1. Okurira ‘omusyona mombepo’ ku heya tjike, nu ku na tjike nondjoroka yatjiri?

 ONDJOROKA yatjiri katjiṋa tji tji ya nokuyenda, nungwari otjiṋa omundu tje yenena okukara na tjo oure womuinyo we. Ongwaye tji matu tja nao? MOmazuvarisiro wOkondundu, Jesus wa kahurura na tja: “Ovaṋingandu imba mbe ritjiwa kutja owo ovasyona mombepo.” (Mat. 5:3) Jesus aa tjiwa kutja ovandu va ungurwa nonḓero yokuvanga okutjiwa nokurikotamena kOmuute wawo Jehova Mukuru. Okurira ‘omusyona mombepo’ ku heya nao. Mena rokutja Jehova ‘oMukuru omunauṋingandu’ poo wondjoroka, imba mbe rikotamena ku ye wina mave yenene okukara nondjoroka.—1 Tim. 1:11, EEP.

2-3. (a) Otja ku Jesus, oouṋe varwe mbu mave yenene okukara nondjoroka? (b) Matu kahungirira ku ye morupa ndwi, nu ongwaye tji matu hepa okuhungirira ko?

² Hapo matu yenene okukara nondjoroka uriri indu tji tu hi na omauzeu? Kako. Jesus wa hungira otjiṋa otjitemise momazuvarisiro we indu tja tja, ovaṋingandu “imba mbe noruhoze.” Okutja owomba mbe rimuna ondjo mena romauvi ngu va tjita, poo mbe nomauzeu omengi mehupo rawo. Jesus wa hungira otjiṋa otjingetjo ohunga na “imba mbe tatumisirwa ombango yaNdjambi” poo imba mbe ‘yambururwa’ mena rokutja ovahongewa va Jesus. (Mat. 5:4, 10, 11) Nu hapo matu yenene vi okukara nondjoroka yatjiri ngunda atu ri mozongaro otja inḓo?

³ Jesus ee tu hongo kutja ondjoroka kai zu mokuhinomauzeu mehupo retu, nungwari i za mokukovisa onḓero yetu yokukarera Jehova nokutumbuka popezu na ye. (Jak. 4:8) Omomuano uṋe mu matu yenene okutjita nao? Morupa ndwi matu kahungirira komikambo vitatu mbi matu hepa okutoora kutja tu kare nondjoroka yatjiri.

4. Otjiṋa otjitenga tji matu sokutjita kutja tu kare nondjoroka yatjiri otjikeṋa? (Epsalme 1:1-3)

⁴ OMUKAMBO 1: Kutja tu kare nondjoroka yatjiri, eṱe matu sokulesa nokukonḓonona Embo ra Mukuru. Jesus wa sasaneka Embo ra Mukuru ku novikurya. Ovandu novipuka ve hepa ovikurya kutja ve hupe. Posi yokutja ovandu porwawo ombe yenena okulesa Embo ra Mukuru. Nowo ve hepa okutjita nao. Jesus opa zokuhungira omambo nga: “Omundu ka hupu momboroto porwayo, nungwari u hupisiwa i embo arihe Ndjambi ndi ma hungire.” (Mat. 4:4) Ku nao, katu sokuyandjera eyuva okukapita nokuhinokulesa Embo ra Mukuru Ombeibela. Omutjange wEpsalme wa tja: “Omuṋingandu ingwi ngu muna ondjoroka mokuṱakamisa omatwako waMuhona, nu ngu rizemburuka na wo omutenya nouṱuku.”—Lesa Epsalme 1:1-3.

5-6. (a) Matu yenene okurihonga ye okuza mOmbeibela? (b) Omomiano viṋe omalesero wOmbeibela mu maye yenene okutuvatera?

⁵ Mena rokutja Jehova we tu suvera, eye we tu raisira mOmbeibela imbi mbi matu sokutjita kutja tu kare nehupo eṋingandu. Eṱe tu rihonga ondando ndje na yo ohunga nehupo retu. Eṱe tu rihonga omuano mu matu yenene okuryama popezu na ye, na imbi mbi matu sokutjita kutja eye me tu isire ozondjo zetu. Nu tu rihonga ohunga nomaundjiro omawa eye nge tu kwizikira moruyaveze. (Jer. 29:11) Nu ouatjiri mbwi mbu tu rihonga okuza mokukonḓonona Ombeibela, u tu pa ondjoroka momuinyo.

⁶ Eṱe tu tjiwa kutja Ombeibela i nomaronga nge tu vatera eyuva arihe. Indu tji twa kongorere omaronga nga, matu yenene okumuna ouṋingandu. Nu indu tji mo rimunu okuwa momuinyo mena romauzeu mehupo, ungurisa  oruveze rwoye okulesa Embo ra Jehova nokuripurira ko oukoto. Jesus wa tja: “Ovaṋingandu komeho imba mbe zuva embo raNdjambi nave ṱakamisa ro!”—Luk. 11:28.

7. Otjikeṋa tji matji yenene okukuvatera okumuna ouwa mokulesa Embo ra Mukuru?

⁷ Otja tji mo lese Embo ra Mukuru, kara noruveze okuyorokera imbi mbi mo lese mu ro. Otjotjihorera, hapo ove wa rora okukara mongaro ndji? Ngatu tje pe nomundu ngwe ku zikire ovikurya mbi wa suvera. Posi yokutja ove mape ya ko noruveze ndwa yenene okurya, poo ove mape ya ko nokuyandja ombango mena rokutja mo ripura ohunga noviṋa vyarwe. Nu okuzambo o ri hakahana nokuhinokurora ovikurya kutja mavi tjata vi tjiri. Tji wa mana okurya, ove o munu kutja wa hakahana okurya nu ozeri kutja andakuzu ko rire hakahana kutja ovikurya vi tjate. Momuano otjingewo, eṱe mape ya povikando tjiva atu hakahana okulesa Ombeibela, natu ha kara nondjoroka poo atu ha zuu nawa ombuze yayo. Kara noruveze okuyorokera okulesa Embo ra Mukuru. Ripura kutja oviṋa mbi mo lese mavi tjitirwa porungeveze, ripurira kombosiro yomaraka, nu u ripurire oukoto ku imbi mbi wa lese. Indu tji wa tjiti nao, ove mo kara nondjoroka tjinene.

8. “Omukarere omuṱakame nomunazondunge” u yenenisa vi oviungura mbi? (Wina tara komambo wokehi.)

⁸ Jesus wa zika “omukarere omuṱakame nomunazondunge” okutupa ovikurya moruveze ndwa tuwa po, nu eṱe tu noviṋa avihe mbi matu hepa okukurisa oupanga wetu ku na Jehova. * (Mat. 24:45) Oviṋa avihe omukarere omuṱakame mbye pitisa, vya zikamena kEmbo ra Mukuru. (1 Tes. 2:13) Oviṋa mbi, vi tu vatera okutjiwa omeripura wa Jehova otja tji ya raisiwa mOmbeibela. Ku nao, eṱe opu tu zokulesa okambo kOruhungu nokambo nga Awake! notupa tu tu ri ko jw.org. Eṱe tu rirongerisira ozombongarero zombongo zomokati kotjivike na inḓa nḓe tjitwa komaandero wotjivike. Nu omueze auhe eṱe tu tarera oprograma yomueze ko-JW Broadcasting^® tji ya piti. Indu tji twa kayenda komurungu okulesa nokukonḓonona Ombeibela, eṱe matu yenene okutoora omukambo outjavari mbu mau tu vatere okukara nondjoroka yatjiri.

9. Omukambo uṋe outjavari mbu matu sokutoora kutja tu kare nondjoroka yatjiri?

⁹ OMUKAMBO 2: Kutja tu kare nondjoroka yatjiri, eṱe matu hepa okuhupa otja komirari vya Jehova. Omutjange wEpsalme wa tja: “Ovaṋingandu imba mbe nonḓuviro ku Muhona, nu mbe tjita ombango ye.” (Eps. 128:1) Okukara nondira ku Jehova poo okukara nonḓuviro ku ye, ku heya okukara nondengero ku ye tjinene nga tji tu hi na okutjita otjiṋa tji matji mu hihamisa. (Omiano 16:6) Ku nao, eṱe tu kondja pu matu yenene okukongorera omirari Jehova mbya kahurura mOmbeibela ohunga nouwa nouvi. (2 Kor. 7:1) Eṱe matu kara nondjoroka indu tji twa tjiti oviṋa Jehova mbya suvera, natu nakaura oviṋa eye mbya tonda.—Eps. 37:27; 97:10; Rom. 12:9.

10. Otja kOvaroma 12:2, eṱe tu nomerizirira yeṋe?

¹⁰ Lesa Ovaroma 12:2. Mape ya omundu a tjiwa kutja Jehova u nousemba okutya kutja otjiṋa otjiwa ootjiṋe nu otjivi ootjiṋe. Posi yokutja eye wina ma sokuyakura omirari vya Mukuru. Otjotjihorera, omundu mape ya a tjiwa kutja ohoromende i nouyara wokutwa po omaze omundu ngu ma sokuhinga. Posi yokutja eye mape ya a ha kara nonḓero okuyakura omirari mbyo. Nu eye mape ya a hingi omaze omengi. Eṱe matu yenene okuraisa mongaro yetu kutja tu kambura kutja okukongorera omirari vya Jehova, ombu ri omuano omusemba wokuhupa. (Omiano 12:28) David wa ri noumune  otjingewo. Eye opa zokutja nai ohunga na Jehova: “Ove mo ndji raisire ondjira yomuinyo; pOve mbi muna po enyando enene, nu u ndji pa onyuṋe nga aruhe.”—Eps. 16:11.

11-12. (a) Indu tji twa u momuinyo poo tji matu rikende, matu sokukengeza kutja atu ha tjiti tjike? (b) Ovafilipi 4:8 mari tu vatere vi indu tji matu sokutoorora omanyando?

¹¹ Indu tji twa u momuinyo, mape ya atu munu kutja ohepero okutjita otjiṋa tji matji tu vatere, kokutja tu ise okurikendera ohunga nomauzeu wetu. Ihi otjiṋa otjizuvakwa, posi ya tu sokukengeza kutja atu ha tjiti otjiṋa Jehova tja tonda.—Ef. 5:10-12, 15-17.

¹² Morutuu rwe kOvafilipi, omuapostele Paulus wa tunduuza Ovakriste kutja ngave kayende komurungu okuyandja ombango ‘kousemba noukohoke nouwa nondangu ombwa.’ (Lesa Ovafilipi 4:8.) Nandarire kutja Paulus kaa hungirire komanyando, oviṋa mbya tjanga mavi sokuṱuna komanyando ngu matu toorora. Rora okutjita nai: Tji wa munu poṋa apehe mezeva ndi pu pa tjangwa omambo nga “oviṋa” poo “noviṋa,” ye pingenisa nomambo nga “omaimburiro,” “ozomuvi,” “omambo,” poo “omanyando wozovidio.” Okutjita nao maku yenene okukuvatera okumuna kutja oviṋa viṋe Mukuru mbye yakura na mbye ha yakura. Eṱe tu vanga okuhupa otja komirari vya Jehova omisemba. (Eps. 119:1-3) Okuzambo otji matu yenene okutoora omukambo mbu mau tu pe ondjoroka yatjiri nomeritjiviro omakohoke.—Oviung. 23:1.

13. Omukambo uṋe outjatatu mbu tjita kutja tu kare nondjoroka yatjiri? (Johanes 4:23, 24)

¹³ OMUKAMBO 3: Tjita kutja omerikotameneno ku Jehova ye kare poruveze orutenga mehupo roye. Mena rokutja Jehova Omuute wetu, eṱe matu sokurikotamena ku ye. (Omavan. 4:11; 14:6, 7) Otjiṋa otjinanḓengu tjinene mehupo retu, matji sokurira okurikotamena ku Jehova momuano mbwe yakura. Pu mape hee kutja matu sokurikotamena ku ye “mOmbepo na mouatjiri.” (Lesa Johanes 4:23, 24.) Tu vanga kutja ombepo ondjapuke i tu hongorere po momerikotameneno wetu, kokutja ye hitasane nouatjiri mbu ri mEmbo ra Mukuru. Omerikotameneno wetu ye sokurira otjiṋa otjitenga, nandarire kutja tu ri momahi oviungura vyetu mu vya tjaerwa. Ovakambure ovakwetu vokombanda 100 ndino, va paterwa monḓorongo mena rokutja Ovahongonone va Jehova. * Nandarire kutja pe ri nao, owo ve kondja pu mave yenene okukumba, okukonḓonona Ombeibela, nokuraera varwe ohunga na Mukuru nOuhona we. Indu ovandu tji mave tu nyekerere nokututatumisa, eṱe tu tjiwa kutja Jehova me tu vatere okukara nonḓaro orure nokutja me tu sere ondaya.—Jak. 1:12; 1 Petr. 4:14.

14. Ovikwaye mbya tjitwa komurumendu omukambure moTajikistan, nu omena raye?

¹⁴ Ovakambure ovakwetu va ri mozongaro ozonḓeu tjinene, posi ya ve nondjoroka mena rokutja va kongorera omikambo vitatu mbi twa hungirire ko. Tara ku imbi mbya tjitwa ku Jovidon Bobojonov, wozombura 19 ngwa za koTajikistan, mena rokupanḓa okuyenda kovita. Tji ya ri 4 ku Oktoba, 2019, eye we yekutoorwa kotjomasa poye na ka ṱizirwa monḓorongo oure womieze, nu aa tjindwa tjimuna omundu ngwa tjiti oviṋa ovivi. Ouhasemba mbwi wa pita mozombuze momahi tjiva. Ozombuze za tja eye wa tonwa mena rokutja aave vanga okumuṋiṋikiza okutjita oruyano rwokurira omuṱakame korupa rwovita nokuhwikika omuzaro wovita. Kombunda yanao, otjombanguriro tja tja eye wa munika ondjo, nu wa hindwa kokamba ovandu ku ve ungura oviungura  ovizeu. Kombunda wa pita kehi yeraa ropresindenda yehi ndo. Oure woruveze aruhe ndo, Jovidon wa raisa ouṱakame we nu wa ri nondjoroka. Omomuano uṋe? Mokuyakura kutja aa hepa okukurisa oupanga we ku na Jehova.

15. Jovidon ee kurisa vi oupanga we ku na Jehova indu tja ri monḓorongo?

¹⁵ Ngunda a ri monḓorongo, Jovidon wa kayenda komurungu okurihonga ohunga na Jehova, nandarire kutja kari nOmbeibela poo omambo wetu nga zikamena kOmbeibela. Hapo eye aa yenene vi okutjita nao? Ovakambure ovakwao aave mu etere ovikurya nu aave tjanga etjangwa reyuva kozondjaṱu maave twa mo ovikurya. Ku nao, eye aa yenene okulesa Ombeibela nokuripurira ko oukoto eyuva arihe. Tja za nokupita monḓorongo, eye wa yandja ondunge ndji ku imba mbe hi ya rora okukara momauzeu omanene. Neye wa tja: “Ounanḓengu tjinene okuungurisa ouyara mbu u na wo nai okukurisa ondjiviro yoye ohunga na Jehova, mokulesa Embo re nomambo wetu nga zikamena kOmbeibela.”

16. Hapo Jovidon ee ripurire ku ye?

¹⁶ Jovidon aa hupu otja komirari vya Jehova. Eye kee ripurire kozonḓuma ozombi nḓa ri na zo nu kaa tjiti oviṋa ovivi, nungwari ee ripurire ku Jehova na imbi mbye vara pondondo yokombanda. Jovidon aa tara kouwa woviutwa vya Mukuru. Omuhukomunene auhe  eye aa puratene kombosiro youzera. Nu ongurova aa tara komueze nozonyose. Eye wa tja: “Oviyandjewa mbyo okuza ku Jehova, aavi ndji pe ondjoroka nokundjiyanḓiparisa.” Indu tji tu nondangi koviṋa avihe na komahongero Jehova nge tu pa mOmbeibela, ovyo vi tu pa ondjoroka, nu ondjoroka ndji i tjita kutja tu kare nonḓaro orure.

17. Omomuano uṋe omambo nge ri mu 1 Petrus 1:6, 7 mu maye vatere omundu ngu ri mongaro tjimuna oya Jovidon?

¹⁷ Jovidon wina wa twa po omerikotameneno ku Jehova poruveze orutenga. Eye aa tjiwa ounanḓengu wokurira omuṱakame ku Mukuru watjiri. Jesus wa tja: “Rikotamena ku Muhona, Ndjambi woye, nu u karere Ye erike!” (Luk. 4:8) Ovanane vovita novasorondate aave vanga kutja Jovidon a ise okurira umwe wOvahongonone va Jehova. Nungwari eye aa kumbu nomasa eyuva arihe nongurova aihe okuningira Jehova kutja a ha yumbu ohama nokutja ma rire omuṱakame. Nandarire kutja kaa tjindwa nawa, Jovidon wa kayenda komurungu okurira omuṱakame. Mena ranao, eye u nondjoroka mena rokutja u notjiṋa tje hi na wa ri na tjo ngunda e hi ya kamburwa kotjomasa, okutonwa nokupaterwa monḓorongo. Eye nai u nongamburiro ndja zikama, mena rokutja ongamburiro ye ya rorwa.—Lesa 1 Petrus 1:6, 7.

18. Omomuano uṋe mu matu yenene okukara nondjoroka?

¹⁸ Jehova u tjiwa imbi mbi matu hepa kutja tu kare nondjoroka yatjiri. Indu tji wa kongorere omikambo vitatu mbi tjita kutja u kare nondjoroka yatjiri, ove mo yenene okukara nondjoroka nandarire kutja u ri kehi yomauzeu. Ove wina mo yenene okutja nai: “Otjiṋingandu otjiwaṋa tji tji na Ndjambi, Eye ngu ri Muhona!”—Eps. 144:15.