Kutja ve ungure otjiungura tjokuzuvarisa, Ovakonḓonone vOmbeibela aave hepa okurira ozombanḓe. Owo aave sokuzuvarisa “ombuze ombwa” kovasyona, na wina okuzuvarisa ‘oruveze eye ndu ma havere ovanavita.’

Mbuti J. H. Hoskin ngwa tura moCanada, wa zuvarisa nouvanḓe nandarire kehi yomapirukiro. Mombura ndji 1921 moruteṋi, eye wa hakaena ku na omuzuvarise wongamburiro yarwe. Mbuti Hoskin wa tja: “Matu sokuhungira ehungi ewa ohunga nOmbeibela, nu nandarire kutja twa pitasana oumune moviṋa tjiva, matu yenene okuyandisa ehungi retu mohange na tu rire omapanga.” Posi yokutja kape tjitirwe nao. Mbuti Hoskin wa kayenda komurungu okutja, “Twa hungira ozominute ozonḓiṱi uriri, indu tja veta omuvero tjinene nga tje munu kutja oruiho rwomuvero maru teka.”

Omuzuvarise wa tja: “Ongwaye tji u hi nakukazuvarisa kovandu mbe he ri Ovakriste?” Mbuti Hoskin ke na pa hungira, posi yokutja indu tja kayenda okuza po, eye ee ripura kutja omuzuvarise ngo ke nakuritjinda momuano wOukriste.

Eyuva ependukirwa, indu omuzuvarise tjaa zuvarisa mokereka yawo, wa hungira oviṋa ovivi ohunga na Mbuti Hoskin. Mbuti Hoskin wa tja: “Eye wa raera ovandu kutja, movandu avehe mbe ya kotjihuro ho eye ongu ri omunavizeze nu ma sokuzepewa.” Posi yokutja, ihi katji mu tjaerere nu wa kayenda komurungu okuzuvarisa nokuhungira kovandu ovengi. Eye wa tja: “Tjiri ya ri otjiṋa otjiwa okuzuvarisa motjihuro ho. Ovandu tjiva aave tja, ‘matu tjiwa kutja u karera Mukuru.’ Nu va ningira okundjivatera noviṋa mbi me hepa.”

Okuvatera ovandu okuzuva Ombeibela nawa, Ovakonḓonone vOmbeibela aave pitisa omapuriro nomaziriro wOmbeibela mokambo ku ndino ku ke tjiukwa otja Penduka! Ka ri nomapuriro wOmbeibela ovanene ngaave yenene okuhungira ku na ovanatje vawo. Ovanene aave pura ovanatje vawo omapuriro ngo, nokuvevatera okumuna omaziriro mOmbeibela. Omapuriro tjimuna inga, “Omambo yengapi nge ri mOmbeibela?” nu “Hapo Omukriste auhe ma sokutatumisiwa?”  aaye hongo oviṋa ovipupu ohunga nOmbeibela, nu aaye vatere omitanda okurira ozombanḓe.

Wina pa ri omapuriro nomaziriro ku imba mba ri nondjiviro onyingi yOmbeibela. Omaziriro aaye vazewa membo etenga romambo nga Studies in the Scriptures. Ovalese ovengi ve rihonga oviṋa ovingi okuza komapuriro nga, posi yokutja pa tjivisiwa kutja omapuriro ngo kaye nakupitisiwa rukwao. Ongwaye tji pa tjitwa omarundurukiro ngo?

Ovarumendu mbaave hongorere po aave munu kutja ovandu mave sokurihonga Ombeibela momuano omusemba. Ku nao va pitisa embo ndi The Harp of God, nda pitisiwa mu Novemba 1921. Imba mba ri nonḓero wina va yakura omerihongero ngaave yenene okutjita ku wo oveni. Omerihongero ngo aaye vatere ovandu okurihonga ohunga nondando ya Mukuru yokuyandja omuinyo waaruhe kovandu. Hapo omerihongero ngo aaye kayendisiwa vi?

Indu omundu tja yakura embo, aa pewa okakarata okaṱiṱi ku make mu raisire oviṋa mbyaa sokulesa membo ndo. Otjivike tjarwe aa pewa okakarata karwe, ku ke nomapuriro ohunga noviṋa mbya lese. Okakarata ngo aake yanda noviṋa omundu mbi ma sokulesa otjivike tji matji kongorere ko.

Otjivike atjihe oure wovivike 12 omuhongwa aa munu okakarata okape okuza kombongo ndja ri popezu. Potuingi oukarata mbwo aau hindwa i yovakurundu mombongo poo imba mbe ha yenene okuzuvarisa okuza kondjuwo nondjuwo. Otjotjihorera Anna K. Gardner, ngwa za ko Millvale, Pennsylvania, tja U.S.A., wa tja: “Indu The Harp of God tji ra pitisiwa, ra tjita kutja erumbi randje Thayle ngwa ri nouzeu wokukayenda, ma yenene okuungura ovingi, mokuhinda oukarata mbu nomapuriro otjivike atjihe.” Indu omundu tja mana omerihongero ngo, omundu mombongo u ke mu ryangera okumuvatera okurihonga ovingi okuza mOmbeibela.

Komaandero wombura, Mbuti J. F. Rutherford wa hinda otutuu kozombongo azehe. Eye wa tja: “Omazuvarisiro wOuhona nga tjitwa ombura ndji, ya vaza nokuvatera ovandu ovengi okukapita ozombura inḓa ozarwe. Pe noviungura ovingi, tunduuze varwe okukara norupa moviungura oviwa mbi.” Ovakonḓonone vOmbeibela tjiri va tjita nao. Mombura ndji 1922 owo va zuvarisa nouvanḓe ombuze ohunga nOuhona wa Mukuru.