Ovarumendu ovakambure poBetel va ungura oukukutu oure wokombanda yombura, okutunga omurari woradio mbwi o-WBBR moStaten Island, tja New York City. Rutenga owo va konda omiti, nu okuzambo ave tungu ondjuwo onene yovaungure nondjuwo yarwe okuṱizira mo oviungurisiwa. Indu oviungura mbi tji vya yanda, ovarumendu ovakambure va kapaha oviungurisiwa mbyaave hepa kutja oradio i ute okuungura. Posi ya, owo aave hepa okuzengurura omauzeu tjiva.

Ya ri ouzeu tjinene okutwa ko oiriera yomurari woradio. Oiriera yozometa 91 aai hepa okutwirikwa pokati kovihenḓe vivari mbya ri nozometa 61. Posi ya, otjikando otjitenga tji va kondjisa okutwa ko, owo kave yenenene. Korusenina, nombatero ya Jehova ovarumendu ovakambure va toṋa. Calvin Prosser, ngwa ri norupa motjiungura hi wa tja: “Andakuzu otjikando otjitenga twa yenena okutwirika oiriera ndjo, atjai irira oupupu kweṱe okurihiva oveni.” Nungwari, ovarumendu ovakambure va yandja ohiviro ku Jehova kombatero ndje ve pa. Posi ya, owo va ri nouzeu warwe.

Omapitisiro wombuze okupitira moradio ya ri omape, nu kaari oupupu okuranda oviungurisiwa mbyaavi heperwa po. Ku nao, ovarumendu ovakambure va muna oviungurisiwa ovikuru okuza komundu ngwa turire momaturiro wawo. Owo va ungurisa ombako yongoze pendje nokukaranda yarwe. Ongurova imwe mu Februari, ovarumendu ovakambure va tya kutja mave roro kutja oviungurisiwa mbi mavi ungura. Owo aave hepa okupitisa oprograma, ku nao ovarumendu ovakambure va imbura omaimburiro wOuhona. Omurumendu omukambure wena Ernest Lowe aa serekarere ohunga noviṋa mbya tjitwa eyuva ndo. Eye wa tja  ngunda amave imbura, Omupangure Rutherford b we ve tonena ongoze. Eye ee ve zuu amave imbura moradio moBrooklyn, ape ozokilometa 25.

Mbuti Rutherford wa tja: “Iseye okuimbura, mamu rokoha. Mamu pose tjimuna oumbihi ouingi pamwe.” Ovakambure va ṱohoṋi, nu va hakahana okuzemisa oradio. Posi ya, owo aave tjiwa kutja oradio mai ungura nu aave yenene okuuta okuiungurisa.

Tji ya ri 24 ku Februari, 1924, Mbuti Rutherford wa tja omurari woradio mbwi mau ungurisiwa koviungura Ombara Kristus mbye ve pa okuungura. Eye wa tja ondando yomurari mbwi “oyokuvatera ovandu okuzuva Ombeibela nawa nounanḓengu woruveze mu tu hupa.”

Oprograma ondenga ndjo ya kayenda nawa. Omurari woradio mbwi wa ungurisiwa oure wozombura 33 okupitisa ozoprograma zovakarere va Jehova.

Mu Juli 1924, Ovakonḓonone vOmbeibela va worongana pamwe pomaworonganeno omanene moColombus, tja Ohio. Ovakonḓonone mbo okuza komahi pekepeke ve ya komaworonganeno ngo, nu va zuva omahungi mOtjiarabic, mOtjiingirisa, mOtjifransose, mOtjindoitji, mOtjigrike, mOtjihungaria, mOtjiitaliana, mOtjilithuania, mOtjipolisha, mOtjirussia, momaraka wOtjiscandinavia, na mOtjiukrainia. Ovandu aave yenene okupuratena omahungi tjiva okupitira moradio, nu ovarumendu ovakambure va ningira okorande okutjanga otupa ohunga nomaworonganeno eyuva arihe.

Tji ya ri 24 ku Juli, Oritjaine, ovakambure ovakwetu vokombanda 5 000 va pita motjiungura tjokuzuvarisa motjihuro mu mwa ri omaworonganeno omanene. Owo va yandja omambo ape 30 000, nu va uta okurihonga Ombeibela ku novandu omayovi. Okambo kOruhungu ka tja eyuva ndo “ra ri eyuva rondjoroka pomaworonganeno ngo.”

Tji ya ri 25 ku Juli, Oritjatano, mehungi re rimwe Mbuti Rutherford nouvanḓe wa lesa orutuu ndwaaru tjiukisa oviṋa ohunga novanane vozongamburiro. Eye wa tja ovanane vozopolotika, vozongamburiro novanane vozongetjefa “ve tjaera ovandu okurihonga ouatjiri ohunga nOuhona wa Mukuru, Mukuru mbu ma ungurisa okusera ovandu ondaya.” Eye wina wa tja ovarumendu mbo va ri posyo mena rokutja aave yandja  oruvara ko-League of Nations, nu aave tja Mukuru u ungurisa otjira ho okuhonaparera po ouye. Ovakonḓonone vOmbeibela aave hepa ouvanḓe okukazuvarisa ombuze ndji kovandu.

Kombunda, orupa mokambo kOruhungu rwa tja omaworonganeno omanene moColumbus ye kurisa ongamburiro yovakambure. Nu ye ve pa ouvanḓe okuzuvarisa nandarire kehi yomapirukiro. Leo Claus, ngwa ri pomaworonganeno nga, wa tja: “Kombunda yomaworonganeno nga, eṱe aatu tjaterwa okuhaṋasana ombuze ndji ku novandu momaturiro wetu.”

Mu Oktoba, Ovakonḓonone vOmbeibela va uta okuyandja oumbapira mbwaau hungire ouatjiri ohunga novanane vozongamburiro, mbi ri oviṋa Mbuti Rutherford mbya hungirira ko mehungi re. Mokahuro okaṱiṱi moOklahoma, tja USA, Frank Johnson wa mana okuyandja oumbapira nu aa sokuundja ozominute 20 okuyekutoorwa i yovakambure ovakwao. Eye kaa yenene okuundjira poruveze paa ri, orondu ovarumendu vokahuro ngo va pindikisirwe i yomazuvarisiro we nu aave mu paha. Ku nao, Mbuti Johnson we rihoreka mokereka ndja ri popezu. Ka pa ri nomundu ngwa ri mokereka, ku nao eye wa isa oumbapira mOmbeibela yomuhonge na povihavero avihe. Eye wa hakahana okupita, nu wa kahita mozokereka zarwe mbari ma katjita nao wina.

Frank wa hakahana okuyaruka koruveze kaa sokukahakaena ku novakambure ovakwao. Eye wa ṱara kongotwe yoruveze paape pakerwa opetrola, nu aa tjevere ovarumendu mbaave mu paha. Ovarumendu mbo va kapita mbo mohauto, posi ya kave mu mwine. Tjimanga tji va za nokuyenda, ovakambure ovakwao mbaave zuvarisa popezu mbo, vee ku mu toora notjihauto.

Omukambure umwe wa tja: “Otja tjaatu piti momaturiro ngo, twa kapita pozokereka ndatu. Pa ri novandu ape 50 mba kuramene momurungu wokereka aihe. Ovandu tjiva aave lese oumbapira mbwi, nu varwe aave u raisa komuhonge. Tjiri eṱe twa za po moruveze ndu ri ro, ngunda ape hi ya kara oumba. Nu matu tja ndangi ku Jehova Mukuru wetu okututjevera nokutuvatera kutja tu zuvarise ombuze nokuhinokukamburwa.”

Ovakonḓonone vOmbeibela momahi warwe wina aave zuvarisa nouvanḓe. Komanene wa France, Józef Krett wa zuvarisa kovaungure mbaave ungura momine, mba zire koPoland. Eye aa sokuyandja ehungi ndi nepu ndi, “The Resurrection of the Dead Soon.” Indu ovarumendu novakazendu ovakambure tji va yandja oumbapira womaṋangero kovandu mokarongo, omupristeri wa rakiza ouṋepo wokereka ye okuhinokuyenda. Erakiza re ndi kari ungurire momuano eye mbwa undjire ko. Ovandu vokombanda 5 000 mu mamu kamburire mo omupristeri ngo, ve ya okupuratena kehungi ndi. Mbuti Krett wa ningira omupristeri okukahurura ongamburiro ye, posi ya eye wa panḓa. Kombunda yehungi, Mbuti Krett wa yandja omambo ayehe nga ri na wo kovandu, mena rokutja owo aave vanga okutjiwa ovingi ohunga nEmbo ra Mukuru.—Amos 8:11.

Claude Brown, wa ya koAfrica kehi ndi tjiukwa kutja oGhana ndino, okukazuvarisa ombuze ombwa. Ovandu ovengi va zuva ouatjiri mena rokutja eye wa yandja omahungi omengi nomambo omengi kovandu mehi ndo. John Blankson, ngwee rihongo okukaungura mostora yomiti omipange, wa kara pu rimwe rehungi ra Mbuti Brown. Eye wa hakahana okumuna kutja wa munu ouatjiri. John wa tja: “Ami ee tjaterwa tjinene i youatjiri, nu ee raere ovandu ovengi poskole ohunga na wo.”

 John we rihonga kutja Ombeibela kai hongo ohunga na Mukuru vetatu mumwe. Ku nao eyuva rimwe, eye wa ya kokereka okukapura omupristeri ohunga nomahongero ngo. Omupristeri wa pindika na rokoha a tja: “Kaove Omukriste, oove omundu wa Satan. Pita!”

Indu tja vaza ponganda, John wa tjanga orutuu komupristeri okumuṋanga poṋa pu pa woronganene ovandu okukahurura Mukuru vetatu mumwe. Omupristeri wa raera John okuyenda komberoo yomiṱiri, nu omiṱiri ye mu pura kutja wa tjangera omupristeri orutuu poo indee.

John wa zira kutja, “Otji mba tjiti, miṱiri.”

Omiṱiri ya rakiza John okuningira ondjesiro komupristeri morutuu. John wa tjanga orutuu na tja:

“Omiṱiri yandje ye ndji rakiza okuningira ondjesiro kove morutuu. Ami me yenene okutjita nao, ndoovazu ove mo yakura kutja u honga omahongero woposyo.”

Omiṱiri ya urumine nai pura kutja, “Blankson, ooviṋa mbi mo vanga okutjanga mbi?”

“Ii miṱiri. Imbyo ooviṋa mbi me yenene okutjanga.”

“Ove mo rambwa moskole. Ove komoo yenene okukara moskole ndji indu tji mo kayenda komurungu okupirukira omupristeri ngu ri mongamburiro ohoromende ku i yandja ko oruvara.”

“Posi ya, miṱiri, . . . hapo indu tji we tu hongo nu tji pe noviṋa mbi tu hi nokuzuva nawa, tu yandjerwa okupura omapuriro poo indee?”

“Ii, eṋe mu yandjerwa.”

“Nu miṱiri, imbyo ombya kayenda po. Omupristeri wa ri ametu hongo Ombeibela nu ami e mu pura epuriro. Ndoovazu eye ke nokuyenena okuzira epuriro randje, ami hi nokumuna kounahepero okuningira ondjesiro ku ye morutuu.”

Blankson ka ramberwe moskole, nu ke na pa ningira ondjesiro morutuu.

Tji twa tara ousupi kovitjitwa vyombura ndjo, okambo kOruhungu ka tja: “Eṱe matu i kumwe nomambo wa David nga tja: ‘Ove we ndji pa omasa motjirwa.’ (Epsalme 18:39) Indji ya ri ombura oyanḓiparise tjinene, mena rokutja twa muna omuano Jehova mee tu vatera motjiungura tje. Ovakarere ve ovaṱakame va zuvarisa ombuze ombwa nondjoroka.”

Ku ṱa komaandero wombura, ovarumendu ovakambure va twa po ondando yokukara nomurari warwe woradio. Omurari woradio mbwi wa katungwa moChicago, tja USA. Omurari omupe mbwi aa u isanewa EMBO mOtjiingirisa, mena rokutja aa u sokuungurisiwa okuzuvarisa Embo ra Mukuru moradio. Otjikando hi, va ungurisa oviungurisiwa mbyaavi tjiti kutja ovandu ve zuve ombuze yOuhona, nandarire kutja ve ri kokure.

Mombura ndji 1925, Jehova wa vatera ovakambure ovakwetu okuzuva nawa ondjivisiro ombe ohunga nembo rOmavandururiro ekondwa 12. Mena rondjivisiro ombe ndji, tjiva va isa okukarera Jehova. Posi ya, ovengi va ri nondjoroka okuzuva nawa oviṋa mbya tjitwa meyuru, nomuano mu vya ṱuna kovakarere va Mukuru kombanda yehi.