OKAṊEPO ko-Nazi ka ravaera kotjimbumba tjOvahongonone va Jehova moruveze rwOvita vyOuye Ovitjavari na ke tja: “Umwe pu eṋe tji ma panḓa okukarwa ku noFrance po oEngland, amuhe mamu sokuṱa.” Nandarire kutja ovarwe vovita vo-Nazi mba ri novirwise va ri popezu mbo, ovakambure avehe mbo va raisa ouṱakame ku Jehova. Owo tjiri va raisa ouvanḓe. Ihi otjihorera otjiwa tji tji raisa oumune wOvahongonone va Jehova ohunga novita. Eṱe tu panḓa okukara norupa movita vyouye mbwi. Nu tu panḓa okukara nomunda mozondjakaha zouye mbwi, nandarire kutja ovandu ve tu tirisa nonḓiro.

1. OVAKARERE AVEHE VA MUKURU VA RI OVOTJIWAṊA TJIMWE

Morukapitaveze, Jehova wa toorora otjiwaṋa tjOvaisrael okurira ovakarere ve. Eye wa isana Ovaisrael kutja “ouini [we] mokati koviwaṋa avihe.” (Eks. 19:5) Mukuru wina we ve pa ehi rorive okurira omaturiro wawo. Ku nao, indu Mukuru tja rakiza Ovaisrael okukarwa ovita ku noviwaṋa vyarwe, owo kaave rwisa poo okuzepa ovakambure ovakwao. *

Ku ndino, ovakarere va Jehova ve za “momihoko noviwaṋa avihe, na momaraka aehe.” (Omavan. 7:9) Indu ovakarere va Mukuru tji va i kovita, owo mape ya ave rwisa nu nandarire ave zepa ovakambure ovakwao.

 2. JEHOVA AA RAKIZA OVAISRAEL OKUYENDA KOVITA

Morukapitaveze, Jehova ongwa tye kutja oruṋe nu omena raye Ovaisrael tjaave sokuyenda kovita. Otjotjihorera, Mukuru wa rakiza Ovaisrael okurwisa Ovakanaan otjomuano wokuyeta omberero ye ku wo. Orondu aave tjiukirwa kokurikotamena kozondemone, kovitjitwa oviyaukise vyotukatuko nu aave punguha ovanatje vawo. Jehova wa rakiza Ovaisrael okuyandeka ovandu mbaave tjiti oviṋa ovivi mbyo mehi ekwizikwa, kutja Ovaisrael ave ha horere kovitjitwa vyawo ovivi. (Lev. 18:24, 25) Tji va za nokuhita mEhi Ekwizikwa, povikando tjiva Mukuru wa rakiza Ovaisrael okuyenda kovita kutja ve karwise ovanavita na wo. (2 Sam. 5:17-25) Posi yokutja, Jehova kena pa yandjera Ovaisrael okurityera oveni okuyenda kovita. Indu tji ve rityere oveni, potuingi aaku tjitwa oviṋa ovivi.—Num. 14:41-45; 2 Ekuruh. 35:20-24.

Ku ndino, Jehova ka yandjere ovandu okuyenda kovita. Oviwaṋa vi rwira onḓero yawo oveni nungwari kanḓero ya Mukuru. Owo ve uta ovirwa mena rokutja ve vanga okuyeka varwe ehi rawo, ve vanga ovimariva ovingi poo ve vanga okuṋiṋikiza varwe okuyakura oumune wawo. Hapo tjike ohunga na imba mbe tja ve kuramena po Mukuru okutjevera ongamburiro yawo poo okuzepa ovanavita va Mukuru? Jehova ma yama ovakarere ve vatjiri na yandeke ovanavita na ye movita mbi mavi tjitwa moruyaveze. Ovyo ovita vya Armagedon. (Omavan. 16:14, 16) Imba mbu mave ru ovita vya Mukuru mbi, mave rire oviutwa vyombepo meyuru uriri nungwari kawomba ovakarere ve kombanda yehi.—Omavan. 19:11-15.

3. OVAISRAEL KAAVE YANDEKE OVANDU MBA RAISA ONGAMBURIRO

Morukapitaveze, ovarwe vovita vOvaisrael potuingi aave raisa otjari ku imba mba raisa ongamburiro mu Mukuru nu aave zepa imba Mukuru mba tya kutja ve sokuzepewa. Ngatu tare kovihorera vivari. Nandarire kutja Jehova wa rakiza kutja Jeriko tji yandekwe, Ovaisrael va yama Rahab  neṱunḓu re mena rongamburiro ye. (Jos. 2:9-16; 6:16, 17) Kombunda, otjihuro atjihe tja Gibeon tja yamwa mena rokutja Ovagibeon va raisa ondengero ku Mukuru.—Jos. 9:3-9, 17-19.

Ku ndino, ovarwe vovita ve zepa ovandu mbe raisa ongamburiro poo nandarire imba mbe he ri ovasorondate.

4. OVAISRAEL AAVE SOKUṰAKAMISA OMATWAKO WA MUKURU OHUNGA NOVITA

Morukapitaveze, Jehova aa undjire kovarwe vovita vOvaisrael okurwa ovita otja komatwako we. Otjotjihorera, povikando tjiva Mukuru ee ve ningire okuyandja “oruveze rwokuzuvasana mohange” ku novihuro vyovanavita. (Deut. 20:10) Jehova wina aa undjire kovarwe vovita vOvaisrael okurira ovakohoke korutu na mozondanda zawo nu wina aave sokukongorera omirari vya Mukuru ohunga nongaro yomeritjindiro. (Deut. 23:9-14) Nandarire kutja ovarwe vovita voviwaṋa ongondoroka na wo aave tjere ovakazendu vovihuro mbyaave huura, Jehova wa tjaera Ovaisrael okutjita nao. Nu nandarire kaave yandjerwa okukupa omukazendu omuhuura, nga tji pa kapita omueze umwe tji va zu nokuhuura otjihuro ho.—Deut. 21:10-13.

Ku ndino, omahi omengi ya tjita onḓuvasaneno ohunga noviṋa mbi yandjerwa movita. Nandarire kutja onḓuvasaneno ndji i tjitwa kutja i tjevere imba mbe hi nokurwa ovita, potuingi omahi omengi kaye kongorere omirari mbyo.

5. MUKURU AA RWIRE OTJIWAṊA TJE MOVITA

Morukapitaveze, Jehova aa rwire Ovaisrael nu potuingi aa tjiti ovihimise kokutja owo ve taare ovita. Omomuano uṋe Jehova ma vatera Ovaisrael okurwisa otjihuro tja Jeriko? Otja Jehova pe ve raera, Ovaisrael va “tona ombimbi, norumbo rwotjihuro arire tji rwa wire pehi.” Nu ihi tja tjita kutja i rire oupupu ku wo okurwisa otjihuro ho. (Jos. 6:20) Nu hapo owo va yenena vi okutaara otjirwa ku nOvaamori? Ombeibela mai tja: “Muhona otja rokisa ozombawe zombura ozonene, . . . Ovengi va ṱa i ozombawe pu imba mba ṱa i Ovaisrael nengaruvyo.”—Jos. 10:6-11.

OVAKRISTE VATJIRI VE KONDJA OKUTJITA OHANGE KU NA VARWE

Otja tji twa munu, ongaro yetu ndino ya panguka tjinene ku indji yOvaisrael voruveze orukuru. Posi yokutja pe nomapu warwe nge tjita kutja atu ha kara norupa movita. Otjotjihorera, Mukuru wa hunganeka kutja momayuva omasenina imba mbe mu karera kamaave “rirongerere okurwa ovita rukwao.” Ku nao, owo kamaave kara norupa movita. (Jes. 2:2-4) Kristus wina wa tja ovahongewa ve kave nokurira “ovouye mbwi.” Owo kave nokukara nomunda mozondjakaha zouye mbwi.—Joh. 15:19.

Kristus wina wa tunduuza ovahongewa ve okutjita ovingi kombanda yanao. Eye we ve rakiza kutja ve ise ozongaro nḓe tjita kutja pe kare onyengo, omazenge novita. (Mat. 5:21, 22) Eye wina wa rakiza ovahongewa ve kutja ve ‘hangane’ nu ve suvere ovanavita na wo.—Mat. 5:9, 44.

Hapo matu yenene vi okutjita nao kourike wetu? Eṱe mape ya kamaatu vanga okurwa ovita ngamwa avihe. Posi ya hapo u nonyengo momutima woye ndji tjita kutja u mune kutja omundu worive mombongo omunavita na ove? Ngatu kondje nomasa okuisa mo ozongaro otja inḓo momitima vyetu.—Jak. 4:1, 11.

Eṱe katu kara norupa movita vyouye mbwi, nungwari tu kondja nomasa okutunduuza ohange norusuvero mokati ketu. (Joh. 13:34, 35) Ngatu rimanene okuhinokukara nomunda moviṋa vyouye, otja tji matu undju nonḓero eyuva indu Jehova tji ma isa po ovita avihe nga aruhe.—Eps. 46:9.