna indji ndji u nayo nai. Indu tji wa papitisiwa ngahino ootjiwa oviṋa tjiva uriri. (Hebr. 6:1) Pa kambura oruveze kove okutjiwa mbi u tjiwa nai, kunao o kondjo okuhonga omuhongwa woye omupe oviṋa avihe meyuva rimwe.

5. (a) Otja 1 Ovatesalonika 2:13, matu vanga kutja omuhongwa wetu ma zuve ye okuza komahongero we wOmbeibela? (b) Omomuano uṋe mu matu yenena okutunduuza omuhongwa wetu okuturaera oviṋa mbi me rihongo?

⁵ Matu vanga kutja omuhongwa wetu wOmbeibela ma mune kutja oviṋa mbi me rihongo mavi zu mOmbeibela. (Lesa 1 Ovatesalonika 2:13.) Omomuano uṋe mu matu yenene okutjita nao? Tunduuza omuhongwa okuhungira ohunga noviṋa mbi me rihongo. Pendje nokukahurura omatjangwa wOmbeibela komuhongwa woye aruhe, mu ningira okukukahururira omatjangwa tjiva. Vatera omuhongwa woye okumuna kutja Embo ra Mukuru wina ma ri yenene okumuvatera mehupo re. Mu pura omapuriro ngu maye tjiti kutja ma hungire oumune we. (Luk. 10:25-28) Otjotjihorera, mu pura omapuriro nga: “Hapo etjangwa ndi re ku vatere vi okutjiwa otjikaṋena tjimwe tja Jehova?” “Oviṋa mbi mo rihongo okuza mOmbeibela mavi ku vatere vi?” “Hapo u noumune uṋe ohunga noviṋa mbi we rihongo mba?” (Omiano 20:5) Otjiṋa otjinanḓengu ka kongwi kutja omuhongwa ma tjiwa oviṋa ovingi, nungwari okongwi okusuvera nokuṱakamisa imbi mbi me rihongo.

6. Ongwaye tje ri otjiṋa otjinanḓengu okutwaerera omuzuvarise ngu nondjiviro indu tji mo ka honga omuhongwa woye?

 ⁶ Hapo ove u twaerera ovazuvarise mbe nondjiviro indu tji mo ka honga omuhongwa woye? Tji u tjita nao, mo yenene okuveningira kutja ve tarere omuano mu mo kayendisa omahongero nomuano mu mo ungurisa Ombeibela tji mo hongo. Indu tji mo vanga okurira omuhonge omuwa wOmbeibela mo sokurisusuparisa. (Sasaneka Oviungura 18:24-26.) Tji wa zu mbo, pura omuzuvarise ngu nondjiviro ngo kutja ma munu kutja omuhongwa woye ma zuu nawa mbi me rihongo poo indee. Ove wina mo yenene okuningira omuzuvarise ngo okuhonga omuhongwa woye indu tji u he ri po oure wotjivike poo ovivike vivari. Iho matji vatere kutja omuhongwa ma kare nomahongero ngu maye kayenda komurungu nu ma mune ounanḓengu womerihongero we. O munu kutja omuhongwa ngwi “owoye” nu kape nomundu warwe ngu ma sokumuhonga. Okutjita nao ku vatera omuhongwa woye kutja ma kayende komurungu okurihonga ovingi ohunga na Mukuru.

7. Ovikwaye mbi mavi vatere omuhongwa okusuvera imbi mbi me rihongo?

⁷ Omuhongwa ma hepa okumuna kutja ove wa suvera nu u nongamburiro mu imbi Ombeibela mbi i honga. (1 Tes. 1:5) Iho mape ya atji tjiti kutja ma suvere imbi mbi me rihongo. Indu tje ri ohepero, mu raera omuano omirari vyOmbeibela mu vye ku vatera mehupo roye. Nu eye otji ma utu okumuna kutja mOmbeibela mu nomirari mbi mavi yenene okumuvatera wina.

8. Ovikwaye vyarwe mbi mo yenene okutjita kutja u vatere omuhongwa woye, nu ongwaye tji wa sokutjita nao?

⁸ Ngunda a mamu rihongo, raera omuhongwa woye ohunga novihorera vyovakambure ovakweṋu mba muna omatokero tjimuna inga owe nomuano mu va tuurunga omatokero ngo. Ove mo yenene okutwaerera omukambure omukweṋu okuza mombongo ngu notjihorera tji mape ya atji vatere omuhongwa woye. Poo mo yenene okumutunduuza kutja ma tarere omahungi okuza ko-jw.org morupa ndwi “The Bible Changes Lives.” * Otupa otja itwo nouvidio mau yenene okuvatera omuhongwa woye okumuna kutja ouwa waye mbu ma munu indu tji ma ṱakamisa omirari vyOmbeibela mehupo re.

9. Matu yenene vi okutunduuza omuhongwa kutja ma raere imbi mbye rihongo keṱunḓu re nomapanga we?

⁹ Indu omuhongwa woye tja kupwa poo tja kupa, hapo ingwi ngu va kupasana u kara norupa momerihongero wOmbeibela poo indee?  Indu tje ha tjiti nao, mu ṋanga kutja ma kare norupa wina. Tunduuza omuhongwa woye okuraera oviṋa mbi me rihongo keṱunḓu re nomapanga we. (Joh. 1:40-45) Omomuano uṋe? Ove mo yenene okumupura kutja, “Ove mo kahururire vi eṱunḓu roye epu ndi?” poo “Etjangwa riṋe ndi mo ungurisa okukahururira epanga roye epu ndi?” Momuano mbwi ove mo rongerisa omuhongwa woye kutja ma rire omuhonge omuwa wOmbeibela. Nu indu tje ya pondondo yokurira omuzuvarise ngu hiya papitisiwa, eye ma yenene okuzuvarisa pu nombongo. Ove mo yenene okupura omuhongwa woye kutja ma tjiwa omundu ngu mape ya a vanga okurihonga Ombeibela. Indu tje nomundu ngu ma tjiwa, hakahana okuhakaena ku nomundu ngo nu u mu ningire okurihonga Ombeibela. Raisira omundu ngo okavidio nga, Omahongero wetu wOmbeibela ye tjitwa vi? *

10. Otja 1 Ovatesalonika 2:7, 8, omuhonge wOmbeibela ma horere vi kotjihorera tja Paulus?

¹⁰ Ovahonge vOmbeibela mave sokuraisa onḓero yatjiri movahongwa vawo. Kara noumune wokutja owo mape ya ave rire ovakambure ovakwetu mombongo. (Lesa 1 Ovatesalonika 2:7, 8.) Kaupupu kovahongwa okuisa omapanga wawo mouye nokutjita omarundurukiro ngu maye heperwa po okurikotamena ku Jehova. Eṱe matu sokuvevatera okupaha omapanga omawa mombongo. Kara pu nomuhongwa woye movitjitwa vyarwe nungwari a rire indu tji mamu rihongo Ombeibela uriri. Tji mo mu tonene ongoze, nokumutjangera okambuze poo okukemuvarura uriri, ku raisa kutja tjiri u rikendera ye.

11. Matu vanga kutja ovahongwa vetu ve mune ye mombongo, nu ongwaye?

¹¹ Pe nomuano wokuhungira mbu tja: “Omuatje u kurisiwa i yovandu avehe.” Eṱe matu yenene okutja, “Pe hepa ombongo aihe okuvatera omundu okurira omuhongewa wa Kristus.” Kunao ovahonge vOmbeibela ve vatera ovahongwa vawo okutjiwa varwe mombongo mbu mave ve vatere okutumbuka popezu na Jehova. Ovahongwa vOmbeibela tji mave kara popezu novakarere va Mukuru mave ve tunduuza tji ve ri mouzeu nu ave ve vatere okutumbuka popezu na Jehova. Matu vanga omuhongwa auhe kutja me rivare otja okaṋepo kombongo na wina otja orupa rweṱunḓu retu rovakambure. Kunao ma rire oupupu ku ye okuisa okukara pu novandu mbe hi nokumuvatera okusuvera Jehova. (Omiano 13:20) Indu ovandu mba ri omapanga we tji mave mu nyengwa, eye ma yenene okutjiwa kutja ma munu omapanga watjiri motjira tja Jehova.—Mar. 10:29, 30; 1 Petr. 4:4.

12. Ongwaye tji matu sokuhungira ohunga nomeriyandjerero nokupapitisiwa ku nomuhongwa wetu?

¹² Aruhe hungira ohunga nounanḓengu wokuriyandja ku Jehova nokupapitisiwa. Mena rokutja ondando yokuhonga Ombeibela oyokuvatera omundu kutja ma ute okukarera Jehova nokupapitisiwa. Kombunda ya indu omuhongwa tje rihongo omieze omiṱiṱi nu tjinene tja utu okuya kozombongarero zombongo, u sokumuna kutja eṱe matu vanga okumuvatera kutja ma rire umwe wOvahongonone va Jehova.

13. Omikambo viṋe omuhongwa mbi ma sokutoora kutja ma vaze pondondo yokupapitisiwa?

¹³ Pe noviṋa tjiva omuhongwa wOmbeibela mbi ma sokutjiwa tji ma vanga okupapitisiwa. Rutenga, omuhongwa u sokutjiwa nokusuvera Jehova nokukara nongamburiro mu ye. (Joh. 3:16; 17:3) Nu okuzambo otji ma yenene okukara noupanga ouwa kuna Jehova na wina ku novakambure mombongo. (Hebr. 10:24, 25; Jak. 4:8) Otja oruveze tji maru kayenda eye u isa okutjita oviṋa ovivi mbyaa tjiti. (Oviung. 3:19) Nu ongamburiro ye i mu hinga kutja ma raere varwe oviṋa mbye rihongo okuza mOmbeibela. (2 Kor. 4:13) Okuzambo e riyandja ku Jehova na papitisiwa. (1 Petr. 3:21; 4:2) Nu indo tjiri ru rira oruveze rondjoroka ku auhe. Indu omuhongwa tji ma kondjo okuyenenisa ondando ye, ove kayende komurungu okumutanga nokumutunduuza kutja ma yenenise ondando ndjo.

14. Hapo omuhonge wOmbeibela ma yenene vi okutara kutja omuhongwa we u tjita omarundurukiro kaaṋi mehupo re poo indee?

¹⁴ Eṱe matu hepa okukara nomuretima, kutja tu vatere omuhongwa wetu ma vaze pondondo yokuriyandja ku Mukuru nokupapitisiwa. Posi yokutja, wina matu sokutjiwa kutja omuhongwa wetu u nonḓero yokukarera Jehova Mukuru poo indee. Tara kutja eye u kondja okuṱakamisa omatwako wa Jesus, poo u vanga okurihonga Ombeibela uriri?

15. Ovikwaye mbi mavi raisire omuhonge wOmbeibela kutja omuhongwa we weya pondondo yokupapitisiwa?

¹⁵ Aruhe konḓonona kutja omuhongwa woye u ungura vi. Otjotjihorera, tjiwa kutja hapo eye u raera Jehova oumune we? Hapo eye u kumba ku Jehova? (Eps. 116:1, 2) Hapo eye u muna ondjoroka mokulesa Ombeibela? (Eps. 119:97) Hapo u kara pozombongarero zombongo aruhe? (Eps. 22:22) Hapo u tjita omarundurukiro ngu maye heperwa po mehupo re? (Eps. 119:112) Hapo eye  wa uta okuraera eṱunḓu re nomapanga we imbi mbye rihonga? (Eps. 9:1) Nu tjinenenene, hapo eye u vanga okurira Omuhongonone wa Jehova? (Eps. 40:8) Indu omuhongwa tje ha tjiti omarundurukiro kaaṋi mu imbi mbya hungirwa mba, nongengezero kondja okutjiwa ouzeu mbu ri po nu u hungire kuna ye momuano omuwa nomupaturuke. *

16. Oruṋe tji mo sokuisa okurihonga ku nomundu?

¹⁶ Povikando ripura omuini kutja mo kayenda komurungu okurihonga ku nomuhongwa ngo poo indee. Ripura omuini kutja: ‘Hapo omuhongwa wandje u rirongerisa komerihongero wetu? Hapo ka vanga okuya kozombongarero zombongo? Hapo ngunda u tjita oviṋa Mukuru mbya tonda? Hapo ngunda okaṋepo kozongamburiro zoposyo?’ Indu omaziriro komapuriro ngo tje ri o ii, okukayenda komurungu nomerihongero wOmbeibela ku nomundu ngo, ma rire tjimuna okuhonga omundu okuswema ngu ha vanga okuningena. Indu omuhongwa tje ha raisa ombango mu imbi mbye rihonga nu tje hi nonḓero yokutjita omarundurukiro, hapo ma rire ohepero okukayenda komurungu okurihonga puna ye?

17. Otja ku 1 Timoteus 4:16, ovikwaye ovahonge avehe vOmbeibela mbi mave sokutjita?

¹⁷ Otjiṋa otjinanḓengu kweṱe okuyenenisa otjiungura tjetu tjokuisapo ovandu ovahongewa, nokuvatera ovahongwa vetu okuvaza pondondo yokupapitisiwa. Kunao otji matu vanga okuungurisa Ombeibela tjinene momahongero wetu nokuraisa orusuvero nongamburiro mu imbi mbi matu hongo. Nu matu sokutunduuza ovahongwa vetu okukara nomapanga mombongo. Nu wina matu sokuhungirira kounahepero wokuriyandja ku Jehova nokupapitisiwa, nokutara aruhe kutja omuhongwa wetu ma tjiti omarundurukiro poo indee. (Lesa okaongo nga, “ Oviṋa omuhonge wOmbeibela mbi ma sokutjita kutja ma vatere omuhongwa we okupapitisiwa.”) Eṱe tjiri tu nondjoroka okukara norupa motjiungura otjinanḓengu hi. Matu vanga okukondja pu matu yenene okuvatera ovahongwa vetu okuvaza pondondo yokupapitisiwa.